ਜਾਣੋ ਕੌਣ ਹਨ ਉਹ 4 ਜੱਜ, ਜਿਨ੍ਹਾਂ ਦੀ ਇਕ ਪ੍ਰੈੱਸ ਕਾਨਫਰੰਸ ਨਾਲ ਹਿੱਲ ਗਈ ਮੋਦੀ ਸਰਕਾਰ

Updated: 12 Jan, 2018 04:07 PM

ਨਵੀਂ ਦਿੱਲੀ— ਸੁਪਰੀਮ ਕੋਰਟ ਦੇ ਚਾਰ ਜੱਜਾਂ ਵੱਲੋਂ ਕੀਤੀ ਗਈ ਪ੍ਰੈੱਸ ਕਾਨਫਰੰਸ ਨੇ ਨਾ ਸਿਰਫ ਦੇਸ਼ ਨੂੰ ਹਿਲਾ ਦਿੱਤਾ ਸਗੋਂ ਮੋਦੀ ਸਰਕਾਰ 'ਚ ਵੀ ਇਸ ਨੂੰ ਲੈ ਕੇ ਹੜਕੰਪ ਮਚ ਗਿਆ। ਜੱਜਾਂ ਦੇ ਸਾਹਮਣੇ ਆਉਣ ਦੇ ਤੁਰੰਤ ਬਾਅਦ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵੀ ਕਾਨੂੰਨ ਮੰਤਰੀ ਰਵੀਸ਼ੰਕਰ ਪ੍ਰਸਾਦ ਨੂੰ ਤਲੱਬ ਕੀਤਾ। ਆਜ਼ਾਦ ਭਾਰਤ ਦੇ ਇਤਿਹਾਸ 'ਚ ਅਜਿਹਾ ਪਹਿਲੀ ਵਾਰ ਹੋਇਆ, ਜਦੋਂ ਦੇਸ਼ ਦੀ ਸਰਵਉੱਚ ਅਦਾਲਤ ਦੇ ਸੀਨੀਅਰ ਜੱਜ ਇਸ ਤਰ੍ਹਾਂ ਮੀਡੀਆ ਦੇ ਸਾਹਮਣੇ ਆਏ ਹਨ ਅਤੇ ਕੋਰਟ ਪ੍ਰਸ਼ਾਸਨ ਦੇ ਕੰਮਕਾਰ 'ਤੇ ਦੋਸ਼ ਲਗਾਇਆ ਹੈ। ਇਨ੍ਹਾਂ ਜੱਜਾਂ ਨੇ ਅਦਾਲਤ 'ਚ ਜਾਰੀ ਭ੍ਰਿਸ਼ਟਾਚਾਰ 'ਤੇ ਆਪਣੀ ਗੱਲ ਰੱਖੀ ਅਤੇ ਦੇਸ਼ ਦੇ ਪ੍ਰਤੀ ਆਪਣੇ ਫਰਜ਼ ਲਈ ਵੀ ਆਪਣੀ ਵਫ਼ਾਦਾਰੀ ਜ਼ਾਹਰ ਕੀਤੀ।
ਜਾਣੋ ਕੌਣ ਹਨ ਇਹ 4 ਜੱਜ
ਜਸਤੀ ਚਲਾਮੇਸ਼ਵਰ
ਪ੍ਰੈੱਸ ਕਾਨਫਰੰਸ ਜਸਟਿਸ ਜਸਤੀ ਚਲਾਮੇਸ਼ਵਰ ਦੇ ਘਰ ਹੋਈ, ਬਾਕੀ ਦੇ ਤਿੰਨੋਂ ਜੱਜ ਇਨ੍ਹਾਂ ਦੇ ਹੀ ਘਰ 'ਤੇ ਇਕੱਠੇ ਹੋਏ। ਆਂਧਰਾ ਪ੍ਰਦੇਸ਼ ਦੇ ਕ੍ਰਿਸ਼ਨਾ ਜ਼ਿਲੇ 'ਚ ਜਨਮੇ ਜਸਟਿਸ ਚਲਾਮੇਸ਼ਵਰ ਕੇਰਲ ਅਤੇ ਗੁਹਾਟੀ ਹਾਈ ਕੋਰਟ ਦੇ ਚੀਫ ਜਸਟਿਸ ਰਹਿ ਚੁਕੇ ਹਨ। ਵਕਾਲਤ ਉਨ੍ਹਾਂ ਨੂੰ ਵਿਰਾਸਤ 'ਚ ਮਿਲੀ ਹੈ। 