ਚੰਡੀਗੜ੍ਹ- ਪੰਜਾਬ ਪੁਲਸ ਵਿਭਾਗ ਜਦੋਂ ਵਿਸ਼ਾਲ ਭਰਤੀ ਮੁਹਿੰਮ ਦੇ ਅਗਲੇ ਪੜਾਅ ਲਈ ਤਿਆਰ ਹੈ ਤਾਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਅੱਜ ਸੂਬੇ ਦੇ ਪੁਲਸ ਮੁਖੀ ਨੂੰ ਲੰਘੀ 22 ਅਗਸਤ ਨੂੰ ਸਬ-ਇੰਸਪੈਕਟਰਾਂ ਲਈ ਹੋਈ ਲਿਖਤੀ ਪ੍ਰੀਖਿਆ ਦੌਰਾਨ ਧੋਖਾਧੜੀ ਕਰਨ ਲਈ ਛੇ ਵਿਅਕਤੀਆਂ ਨੂੰ ਉਨ੍ਹਾਂ ਦੀ ਸ਼ੱਕੀ ਸ਼ਮੂਲੀਅਤ ਦੇ ਆਧਾਰ 'ਤੇ ਗਿ੍ਰਫਤਾਰ ਕਰਨ ਤੋਂ ਬਾਅਦ ਪ੍ਰੀਖਿਆ ਦੇ ਪੇਪਰ ਲੀਕ ਹੋਣ, ਧੋਖਾਧੜੀ ਅਤੇ ਨਕਲ ਆਦਿ ਦੇ ਖ਼ਿਲਾਫ਼ ਕਾਰਵਾਈ ਤੇਜ਼ ਕਰਨ ਦੇ ਹੁਕਮ ਦਿੱਤੇ ਹਨ।
ਮੁੱਖ ਮੰਤਰੀ ਦੇ ਇਹ ਨਿਰਦੇਸ਼ ਹੈੱਡ ਕਾਂਸਟੇਬਲਾਂ (ਇਨਵੈਸਟੀਗੇਸ਼ਨ ਕਾਡਰ) ਲਈ ਲਿਖਤੀ ਪ੍ਰੀਖਿਆ ਹੋਣ ਤੋਂ ਪਹਿਲਾਂ ਆਏ ਹਨ। ਇਹ ਪ੍ਰੀਖਿਆ 12 ਸਤੰਬਰ ਤੋਂ 19 ਸਤੰਬਰ ਤੱਕ ਹੋਣੀ ਹੈ ਜਿਸ ਲਈ 75,544 ਉਮੀਦਵਾਰ ਬੈਠਣਗੇ ਜਿਨਾਂ ਨੇ 787 ਅਸਾਮੀਆਂ ਲਈ ਅਪਲਾਈ ਕੀਤਾ ਹੈ। ਇਸ ਤੋਂ ਬਾਅਦ 25-26 ਸਤੰਬਰ ਨੂੰ ਕਾਂਸਟੇਬਲ (ਜ਼ਿਲ੍ਹਾ ਤੇ ਆਰਮਡ ਕਾਡਰ) ਲਈ ਪ੍ਰੀਖਿਆ ਹੋਣੀ ਹੈ ਜਿਸ ਲਈ 4358 ਅਸਾਮੀਆਂ ਵਾਸਤੇ 4,70,775 ਉਮੀਦਵਾਰਾਂ ਨੇ ਅਪਲਾਈ ਕੀਤਾ ਹੋਇਆ ਹੈ। ਇਸ ਤੋਂ ਬਾਅਦ ਦੇਸ਼ ਵਿਚ ਕਿਸੇ ਵੀ ਸੂਬਾ ਪੁਲਸ ਲਈ ਇਹ ਪਹਿਲੀ ਵਾਰ ਹੋਵੇਗਾ ਕਿ ਪੰਜਾਬ ਪੁਲਸ ਵਿਭਾਗ ਵਿਚ 2600 ਵਰਦੀਧਾਰੀ ਸਪੈਸ਼ਲਿਸਟਾਂ ਦੀ ਨਿਯੁਕਤੀ ਲਈ ਅਕਤੂਬਰ ਵਿਚ ਇਕ ਹੋਰ ਭਰਤੀ ਮੁਹਿੰਮ ਚਲਾਈ ਜਾਵੇਗੀ।
