ਸਿੱਖ ਕੌਮ ਨੂੰ ਗੌਰਵਮਈ ਇਤਿਹਾਸ ਦੀ ਵਾਰਿਸ ਹੋਣ ਦਾ ਮਾਣ ਪ੍ਰਾਪਤ ਹੋਇਆ ਹੈ। ਗੁਰੂ ਸਾਹਿਬਾਨ ਨੇ ਸਮੁੱਚੀ ਲੋਕਾਈ ਦੇ ਭਲੇ ਲਈ ਸੇਵਾ, ਸਾਦਗੀ, ਪਰਉਪਕਾਰ ਤੇ ਬਲੀਦਾਨ ਦਾ ਉਪਦੇਸ਼ ਦਿੱਤਾ। ਕਰਮਾਂ ਦੀ ਧਾਰਨੀ ਹੈ ਸੰਪਰਦਾਇ ਕਾਰਸੇਵਾ ਸਰਹਾਲੀ ਸਾਹਿਬ। ਇਸ ਸੰਪਰਦਾਇ ਨੇ ਗੁਰੂ ਸਾਹਿਬਾਨ ਦੀ ਸੋਚ 'ਤੇ ਪਹਿਰਾ ਦਿੰਦਿਆਂ ਮਨੁੱਖਤਾ ਦੇ ਭਲੇ ਲਈ ਮਹਾਨ ਕਾਰਜ ਕੀਤੇ। ਇਸ ਸੰਪਰਦਾਇ ਦੀ ਅਗਵਾਈ ਸੰਭਾਲਣ ਵਾਲੇ ਹਰ ਮੁਖੀ ਨੇ ਵਿੱਦਿਅਕ ਸੰਸਥਾਵਾਂ ਤੇ ਹਸਪਤਾਲਾਂ ਦਾ ਨਿਰਮਾਣ, ਲੋੜਵੰਦ ਪਰਿਵਾਰਾਂ ਦੀਆਂ ਲੜਕੀਆਂ ਦੇ ਪੂਰਨ ਰੀਤੀ-ਰਿਵਾਜਾਂ ਨਾਲ ਸਮੂਹਿਕ ਵਿਆਹ ਕਰਾਉਣੇ, ਕੁਦਰਤੀ ਆਫਤਾਂ ਦੇ ਸ਼ਿਕਾਰ ਲੋਕਾਂ ਲਈ ਉਨ੍ਹਾਂ ਦੀ ਹਰ ਸੰਭਵ ਮਦਦ ਕਰਨ ਲਈ ਸੰਪਰਦਾਇ ਦੇ 24 ਘੰਟੇ ਦਰਵਾਜ਼ੇ ਖੁੱਲ੍ਹੇ ਰੱਖਣਾ ਤੇ ਗੁਰੂ ਦੇ ਲੰਗਰ ਚਲਾਉਣੇ ਆਦਿ ਕਾਰਜ ਕੀਤੇ ਹਨ।
ਕਾਰਸੇਵਾ ਸਰਹਾਲੀ ਸਾਹਿਬ ਦੇ ਬਾਨੀ ਸੰਤ ਬਾਬਾ ਤਾਰਾ ਸਿੰਘ ਜੀ ਦਾ ਜਨਮ 1927 ਈਸਵੀ ਨੂੰ ਜ਼ਿਲਾ ਤਰਨਤਾਰਨ ਦੇ ਪਿੰਡ ਸਰਹਾਲੀ ਸਾਹਿਬ ਵਿਖੇ ਪਿਤਾ ਸ. ਮੰਨਾ ਸਿੰਘ ਜੀ ਤੇ ਮਾਤਾ ਮੰਗਲ ਕੌਰ ਜੀ ਦੀ ਪਵਿੱਤਰ ਕੁੱਖੋਂ ਹੋਇਆ। ਆਪ ਜੀ ਸ਼ੁਰੂ ਤੋਂ ਹੀ ਧਾਰਮਿਕ ਬਿਰਤੀ ਵਾਲੇ ਨਿੱਤਨੇਮੀ ਸਨ। ਆਪ ਜੀ ਨੇ 30 ਸਾਲ ਦੀ ਉਮਰ ਤਕ ਆਪਣੇ ਸਾਂਝੇ ਪਰਿਵਾਰ ਦੀ ਪੂਰੀ ਜ਼ਿੰਮੇਵਾਰੀ ਨਿਭਾਈ। ਸੰਤ ਬਾਬਾ ਤਾਰਾ ਸਿੰਘ ਜੀ ਨੇ ਵਿਆਹ ਨਹੀਂ ਕਰਵਾਇਆ ਸੀ। ਉਨ੍ਹਾਂ ਨੇ ਆਪਣਾ ਸਮੁੱਚਾ ਜੀਵਨ ਲੋਕਾਂ ਦੀ ਸੇਵਾ ਤੇ ਰੱਬ ਦੀ ਭਗਤੀ ਵੱਲ ਲਗਾਇਆ। ਬਾਬਾ ਜੀ ਨੇ ਆਪਣੇ ਕਾਰ ਸੇਵਕਾਂ ਦੀ ਪਰਖ ਕਰ ਕੇ ਅੰਤ ਆਪਣੇ ਜਾਨਸ਼ੀਨ ਦੀ ਵਸੀਅਤ ਬਾਬਾ ਚਰਨ ਸਿੰਘ ਜੀ ਦੇ ਨਾਂ ਕਰਵਾ ਦਿੱਤੀ। ਬਾਬਾ ਜੀ ਦੀ ਇਹ ਚੋਣ ਬਹੁਤ ਸਫਲ ਸਾਬਤ ਹੋਈ। 