ਮੁੰਬਈ—ਮੁੰਬਈ ਟ੍ਰੈਫਿਕ ਪੁਲਸ ਨੇ ਸੜਕ 'ਤੇ ਬਿਨਾਂ ਕਿਸੇ ਕਾਰਨ ਹਾਰਨ ਵਜਾਉਣ ਵਾਲਿਆਂ 'ਤੇ ਲਗਾਮ ਲਗਾਉਣ ਲਈ ਇਕ ਅਨੋਖੀ ਪਹਿਲ ਕੀਤੀ ਹੈ। ਦਰਅਸਲ ਕੁਝ ਵਾਹਨ ਚਾਲਕ ਸਿਗਨਲ ਰੈੱਡ ਹੋਣ ਦੇ ਬਾਵਜੂਦ ਵੀ ਹਾਰਨ ਵਜਾਉਂਦੇ ਰਹਿੰਦੇ ਹਨ, ਜਿਨ੍ਹਾਂ ਲਈ ਇਹ ਕਦਮ ਚੁੱਕਿਆ ਗਿਆ ਹੈ। ਦੇਸ਼ ਦੀ ਆਰਥਿਕ ਰਾਜਧਾਨੀ 'ਚ ਵੱਧਦੇ ਧੁਨੀ ਪ੍ਰਦੂਸ਼ਣ 'ਤੇ ਲਗਾਮ ਲਗਾਉਣ ਲਈ ਉਨ੍ਹਾਂ ਟ੍ਰੈਫਿਕ ਸਿਗਨਲ 'ਤੇ ਡੈਸੀਬਲ ਮੀਟਰ ਲਗਾਏ ਹਨ, ਜਿਥੇ ਜਿਆਦਾ ਟ੍ਰੈਫਿਕ ਰਹਿੰਦਾ ਹੈ। ਪੁਲਸ ਨੇ ਇਸ ਕੈਂਪੇਨ ਨੂੰ 'ਪਨੀਸ਼ਿੰਗ ਸਿਗਨਲ' ਨਾਂ ਦਿੱਤਾ ਗਿਆ ਹੈ। ਜੁਆਇੰਟ ਪੁਲਸ ਕਮਿਸ਼ਨਰ (ਟ੍ਰੈਫਿਕ) ਮਧੁਕਰ ਪਾਂਡੇ ਨੇ ਦੱਸਿਆ ਕਿ ਡੈਸੀਬਲ ਮਾਨਿਟਰ ਟ੍ਰੈਫਿਕ ਸਿਗਨਲ ਨਾਲ ਜੁੜੇ ਹੋਏ ਹਨ। ਜਿਆਦਾ ਹਾਰਨ ਵਜਾਉਣ ਨਾਲ ਜਿਵੇਂ ਹੀ ਡੈਸੀਬਲ ਲੈਵਲ 85 ਦੇ ਖਤਰਨਾਕ ਪੱਧਰ 'ਤੇ ਪਹੁੰਚੇਗਾ, ਸਿਗਨਲ ਦਾ ਟਾਈਮ ਮੁੜ ਰੀਸੈੱਟ ਹੋ ਜਾਵੇਗਾ, ਜਿਸ ਨਾਲ ਵਾਹਨ ਚਾਲਕਾਂ ਨੂੰ ਸਿਗਨਲ 'ਤੇ ਦੁੱਗਣਾ ਇੰਤਜ਼ਾਰ ਕਰਨਾ ਪਵੇਗਾ।
ਦੱਸ ਦੇਈਏ ਕਿ ਦੁਨੀਆ ਦੇ ਸਭ ਤੋਂ ਜ਼ਿਆਦਾ ਧੁਨੀ ਪ੍ਰਦੂਸ਼ਣ ਵਾਲੇ ਸ਼ਹਿਰਾਂ 'ਚ ਮੁੰਬਈ ਦਾ ਨਾਂ ਵੀ ਸ਼ਾਮਲ ਹੈ। ਮੁੰਬਈ 'ਚ ਹੋਣ ਵਾਲੇ ਧੁਨੀ ਪ੍ਰਦੂਸ਼ਣ 'ਚ ਸਭ ਤੋਂ ਜ਼ਿਆਦਾ ਪ੍ਰਦੂਸ਼ਣ ਟ੍ਰੈਫਿਕ ਸਿਗਨਲ ਦੇ ਚੱਲਦਿਆਂ ਹੀ ਹੁੰਦਾ ਹੈ। ਕੁਝ ਲੋਕ ਤਾਂ ਸਿਗਨਲ ਰੈੱਡ ਹੋਣ ਦੇ ਬਾਵਜੂਦ ਵੀ ਹਾਰਨ ਵਜਾਉਂਦੇ ਰਹਿੰਦੇ ਹਨ। ਮਧੁਕਰ ਪਾਂਡੇ ਨੇ ਦੱਸਿਆ ਹੈ ਕਿ ਐੱਫ.