ਅੰਮ੍ਰਿਤਸਰ (ਦਲਜੀਤ)- ਪੰਜਾਬ ਦਾ ਸਭ ਤੋਂ ਵੱਡਾ ਸਰਕਾਰੀ ਬਲੱਡ ਬੈਂਕ ਰਾਤ ਨੂੰ ਬਿਨਾਂ ਡਾਕਟਰ ਦੀ ਮੌਜੂਦਗੀ ਤੋਂ ਚੱਲਦਾ ਹੈ। ਸਰਕਾਰ ਵੱਲੋਂ ਕਰੋੜਾਂ ਰੁਪਏ ਖਰਚ ਕੇ ਅਤੇ ਅਤਿ-ਆਧੁਨਿਕ ਤਕਨੀਕ ਦੀ ਵਰਤੋਂ ਕਰ ਕੇ ਬਣਾਏ ਗਏ ਇਸ ਬਲੱਡ ਬੈਂਕ ਵਿਚ ਨਾ ਤਾਂ ਰਾਤ ਨੂੰ ਆਉਣ ਵਾਲੇ ਮਰੀਜ਼ਾਂ ਦਾ ਖ਼ੂਨ ਕੱਢ ਕੇ ਉਸ ਦੀ ਥਾਂ ਨਵਾਂ ਖ਼ੂਨ ਦਿੱਤਾ ਜਾਂਦਾ ਹੈ ਅਤੇ ਨਾ ਹੀ ਕੋਈ ਉੱਚ ਅਧਿਕਾਰੀ ਦੇਰ ਰਾਤ ਮਰੀਜ਼ਾਂ ਨੂੰ ਦਰਪੇਸ਼ ਮੁਸ਼ਕਿਲਾਂ ਦਾ ਹੱਲ ਕਰਨ ਲਈ ਆਉਂਦਾ ਹੈ। ਪੰਜਾਬ ਭਰ ਦੇ ਮਸ਼ਹੂਰ ਬਲੱਡ ਬੈਂਕ ਸਿਰਫ਼ ਲੈਬਾਰਟਰੀ ਟੈਕਨੀਸ਼ੀਅਨਾਂ ਦੇ ਸਹਾਰੇ ਹੀ ਰਹਿ ਗਏ ਹਨ। ਇਹ ਕੰਮ ਅੱਜ ਤੋਂ ਨਹੀਂ ਪਿਛਲੇ ਕੁਝ ਸਮੇਂ ਤੋਂ ਚੱਲ ਰਿਹਾ ਹੈ। ਬਲੱਡ ਬੈਂਕ ਦੇ ਇੰਚਾਰਜ ਡਾ. ਨੀਰਜ ਸ਼ਰਮਾ ਇਸ ਸਬੰਧੀ ਨਾ ਤਾਂ ਕੁਝ ਦੱਸਦੇ ਹਨ ਅਤੇ ਨਾ ਹੀ ਫ਼ੋਨ ਚੁੱਕਣਾ ਮੁਨਾਸਿਬ ਸਮਝਦੇ ਹਨ। ਅਸੀਂ ਗੱਲ ਕਰ ਰਹੇ ਹਾਂ ਪੰਜਾਬ ਦੇ ਸਭ ਤੋਂ ਵੱਡੇ ਸਰਕਾਰੀ ਗੁਰੂ ਨਾਨਕ ਦੇਵ ਹਸਪਤਾਲ ਵਿਚ ਸਥਿਤ ਸਰਕਾਰੀ ਬਲੱਡ ਬੈਂਕ ਦੀ।
