ਹੈਲਥ ਡੈਸਕ - ਪੂਰੀ ਦੁਨੀਆ 'ਚ 7 ਅਪ੍ਰੈਲ ਭਾਵ ਕਿ ਅੱਜ 'ਵਿਸ਼ਵ ਸਿਹਤ ਦਿਵਸ' ਵਜੋਂ ਮਨਾਇਆ ਜਾਂਦਾ ਹੈ ਤਾਂ ਜੋ ਲੋਕਾਂ 'ਚ ਸਿਹਤ ਪ੍ਰਤੀ ਜਾਗਰੂਕਤਾ ਪੈਦਾ ਕੀਤੀ ਜਾ ਸਕੇ। ਇਸ ਸਾਲ ਦੀ ਥੀਮ 'ਸਿਹਤ ਲਈ ਇੱਕਜੁੱਟ: ਵਿਗਿਆਨ ਦੇ ਨਾਲ ਖੜ੍ਹੇ ਰਹੋ' ਰੱਖੀ ਗਈ ਹੈ। ਭਾਰਤ ਦੇ ਸੰਦਰਭ 'ਚ ਚਿੰਤਾ ਵਾਲੀ ਗੱਲ ਇਹ ਹੈ ਕਿ ਪਿਛਲੇ 2-3 ਸਾਲਾਂ 'ਚ 6 ਪ੍ਰਮੁੱਖ ਬਿਮਾਰੀਆਂ ਨੌਜਵਾਨਾਂ 'ਚ ਤੇਜ਼ੀ ਨਾਲ ਵਧ ਰਹੀਆਂ ਹਨ।
ਭਾਰਤ 'ਚ ਵਧ ਰਹੀਆਂ 6 ਮੁੱਖ ਸਿਹਤ ਸਮੱਸਿਆਵਾਂ :-
ਡਾਇਬੀਟੀਜ਼
- ਭਾਰਤ ਦੁਨੀਆ ਦੇ ਸਭ ਤੋਂ ਵੱਧ ਡਾਇਬੀਟੀਜ਼ ਮਰੀਜ਼ਾਂ ਵਾਲੇ ਦੇਸ਼ਾਂ 'ਚੋਂ ਇਕ ਬਣ ਗਿਆ ਹੈ, ਜਿੱਥੇ ਲਗਭਗ 7 ਕਰੋੜ 70 ਲੱਖ ਲੋਕ ਇਸ ਬਿਮਾਰੀ ਨਾਲ ਜੂਝ ਰਹੇ ਹਨ। ਗਲਤ ਖਾਣ-ਪੀਣ ਅਤੇ ਤਣਾਅ ਕਾਰਨ ਨੌਜਵਾਨ ਵੀ ਇਸ 'ਸਾਈਲੈਂਸ ਮਹਾਂਮਾਰੀ' ਦਾ ਸ਼ਿਕਾਰ ਹੋ ਰਹੇ ਹਨ।
ਦਿਲ ਦੇ ਰੋਗ
- ਭਾਰਤ 'ਚ ਹੋਣ ਵਾਲੀਆਂ ਕੁੱਲ ਮੌਤਾਂ 'ਚੋਂ 27% ਮੌਤਾਂ ਦਾ ਕਾਰਨ ਦਿਲ ਦੇ ਰੋਗ ਹਨ। ਹੁਣ 30 ਤੋਂ 40 ਸਾਲ ਦੀ ਉਮਰ ਦੇ ਨੌਜਵਾਨਾਂ 'ਚ ਵੀ ਦਿਲ ਦੀਆਂ ਬਿਮਾਰੀਆਂ ਦੇਖਣ ਨੂੰ ਮਿਲ ਰਹੀਆਂ ਹਨ, ਜਿਸ ਦਾ ਮੁੱਖ ਕਾਰਨ ਤਣਾਅ ਅਤੇ ਕਸਰਤ ਦੀ ਕਮੀ ਹੈ।
ਮੋਟਾਪਾ
- ਦੇਸ਼ ਦੀ ਲਗਭਗ 16% ਆਬਾਦੀ ਮੋਟਾਪੇ ਦੀ ਚਪੇਟ 'ਚ ਹੈ। ਦਫ਼ਤਰਾਂ 'ਚ ਘੰਟਿਆਂ ਬੱਧੀ ਬੈਠ ਕੇ ਕੰਮ ਕਰਨਾ ਅਤੇ ਪ੍ਰੋਸੈਸਡ ਫੂਡ ਦਾ ਸੇਵਨ ਇਸ ਨੂੰ ਵਧਾ ਰਿਹਾ ਹੈ, ਜੋ ਅੱਗੇ ਜਾ ਕੇ ਸ਼ੂਗਰ ਅਤੇ ਹਾਈ ਬਲੱਡ ਪ੍ਰੈਸ਼ਰ ਦਾ ਕਾਰਨ ਬਣਦਾ ਹੈ।
ਔਰਤਾਂ 'ਚ ਹਾਰਮੋਨਲ ਅਸੰਤੁਲਨ