ਸੀ.ਬੀ ਇੰਟਰਫੇਸ ਦੇ ਨਾਲ ਮਿਲ ਕੇ ਅਸੀਂ ਇਹ ਪਹਿਲ ਕੀਤੀ ਹੈ, ਜਿਸ ਤੋਂ ਬਿਨਾਂ ਕਾਰਨ ਹਾਰਨ ਵਜਾਉਣ ਦੀ ਸਮੱਸਿਆ 'ਤੇ ਕੁਝ ਕਾਬੂ ਪਾਇਆ ਜਾ ਸਕੇ।
ਡੈਸੀਬਲ ਮੀਟਰ ਨੂੰ ਮੁੰਬਈ ਦੇ ਪ੍ਰਮੁਖ ਜੰਕਸ਼ਨ ਜਿਵੇਂ ਛਤਰਪਤੀ ਸ਼ਿਵਾਜੀ ਮਹਾਰਾਜ ਟਰਮੀਨਸ, ਮਰੀਨ ਡ੍ਰਾਈਵ, ਪੇਡਰ ਰੋਜ, ਹਿੰਦਮਾਤਾ ਸਿਨੇਮਾ ਦਾਦਰ ਅਤੇ ਬੈਂਡ੍ਰਾ 'ਤੇ ਲਗਾਇਆ ਗਿਆ ਹੈ। ਮੁੰਬਈ ਪੁਲਸ ਨੇ ਇਸ ਪਹਿਲ ਨੂੰ ਲੈ ਕੇ ਇਕ ਵੀਡੀਓ ਵੀ ਸ਼ੇਅਰ ਕੀਤਾ ਹੈ। ਹੁਣ ਇਹ ਵੀਡੀਓ ਵਾਇਰਲ ਹੋ ਰਿਹਾ ਹੈ। ਵੀਡੀਓ ਦੀ ਸ਼ੁਰੂਆਤ 'ਚ ਦੱਸਿਆ ਗਿਆ ਹੈ, ''ਦੁਨੀਆ ਦੀ ਹਾਨਕਿੰਗ ਕੈਪੀਟਲ 'ਚ ਤੁਹਾਡਾ ਸਵਾਗਤ ਹੈ।ਇਥੇ ਲੋਕ ਉਦੋਂ ਵੀ ਹਾਰਨ ਵਜਾਉਂਦੇ ਹਨ, ਜਦੋਂ ਸਿਗਨਲ ਰੈੱਡ ਰਹਿੰਦਾ ਹੈ। ਉਨ੍ਹਾਂ ਨੂੰ ਲਗਦਾ ਹੈ ਕਿ ਹਾਰਨ ਵਜਾਉਣ ਨਾਲ ਸਿਗਨਲ ਗ੍ਰੀਨ ਹੋ ਜਾਵੇਗਾ।''
ਜੁਆਇੰਟ ਪੁਲਸ ਕਮਿਸ਼ਨਰ ਪਾਂਡੇ ਨੇ ਦੱਸਿਆ ਕਿ ਵਾਹਨ ਚਾਲਕਾਂ ਵਲੋਂ ਬਿਨਾਂ ਕਿਸੇ ਕਾਰਨ ਹਾਰਨ ਵਜਾਉਣ ਨਾਲ ਨਾ ਸਿਰਫ ਕੰਨਾਂ ਨੂੰ ਨੁਕਸਾਨ ਪਹੁੰਚਦਾ ਹੈ ਸਗੋਂ ਦਿਲ ਦੀ ਰਫਤਾਰ ਵੀ ਇਸ ਨਾਲ ਵੱਧ ਜਾਂਦੀ ਹੈ। ਟ੍ਰੈਫਿਕ ਪੁਲਸ ਦਾ ਕਹਿਣਾ ਹੈ ਕਿ ਇਸ ਪਹਿਲ ਨਾਲ ਲੋਕਾਂ ਨੂੰ ਰਾਹਤ ਜ਼ਰੂਰ ਮਿਲੇਗੀ।
ਦਿੱਲੀ : ਸ਼ਾਹੀਨ ਬਾਗ 'ਚ ਚੱਲੀ ਗੋਲੀ, ਹਿਰਾਸਤ 'ਚ ਸ਼ਖਸ
NEXT STORY 