ਜਾਣਕਾਰੀ ਅਨੁਸਾਰ ਮਰੀਜ਼ਾਂ ਨੂੰ ਵਧੀਆ ਸੇਵਾਵਾਂ ਦੇਣ ਲਈ ਪੰਜਾਬ ਸਰਕਾਰ ਵੱਲੋਂ ਪੰਜਾਬ ਦੇ ਸਭ ਤੋਂ ਵੱਡੇ ਸਰਕਾਰੀ ਗੁਰੂ ਨਾਨਕ ਦੇਵ ਹਸਪਤਾਲ ਵਿਚ ਸਭ ਤੋਂ ਵੱਡਾ ਸਰਕਾਰੀ ਬਲੱਡ ਬੈਂਕ ਖੋਲ੍ਹਿਆ ਗਿਆ ਹੈ। ਮੈਡੀਕਲ ਸਿੱਖਿਆ ਤੇ ਖੋਜ ਵਿਭਾਗ ਵੱਲੋਂ ਇਸ ਬਲੱਡ ਬੈਂਕ ਨੂੰ 24 ਘੰਟੇ ਚਲਾਉਣ ਦਾ ਦਾਅਵਾ ਕੀਤਾ ਗਿਆ, ਜਦੋਂ ਕਿ ਅਸਲੀਅਤ ਕੁਝ ਹੋਰ ਹੈ। ਹਰ ਰੋਜ਼ ਹਸਪਤਾਲ ਵਿਚ ਦਾਖ਼ਲ ਦਰਜਨਾਂ ਮਰੀਜ਼ ਅਤੇ ਬਾਹਰੋਂ ਪ੍ਰਾਈਵੇਟ ਹਸਪਤਾਲਾਂ ਵਿਚ ਦਾਖ਼ਲ ਮਰੀਜ਼ ਖ਼ੂਨ ਲੈਣ ਲਈ ਇਸ ਬਲੱਡ ਬੈਂਕ ਵਿਚ ਆਉਂਦੇ ਹਨ। ਦਿਨ ਵੇਲੇ ਤਾਂ ਨਿਯਮਾਂ ਅਨੁਸਾਰ ਕੰਮ ਚੱਲਦਾ ਹੈ ਪਰ ਰਾਤ ਵੇਲੇ ਕੋਈ ਵੀ ਸੀਨੀਅਰ ਡਾਕਟਰ ਬਲੱਡ ਬੈਂਕ ਵਿਚ ਮੌਜੂਦ ਨਹੀਂ ਹੁੰਦਾ। ਇੱਥੋਂ ਤੱਕ ਕਿ ਜਦੋਂ ਮਰੀਜ਼ ਨੂੰ ਕੋਈ ਸਮੱਸਿਆ ਆਉਂਦੀ ਹੈ ਤਾਂ ਕੋਈ ਵੀ ਉੱਚ ਅਧਿਕਾਰੀ ਇਸ ਦੇ ਹੱਲ ਲਈ ਹਾਜ਼ਰ ਨਹੀਂ ਹੁੰਦਾ।
ਇਹ ਵੀ ਪੜ੍ਹੋ : ਫਾਈਨਲ ਪ੍ਰੀਖਿਆ ਦੇ ਸਮੇਂ ਚੋਣ ਡਿਊਟੀਆਂ ਦੇ ਖੌਫ਼ ’ਚ ਮਹਿਲਾ ਟੀਚਰ, ਵਿਦਿਆਰਥੀਆਂ ਦੀ ਵੀ ਵਧੇਗੀ ਚਿੰਤਾ
ਇਸ ਸਬੰਧੀ ਜਦੋਂ ਜਗ ਬਾਣੀ ਦੀ ਟੀਮ ਨੇ ਦੇਰ ਰਾਤ ਹਸਪਤਾਲ ਦਾ ਮੁਆਇਨਾ ਕੀਤਾ ਤਾਂ ਦੇਖਿਆ ਗਿਆ ਕਿ ਰਾਤ ਸਮੇਂ ਸਿਰਫ਼ ਲੈਬਾਰਟਰੀ ਟੈਕਨੀਸ਼ੀਅਨ ਅਤੇ ਇਕ ਦਰਜਾਚਾਰ ਮੁਲਾਜ਼ਮ ਹੀ ਡਿਊਟੀ ’ਤੇ ਮੌਜੂਦ ਸਨ, ਜਦੋਂਕਿ ਨਾ ਤਾਂ ਕੋਈ ਸੀਨੀਅਰ, ਨਾ ਕੋਈ ਡਾਕਟਰ ਤੇ ਨਾ ਹੀ ਕੋਈ ਉੱਚ ਅਧਿਕਾਰੀ ਡਿਊਟੀ ’ਤੇ ਹਾਜ਼ਰ ਸੀ। ਹਸਪਤਾਲ ਵਿਚ ਗਾਇਨੀਕੋਲੋਜੀ, ਮੈਡੀਸਨ, ਆਰਥੋ, ਸਰਜਰੀ, ਬਾਲ ਰੋਗ ਵਿਭਾਗ, ਆਈ .