ਲੁਧਿਆਣਾ,(ਪੰਕਜ) - ਪਿਛਲੇ ਲੰਬੇ ਸਮੇਂ ਤੋਂ ਆਪਣੀ ਪ੍ਰਮੋਸ਼ਨ ਦਾ ਇੰਤਜ਼ਾਰ ਕਰ ਰਹੇ ਪੰਜਾਬ ਪੁਲਸ ਦੇ ਇੰਸਪੈਕਟਰ ਉਸ ਵੇਲੇ ਕੱਪੜਿਆਂ ਤੋਂ ਬਾਹਰ ਹੋ ਗਏ। ਜਦੋਂ ਉਨ੍ਹਾਂ ਨੇ ਵਿਭਾਗ ਵਲੋਂ ਕੱਢੀ ਡੀ. ਐੱਸ. ਪੀਜ਼ ਦੀ ਪ੍ਰਮੋਸ਼ਨ ਸੰਬੰਧੀ ਲਿਸਟ 'ਚ ਕੀਤੇ ਜੂਨੀਅਰ ਚਾਰ ਅਧਿਕਾਰੀਆਂ ਦੇ ਨਾਂ ਵੇਖੇ, ਗੁੱਸੇ 'ਚ ਆਏ ਆਪਣੀ ਵਾਰੀ ਦਾ ਇੰਤਜ਼ਾਰ ਕਰ ਰਹੇ ਇੰਸਪੈਕਟਰਾਂ ਵਲੋਂ ਕੀਤੇ ਵਿਰੋਧ ਨੂੰ ਵੇਖਦਿਆਂ ਤੁਰੰਤ ਹਰਕਤ 'ਚ ਆਏ ਵਿਭਾਗ ਨੇ ਫਲੈਸ਼ ਹੋਣ ਦੇ ਕੁਝ ਘੰਟਿਆਂ ਬਾਅਦ ਹੀ ਲਿਸਟ ਨੂੰ ਵਾਪਸ ਲੈ ਲਿਆ।
ਕਈ ਸਾਲਾਂ ਤੋਂ ਆਪਣੀ ਪ੍ਰਮੋਸ਼ਨ ਦਾ ਇੰਤਜ਼ਾਰ ਕਰ ਰਹੇ ਇੰਸਪੈਕਟਰ ਰੈਂਕ ਦੇ ਅਧਿਕਾਰੀਆਂ ਦੀ ਲੰਬੀ ਲਾਈਨ ਪਹਿਲਾਂ ਹੀ ਕਿਸ਼ਤਾਂ 'ਚ ਪ੍ਰਮੋਸ਼ਨ ਸੰਬੰਧੀ ਲਿਸਟਾਂ ਕੱਢ ਰਹੀ ਸੂਬਾ ਸਰਕਾਰ ਦੀ ਕਾਰਜਸ਼ੈਲੀ ਤੋਂ ਦੁਖੀ ਹਨ। ਆਪਣੀ ਵਾਰੀ ਦਾ ਇੰਤਜ਼ਾਰ ਕਰ ਰਹੇ ਇਨ੍ਹਾਂ ਅਧਿਕਾਰੀਆਂ ਵਿਚੋਂ ਤਾਂ ਕਈ ਪਿਛਲੇ 10 ਤੋਂ 15 ਸਾਲਾਂ ਤੋਂ ਬਤੌਰ ਥਾਣਾ ਮੁਖੀ ਵੱਖ-ਵੱਖ ਪੁਲਸ ਸਟੇਸ਼ਨਾਂ 'ਚ ਡਿਊਟੀ ਵਜਾਈ ਜਾ ਰਹੇ ਹਨ। ਪਹਿਲਾਂ ਵੀ ਪਿਛਲੇ ਦਰਵਾਜ਼ੇ 'ਚੋਂ ਹੋਣ ਵਾਲੀਆਂ ਤਰੱਕੀਆਂ ਨੇ ਡਿਸਿਪਲਨ ਮੰਨੀ ਜਾਣ ਵਾਲੀ ਇਸ ਫੋਰਸ 'ਚ ਬਗਾਵਤੀ ਹਾਲਾਤ ਪੈਦਾ ਕੀਤੇ ਸਨ।
ਪਰ ਮਾਹੌਲ ਵਿਗੜਦਾ ਵੇਖ ਸਰਕਾਰ ਵਲੋਂ ਆਈ. ਪੀ. ਐੱਸ. ਅਧਿਕਾਰੀ ਹਰਪ੍ਰੀਤ ਸਿੰਘ ਸਿੱਧੂ 'ਤੇ ਆਧਾਰਤ ਇਕ ਕਮੇਟੀ ਦਾ ਗਠਨ ਕਰਦਿਆਂ ਸੀਨੀਆਰਟੀ ਵਾਈਜ਼ ਵਿਭਾਗ 'ਚ ਤਰੱਕੀਆਂ ਕਰਨ ਦੀ ਨੀਤੀ ਤਿਆਰ ਕੀਤੀ ਸੀ। ਇਸ ਕਮੇਟੀ ਵਲੋਂ ਸੀਨੀਆਰਟੀ ਲਿਸਟ ਬਣਾਉਣ ਸਮੇਂ ਅਪਨਾਈ ਦੁੱਧ ਦਾ ਦੁੱਧ ਅਤੇ ਪਾਣੀ ਦਾ ਪਾਣੀ ਕਰਨ ਸੰਬੰਧੀ ਨੀਤੀ ਨਾਲ ਸਾਲਾਂ ਤੋਂ ਤਰੱਕੀਆਂ ਦਾ ਇੰਤਜ਼ਾਰ ਕਰ ਰਹੇ ਅਧਿਕਾਰੀਆਂ 'ਚ ਉਮੀਦ ਦੀ ਕਿਰਨ ਜਗਾਈ ਗਈ ਸੀ।
ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ 90 ਦੇ ਕਰੀਬ ਇੰਸਪੈਕਟਰ ਰੈਂਕ ਦੇ ਅਧਿਕਾਰੀਆਂ ਦੇ ਨਾਂ ਸੰਬੰਧੀ ਲਿਸਟ ਪ੍ਰਮੋਸ਼ਨ ਲਈ ਵਿਭਾਗ ਦੇ ਕੋਲ ਲੰਬੇ ਸਮੇਂ ਤੋਂ ਪੈਂਡਿੰਗ ਪਈ ਸੀ, ਜਿਸ ਨੂੰ ਕਿਸ਼ਤਾਂ ਵਿਚ ਜਾਰੀ ਕਰਨ ਸੰਬੰਧੀ ਸਰਕਾਰ ਵਲੋਂ ਅਪਨਾਈ ਪਾਲਿਸੀ ਪਹਿਲਾਂ ਹੀ ਉਮੀਦਾਰਾਂ ਲਈ ਪ੍ਰੇਸ਼ਾਨੀ ਦਾ ਕਾਰਨ ਬਣੀ ਹੋਈ ਸੀ। ਕੁਝ ਸਮਾਂ ਪਹਿਲਾਂ ਵਿਭਾਗ ਵਲੋਂ 15 ਦੇ ਕਰੀਬ ਇੰਸਪੈਕਟਰਾਂ ਨੂੰ ਪ੍ਰਮੋਟ ਕਰਦਿਆਂ ਡੀ. ਐੱਸ. ਪੀਜ਼ ਬਣਾ ਦਿੱਤਾ ਗਿਆ ਸੀ ਅਤੇ ਹੁਣ ਜਾਰੀ ਹੋਣ ਵਾਲੀ ਲਿਸਟ 'ਚ ਸਾਲ 1990 'ਚ ਭਰਤੀ ਹੋਏ ਕਰਮਚਾਰੀਆਂ ਦੀ ਵਾਰੀ ਸੀ।
ਪਿਛਲੇ ਕਈ ਮਹੀਨਿਆਂ ਤੋਂ ਆਪਣੀ ਵਾਰੀ ਦਾ ਇੰਤਜ਼ਾਰ ਕਰ ਰਹੇ ਇਨ੍ਹਾਂ ਕਰਮਚਾਰੀਆਂ ਦਾ ਗੁੱਸਾ ਉਸ ਵੇਲੇ ਆਸਮਾਨ 'ਤੇ ਪੁੱਜ ਗਿਆ। ਜਦੋਂ ਉਨ੍ਹਾਂ ਨੇ ਦੋ ਦਿਨ ਪਹਿਲਾਂ ਜਾਰੀ ਹੋਈ ਲਿਸਟ 'ਚ ਆਪਣੇ ਤੋਂ ਕਿਤੇ ਜੂਨੀਅਰ ਚਾਰ ਕਰਮਚਾਰੀਆਂ ਦੇ ਨਾਂ ਵੇਖੇ, ਸਾਰੇ ਕਾਇਦੇ ਕਾਨੂੰਨਾਂ ਨੂੰ ਛਿੱਕੇ 'ਤੇ ਟੰਗਦਿਆਂ ਇੰਟੈਲੀਜੈਂਸ ਵਿਭਾਗ 'ਚ ਤਾਇਨਾਤ ਇਨ੍ਹਾਂ ਕਰਮਚਾਰੀਆਂ ਦੇ ਨਾਂ ਪ੍ਰਮੋਸ਼ਨ ਲਿਸਟ 'ਚ ਆਉਣ ਦੀ ਖਬਰ ਪੂਰੀ ਫੋਰਸ 'ਚ ਅੱਗ ਵਾਂਗ ਫੈਲ ਗਈ ਅਤੇ ਲਿਸਟ 'ਚੋਂ ਬਾਹਰ ਹੋਏ ਇੰਸਪੈਕਟਰਾਂ ਦੇ ਇਕ ਗਰੁੱਪ ਨੇ ਬਿਨਾਂ ਸਮਾਂ ਗੁਆਏ ਤੁਰੰਤ ਚੰਡੀਗੜ੍ਹ ਹੈੱਡ ਕੁਆਰਟਰ ਪੁੱਜ ਕੇ ਆਲਾ ਅਧਿਕਾਰੀਆਂ ਅੱਗੇ ਆਪਣਾ ਰੋਸ ਪ੍ਰਗਟ ਕੀਤਾ। ਜਿਸ 'ਤੇ ਤੁਰੰਤ ਹਰਕਤ 'ਚ ਆਏ ਵਿਭਾਗ ਨੇ ਇਸ ਤੋਂ ਪਹਿਲਾਂ ਕੋਈ ਹੰਗਾਮਾ ਮਚਦਾ, ਤੁਰੰਤ ਲਿਸਟ ਨੂੰ ਵਾਪਸ ਲੈ ਕੇ ਪੀੜਤਾਂ ਦੇ ਜ਼ਖਮਾਂ 'ਤੇ ਮਰਹਮ ਲਗਾਉਣ ਦੀ ਕੋਸ਼ਿਸ਼ ਕੀਤੀ।
ਤਿੰਨ ਮੀਟਿੰਗਾਂ 'ਚ ਗੈਰ-ਹਾਜ਼ਰੀ 'ਤੇ ਛੱਡਣਾ ਪਵੇਗਾ ਅਹੁਦਾ
NEXT STORY 
