ਵੈੱਬ ਡੈਸਕ : ਭਾਰਤ ਦੇ NRI ਨਾਗਰਿਕਾਂ ਨੇ ਦੇਸ਼ ਦੀ ਆਰਥਿਕਤਾ ਨੂੰ ਮਜ਼ਬੂਤ ਕਰਨ ਵਿੱਚ ਇੱਕ ਨਵਾਂ ਰਿਕਾਰਡ ਬਣਾਇਆ ਹੈ। ਵਿੱਤੀ ਸਾਲ 2024-25 (ਜੋ 31 ਮਾਰਚ ਨੂੰ ਖਤਮ ਹੋਇਆ) ਵਿੱਚ, ਵਿਦੇਸ਼ਾਂ ਵਿੱਚ ਰਹਿਣ ਵਾਲੇ ਭਾਰਤੀਆਂ ਨੇ ਆਪਣੇ ਪਰਿਵਾਰਾਂ ਨੂੰ 135.46 ਬਿਲੀਅਨ ਡਾਲਰ (ਭਾਵ ਲਗਭਗ 11.63 ਲੱਖ ਕਰੋੜ ਰੁਪਏ) ਭੇਜੇ। ਇਹ ਹੁਣ ਤੱਕ ਇੱਕ ਸਾਲ ਵਿੱਚ ਭੇਜੀ ਗਈ ਸਭ ਤੋਂ ਵੱਡੀ ਰਕਮ ਹੈ।
ਪੈਸੇ ਭੇਜਣ 'ਚ 14 ਫੀਸਦੀ ਦਾ ਸਾਲਾਨਾ ਵਾਧਾ
ਇਸ ਰਕਮ 'ਚ ਸਾਲ-ਦਰ-ਸਾਲ 14.24 ਫੀਸਦੀ ਦਾ ਵਾਧਾ ਹੋਇਆ ਹੈ। ਇਹ ਅੰਕੜਾ 8 ਸਾਲ ਪਹਿਲਾਂ ਯਾਨੀ 2016-17 'ਚ ਭੇਜੇ ਗਏ 61 ਬਿਲੀਅਨ ਡਾਲਰ ਤੋਂ ਦੁੱਗਣੇ ਤੋਂ ਵੀ ਵੱਧ ਹੈ। ਇਸਦਾ ਸਪੱਸ਼ਟ ਅਰਥ ਹੈ ਕਿ ਵਿਦੇਸ਼ਾਂ ਵਿੱਚ ਰਹਿਣ ਵਾਲੇ ਭਾਰਤੀਆਂ ਦੀ ਆਮਦਨ ਅਤੇ ਖੁਸ਼ਹਾਲੀ ਵਧੀ ਹੈ ਅਤੇ ਭਾਰਤੀ ਕਾਰਜਬਲ ਦੀ ਅੰਤਰਰਾਸ਼ਟਰੀ ਮੰਗ ਵੀ ਮਜ਼ਬੂਤ ਹੋਈ ਹੈ।
45 ਫੀਸਦੀ ਪੈਸਾ ਅਮਰੀਕਾ, ਸਿੰਗਾਪੁਰ, ਬ੍ਰਿਟੇਨ ਤੋਂ ਆਇਆ
ਰਿਜ਼ਰਵ ਬੈਂਕ (RBI) ਦੀ ਰਿਪੋਰਟ ਦੇ ਅਨੁਸਾਰ, ਕੁੱਲ ਰੈਮਿਟੈਂਸ ਦਾ 45 ਫੀਸਦੀ ਅਮਰੀਕਾ, ਬ੍ਰਿਟੇਨ ਅਤੇ ਸਿੰਗਾਪੁਰ ਤੋਂ ਆਇਆ। ਇਸ ਦੇ ਨਾਲ ਹੀ, ਖਾੜੀ ਦੇਸ਼ਾਂ ਤੋਂ ਰੈਮਿਟੈਂਸ ਵਿੱਚ ਗਿਰਾਵਟ ਆਈ ਹੈ। ਤੇਲ ਦੀਆਂ ਕੀਮਤਾਂ ਵਿੱਚ ਗਿਰਾਵਟ ਦੇ ਕਾਰਨ, ਉੱਥੋਂ ਘੱਟ ਪੈਸਾ ਭੇਜਿਆ ਜਾ ਰਿਹਾ ਹੈ, ਜਿਸਦੀ ਭਰਪਾਈ ਪੱਛਮੀ ਦੇਸ਼ਾਂ ਦੁਆਰਾ ਕੀਤੀ ਜਾ ਰਹੀ ਹੈ। ਵਿਸ਼ਵ ਬੈਂਕ ਦੇ ਅਨੁਸਾਰ, ਭਾਰਤ ਪਿਛਲੇ 10 ਸਾਲਾਂ ਤੋਂ ਸਭ ਤੋਂ ਵੱਧ ਰੈਮਿਟੈਂਸ ਪ੍ਰਾਪਤ ਕਰਨ ਵਾਲਾ ਦੇਸ਼ ਬਣਿਆ ਹੋਇਆ ਹੈ। 