ਨੈਸ਼ਨਲ ਡੈਸਕ- ਤਾਮਿਲਨਾਡੂ ਦੇ ਚੇਨਈ ਤੋਂ ਬਿਹਾਰ ਦੇ ਚੰਪਾਰਨ ਲਿਜਾਇਆ ਜਾ ਰਿਹਾ ਇਕ ਵਿਸ਼ਾਲ ਸ਼ਿਵਲਿੰਗ ਇਸ ਸਮੇਂ ਦੇਸ਼ ਭਰ 'ਚ ਖਿੱਚ ਦਾ ਮੁੱਖ ਕੇਂਦਰ ਬਣਿਆ ਹੋਇਆ ਹੈ। ਇਹ ਵਿਸ਼ਾਲ ਸ਼ਿਵਲਿੰਗ ਜਬਲਪੁਰ ਤੋਂ ਨਾਗਪੁਰ ਦੇ ਰਸਤੇ NH-44 ਰਾਹੀਂ ਲੰਘ ਰਿਹਾ ਹੈ, ਜਿੱਥੇ ਰਸਤੇ 'ਚ ਥਾਂ-ਥਾਂ ਲੋਕ ਇਸ ਦੀ ਪੂਜਾ ਕਰਨ ਲਈ ਪਹੁੰਚ ਰਹੇ ਹਨ।
ਸ਼ਿਵਲਿੰਗ ਦੇ ਮਾਪ ਅਤੇ ਢੋਆ-ਢੁਆਈ
ਇਸ ਸ਼ਿਵਲਿੰਗ ਦਾ ਭਾਰ 1 ਲੱਖ 80 ਹਜ਼ਾਰ ਕਿਲੋ ਹੈ ਅਤੇ ਇਸ ਦੀ ਉਚਾਈ 30 ਫੁੱਟ ਹੈ। ਇਸ ਨੂੰ ਲਿਜਾਣ ਲਈ ਇਕ ਵਿਸ਼ੇਸ਼ ਪ੍ਰਬੰਧ ਕੀਤਾ ਗਿਆ ਹੈ, ਜਿਸ 'ਚ ਇਸ ਨੂੰ 110 ਚੱਕਿਆਂ ਵਾਲੇ ਇਕ ਵਿਸ਼ਾਲ ਟਰੇਲਰ 'ਤੇ ਲੱਦਿਆ ਗਿਆ ਹੈ। ਟਰੇਲਰ ਦੇ ਡਰਾਈਵਰ ਅਰੁਣ ਕੁਮਾਰ ਨੇ ਦੱਸਿਆ ਕਿ ਉਹ 23 ਦਿਨ ਪਹਿਲਾਂ ਚੇਨਈ ਤੋਂ ਰਵਾਨਾ ਹੋਏ ਸਨ ਅਤੇ ਅਗਲੇ 20 ਦਿਨਾਂ 'ਚ ਬਿਹਾਰ ਦੇ ਚੰਪਾਰਨ ਪਹੁੰਚ ਜਾਣਗੇ।
ਵਿਰਾਟ ਰਾਮਾਇਣ ਮੰਦਰ 'ਚ ਹੋਵੇਗੀ ਪ੍ਰਾਣ ਪ੍ਰਤਿਸ਼ਠਾ
ਇਸ ਵਿਸ਼ਾਲ ਸ਼ਿਵਲਿੰਗ ਦੀ ਪ੍ਰਾਣ ਪ੍ਰਤਿਸ਼ਠਾ ਪੂਰਬੀ ਚੰਪਾਰਨ ਜ਼ਿਲ੍ਹੇ ਦੇ ਜਾਨਕੀਨਗਰ ਦੇ ਕੈਥਵਲੀਆ ਪਿੰਡ 'ਚ ਬਣ ਰਹੇ ਵਿਰਾਟ ਰਾਮਾਇਣ ਮੰਦਰ 'ਚ ਕੀਤੀ ਜਾਵੇਗੀ। ਇਹ ਮੰਦਰ ਮਹਾਵੀਰ ਮੰਦਰ ਟਰੱਸਟ ਕਮੇਟੀ ਦੁਆਰਾ ਬਣਾਇਆ ਜਾ ਰਿਹਾ ਹੈ। ਮੰਦਰ ਦੇ ਨਿਰਮਾਣ ਬਾਰੇ ਦੱਸਿਆ ਗਿਆ ਹੈ ਕਿ ਮੁੱਖ ਮੰਦਰ ਦੀ ਲੰਬਾਈ 1080 ਫੁੱਟ ਅਤੇ ਚੌੜਾਈ 540 ਫੁੱਟ ਹੋਵੇਗੀ। ਇਸ 'ਚ ਕੁੱਲ 18 ਸਿਖਰਾਂ (spires) ਸਮੇਤ 22 ਹੋਰ ਮੰਦਰ ਸ਼ਾਮਲ ਹੋਣਗੇ। ਮੰਦਰ ਦੇ ਸਭ ਤੋਂ ਉੱਚੇ ਸ਼ਿਖਰ ਦੀ ਉਚਾਈ 270 ਫੁੱਟ ਰੱਖੀ ਗਈ ਹੈ।
ਬਣਾਉਣ 'ਚ ਲੱਗੇ 10 ਸਾਲ ਅਤੇ 3 ਕਰੋੜ ਰੁਪਏ
ਇਹ 30 ਫੁੱਟ ਉੱਚਾ ਸ਼ਿਵਲਿੰਗ ਇਕੋ ਹੀ ਪੱਥਰ ਨੂੰ ਤਰਾਸ਼ ਕੇ ਬਣਾਇਆ ਗਿਆ ਹੈ। ਇਸ ਨੂੰ ਮਹਾਬਲੀਪੁਰਮ ਦੇ ਪੱਟੀਕਾਡੂ ਪਿੰਡ 'ਚ ਆਰਕੀਟੈਕਟ ਲੋਕਨਾਥ ਨੇ ਤਿਆਰ ਕੀਤਾ। ਇਸ ਨੂੰ ਬਣਾਉਣ 'ਚ ਵਿਨਾਇਕ ਵੈਂਕਟਰਮਣ ਦੀ ਕੰਪਨੀ ਨੂੰ 10 ਸਾਲ ਦੀ ਅਣਥੱਕ ਮਿਹਨਤ ਕਰਨੀ ਪਈ ਅਤੇ ਇਸ 'ਤੇ ਕਰੀਬ 3 ਕਰੋੜ ਰੁਪਏ ਦਾ ਖਰਚ ਆਇਆ। ਇਸ ਦੀ ਖਾਸ ਵਿਸ਼ੇਸ਼ਤਾ ਇਹ ਹੈ ਕਿ ਇਸ ਵੱਡੇ ਸ਼ਿਵਲਿੰਗ 'ਤੇ ਛੋਟੇ-ਛੋਟੇ 1008 ਸ਼ਿਵਲਿੰਗ ਵੀ ਬਣਾਏ ਗਏ ਹਨ।
ਤੇਜ਼ ਰਫ਼ਤਾਰ ਨੇ ਢਾਹਿਆ ਕਹਿਰ ! ਪਿਓ ਨਾਲ ਜਾਂਦੀ MBBS ਵਿਦਿਆਰਥਣ ਦੀ ਹੋਈ ਦਰਦਨਾਕ ਮੌਤ
NEXT STORY 
