ਅਕਸਰ ਅਸੀਂ ਪੇਟ ਦਰਦ ਹੋਣ 'ਤੇ ਆਪਣੀ ਖੁਰਾਕ ਵੱਲ ਧਿਆਨ ਨਹੀਂ ਦਿੰਦੇ। ਅਸੀਂ ਇਹ ਨਹੀਂ ਸੋਚਦੇ ਕਿ ਜੋ ਖੁਰਾਕ ਅਸੀਂ ਖਾਣ ਵਾਲੇ ਹਾਂ ਕਿਤੇ ਇਹ ਸਾਡੀ ਪਰੇਸ਼ਾਨੀ ਨੂੰ ਹੋਰ ਤਾਂ ਨਹੀਂ ਵਧਾ ਦੇਵੇਗੀ। ਇਕ ਗੱਲ ਯਾਦ ਰੱਖੋ ਕਿ ਜਦੋਂ ਕਦੇ ਵੀ ਤੁਹਾਡੇ ਪੇਟ ਦਰਦ ਭਾਵੇਂ ਕਿਸੇ ਕਾਰਨ ਵੀ ਹੋਵੇ, ਉਸ ਦੌਰਾਨ ਕੋਈ ਵੀ ਭੋਜਨ ਸਹੀ ਤਰ੍ਹਾਂ ਨਹੀਂ ਪਚਦਾ। ਜਾਣਦੇ ਹਾਂ ਉਹ ਕਿਹੜੇ ਭੋਜਨ ਪਦਾਰਥ ਹਨ, ਜੋ ਤੁਹਾਨੂੰ ਇਸ ਸਥਿਤੀ 'ਚ ਨਹੀਂ ਖਾਣੇ-ਪੀਣੇ ਚਾਹੀਦੇ।
ਦੁੱਧ ਅਤੇ ਦੁੱਧ ਉਤਪਾਦ
ਦੁੱਧ ਅਤੇ ਇਸ ਤੋਂ ਬਣੇ ਉਤਪਾਦਾਂ 'ਚ ਲੈਕਟੋਜ਼ ਹੁੰਦਾ ਹੈ, ਜੋ ਛੇਤੀ ਕੁਝ ਨਹੀਂ ਪਚਣ ਦਿੰਦਾ। ਇਸ ਕਾਰਨ ਪੇਟ 'ਚ ਸੋਜ ਜਾਂ ਗੈਸ ਦੀ ਸਮੱਸਿਆ ਹੋ ਸਕਦੀ ਹੈ। ਕਦੇ ਵੀ ਬਦਹਜ਼ਮੀ ਹੋਵੇ ਤਾਂ ਦੁੱਧ ਜਾਂ ਇਸ ਤੋਂ ਬਣੇ ਉਤਪਾਦਾਂ ਦਾ ਸੇਵਨ ਨਹੀਂ ਕਰਨਾ ਚਾਹੀਦਾ। ਹਾਂ ਦਹੀਂ ਜ਼ਰੂਰ ਖਾ ਸਕਦੇ ਹੋ ਕਿਉਂਕਿ ਇਸ 'ਚ ਲੈਕਟੋਜ਼ ਨਹੀਂ ਪਾਇਆ ਜਾਂਦਾ।
ਵਧੇਰੇ ਤੇਲ ਅਤੇ ਮਸਾਲਿਆਂ ਵਾਲਾ ਭੋਜਨ