ਸੀ .ਯੂ., ਐਮਰਜੈਂਸੀ ਆਦਿ ਮੁੱਖ ਵਾਰਡ ਹਨ, ਜਿਨ੍ਹਾਂ ਵਿੱਚੋਂ ਹਰ ਰੋਜ਼ ਦਾਖਲ ਮਰੀਜ਼ ਖੂਨ ਲੈਣ ਲਈ ਇਸ ਬਲੱਡ ਬੈਂਕ ਦੀ ਵਰਤੋਂ ਕਰਦੇ ਹਨ। ਰਾਤ ਸਮੇਂ ਕੁਝ ਮੁਲਾਜ਼ਮ ਅਜਿਹੇ ਹਨ ਜੋ ਹਸਪਤਾਲ ਵਿਚ ਦਾਖ਼ਲ ਆਪਣੇ ਮਰੀਜ਼ ਦੀ ਜਾਨ ਬਚਾਉਣ ਲਈ ਐਮਰਜੈਂਸੀ ਦੀ ਹਾਲਤ ਵਿਚ ਖ਼ੂਨ ਲੈਣ ਲਈ ਦੇਰ ਰਾਤ ਆਉਂਦੇ ਹਨ ਪਰ ਮੁਲਾਜ਼ਮਾਂ ਨੇ ਉਨ੍ਹਾਂ ਨੂੰ ਇਹ ਕਹਿ ਕੇ ਭੇਜ ਦਿੱਤਾ ਕਿ ਸਵੇਰੇ ਆ ਜਾਓ, ਰਾਤ ਨੂੰ ਖ਼ੂਨ ਨਹੀਂ ਹੈ ਅਤੇ ਸਵੇਰੇ ਆ ਕੇ ਖ਼ੂਨ ਦੇਖਣ ਤੋਂ ਬਾਅਦ ਖ਼ੂਨ ਲੈਣ। ਕੁਝ ਮੁਲਾਜ਼ਮ ਅਜਿਹੇ ਵੀ ਹਨ ਜੋ ਮਰੀਜ਼ ਨੂੰ ਸਿੱਧੇ ਤੌਰ ’ਤੇ ਦੱਸਦੇ ਹਨ ਕਿ ਇਹ ਸਰਕਾਰੀ ਬਲੱਡ ਬੈਂਕ ਹੈ ਪਰ ਇੱਥੇ ਖ਼ੂਨ ਦੇ ਬਦਲੇ ਖ਼ੂਨ ਦਿੱਤਾ ਜਾਂਦਾ ਹੈ, ਮੁਫ਼ਤ ਵਿਚ ਕੁਝ ਨਹੀਂ ਦਿੱਤਾ ਜਾਂਦਾ।
ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਬਲੱਡ ਬੈਂਕ ਵਿਚ ਸਵੇਰ ਵੇਲੇ ਕਾਫੀ ਸਟਾਫ ਹੁੰਦਾ ਹੈ ਪਰ ਇਨ੍ਹਾਂ ਵਿਚੋਂ ਜ਼ਿਆਦਾਤਰ ਸਟਾਫ ਰਾਤ ਨੂੰ ਡਿਊਟੀ ’ਤੇ ਨਹੀਂ ਲਗਾਇਆ ਗਿਆ। ਇੱਥੋਂ ਤੱਕ ਕਿ ਮਰੀਜ਼ਾਂ ਦੀਆਂ ਸਮੱਸਿਆਵਾਂ ਨੂੰ ਵੀ ਅਣਗੌਲਿਆਂ ਕੀਤਾ ਜਾਂਦਾ ਹੈ। ਦੱਸਿਆ ਜਾਂਦਾ ਹੈ ਕਿ ਇਹ ਪੰਜਾਬ ਦਾ ਸਭ ਤੋਂ ਵੱਡਾ ਬਲੱਡ ਬੈਂਕ ਹੈ ਪਰ ਰਾਤ ਸਮੇਂ ਇਕ-ਦੋ ਮੁਲਾਜ਼ਮਾਂ ਨੂੰ ਛੱਡ ਕੇ ਸੀਨੀਅਰਜ਼ ਇੱਥੇ ਮੌਜੂਦ ਨਹੀਂ ਹੁੰਦੇ। ਜੇਕਰ ਇਕ ਪਾਸੇ ਸਰਕਾਰ ਇਸ ਬਲੱਡ ਬੈਂਕ ਨੂੰ 24 ਘੰਟੇ ਖੁੱਲ੍ਹਾ ਰੱਖਣ ਦਾ ਦਾਅਵਾ ਕਰਦੀ ਹੈ ਤਾਂ ਫਿਰ ਬਲੱਡ ਬੈਂਕਾਂ ਨੂੰ ਰਾਤ ਨੂੰ ਸਵੇਰੇ ਜਿੰਨੀਆਂ ਸਹੂਲਤਾਂ ਨਹੀਂ ਦਿੱਤੀਆਂ ਜਾ ਰਹੀਆਂ? ਇਹ ਸਰਕਾਰੀ ਸਿਸਟਮ ’ਤੇ ਵੱਡਾ ਸਵਾਲੀਆ ਨਿਸ਼ਾਨ ਹੈ। ਇਸ ਸਬੰਧੀ ਜਦੋਂ ਬਲੱਡ ਬੈਂਕ ਦੇ ਇੰਚਾਰਜ ਡਾ. ਨੀਰਜ ਸ਼ਰਮਾ ਨਾਲ ਫ਼ੋਨ ’ਤੇ ਗੱਲ ਕਰਨ ਦੀ ਕੋਸ਼ਿਸ ਕੀਤੀ ਤਾਂ ਉਨ੍ਹਾਂ ਪਹਿਲਾਂ ਵਾਂਗ ਆਪਣਾ ਫ਼ੋਨ ਚੁੱਕਣਾ ਮੁਨਾਸਿਬ ਨਹੀਂ ਸਮਝਿਆ, ਜਦੋਂ ਮਰੀਜ਼ ਅਕਸਰ ਇੰਚਾਰਜ ਨੂੰ ਫੋਨ ਕਰਦੇ ਹਨ ਤਾਂ ਵੀ ਇੰਚਾਰਜ ਉਨ੍ਹਾਂ ਦਾ ਫੋਨ ਨਹੀਂ ਚੁੱਕਦੇ।
ਇਹ ਵੀ ਪੜ੍ਹੋ : ਅਦਾਲਤ ਵੱਲੋਂ ਸਖ਼ਤ ਹੁਕਮ ਜਾਰੀ, ਰੇਤ ਦੀਆਂ ਸਰਕਾਰੀ ਖੱਡਾਂ 'ਚ ਸੈਨਾ ਤੇ BSF ਦੀ NOC ਬਿਨਾਂ ਨਹੀਂ ਹੋਵੇਗੀ ਮਾਈਨਿੰਗ
ਰਾਤ ਨੂੰ ਬਿਨ੍ਹਾਂ ਡਾਕਟਰ ਦੀ ਇਜਾਜ਼ਤ ਤੋਂ ਲੈਬਾਰਟਰੀ ਟੈਕਨੀਸ਼ੀਅਨ ਜਾਰੀ ਕਰਦੇ ਹਨ ਬਲੱਡ