1976 'ਚ ਉਨ੍ਹਾਂ ਨੇ ਆਂਧਰਾ ਯੂਨੀਵਰਸਿਟੀ ਤੋਂ ਕਾਨੂੰਨ ਦੀ ਡਿਗਰੀ ਹਾਸਲ ਕੀਤੀ। ਅਕਤੂਬਰ 2011 'ਚ ਉਹ ਸੁਪਰੀਮ ਕੋਰਟ ਦੇ ਜੱਜ ਬਣੇ ਸਨ। ਚਲਾਮੇਸ਼ਵਰ ਅਤੇ ਰੋਹਿੰਗਟਨ ਫਲੀ ਨਰੀਮ ਦੀ 2 ਮੈਂਬਰੀ ਬੈਂਚ ਨੇ ਉਸ ਵਿਵਾਦਪੂਰਨ ਕਾਨੂੰਨ ਨੂੰ ਖਾਰਜ ਕੀਤਾ, ਜਿਸ 'ਚ ਪੁਲਸ ਕੋਲ ਕਿਸੇ ਦੇ ਖਿਲਾਫ ਇਤਰਾਜ਼ਯੋਗ ਮੇਲ ਕਰਨ ਜਾਂ ਇਲੈਕਟ੍ਰਾਨਿਕ ਮੈਸੇਜ਼ ਕਰਨ ਦੇ ਦੋਸ਼ 'ਚ ਗ੍ਰਿਫਤਾਰ ਕਰਨ ਦਾ ਅਧਿਕਾਰ ਸੀ। ਉਨ੍ਹਾਂ ਦੇ ਇਸ ਫੈਸਲੇ ਦੀ ਦੇਸ਼ ਭਰ 'ਚ ਤਾਰੀਫ ਹੋਈ ਅਤੇ ਬੋਲਣ ਦੀ ਆਜ਼ਾਦੀ ਨੂੰ ਕਾਇਮ ਰੱਖਿਆ। ਜੱਜਾਂ ਦੀ ਨਿਯੁਕਤੀ ਨੂੰ ਲੈ ਕੇ ਨੈਸ਼ਨਲ ਜੂਡੀਸ਼ੀਅਲ ਨਿਯੁਕਤੀ ਕਮਿਸ਼ਨ (ਐੱਨ.ਜੇ.ਏ.ਸੀ.) ਦਾ ਸਮਰਥਨ ਵੀ ਇਨ੍ਹਾਂ ਨੇ ਕੀਤਾ ਸੀ। ਇੰਨਾ ਹੀ ਨਹੀਂ ਉਹ ਪਹਿਲਾਂ ਤੋਂ ਚੱਲੀ ਆ ਰਹੀ ਕੋਲੇਜੀਅਮ ਵਿਵਸਥਾ ਦੀ ਆਲੋਚਨਾ ਵੀ ਕਰ ਚੁਕੇ ਹਨ।
ਜਸਟਿਸ ਰੰਜਨ ਗੋਗੋਈ
ਜਸਟਿਸ ਰੰਜਨ ਗੋਗੋਈ ਆਸਾਮ ਤੋਂ ਹਨ ਅਤੇ ਸੁਪਰੀਮ ਕੋਰਟ ਦੇ ਸੀਨੀਅਰ ਜੱਜਾਂ 'ਚ ਉਨ੍ਹਾਂ ਦੀ ਗਿਣਤੀ ਹੁੰਦੀ ਹੈ। ਉਨ੍ਹਾਂ ਦੇ ਪਿਤਾ ਕੇਸ਼ਵ ਚੰਦਰ ਗੋਗੋਈ ਆਸਾਮ ਦੇ ਮੁੱਖ ਮੰਤਰੀ ਰਹੇ ਹਨ। ਜਸਟਿਸ ਦੀਪਕ ਮਿਸ਼ਰਾ ਅਕਤੂਬਰ 2018 'ਚ ਰਿਟਾਇਰਡ ਹੋਣ ਵਾਲੇ ਹਨ ਅਤੇ ਗੋਗੋਈ ਚੀਫ ਜਸਟਿਸ ਬਣਨ ਦੀ ਲਾਈਨ 'ਚ ਹਨ। ਜੇਕਰ ਉਹ ਚੀਫ ਜਸਟਿਸ ਚੁਣੇ ਜਾਂਦੇ ਹਨ ਤਾਂ ਭਾਰਤ ਦੇ ਪੂਰਬ-ਉੱਤਰੀ ਰਾਜ ਤੋਂ ਇਸ ਸੀਨੀਅਰ ਅਹੁਦੇ 'ਤੇ ਕਾਬਿਜ਼ ਹੋਣ ਵਾਲੇ ਉਹ ਪਹਿਲੇ ਜਸਟਿਸ ਹੋਣਗੇ। ਗੋਗੋਈ ਨੇ ਗੁਹਾਟੀ ਹਾਈ ਕੋਰਟ ਤੋਂ ਕਰੀਅਰ ਦੀ ਸ਼ੁਰੂਆਤ ਕੀਤੀ ਅਤੇ ਫਰਵਰੀ 2011 'ਚ ਪੰਜਾਬ ਐਂਡ ਹਰਿਆਣਾ ਹਾਈ ਕੋਰਟ ਦੇ ਚੀਫ ਜਸਟਿਸ ਬਣੇ। ਅਪ੍ਰੈਲ 2012 'ਚ ਉਹ ਸੁਪਰੀਮ ਕੋਰਟ ਦੇ ਜੱਜ ਬਣੇ।
ਜਸਟਿਸ ਮਦਨ ਭੀਮਰਾਵ ਲੋਕੁਰ
ਜਸਟਿਸ ਮਦਨ ਭੀਮਰਾਵ ਲੋਕੁਰ ਦੀ ਸਕੂਲੀ ਸਿੱਖਿਆ ਤੋਂ ਲੈ ਕੇ ਕਾਨੂੰਨੀ ਸਿੱਖਿਆ ਤੱਕ ਦਿੱਲੀ ਤੋਂ ਹੀ ਪੂਰੀ ਹੋਈ। 1977 'ਚ ਉਨ੍ਹਾਂ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਅਤੇ ਸੁਪਰੀਮ ਕੋਰਟ ਅਤੇ ਦਿੱਲੀ ਹਾਈ ਕੋਰਟ ਤੋਂ ਵਕਾਲਤ ਕੀਤੀ। 2010 'ਚ ਉਹ ਫਰਵਰੀ ਤੋਂ ਮਈ ਤੱਕ ਦਿੱਲੀ ਹਾਈ ਕੋਰਟ ਦੇ ਕਾਰਜਵਾਹਕ ਚੀਫ ਜਸਟਿਸ ਰਹੇ। ਇਸ ਤੋਂ ਬਾਅਦ ਜੂਨ 2010 'ਚ ਉਹ ਗੁਹਾਟੀ ਹਾਈ ਕੋਰਟ 'ਚ ਚੀਫ ਜਸਟਿਸ ਅਹੁਦੇ ਚੁਣੇ ਗਏ। ਉਹ ਆਂਧਰਾ ਪ੍ਰਦੇਸ਼ ਹਾਈ ਕੋਰਟ ਦੇ ਵੀ ਚੀਫ ਜਸਟਿਸ ਰਹਿ ਚੁਕੇ ਹਨ।
ਜਸਟਿਸ ਕੁਰੀਅਨ ਜੋਸੇਫ
1979 'ਚ ਆਪਣੀ ਵਕਾਲਤ ਕਰੀਅਰ ਦੀ ਸ਼ੁਰੂਆਤ ਕਰਨ ਵਾਲੇ ਜਸਟਿਸ ਕੁਰੀਅਨ ਜੋਸੇਫ ਸਾਲ 2000 'ਚ ਕੇਰਲ ਹਾਈ ਕੋਰਟ ਦੇ ਚੀਫ ਜਸਟਿਸ ਚੁਣੇ ਗਏ। ਫਰਵਰੀ 2010 'ਚ ਉਨ੍ਹਾਂ ਨੇ ਹਿਮਾਚਲ ਪ੍ਰਦੇਸ਼ ਦੇ ਚੀਫ ਜਸਟਿਸ ਦੇ ਰੂਪ 'ਚ ਸਹੁੰ ਚੁੱਕੀ ਅਤੇ 8 ਮਾਰਚ 2013 ਨੂੰ ਉਹ ਸੁਪਰੀਮ ਕੋਰਟ 'ਚ ਜੱਜ ਬਣੇ।