ਜਲੰਧਰ (ਚੋਪੜਾ)–ਜ਼ਿਲ੍ਹਾ ਕਾਂਗਰਸ ਭਵਨ 'ਚ ਇਕ ਕਮਰੇ ਨੂੰ ਲੈ ਕੇ ਛਿੜੀ ਸਿਆਸੀ ਜੰਗ ਰੁਕਣ ਦਾ ਨਾਂ ਨਹੀਂ ਲੈ ਰਹੀ। ਪਾਰਟੀ ਵਰਕਰਾਂ ਅਤੇ ਆਗੂਆਂ ਵਿਚਾਲੇ ਇਹ ਵਿਵਾਦ ਹੁਣ ਸਿਰਫ਼ ਇਕ ਦਫ਼ਤਰ ਤੱਕ ਸੀਮਤ ਨਹੀਂ ਰਿਹਾ, ਸਗੋਂ ਕਾਂਗਰਸ ਸੰਗਠਨ ’ਚ ਡੂੰਘੀ ਹੋ ਰਹੀ ਗੁੱਟਬਾਜ਼ੀ ਅਤੇ ਸੀਨੀਅਰ ਲੀਡਰਸ਼ਿਪ ਦੀ ਨਾਕਾਮੀ ਦੀ ਖੁੱਲ੍ਹੀ ਤਸਵੀਰ ਬਣ ਕੇ ਸਾਹਮਣੇ ਆ ਰਿਹਾ ਹੈ। ਜਿਸ ਕਮਰੇ ਨੂੰ ਲੈ ਕੇ ਪਿਛਲੇ ਕਈ ਦਿਨਾਂ ਤੋਂ ਖਿੱਚੋਤਾਣ ਚੱਲ ਰਹੀ ਹੈ, ਉੱਥੇ ਹੁਣ ਨੇਮ ਪਲੇਟਾਂ ਉਤਰਨ-ਚੜ੍ਹਨ ਦਾ ਅਜਿਹਾ ਸਿਲਸਿਲਾ ਸ਼ੁਰੂ ਹੋ ਗਿਆ ਹੈ ਕਿ ਮੰਨੋ ਕਾਂਗਰਸ ਭਵਨ ਨਹੀਂ, ਸਗੋਂ ਕਿਸੇ ਪ੍ਰਾਈਵੇਟ ਜਾਇਦਾਦ ’ਤੇ ਕਬਜ਼ੇ ਦੀ ਲੜਾਈ ਚੱਲ ਰਹੀ ਹੋਵੇ।
ਇਹ ਵੀ ਪੜ੍ਹੋ: ਪੰਜਾਬ 'ਚ 48 ਘੰਟੇ ਅਹਿਮ! 5 ਦਿਨ ਲਗਾਤਾਰ ਮੀਂਹ, ਵਿਭਾਗ ਵੱਲੋਂ 14 ਜ਼ਿਲ੍ਹਿਆਂ 'ਚ ਹਨ੍ਹੇਰੀ-ਤੂਫ਼ਾਨ ਦਾ Alert
ਵਿਵਾਦ ਉਸ ਸਮੇਂ ਹੋਰ ਡੂੰਘਾ ਹੋ ਗਿਆ ਸੀ ਜਦੋਂ ਪੰਜਾਬ ਯੂਥ ਕਾਂਗਰਸ ਦੇ ਜਨਰਲ ਸਕੱਤਰ ਦੀਪਕ ਖੋਸਲਾ ਅਤੇ ਜ਼ਿਲਾ ਯੂਥ ਕਾਂਗਰਸ ਦਿਹਾਤੀ ਦੇ ਪ੍ਰਧਾਨ ਮਨਪ੍ਰੀਤ ਚੱਢਾ ਗੁੱਟ ਨੇ ਵਿਵਾਦਿਤ ਕਮਰੇ ਦੇ ਬਾਹਰ ਲੱਗੀ ਅਸ਼ਵਨ ਭੱਲਾ ਅਤੇ ਹਨੀ ਜੋਸ਼ੀ ਦੀ ਨੇਮ ਪਲੇਟ ਹਟਾ ਕੇ ਉੱਥੇ ਜ਼ਿਲ੍ਹਾ ਕਾਂਗਰਸ ਦਿਹਾਤੀ ਦੇ ਪ੍ਰਧਾਨ ਅਤੇ ਮਹਿਲਾ ਕਾਂਗਰਸ ਪ੍ਰਧਾਨ ਦੀ ਨੇਮ ਪਲੇਟ ਲਗਾ ਦਿੱਤੀ ਸੀ। ਇਸ ਦੇ ਨਾਲ ਹੀ ਨੇੜਲੇ ਹਾਲ ’ਤੇ ਆਪਣੀ ਨੇਮ ਪਲੇਟ ਲਗਾ ਕੇ ਉਸ ਨੂੰ ਯੂਥ ਕਾਂਗਰਸ ਦਫ਼ਤਰ ਐਲਾਨ ਦਿੱਤਾ ਸੀ।