ਜੀ ਕੱਚਾ ਹੋ ਰਿਹਾ ਹੋਵੇ ਜਾਂ ਫਿਰ ਦਸਤ ਲੱਗੇ ਹੋਣ ਤਾਂ ਜਾਣ ਲਓ ਕਿ ਤੇਲ ਅਤੇ ਮਸਾਲਿਆਂ ਵਾਲੇ ਖਾਣੇ ਤੋਂ ਤੁਹਾਡਾ ਪਰਹੇਜ਼ ਕਰਨਾ ਹੀ ਲਾਜ਼ਮੀ ਹੈ। ਇਸ ਸਥਿਤੀ 'ਚ ਹਲਕੇ ਅਤੇ ਲੋੜੀਂਦੇ ਪਾਣੀ ਵਾਲੇ ਪਦਾਰਥਾਂ ਦਾ ਸੇਵਨ ਹੀ ਫਾਇਦੇਮੰਦ ਹੁੰਦਾ ਹੈ, ਜਿਵੇਂ ਖਿਚੜੀ, ਦਹੀਂ-ਚੌਲ ਅਤੇ ਉਬਲੇ ਆਲੂ ਖਾਣ ਨਾਲ ਊਰਜਾ ਮਿਲਦੀ ਹੈ।
ਖੱਟੀਆਂ ਚੀਜ਼ਾਂ ਵਧਾਉਣ ਸਮੱਸਿਆ
ਜੇਕਰ ਬਦਹਜ਼ਮੀ ਦੇ ਨਾਲ-ਨਾਲ ਪੇਟ 'ਚ ਦਰਦ ਅਤੇ ਮਰੋੜ ਉੱਠ ਰਹੇ ਹੋਣ ਜਾਂ ਫਿਰ ਗੈਸ ਦੀ ਸਮੱਸਿਆ ਹੋਵੇ ਤਾਂ ਟਮਾਟਰ ਸੌਸ ਜਾਂ ਖੱਟੇ ਫਲਾਂ ਜਿਵੇਂ ਨਿੰਬੂ, ਸੰਤਰਾ ਅਤੇ ਅੰਗੂਰ ਆਦਿ ਤੋਂ ਦੂਰ ਹੀ ਰਹੋ। ਇਨ੍ਹਾਂ ਤੋਂ ਇਲਾਵਾ ਜਿਨ੍ਹਾਂ ਚੀਜ਼ਾਂ 'ਚ ਮਿੱਠੇ ਸੋਡੇ ਦੀ ਵਰਤੋਂ ਹੋਈ ਹੋਵੇ, ਉਨ੍ਹਾਂ ਤੋਂ ਵੀ ਦੂਰ ਰਹਿਣਾ ਚਾਹੀਦੈ।
ਪਨੀਰ, ਆਈਸਕ੍ਰੀਮ ਅਤੇ ਮੱਖਣ, ਨਾ ਬਾਬਾ ਨਾ
ਤੁਹਾਡਾ ਪਾਚਨ ਤੰਤਰ ਜਿੰਨਾ ਮਰਜ਼ੀ ਮਜ਼ਬੂਤ ਹੋਵੇ ਪਰ ਭੋਜਨ ਪਚਾਉਣ ਲਈ ਤੁਹਾਨੂੰ ਮਿਹਨਤ ਕਰਨੀ ਹੀ ਪੈਂਦੀ ਹੈ। ਪਨੀਰ ਵਰਗੇ ਭੋਜਨ ਨੂੰ ਪਚਾਉਣ 'ਚ ਪਾਣੀ ਵੀ ਵਧੇਰੇ ਲੱਗਦੈ, ਇਸ ਲਈ ਡਾਇਰੀਆ (ਦਸਤ ਲੱਗਣੇ) ਦੌਰਾਨ ਫੈਟ ਵਾਲੀਆਂ ਚੀਜ਼ਾਂ ਖਾਣ ਤੋਂ ਬਚੋ। ਅਜਿਹੇ ਨਾਜ਼ੁਕ ਸਮੇਂ 'ਚ ਆਈਸਕ੍ਰੀਮ, ਮੱਖਣ, ਰੈੱਡ ਮੀਟ, ਪਨੀਰ, ਪੇਸਟ੍ਰੀ, ਘਿਓ, ਤੇਲ ਅਤੇ ਕ੍ਰੀਮ ਆਦਿ ਦਾ ਸੇਵਨ ਨਾ ਹੀ ਕਰੋ ਤਾਂ ਬਿਹਤਰ ਹੋਵੇਗਾ।
ਚਾਹ, ਕੌਫੀ ਅਤੇ ਚਾਕਲੇਟ
ਜੇਕਰ ਪੇਟ 'ਚ ਐਸੀਡਿਟੀ ਹੋਵੇ ਤਾਂ ਤਲਬ ਲੱਗਣ 'ਤੇ ਵੀ ਚਾਹ, ਕੌਫੀ ਜਾਂ ਚਾਕਲੇਟ ਖਾਣ ਦੀ ਗਲਤੀ ਨਾ ਕਰੋ ਕਿਉਂਕਿ ਇਨ੍ਹਾਂ 'ਚ ਮੌਜੂਦ ਕੈਫੀਨ, ਪੇਟ 'ਚ ਐਸਿਡ ਦੀ ਮਾਤਰਾ ਵਧਾਉਣ 'ਚ ਸਹਾਇਕ ਹੋਵੇਗਾ। ਵਧੇਰੇ ਕੈਫੀਨ ਨਾਲ ਕਬਜ਼ ਦੀ ਸਮੱਸਿਆ ਹੋ ਸਕਦੀ ਹੈ। ਜੇਕਰ ਤੁਹਾਨੂੰ ਐਸੀਡਿਟੀ ਦੀ ਸਮੱਸਿਆ ਰਹਿੰਦੀ ਹੈ ਤਾਂ ਆਮ ਦਿਨਾਂ 'ਚ ਵੀ ਬਹੁਤੀ ਚਾਹ-ਕੌਫੀ ਨਾ ਪੀਓ। ਇਕੱਲੀ ਚਾਹ-ਕੌਫੀ ਪੀਣ ਦੀ ਬਜਾਏ ਇਸ ਨਾਲ ਖਾਖਰਾ, ਨਮਕੀਨ ਛੋਲੇ, ਬਿਸਕੁਟ ਜਾਂ ਟੋਸਟ ਆਦਿ ਲਓ।
ਡੱਬਾਬੰਦ ਖਾਣੇ ਅਤੇ ਮੈਦੇ ਤੋਂ ਦੂਰ ਰਹੋ
ਜਦੋਂ ਵੀ ਕਬਜ਼ ਹੋਵੇ ਤਾਂ ਕੋਸ਼ਿਸ਼ ਕਰੋ ਕਿ ਡੱਬਾਬੰਦ ਖਾਧ ਪਦਾਰਥਾਂ ਜਿਵੇਂ ਜੈਮ, ਜੈਲੀ, ਨੂਡਲਸ ਅਤੇ ਮੈਦੇ ਤੋਂ ਬਣੀਆਂ ਚੀਜ਼ਾਂ ਦੇ ਸੇਵਨ ਤੋਂ ਬਚੋ। ਇਨ੍ਹਾਂ 'ਚ ਫਾਈਬਰ ਦੀ ਕਮੀ ਹੁੰਦੀ ਹੈ, ਜਿਸ ਕਾਰਨ ਇਹ ਛੇਤੀ ਪਚਦੇ ਨਹੀਂ। ਜ਼ਿਆਦਤਰ ਡੱਬਾਬੰਦ ਪਦਾਰਥਾਂ 'ਚ ਆਰਟੀਫਿਸ਼ੀਅਲ ਮਿਠਾਸ ਅਤੇ ਰੰਗ ਮਿਲਾਏ ਜਾਂਦੇ ਹਨ। ਇਨ੍ਹਾਂ ਦਾ ਸੇਵਨ ਗੈਸ ਅਤੇ ਬਦਹਜ਼ਮੀ ਦੀ ਸਮੱਸਿਆ ਪੈਦਾ ਕਰ ਸਕਦਾ ਹੈ।
ਜਾਣੋ ਅਖਰੋਟ ਕਿਵੇਂ ਵਾਲਾਂ ਨੂੰ ਸਫੇਦ ਹੋਣ ਤੋਂ ਰੋਕਦਾ ਹੈ
NEXT STORY 