2024 ਵਿੱਚ, ਭਾਰਤ ਪਹਿਲੇ ਸਥਾਨ 'ਤੇ ਰਿਹਾ, ਜਦੋਂ ਕਿ ਮੈਕਸੀਕੋ (5.8 ਲੱਖ ਕਰੋੜ) ਅਤੇ ਚੀਨ (4.1 ਲੱਖ ਕਰੋੜ) ਦੂਜੇ ਅਤੇ ਤੀਜੇ ਸਥਾਨ 'ਤੇ ਰਹੇ।
ਵਪਾਰ ਘਾਟੇ ਦੀ ਭਰਪਾਈ 'ਚ ਮਦਦਗਾਰ
RBI ਦੀ ਰਿਪੋਰਟ ਦਰਸਾਉਂਦੀ ਹੈ ਕਿ ਰੈਮਿਟੈਂਸ ਸਿਰਫ਼ ਆਮਦਨ ਦਾ ਸਰੋਤ ਨਹੀਂ ਹੈ, ਸਗੋਂ ਭਾਰਤ ਦੀ ਆਰਥਿਕਤਾ ਦਾ ਇੱਕ ਮਜ਼ਬੂਤ ਥੰਮ੍ਹ ਹੈ। ਇਹ ਵਿਦੇਸ਼ੀ ਨਿਵੇਸ਼ (FDI) ਨਾਲੋਂ ਵੱਡਾ ਸਰੋਤ ਬਣ ਗਿਆ ਹੈ। ਵਿੱਤੀ ਸਾਲ 2025 'ਚ, ਭਾਰਤ ਦਾ ਵਪਾਰ ਘਾਟਾ 287 ਬਿਲੀਅਨ ਡਾਲਰ ਸੀ, ਜਿਸ 'ਚੋਂ 47 ਫੀਸਦੀ ਦੀ ਭਰਪਾਈ ਰੈਮਿਟੈਂਸ ਦੁਆਰਾ ਕੀਤੀ ਗਈ ਸੀ। ਇਸ ਤੋਂ ਇਹ ਸਪੱਸ਼ਟ ਹੁੰਦਾ ਹੈ ਕਿ ਭਾਰਤ ਦੀ ਵਿੱਤੀ ਸਿਹਤ ਲਈ ਪ੍ਰਵਾਸੀ ਭਾਰਤੀਆਂ ਦਾ ਯੋਗਦਾਨ ਬਹੁਤ ਮਹੱਤਵਪੂਰਨ ਹੈ। ਭਾਰਤੀ ਪ੍ਰਵਾਸੀ ਸਿਰਫ਼ ਵਿਦੇਸ਼ੀ ਧਰਤੀ 'ਤੇ ਕੰਮ ਨਹੀਂ ਕਰ ਰਹੇ ਹਨ, ਸਗੋਂ ਇਹ ਭਾਰਤ ਦੇ ਆਰਥਿਕ ਭਵਿੱਖ ਦੀ ਨੀਂਹ ਨੂੰ ਵੀ ਮਜ਼ਬੂਤ ਕਰ ਰਹੇ ਹਨ। ਪੈਸੇ ਭੇਜਣਾ ਹੁਣ ਸਿਰਫ਼ ਪਰਿਵਾਰਕ ਮਦਦ ਹੀ ਨਹੀਂ ਸਗੋਂ ਰਾਸ਼ਟਰੀ ਆਰਥਿਕ ਰਣਨੀਤੀ ਦਾ ਇੱਕ ਮਹੱਤਵਪੂਰਨ ਹਿੱਸਾ ਵੀ ਬਣ ਗਿਆ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਧਮਾਕੇ 'ਚ ਮਰੇ ਲੋਕਾਂ ਨੂੰ 1-1 ਕਰੋੜ ਮੁਆਵਜ਼ਾ ਦੇਵੇਗੀ ਸਰਕਾਰ, ਜ਼ਖ਼ਮੀਆਂ ਨੂੰ ਮਿਲਣਗੇ ਇੰਨੇ ਰੁਪਏ
NEXT STORY 