ਪਰ ਮੰਗਲਵਾਰ ਨੂੰ ਭੱਲਾ-ਜੋਸ਼ੀ ਗੁੱਟ ਨੇ ਪਲਟਵਾਰ ਕਰਦਿਆਂ ਫਿਰ ਤੋਂ ਪੂਰਾ ਘਟਨਾਕ੍ਰਮ ਬਦਲ ਦਿੱਤਾ। ਪਹਿਲਾਂ ਜ਼ਿਲਾ ਕਾਂਗਰਸ ਦਿਹਾਤੀ ਪ੍ਰਧਾਨ ਅਤੇ ਮਹਿਲਾ ਕਾਂਗਰਸ ਪ੍ਰਧਾਨ ਦੀ ਨੇਮ ਪਲੇਟ ਹਟਾਈ ਗਈ ਅਤੇ ਉਸ ਨੂੰ ਯੂਥ ਕਾਂਗਰਸ ਦਫ਼ਤਰ ਦੇ ਦਰਵਾਜ਼ੇ ਦੇ ਉੱਪਰ ਲਗਾ ਦਿੱਤਾ ਗਿਆ। ਇਸ ਤੋਂ ਬਾਅਦ ਵਿਵਾਦਿਤ ਕਮਰੇ ਦੇ ਬਾਹਰ ਨੇਮ ਪਲੇਟ ਲਗਾਉਣ ਦੀ ਬਜਾਏ ਅਸ਼ਵਨ ਭੱਲਾ ਅਤੇ ਹਨੀ ਜੋਸ਼ੀ ਦੇ ਨਾਂ ਸਿੱਧੇ ਕੰਧ ’ਤੇ ਪੇਂਟ ਨਾਲ ਲਿਖਵਾ ਦਿੱਤੇ ਗਏ, ਤਾਂ ਜੋ ਭਵਿੱਖ ’ਚ ਕੋਈ ਉਨ੍ਹਾਂ ਨੂੰ ਆਸਾਨੀ ਨਾਲ ਉਖਾੜ ਨਾ ਸਕੇ। ਨਾਲ ਹੀ ਕਮਰੇ ਦੇ ਬਾਹਰ ਜ਼ਿਲਾ ਕਾਂਗਰਸ ਦਿਹਾਤੀ ਪ੍ਰਧਾਨ ਦਾ ਵੀ ਜ਼ਿਕਰ ਕਰਕੇ ਨਵਾਂ ਸੰਦੇਸ਼ ਦੇਣ ਦੀ ਕੋਸ਼ਿਸ਼ ਕੀਤੀ ਗਈ।
ਇਹ ਵੀ ਪੜ੍ਹੋ: 100 ਰੁਪਏ ਨੇ ਖੋਲ੍ਹ ਤਾਂ ਪੰਜਾਬ ਪੁਲਸ ਦੇ ਮੁਲਾਜ਼ਮ ਦਾ ਵੱਡਾ ਰਾਜ਼! ਹੈਰਾਨੀਜਨਕ ਕਾਰੇ ਦੀ ਵੀਡੀਓ ਵਾਇਰਲ
ਕਾਂਗਰਸ ਦੇ ਕਈ ਟਕਸਾਲੀ ਅਤੇ ਸੀਨੀਅਰ ਆਗੂਆਂ ਦਾ ਕਹਿਣਾ ਹੈ ਕਿ ਜ਼ਿਲ੍ਹਾ ਕਾਂਗਰਸ ਭਵਨ ਕਿਸੇ ਇਕ ਆਗੂ ਦੀ ਨਿੱਜੀ ਜਾਗੀਰ ਨਹੀਂ ਹੈ। ਨਾਂ ਨਾ ਛਾਪਣ ਦੀ ਸ਼ਰਤ ’ਤੇ ਕਈ ਸੀਨੀਅਰ ਕਾਂਗਰਸੀਆਂ ਨੇ ਕਿਹਾ ਕਿ ਜਿਸ ਤਰ੍ਹਾਂ ਕਮਰੇ ’ਤੇ ਕਬਜ਼ਾ ਵਿਖਾਉਣ ਦੀ ਹੋੜ ਲੱਗੀ ਹੋਈ ਹੈ, ਉਸ ਨਾਲ ਪਾਰਟੀ ਦੇ ਅਕਸ ਨੂੰ ਗੰਭੀਰ ਨੁਕਸਾਨ ਪਹੁੰਚ ਰਿਹਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜੇਕਰ ਇਹੀ ਊਰਜਾ ਸੰਗਠਨ ਨੂੰ ਮਜ਼ਬੂਤ ਕਰਨ ’ਚ ਲਗਾਈ ਜਾਂਦੀ ਤਾਂ ਕਾਂਗਰਸ ਦੀ ਸਥਿਤੀ ਬਹੁਤ ਬਿਹਤਰ ਹੁੰਦੀ। ਸਭ ਤੋਂ ਵੱਡਾ ਸਵਾਲ ਜ਼ਿਲ੍ਹੇ ਨਾਲ ਸਬੰਧਤ ਸੀਨੀਅਰ ਲੀਡਰਸ਼ਿਪ ਦੀ ਭੂਮਿਕਾ ’ਤੇ ਉੱਠ ਰਿਹਾ ਹੈ। ਆਖ਼ਿਰ ਕਈ ਦਿਨਾਂ ਤੋਂ ਚੱਲ ਰਹੇ ਇਸ ਵਿਵਾਦ ਨੂੰ ਸੁਲਝਾਉਣ ਲਈ ਕੋਈ ਫੈਸਲਾਕੁੰਨ ਪਹਿਲ ਕਿਉਂ ਨਹੀਂ ਹੋਈ? ਕਿਸ ਦੇ ਹੁਕਮਾਂ ’ਤੇ ਰੋਜ਼ ਨੇਮ ਪਲੇਟਾਂ ਉਤਰ ਰਹੀਆਂ ਹਨ ਅਤੇ ਨਵੀਆਂ ਲੱਗ ਰਹੀਆਂ ਹਨ? ਜੇਕਰ ਕਾਂਗਰਸ ਭਵਨ ਪਾਰਟੀ ਦੀ ਜਾਇਦਾਦ ਹੈ ਤਾਂ ਫਿਰ ਉੱਥੇ ਮਨਮਰਜ਼ੀ ਨਾਲ ਕਬਜ਼ੇ ਅਤੇ ਪਛਾਣ ਦੀ ਸਿਆਸਤ ਕਿਉਂ ਚੱਲ ਰਹੀ ਹੈ?
ਸਿਆਸੀ ਗਲਿਆਰਿਆਂ ’ਚ ਚਰਚਾ ਹੈ ਕਿ ਆਗੂਆਂ ਦੀ ਇਹ ਚੁੱਪ ਸਾਧਾਰਨ ਨਹੀਂ, ਸਗੋਂ ਗੁੱਟਬਾਜ਼ੀ ਦੇ ਸਮੀਕਰਨਾਂ ਤੋਂ ਪ੍ਰੇਰਿਤ ਦਿਖਾਈ ਦਿੰਦੀ ਹੈ। ਜੇਕਰ ਸਮਾਂ ਰਹਿੰਦੇ ਇਸ ਵਿਵਾਦ ਦਾ ਹੱਲ ਨਾ ਕੱਢਿਆ ਗਿਆ ਤਾਂ ਇਹ ਸਿਰਫ਼ ਇਕ ਕਮਰੇ ਦਾ ਵਿਵਾਦ ਨਹੀਂ ਰਹੇਗਾ, ਸਗੋਂ ਜਥੇਬੰਦਕ ਅਨੁਸ਼ਾਸਨ ’ਤੇ ਵੱਡਾ ਸਵਾਲ ਬਣ ਜਾਵੇਗਾ। ਫਿਲਹਾਲ ਕਾਂਗਰਸ ਭਵਨ ’ਚ ਕਮਰਾ ਉਹੀ ਹੈ, ਕੰਧਾਂ ਉਹੀ ਹਨ ਪਰ ਹਰ ਦੂਜੇ ਦਿਨ ਬਦਲਦੀਆਂ ਨੇਮ ਪਲੇਟਾਂ ਇਹ ਜ਼ਰੂਰ ਦੱਸ ਰਹੀਆਂ ਹਨ ਕਿ ਪਾਰਟੀ ਦੇ ਅੰਦਰ ਅਸਲੀ ਲੜਾਈ ਵਿਚਾਰਧਾਰਾ ਦੀ ਨਹੀਂ, ਸਗੋਂ ‘ਕਮਰੇ ਅਤੇ ਕਬਜ਼ੇ’ ਦੀ ਬਣ ਚੁੱਕੀ ਹੈ। ਹੁਣ ਵੇਖਣਾ ਇਹ ਹੋਵੇਗਾ ਕਿ ਸੀਨੀਅਰ ਲੀਡਰਸ਼ਿਪ ਇਸ ਵਿਵਾਦ ’ਤੇ ਚੁੱਪ ਤੋੜਦੀ ਹੈ ਜਾਂ ਫਿਰ ਕਾਂਗਰਸ ਭਵਨ ’ਚ ਨੇਮ ਪਲੇਟ ਬਦਲਣ ਦਾ ਇਹ ਸਿਲਸਿਲਾ ਇੰਝ ਹੀ ਚੱਲਦਾ ਰਹੇਗਾ। ਕਿਉਂਕਿ ਇਹ ਤਾਂ ਤੈਅ ਮੰਨਿਆ ਜਾ ਰਿਹਾ ਹੈ ਕਿ ਜੇਕਰ ਇਹ ਵਿਵਾਦ ਕੋਈ ਨਵਾਂ ਰੂਪ ਧਾਰਨ ਕਰਦਾ ਹੈ ਤਾਂ ਜ਼ਿਲੇ ਦੇ ਸੀਨੀਅਰ ਆਗੂਆਂ ਦੀ ਜਵਾਬਦੇਹੀ ਅਤੇ ਉਨ੍ਹਾਂ ਦੀ ਭੂਮਿਕਾ ਸਵਾਲਾਂ ਦੇ ਘੇਰੇ ’ਚ ਆਉਣੀ ਵੀ ਲਾਜ਼ਮੀ ਹੋਵੇਗੀ।
ਇਹ ਵੀ ਪੜ੍ਹੋ: ਐਕਸ਼ਨ 'ਚ ਜਲੰਧਰ ਦੇ CP ਸਤਿੰਦਰ ਸਿੰਘ, ਕਈ ਥਾਣਿਆਂ ਦੇ SHO ਦੇ ਕੀਤੇ ਤਬਾਦਲੇ
ਜ਼ਿਲ੍ਹਾ ਯੂਥ ਕਾਂਗਰਸ ਦਿਹਾਤੀ ਦੇ ਕਾਂਗਰਸ ਭਵਨ ’ਚ ਲਗਾਏ ਨਵੇਂ ਹੋਰਡਿੰਗ ’ਚ ਪੰਜਾਬ ਯੂਥ ਕਾਂਗਰਸ ਪ੍ਰਧਾਨ ਦੀ ਗਾਇਬ ਫੋਟੋ ਨੇ ਛੇੜਿਆ ਨਵਾਂ ਵਿਵਾਦ
- ਜ਼ਿਲ੍ਹਾ ਪ੍ਰਧਾਨ ਚੱਢਾ ਫਿਰ ਸਵਾਲਾਂ ਦੇ ਘੇਰੇ 'ਚ, ਗੁੱਟਬਾਜ਼ੀ, ਅਨੁਸ਼ਾਸਨਹੀਣਤਾ ਜਾਂ ਮਹਿਜ਼ ਗਲਤੀ, ਸਿਆਸੀ ਗਲਿਆਰਿਆਂ ’ਚ ਚਰਚਾ ਹੋਈ ਤੇਜ਼
ਜਲੰਧਰ (ਚੋਪੜਾ)-ਜ਼ਿਲ੍ਹਾ ਕਾਂਗਰਸ ਭਵਨ 'ਚ ਯੂਥ ਕਾਂਗਰਸ ਦਿਹਾਤੀ ਵੱਲੋਂ ਲਗਾਇਆ ਗਿਆ ਨਵਾਂ ਹੋਰਡਿੰਗ ਵਿਵਾਦਾਂ 'ਚ ਆ ਗਿਆ ਹੈ। ਹਾਲ ਹੀ 'ਚ ਜ਼ਿਲ੍ਹਾ ਯੂਥ ਕਾਂਗਰਸ (ਦਿਹਾਤੀ) ਦੇ ਪ੍ਰਧਾਨ ਬਣੇ ਮਨਪ੍ਰੀਤ ਚੱਢਾ ਇਕ ਵਾਰ ਫਿਰ ਚਰਚਾ ਦੇ ਕੇਂਦਰ 'ਚ ਹਨ। ਪਹਿਲਾਂ ਯੂਥ ਕਾਂਗਰਸ ਦਫ਼ਤਰ ਨੂੰ ਲੈ ਕੇ ਨੇਮ ਪਲੇਟ ਉਤਾਰਨ-ਲਗਾਉਣ ਦੇ ਵਿਵਾਦ ਨੇ ਜਥੇਬੰਦਕ ਹਲਕਿਆਂ ’ਚ ਹਲਚਲ ਮਚਾਈ ਸੀ ਅਤੇ ਹੁਣ ਨਵੇਂ ਹੋਰਡਿੰਗ ਨੇ ਪਾਰਟੀ ਦੇ ਅੰਦਰ ਨਵੀਂ ਬਹਿਸ ਛੇੜ ਦਿੱਤੀ ਹੈ।
ਕਾਂਗਰਸ ਭਵਨ 'ਚ ਲਗਾਏ ਗਏ ਇਸ ਹੋਰਡਿੰਗ 'ਚ ਆਲ ਇੰਡੀਆ ਕਾਂਗਰਸ ਅਤੇ ਯੂਥ ਕਾਂਗਰਸ ਦੀ ਸੀਨੀਅਰ ਲੀਡਰਸ਼ਿਪ ਦੇ ਨਾਲ-ਨਾਲ ਦਿਹਾਤੀ ਖੇਤਰ ਦੇ ਵਿਧਾਇਕਾਂ ਅਤੇ ਹਲਕਾ ਇੰਚਾਰਜਾਂ ਦੀਆਂ ਤਸਵੀਰਾਂ ਸ਼ਾਮਲ ਕੀਤੀਆਂ ਗਈਆਂ ਹਨ। ਇਸ ਤੋਂ ਇਲਾਵਾ ਜ਼ਿਲ੍ਹਾ ਕਾਂਗਰਸ ਦਿਹਾਤੀ ਦੇ ਪ੍ਰਧਾਨ ਲਾਡੀ ਸ਼ੇਰੋਵਾਲੀਆ ਅਤੇ ਜ਼ਿਲ੍ਹਾ ਯੂਥ ਕਾਂਗਰਸ ਦਿਹਾਤੀ ਦੇ ਪ੍ਰਧਾਨ ਮਨਪ੍ਰੀਤ ਚੱਢਾ ਦੀਆਂ ਤਸਵੀਰਾਂ ਵੀ ਪ੍ਰਮੁੱਖਤਾ ਨਾਲ ਲਗਾਈਆਂ ਗਈਆਂ ਹਨ। ਹਾਲਾਂਕਿ ਸਭ ਤੋਂ ਵੱਧ ਚਰਚਾ ਇਸ ਗੱਲ ਨੂੰ ਲੈ ਕੇ ਹੋ ਰਹੀ ਹੈ ਕਿ ਹੋਰਡਿੰਗ 'ਤੇ ਪੰਜਾਬ ਯੂਥ ਕਾਂਗਰਸ ਦੇ ਨਵੇਂ ਚੁਣੇ ਗਏ ਸੂਬਾ ਪ੍ਰਧਾਨ ਸ਼ੁਭਮ ਦੇਵਗਨ ਦੀ ਤਸਵੀਰ ਸ਼ਾਮਲ ਨਹੀਂ ਕੀਤੀ ਗਈ।
ਇਹ ਵੀ ਪੜ੍ਹੋ: ਕਹਿਰ ਓ ਰੱਬਾ! ਨਾਨਕੇ ਛੁੱਟੀਆਂ ਕੱਟਣ ਗਏ ਜਵਾਕ ਦੀ ਕਰੰਟ ਲੱਗਣ ਨਾਲ ਮੌਤ, ਮਾਪਿਆਂ ਦਾ ਸੀ ਇਕਲੌਤਾ ਪੁੱਤ
ਸਿਆਸੀ ਹਲਕਿਆਂ ’ਚ ਇਸ ਨੂੰ ਲੈ ਕੇ ਕਈ ਤਰ੍ਹਾਂ ਦੇ ਸਵਾਲ ਉੱਠ ਰਹੇ ਹਨ। ਕੀ ਸੂਬਾ ਯੂਥ ਕਾਂਗਰਸ ਪ੍ਰਧਾਨ ਦੀ ਤਸਵੀਰ ਦਾ ਨਾ ਹੋਣਾ ਜਥੇਬੰਦੀ ਦੇ ਅੰਦਰ ਗੁੱਟਬਾਜ਼ੀ ਦਾ ਸੰਕੇਤ ਹੈ? ਕੀ ਇਹ ਪਾਰਟੀ ਅਨੁਸ਼ਾਸਨ ਦੀ ਅਣਦੇਖੀ ਹੈ ਜਾਂ ਫਿਰ ਹੋਰਡਿੰਗ ਤਿਆਰ ਕਰਨ 'ਚ ਹੋਈ ਕੋਈ ਆਮ ਗਲਤੀ? ਇਨ੍ਹਾਂ ਸਵਾਲਾਂ ਨੂੰ ਲੈ ਕੇ ਕਾਂਗਰਸ ਵਰਕਰਾਂ ਅਤੇ ਆਗੂਆਂ ਵਿਚਾਲੇ ਚਰਚਾਵਾਂ ਦਾ ਦੌਰ ਜਾਰੀ ਹੈ।
ਜ਼ਿਕਰਯੋਗ ਹੈ ਕਿ ਸੂਬਾ ਪ੍ਰਧਾਨ ਵਜੋਂ ਸ਼ੁਭਮ ਦੇਵਗਨ ਦੀ ਨਿਯੁਕਤੀ ਹਾਲ ਹੀ 'ਚ ਹੋਈ ਹੈ। ਅਜਿਹੇ 'ਚ ਕਾਂਗਰਸ ਭਵਨ 'ਚ ਲੱਗੇ ਅਧਿਕਾਰਤ ਹੋਰਡਿੰਗ 'ਤੇ ਉਨ੍ਹਾਂ ਦੀ ਤਸਵੀਰ ਦਾ ਨਾ ਹੋਣਾ ਕਈ ਸਿਆਸੀ ਸੰਕੇਤਾਂ ਵੱਲ ਇਸ਼ਾਰਾ ਕਰਦਾ ਮੰਨਿਆ ਜਾ ਰਿਹਾ ਹੈ। ਇਸ ਸਬੰਧ ’ਚ ਜ਼ਿਲ੍ਹਾ ਯੂਥ ਕਾਂਗਰਸ ਦਿਹਾਤੀ ਦੇ ਪ੍ਰਧਾਨ ਮਨਪ੍ਰੀਤ ਚੱਢਾ ਨਾਲ ਉਨ੍ਹਾਂ ਦਾ ਪੱਖ ਜਾਣਨ ਲਈ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਉਨ੍ਹਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ। ਹੁਣ ਸਭ ਦੀ ਨਜ਼ਰ ਇਸ ਗੱਲ ’ਤੇ ਹੈ ਕਿ ਪਾਰਟੀ ਲੀਡਰਸ਼ਿਪ ਇਸ ਮਾਮਲੇ ਨੂੰ ਸਿਰਫ਼ ਇਕ ਤਕਨੀਕੀ ਗਲਤੀ ਮੰਨਦੀ ਹੈ ਜਾਂ ਫਿਰ ਇਸ ’ਤੇ ਕੋਈ ਜਥੇਬੰਦਕ ਸਪੱਸ਼ਟੀਕਰਨ ਸਾਹਮਣੇ ਆਉਂਦਾ ਹੈ।
ਇਹ ਵੀ ਪੜ੍ਹੋ: ਪੰਜਾਬ 'ਚ ਵਧਾਈ ਗਈ ਸੁਰੱਖਿਆ! ਵਿਸ਼ੇਸ਼ DGP ਨੇ ਜਾਰੀ ਕਰ ਦਿੱਤੇ ਸਖ਼ਤ ਹੁਕਮ
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਮੋਹਾਲੀ 'ਚ ਬੱਚਿਆਂ ਦੀ ਅੰਤਿਮ ਵਿਦਾਈ 'ਚ ਪੁੱਜੀ ਕਾਤਲ ਮਾਂ, ਦਾਦਾ-ਦਾਦੀ ਨੇ ਲਾਏ ਗੰਭੀਰ ਦੋਸ਼
NEXT STORY 