18 ਪੋਹ 1 ਜਨਵਰੀ 1987 ਨੂੰ ਆਪ ਜੀ ਸਰੀਰਕ ਚੋਲਾ ਤਿਆਗ ਕੇ ਅਕਾਲ ਪੁਰਖ ਨਾਲ ਅਭੇਦ ਹੋ ਗਏ। ਸੰਤ ਬਾਬਾ ਚਰਨ ਸਿੰਘ ਜੀ ਨੇ ਵੱਡੇ ਬਾਬਾ ਜੀ ਦੇ ਪਦਚਿਨ੍ਹਾਂ 'ਤੇ ਚਲਦਿਆਂ ਆਪਣੀ ਜ਼ਿੰਮੇਵਾਰੀ ਨਿਭਾਈ। ਸੰਤ ਬਾਬਾ ਚਰਨ ਸਿੰਘ ਜੀ ਦਾ ਜਨਮ 1954 ਈਸਵੀ ਨੂੰ ਸ. ਮੰਨਾ ਸਿੰਘ ਜੀ ਤੇ ਮਾਤਾ ਮੰਗਲ ਕੌਰ ਜੀ ਦੀ ਪਵਿੱਤਰ ਕੁੱਖੋਂ ਹੋਇਆ। ਆਪ ਜੀ ਬਾਣੀ 'ਚ ਸ਼ੁਰੂ ਤੋਂ ਹੀ ਲੀਨ ਰਹਿੰਦੇ ਸਨ। ਆਪ ਜੀ ਵਿਆਹ ਕਰਵਾਉਣ ਵੱਲ ਰੁਚਿਤ ਨਹੀਂ ਸਨ ਪਰ ਵੱਡੇ ਭਰਾ ਸੰਤ ਬਾਬਾ ਤਾਰਾ ਸਿੰਘ ਜੀ ਦੇ ਕਹਿਣ 'ਤੇ ਮਜਬੂਰਨ 17 ਸਾਲ ਦੀ ਉਮਰ ਵਿਚ ਆਪ ਜੀ ਨੂੰ ਵਿਆਹ ਕਰਵਾਉਣਾ ਪਿਆ। ਸੰਤ ਬਾਬਾ ਚਰਨ ਸਿੰਘ ਜੀ ਨੇ ਸਾਰੀ ਉਮਰ ਲੋਕ ਸੇਵਾ ਤੇ ਧਾਰਮਿਕ ਕਾਰਜਾਂ 'ਚ ਬਿਤਾਈ। ਆਪ ਜੀ ਨੇ ਸੰਤ ਬਾਬਾ ਤਾਰਾ ਸਿੰਘ ਜੀ ਵਲੋਂ ਚਲਾਈ ਸੰਪਰਦਾਇ ਕਾਰਸੇਵਾ ਸਰਹਾਲੀ ਸਾਹਿਬ ਨੂੰ ਚੜ੍ਹਦੀ ਕਲਾ ਵੱਲ ਤੋਰਿਆ ਅਤੇ ਨਿਸ਼ਕਾਮ ਰੂਪ 'ਚ ਆਪਣਾ ਜੀਵਨ ਬਿਤਾਇਆ। ਬਾਬਾ ਜੀ ਦਾ ਇਹ ਬਚਨ ਕਿ ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਸਰਹਾਲੀ ਕਲਾਂ ਨਾ ਕੀਤਾ ਜਾਵੇ। ਉਨ੍ਹਾਂ ਦਾ ਇਹ ਬਚਨ ਇਸ਼ਾਰੇ ਜਾਂ ਰਮਜ਼ ਵਜੋਂ ਇਹ ਅਰਥ ਦਿੰਦਾ ਸੀ ਕਿ ਬਾਬਾ ਜੀ ਸੰਪਰਦਾਇ ਦੇ ਬਿਨਾਂ ਵਜ੍ਹਾ ਮਾੜਾ ਸੋਚਣ ਵਾਲਿਆਂ ਤੋਂ ਦੁੱਖ ਮਹਿਸੂਸ ਕਰਿਆ ਕਰਦੇ ਸਨ ਪਰ ਇਲਾਕੇ ਦੀ ਸੰਗਤ ਨੇ ਬਾਬਾ ਜੀ ਪ੍ਰਤੀ ਅਥਾਹ ਸ਼ਰਧਾ ਤੇ ਸਤਿਕਾਰ ਦਿਖਾਉਂਦਿਆ ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਗੁਰਦੁਆਰਾ ਗੁਰਪੁਰੀ ਸਾਹਿਬ ਸਰਹਾਲੀ ਕਲਾਂ ਵਿਖੇ ਹੀ ਕੀਤਾ। ਬਾਬਾ ਜੀ ਇਹ ਕਹਿ ਕੇ ਗਏ ਸਨ ਕਿ ਉਨ੍ਹਾਂ ਦੀ ਯਾਦ ਵਿਚ ਕੋਈ ਯਾਦਗਾਰ ਨਾ ਬਣਾਈ ਜਾਵੇ। ਉਹ ਆਪਣੇ ਆਉਣ ਵਾਲੇ ਸਮੇਂ ਸੰਬੰਧੀ ਵੀ ਭਲੀ-ਭਾਂਤ ਜਾਣੂ ਸਨ। ਬਾਬਾ ਚਰਨ ਸਿੰਘ ਜੀ ਨੇ 11 ਜੁਲਾਈ 2001 ਨੂੰ ਇਸ ਸੰਸਾਰ ਤੋਂ ਆਪਣਾ ਸਰੀਰਕ ਚੋਲਾ ਤਿਆਗ ਜਾਣ ਬਾਰੇ ਆਪਣੇ ਨੇੜਲੇ ਸ਼ਰਧਾਲੂਆਂ ਤੇ ਮਾਤਾ ਜੀ (ਧਰਮਪਤਨੀ ਬਾਬਾ ਚਰਨ ਸਿੰਘ ਜੀ) ਨੂੰ ਸੂਚਿਤ ਕੀਤਾ ਅਤੇ ਉਹ ਕੀਰਤਨ ਤੇ ਅਰਦਾਸ ਉਪਰੰਤ ਸੰਸਾਰ ਤੋਂ ਕੂਚ ਕਰ ਗਏ। ਇਸ ਲਈ ਉਹ ਆਉਣ ਵਾਲੇ ਸਮੇਂ ਸੰਬੰਧੀ ਸੰਪਰਦਾਇ ਬਾਰੇ ਪਹਿਲਾਂ ਹੀ ਸਭ ਕੁਝ ਤੈਅ ਕਰ ਗਏ। ਉਹ ਬਾਬਾ ਸੁੱਖਾ ਸਿੰਘ ਜੀ ਨੂੰ ਸੰਪਰਦਾਇ ਦਾ ਅਗਲਾ ਮੁਖੀ ਥਾਪ ਗਏ। ਇਸ ਤਰ੍ਹਾਂ ਹੁਣ ਬਾਬਾ ਸੁੱਖਾ ਸਿੰਘ ਜੀ ਸੰਪਰਦਾਇ ਕਾਰਸੇਵਾ ਸਰਹਾਲੀ ਸਾਹਿਬ ਦੇ ਤੀਸਰੇ ਮੁਖੀ (ਗੱਦੀਨਸ਼ੀਨ) ਹਨ।
ਸੱਚਖੰਡ ਵਾਸੀ ਸੰਤ ਬਾਬਾ ਤਾਰਾ ਸਿੰਘ ਜੀ, ਸੱਚਖੰਡ ਵਾਸੀ ਸੰਤ ਬਾਬਾ ਚਰਨ ਸਿੰਘ ਜੀ ਸੰਪਰਦਾਇ ਕਾਰਸੇਵਾ ਸਰਹਾਲੀ ਸਾਹਿਬ ਵਾਲਿਆਂ ਦੀ ਯਾਦ ਵਿਚ ਸਾਲਾਨਾ ਵਿਸ਼ਾਲ ਤਿੰਨ ਦਿਨਾ ਬਰਸੀ ਸਮਾਗਮ ਗੁਰਦੁਆਰਾ ਗੁਰਪੁਰੀ ਸਾਹਿਬ ਨਜ਼ਦੀਕ ਚੋਹਲਾ ਸਾਹਿਬ/ ਸਰਹਾਲੀ ਕਲਾਂ ਜ਼ਿਲਾ ਤਰਨਤਾਰਨ ਵਿਖੇ ਸੰਤ ਬਾਬਾ ਸੁੱਖਾ ਸਿੰਘ ਜੀ ਕਾਰਸੇਵਾ ਸਰਹਾਲੀ ਸਾਹਿਬ ਵਾਲਿਆਂ ਦੀ ਰਹਿਨੁਮਾਈ ਹੇਠ 1 ਜਨਵਰੀ 2015 ਤੋਂ ਬੜੀ ਸ਼ਰਧਾ ਤੇ ਭਾਵਨਾ ਨਾਲ ਮਨਾਇਆ ਜਾ ਰਿਹਾ ਹੈ।
- ਮਨਜੀਤ ਸਿੰਘ ਸੰਧੂ
ਜਨਵਰੀ ਮਹੀਨੇ ਦੇ ਵਰਤ-ਤਿਉਹਾਰ
NEXT STORY 