ਰਾਤ ਸਮੇਂ ਸਰਕਾਰੀ ਬਲੱਡ ਬੈਂਕ ਵਿਚ ਡਾਕਟਰ ਨਾ ਹੋਣ ਕਾਰਨ ਲੈਬਾਰਟਰੀ ਟੈਕਨੀਸ਼ੀਅਨ ਆਪਣੇ ਪੱਧਰ ’ਤੇ ਮੰਗ ਅਨੁਸਾਰ ਮਰੀਜ਼ ਦੇ ਪਰਿਵਾਰਕ ਮੈਂਬਰਾਂ ਨੂੰ ਖੂਨ ਸੌਂਪ ਦਿੰਦੇ ਹਨ। ਲੈਬਾਰਟਰੀ ਟੈਕਨੀਸ਼ੀਅਨ ਟੈਸਟ ਕਰਨ ਤੱਕ ਅਤੇ ਟੈਸਟ ਦਾ ਧਿਆਨ ਰੱਖਣ ਤੱਕ ਹੀ ਸੀਮਤ ਹੁੰਦੇ ਹਨ ਪਰ ਰਾਤ ਨੂੰ ਕਿਸੇ ਡਾਕਟਰ ਜਾਂ ਸੀਨੀਅਰ ਦੀ ਹਾਜ਼ਰੀ ਤੋਂ ਬਿਨਾਂ ਮਰੀਜ਼ਾਂ ਦੇ ਪਰਿਵਾਰਿਕ ਮੈਂਬਰਾਂ ਨੂੰ ਖੂਨ ਦੇਣਾ ਸਰਕਾਰੀ ਸਿਸਟਮ ’ਤੇ ਸਵਾਲ ਖੜ੍ਹੇ ਕਰਦਾ ਹੈ? ਹੁਣ ਦੇਖਣਾ ਇਹ ਹੋਵੇਗਾ ਕਿ ਕੀ ਮੈਡੀਕਲ ਸਿੱਖਿਆ ਤੇ ਖੋਜ ਵਿਭਾਗ ਕੁੰਭਕਰਨੀ ਨੂੰ ਨੀਂਦ ਤੋਂ ਜਾਗਦੇ ਹੋਏ ਰਾਤ ਦੇ ਸਮੇਂ ਮਰੀਜ਼ਾਂ ਦੀ ਸਹੂਲਤ ਲਈ ਡੋਨਰ ਦਾ ਬਲੱਡ ਕੱਢਣ ਦੀ ਸੁਵਿਧਾ ਉਪਲੱਬਧ ਕਰਵਾਉਦਾ ਹੈ ਜਾਂ ਪਹਿਲਾਂ ਦੀ ਤਰ੍ਹਾਂ ਬਲੱਡ ਬੈਂਕ ਵਿਚ ਚੱਲ ਰਹੇ ਕੰਮ ਨੂੰ ਪਹਿਲਾਂ ਦੀ ਤਰ੍ਹਾਂ ਜਾਰੀ ਰੱਖਣਗੇ।
ਕਈ ਵਾਰ ਕੀਤੀ ਸ਼ਿਕਾਇਤ ਪਰ ਉੱਚ ਅਧਿਕਾਰੀ ਨਹੀਂ ਕਰਦੇ ਸੁਣਵਾਈ
ਸਮਾਜ ਸੇਵੀ ਰਾਜਿੰਦਰ ਸ਼ਰਮਾ ਰਾਜੂ ਨੇ ਦੱਸਿਆ ਕਿ ਬਲੱਡ ਬੈਂਕ ਵਿਚ ਰਾਤ ਦੇ ਸਮੇਂ ਨਾ ਤਾ ਕੋਈ ਸੀਨੀਅਰ ਹੁੰਦਾ ਹੈ ਅਤੇ ਨਾ ਹੀ ਡੋਨਰ ਦਾ ਬਲੱਡ ਕੱਢਿਆ ਜਾਂਦਾ ਹੈ। ਕਈ ਵਾਰ ਤਾਂ ਜਦੋਂ ਰਾਤ ਦੇ ਸਮੇਂ ਮਰੀਜ਼ਾਂ ਨੂੰ ਪ੍ਰੇਸ਼ਾਨੀ ਹੁੰਦੀ ਹੈ ਤਾਂ ਉਹ ਉਨ੍ਹਾਂ ਨੂੰ ਫੋਨ ਕਰ ਕੇ ਮੌਕੇ ’ਤੇ ਬੁਲਾਉਂਦੇ ਹਨ ਅਤੇ ਜਦੋਂ ਉਹ ਬਲੱਡ ਬੈਂਕ ਵਿਚ ਜਾਂਦੇ ਹਨ ਤਾਂ ਕੁਝ ਕਰਮਚਾਰੀ ਮਰੀਜ਼ਾਂ ਨੂੰ ਬਲੱਡ ਦੇਣ ਤੋਂ ਮਨ੍ਹਾ ਕਰ ਦਿੰਦੇ ਹਨ ਅਤੇ ਸਵੇਰੇ ਆਉਣ ਲਈ ਕਹਿੰਦੇ ਹਨ, ਜਦੋਂ ਵੈਨ ਵਿਚ ਬਲੱਡ ਬੈਂਕ ਦੇ ਸੀਨੀਅਰ ਅਫਸਰ ਨੂੰ ਸ਼ਿਕਾਇਤ ਕੀਤੀ ਜਾਂਦੀ ਹੈ ਜਾਂ ਹਸਪਤਾਲ ਦੇ ਸੀਨੀਅਰ ਅਫਸਰ ਨਾਲ ਗੱਲਬਾਤ ਕੀਤੀ ਜਾਂਦੀ ਹੈ ਤਾਂ ਉਹ ਵੀ ਮਾਮਲੇ ਨੂੰ ਠੰਡੇ ਬਸਤੇ ਵਿਚ ਪਾ ਦਿੰਦੇ ਹਨ ਅਤੇ ਸਰਕਾਰੀ ਤੰਤਰ ਦੀਆਂ ਕਮੀਆਂ ਨੂੰ ਸੁਧਾਰਨ ਦੀ ਬਜਾਏ ਇਕ ਕੰਨ ਤੋਂ ਗੱਲ ਸੁਣ ਕੇ ਦੂਸਰੇ ਕੰਨ ਤੋਂ ਕੱਢ ਦਿੰਦੇ ਹਨ। ਪੰਜਾਬ ਸਰਕਾਰ ਨੂੰ ਇਸ ਮਾਮਲੇ ਦਾ ਸਖ਼ਤ ਨੋਟਿਸ ਲੈਣਾ ਚਾਹੀਦਾ ਹੈ ਅਤੇ ਕਥਿਤ ਕਾਰਵਾਈ ਅਮਲ ਵਿਚ ਲਿਆਉਣੀ ਚਾਹੀਦੀ ਹੈ।
ਇਹ ਵੀ ਪੜ੍ਹੋ : ਅੰਮ੍ਰਿਤਸਰ 'ਚ ਹੈਰੀਟੇਜ ਸਟਰੀਟ ਪ੍ਰੀ-ਵੈਡਿੰਗ ਸ਼ੂਟ ਲਈ ਬਣੀ ਹੌਟਸਪੌਟ
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਮਰੀਜ਼ਾਂ ਨੂੰ ਹਸਪਤਾਲ 'ਚ ਮੌਜੂਦ ਦਵਾਈ ਲਿਖ ਕੇ ਦੇਣਗੇ ਡਾਕਟਰ, ਬਾਹਰੋਂ ਲਿਆਉਣ 'ਤੇ ਹਸਪਤਾਲ ਖੁਦ ਕਰੇਗਾ ਭੁਗਤਾਨ
NEXT STORY 