- ਭਾਰਤ 'ਚ ਲਗਭਗ 20% ਔਰਤਾਂ ਪੋਲੀਸਿਸਟਿਕ ਓਵਰੀ ਸਿੰਡਰੋਮ ਦੀ ਸਮੱਸਿਆ ਨਾਲ ਜੂਝ ਰਹੀਆਂ ਹਨ। ਖਰਾਬ ਜੀਵਨ ਸ਼ੈਲੀ ਅਤੇ ਤਣਾਅ ਕਾਰਨ ਇਹ ਸਮੱਸਿਆ ਘੱਟ ਉਮਰ ਦੀਆਂ ਕੁੜੀਆਂ 'ਚ ਵੀ ਵਧ ਰਹੀ ਹੈ, ਜਿਸ ਨਾਲ ਬਾਂਝਪਨ ਦਾ ਖਤਰਾ ਵਧ ਜਾਂਦਾ ਹੈ।
ਫੈਟੀ ਲਿਵਰ
- ਭਾਰਤ 'ਚ ਹਰ 3 'ਚੋਂ 1 ਵਿਅਕਤੀ ਫੈਟੀ ਲਿਵਰ ਦੀ ਸਮੱਸਿਆ ਤੋਂ ਪੀੜਤ ਹੈ। ਇਹ ਇਕ ਅਜਿਹਾ ਖਤਰਾ ਹੈ ਜਿਸ ਨੂੰ ਅਕਸਰ ਨਜ਼ਰਅੰਦਾਜ਼ ਕੀਤਾ ਜਾਂਦਾ ਹੈ, ਪਰ ਇਹ ਤੇਜ਼ੀ ਨਾਲ ਫੈਲਣ ਵਾਲੀ ਬਿਮਾਰੀ ਬਣ ਚੁੱਕੀ ਹੈ।
ਮਾਨਸਿਕ ਸਿਹਤ
- ਅੱਜ ਦੀ ਭੱਜ-ਦੌੜ ਭਰੀ ਜ਼ਿੰਦਗੀ 'ਚ ਐਂਗਜ਼ਾਈਟੀ (ਚਿੰਤਾ) ਅਤੇ ਡਿਪ੍ਰੈਸ਼ਨ ਵਰਗੀਆਂ ਸਮੱਸਿਆਵਾਂ ਆਮ ਹੋ ਗਈਆਂ ਹਨ। ਬਹੁਤ ਜ਼ਿਆਦਾ ਸਕ੍ਰੀਨ ਟਾਈਮ ਅਤੇ ਕੰਮ ਦਾ ਦਬਾਅ ਮਾਨਸਿਕ ਸਿਹਤ ਨੂੰ ਵਿਗਾੜ ਰਿਹਾ ਹੈ।
ਬਚਾਅ ਦੇ 3 ਤਰੀਕੇ :-
ਮਾਹਿਰਾਂ ਅਨੁਸਾਰ ਇਹ ਸਾਰੀਆਂ ਬਿਮਾਰੀਆਂ ਸਾਡੀ ਜੀਵਨ ਸ਼ੈਲੀ ਨਾਲ ਜੁੜੀਆਂ ਹੋਈਆਂ ਹਨ ਅਤੇ ਇਨ੍ਹਾਂ ਨੂੰ ਆਸਾਨੀ ਨਾਲ ਰੋਕਿਆ ਜਾ ਸਕਦਾ ਹੈ:
ਸਹੀ ਜੀਵਨ ਸ਼ੈਲੀ
- ਸਮੇਂ ਸਿਰ ਸੌਣਾ ਅਤੇ ਤਣਾਅ ਨੂੰ ਘੱਟ ਕਰਨਾ।
ਸਿਹਤਮੰਦ ਖੁਰਾਕ
- ਬਾਹਰਲੇ ਖਾਣੇ ਅਤੇ ਪ੍ਰੋਸੈਸਡ ਫੂਡ ਦੀ ਜਗ੍ਹਾ ਪੌਸ਼ਟਿਕ ਭੋਜਨ ਨੂੰ ਤਰਜੀਹ ਦੇਣਾ।
ਰੋਜ਼ਾਨਾ ਕਸਰਤ
- ਰੋਜ਼ਾਨਾ ਯੋਗ, ਧਿਆਨ ਜਾਂ ਕਸਰਤ ਕਰਨਾ ਸਰੀਰਕ ਅਤੇ ਮਾਨਸਿਕ ਸਿਹਤ ਲਈ ਬਹੁਤ ਜ਼ਰੂਰੀ ਹੈ।
ਸਿਹਤਮੰਦ ਰਹਿਣ ਲਈ ਸਮੇਂ-ਸਮੇਂ 'ਤੇ ਰੈਗੂਲਰ ਹੈਲਥ ਚੈੱਕਅਪ ਕਰਵਾਉਣਾ ਵੀ ਬੇਹੱਦ ਜ਼ਰੂਰੀ ਹੈ।
ਇਸ ਸੂਬੇ 'ਚ ਫੈਲੀ ਰਹੱਸਮਈ ਬੀਮਾਰੀ, 5 ਜਵਾਕਾਂ ਦੀ ਮੌਤ, ਮਚੀ ਹਫ਼ੜਾ-ਦਫ਼ੜੀ
NEXT STORY 
