ਨੈਸ਼ਨਲ ਡੈਸਕ- ਮੱਧ ਪ੍ਰਦੇਸ਼ ਦੇ ਮੁਰੈਨਾ ਸ਼ਹਿਰ ਵਿੱਚ ਅੱਜ ਇੱਕ ਵੱਡਾ ਹਾਦਸਾ ਵਾਪਰ ਗਿਆ। ਪਾਣੀ ਦੀ ਪਾਈਪਲਾਈਨ ਦੀ ਮੁਰੰਮਤ ਦੌਰਾਨ ਹੇਠਾਂ ਤੋਂ ਗੁਜ਼ਰ ਰਹੀ PNG ਗੈਸ ਪਾਈਪਲਾਈਨ ਫਟ ਗਈ, ਜਿਸ ਕਾਰਨ ਲੱਗੀ ਭਿਆਨਕ ਅੱਗ ਵਿੱਚ ਇੱਕ ਦੁਕਾਨਦਾਰ ਸਮੇਤ ਚਾਰ ਲੋਕ ਗੰਭੀਰ ਰੂਪ ਵਿੱਚ ਝੁਲਸ ਗਏ।
ਅਧਿਕਾਰਤ ਜਾਣਕਾਰੀ ਅਨੁਸਾਰ, ਐੱਮ.ਐੱਸ. ਰੋਡ 'ਤੇ ਨਹਿਰੂ ਪਾਰਕ ਨੇੜੇ ਪਾਣੀ ਦੀ ਪਾਈਪਲਾਈਨ ਲੀਕ ਹੋ ਰਹੀ ਸੀ। ਨਗਰ ਨਿਗਮ ਦੇ ਕਰਮਚਾਰੀ JCB ਨਾਲ ਖੁਦਾਈ ਕਰਕੇ ਇਸ ਨੂੰ ਠੀਕ ਕਰ ਰਹੇ ਸਨ। ਖੁਦਾਈ ਦੌਰਾਨ JCB ਦੀ ਟੱਕਰ ਨਾਲ ਗੈਸ ਪਾਈਪਲਾਈਨ ਲੀਕ ਹੋ ਗਈ। ਲੀਕ ਹੋਈ ਗੈਸ ਕੋਲ ਹੀ ਇੱਕ ਹਲਵਾਈ ਦੀ ਚੱਲ ਰਹੀ ਭੱਠੀ ਦੇ ਸੰਪਰਕ ਵਿੱਚ ਆ ਗਈ, ਜਿਸ ਨਾਲ ਅਚਾਨਕ ਅੱਗ ਦੀਆਂ ਲਪਟਾਂ ਉੱਠਣ ਲੱਗੀਆਂ। ਇਹ ਅੱਗ ਇੰਨੀ ਤੇਜ਼ ਸੀ ਕਿ ਦੁਕਾਨ ਦੇ ਬਾਹਰ ਰੱਖਿਆ ਸਾਮਾਨ ਸੜ ਕੇ ਸੁਆਹ ਹੋ ਗਿਆ। ਝੁਲਸੇ ਹੋਏ ਚਾਰ ਲੋਕਾਂ ਨੂੰ ਤੁਰੰਤ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ।
ਘਟਨਾ ਦੀ ਸੂਚਨਾ ਮਿਲਦੇ ਹੀ ਫਾਇਰ ਬ੍ਰਿਗੇਡ ਅਤੇ ਗੈਸ ਕੰਪਨੀ ਦੇ ਕਰਮਚਾਰੀ ਮੌਕੇ 'ਤੇ ਪਹੁੰਚੇ ਅਤੇ ਸਥਿਤੀ 'ਤੇ ਕਾਬੂ ਪਾਇਆ। ਮੁਰੈਨਾ ਦੀ ਮੇਅਰ ਸ਼ਾਰਦਾ ਸੋਲੰਕੀ, ਨਿਗਮ ਕਮਿਸ਼ਨਰ ਅਤੇ ਪੁਲਸ ਅਧਿਕਾਰੀਆਂ ਨੇ ਮੌਕੇ ਦਾ ਜਾਇਜ਼ਾ ਲਿਆ। ਦੱਸਿਆ ਗਿਆ ਹੈ ਕਿ ਸ਼ਹਿਰ ਵਿੱਚ ਅਜੇ ਘਰਾਂ ਤੱਕ ਗੈਸ ਸਪਲਾਈ ਸ਼ੁਰੂ ਨਹੀਂ ਹੋਈ ਸੀ ਅਤੇ ਪਾਈਪਲਾਈਨ ਵਿਛਾਉਣ ਦਾ ਕੰਮ ਹੀ ਚੱਲ ਰਿਹਾ ਸੀ।
''ਇਹ ਇੰਡੀਆ ਨਹੀਂ..!'' ਨੇਪਾਲ 'ਚ ਗੁਟਕਾ ਸੁੱਟਣ 'ਤੇ ਭਾਰਤੀ ਨੌਜਵਾਨ ਦੀ ਲੱਗੀ ਕਲਾਸ, ਵੀਡੀਓ ਵਾਇਰਲ
NEXT STORY 
