ਖਰੜ (ਅਮਰਦੀਪ) – ਪੰਜਾਬੀ ਫਿਲਮਾਂ ਤੇ ਗਾਇਕੀ 'ਚ ਨਾਮਣਾ ਖੱਟਣ ਵਾਲੇ ਜੱਸੀ ਜਸਰਾਜ ਨੇ ਖਰੜ ਦੇ ਇਕ ਕਾਂਗਰਸ ਦੇ ਕੌਂਸਲਰ, ਬਿਲਡਰ ਤੇ ਉਸਦੇ ਸਾਥੀਆਂ ਵਲੋਂ ਉਸ 'ਤੇ ਜਾਨਲੇਵਾ ਹਮਲਾ ਕਰਨ ਸਬੰਧੀ ਥਾਣਾ ਸਿਟੀ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਹੈ।
ਜੱਸੀ ਜਸਰਾਜ ਨੇ ਦੱਸਿਆ ਕਿ ਉਹ ਬੀਤੀ ਰਾਤ 10:30 ਵਜੇ ਅਮਨ ਸਿਟੀ ਖਰੜ ਆਪਣੇ ਦੋਸਤ ਨੂੰ ਛੱਡ ਕੇ ਜਦੋਂ ਆਪਣੇ ਘਰ ਸੰਨੀ ਇਨਕਲੇਵ ਨੂੰ ਆ ਰਿਹਾ ਸੀ ਤਾਂ ਇਨਕਲੇਵ ਦੀ ਅੰਦਰਲੀ ਮਾਰਕੀਟ ਨੇੜੇ ਦੋ-ਤਿੰਨ ਲੋਕਾਂ ਨੇ ਉਸਦੀ ਕਾਰ 'ਤੇ ਪੱਥਰਾਂ ਨਾਲ ਹਮਲਾ ਕਰ ਦਿੱਤਾ, ਜਿਸ ਕਾਰਨ ਉਸਦੀ ਕਾਰ ਦਾ ਪਿਛਲਾ ਸ਼ੀਸ਼ਾ ਟੁੱਟ ਗਿਆ। ਉਸਨੇ ਦੱਸਿਆ ਕਿ ਹਮਲਾਵਰ ਡੰਡਿਆਂ ਤੇ ਹਥਿਆਰਾਂ ਨਾਲ ਲੈਸ ਸਨ ਤੇ ਉਸ ਨੇ ਆਪਣੀ ਜਾਨ ਬਚਾਉਣ ਲਈ ਘਟਨਾ ਸਥਾਨ ਤੋਂ ਕਾਰ ਭਜਾ ਲਈ।
ਜਸਰਾਜ ਨੇ ਆਖਿਆ ਕਿ ਉਸ ਨੇ ਖਰੜ ਦੇ ਇਕ ਕਾਂਗਰਸ ਕੌਂਸਲਰ ਤੇ ਬਿਲਡਰ ਅਤੇ ਉਸਦੇ ਦੋ ਸਾਥੀਆਂ ਖਿਲਾਫ ਪਿੰਡ ਦੇਸੂ ਮਾਜਰਾ ਦੀ ਸ਼ਾਮਲਾਟ ਦੀ ਗਲਤ ਢੰਗ ਨਾਲ ਰਜਿਸਟਰੀ ਕਰਵਾਉਣ ਸਬੰਧੀ ਥਾਣਾ ਸਦਰ 'ਚ ਮਾਮਲਾ ਦਰਜ ਕਰਵਾਇਆ ਸੀ ਤੇ ਉਸ ਨੂੰ ਸ਼ੱਕ ਹੈ ਕਿ ਉਕਤ ਵਿਅਕਤੀਆਂ ਨੇ ਹੀ ਉਸ 'ਤੇ ਜਾਨਲੇਵਾ ਹਮਲਾ ਕਰਾਉਣ ਦੀ ਕੋਸ਼ਿਸ਼ ਕੀਤੀ ਹੈ।
45 ਦਿਨਾਂ ਬਾਅਦ ਵੀ ਗ੍ਰਿਫਤਾਰ ਨਹੀਂ ਕੀਤਾ ਬਿਲਡਰ
ਜੱਸੀ ਜਸਰਾਜ ਨੇ ਪੁਲਸ 'ਤੇ ਦੋਸ਼ ਲਾਉਂਦਿਆਂ ਕਿਹਾ ਹੈ ਕਿ ਦੋਸ਼ੀ ਬਿਲਡਰ ਖਿਲਾਫ ਧੋਖਾਦੇਹੀ ਦਾ ਮਾਮਲਾ ਦਰਜ ਹੋ ਚੁੱਕਾ ਹੈ ਤੇ ਪੁਲਸ ਉਸ ਨੂੰ ਪੁੱਛਗਿੱਛ ਲਈ ਥਾਣੇ ਵੀ ਬੁਲਾ ਚੁੱਕੀ ਹੈ ਪਰ ਥਾਣੇ ਬੁਲਾ ਕੇ ਪੁਲਸ ਨੇ ਬਿਲਡਰ ਨੂੰ ਛੱਡ ਦਿੱਤਾ ਸੀ ਤੇ ਹੁਣ 45 ਦਿਨ ਬੀਤ ਜਾਣ ਉਪਰੰਤ ਵੀ ਸਦਰ ਥਾਣਾ ਪੁਲਸ ਉਸ ਨੂੰ ਗ੍ਰਿਫਤਾਰ ਨਹੀਂ ਕਰ ਸਕੀ। ਜੱਸੀ ਜਸਰਾਜ ਨੇ ਆਖਿਆ ਕਿ ਬਿਲਡਰ, ਜੋ ਕਿ ਕਾਂਗਰਸ ਪਾਰਟੀ ਨਾਲ ਸਬੰਧ ਰੱਖਦਾ ਹੈ, ਨੂੰ ਜਾਣਬੁੱਝ ਕੇ ਪੁਲਸ ਗ੍ਰਿਫਤਾਰ ਨਹੀਂ ਕਰ ਰਹੀ।
ਕੀ ਕਹਿਣਾ ਹੈ ਐੱਸ. ਐੱਚ. ਓ ਦਾ
ਇਸ ਸਬੰਧੀ ਸੰਪਰਕ ਕਰਨ 'ਤੇ ਥਾਣਾ ਸਦਰ ਦੇ ਐੱਸ. ਐੱਚ. ਓ. ਭਗਵੰਤ ਸਿੰਘ ਨੇ ਆਖਿਆ ਕਿ ਕੌਂਸਲਰ ਨੇ ਇਸ ਮਾਮਲੇ ਵਿਚ ਦੋਬਾਰਾ ਐੱਸ. ਪੀ. ਹੈੱਡਕੁਆਰਟਰ ਤੋਂ ਇਨਕੁਆਰੀ ਲਈ ਅਰਜ਼ੀ ਦਾਖਿਲ ਕੀਤੀ ਹੈ। ਪੜਤਾਲ ਪੂਰੀ ਹੋਣ ਤੋਂ ਬਾਅਦ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।
ਟਰੈਫਿਕ ਪੁਲਸ ਨੇ 2 ਦਰਜਨ ਵਾਹਨਾਂ ਦੇ ਕੀਤੇ ਚਲਾਨ, 2 ਕੀਤੇ ਜ਼ਬਤ
NEXT STORY 