ਇਹ ਵੀ ਪੜ੍ਹੋ- ਕੱਚੇ ਤੇ ਐਡਹਾਕ ਮੁਲਾਜ਼ਮਾਂ ਨੂੰ ਪਾਲਿਸੀ ਬਣਾ ਕੇ ਰੈਗੂਲਰ ਕਰੇ ਪੰਜਾਬ ਸਰਕਾਰ : ਪ੍ਰਿੰਸੀਪਲ ਬੁੱਧਰਾਮ
ਮੁੱਖ ਮੰਤਰੀ ਨੇ ਡੀ.ਜੀ.ਪੀ. ਦਿਨਕਰ ਗੁਪਤਾ ਨੂੰ ਧੋਖੇਬਾਜ਼ਾਂ ਤੇ ਘੁਟਾਲੇਬਾਜ਼ਾਂ ਵੱਲੋਂ ਇਮਤਿਹਾਨ ਪ੍ਰੀਕਿਰਿਆ ਨੂੰ ਲੀਹੋਂ ਲਾਹੁਣ ਤੇ ਸਾਬੋਤਾਜ ਕਰਨ ਲਈ ਕੀਤੀਆਂ ਕੋਸ਼ਿਸ਼ਾਂ ਦੀਆਂ ਰਿਪੋਰਟਾਂ ਦੇ ਮੱਦੇਨਜ਼ਰ ਪ੍ਰੀਖਿਆ ਕੇਂਦਰਾਂ ਵਿਚ ਸੁੱਰਖਿਆ ਕਦਮ ਹੋਰ ਸਖਤ ਕਰਨ ਲਈ ਆਖਿਆ ਹੈ।
17 ਤੋਂ 24 ਅਗਸਤ, 2021 ਤੱਕ ਚੰਡੀਗੜ੍ਹ ਅਤੇ ਪੰਜਾਬ ਦੇ ਵੱਖ-ਵੱਖ ਜ਼ਿਲ੍ਹਿਆਂ ਵਿਚ ਸਬ-ਇੰਸਪੈਕਟਰਾਂ ਲਈ ਹੋਈ ਲਿਖਤੀ ਪ੍ਰੀਖਿਆ ਦੌਰਾਨ ਬਲੂਟੁੱਥ ਨਾਲ ਸੰਪਰਕ ਸਾਧ ਕੇ ਧੋਖਾਧੜੀ ਕਰਨ ਦੇ ਸਬੰਧ ਵਿਚ ਖੰਨਾ ਪੁਲਸ ਵੱਲੋਂ ਛੇ ਵਿਅਕਤੀਆਂ ਦੀ ਗਿ੍ਰਫਤਾਰੀ ਦੇ ਸੰਦਰਭ ਵਿਚ ਦਿਨਕਰ ਗੁਪਤਾ ਨੇ ਕਿਹਾ ਕਿ ਸਾਰੇ ਪ੍ਰੀਖਿਆ ਕੇਂਦਰਾਂ ਵਿਚ ਜੈਮਰ ਅਤੇ ਹੋਰ ਬਿਜਲਈ ਉਪਕਰਨ ਲਾਏ ਜਾ ਰਹੇ ਹਨ ਤਾਂ ਕਿ ਇੰਟਰਨੈੱਟ ਜਾਂ ਬਲੂਟੁੱਥ ਦੇ ਅਮਲ ਨੂੰ ਰੋਕਿਆ ਜਾ ਸਕੇ। ਉਨ੍ਹਾਂ ਦੱਸਿਆ ਕਿ ਹੋਰ ਗਿ੍ਰਫਤਾਰੀਆਂ ਵੀ ਹੋਣ ਦੀ ਸੰਭਾਵਨਾ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਕੋਈ ਵੀ ਵਿਅਕਤੀ, ਚਾਹੇ ਉਹ ਉਮੀਦਵਾਰ ਹੋਵੇ, ਟਾਊਟ ਹੋਵੇ ਜਾਂ ਪੇਸ਼ੇਵਰ ਘੁਟਾਲੇਬਾਜ਼, ਦੀ ਸ਼ਮੂਲੀਅਤ ਪ੍ਰੀਖਿਆ ਨਾਲ ਸਬੰਧਤ ਗਲਤ ਕੰਮਾਂ ਵਿਚ ਪਾਈ ਗਈ ਤਾਂ ਉਸ ਖ਼ਿਲਾਫ਼ ਤੁਰੰਤ ਕਾਰਵਾਈ ਕਰਕੇ ਗਿ੍ਰਫਤਾਰ ਕਰ ਲਿਆ ਜਾਵੇਗਾ।
ਪੰਜਾਬ ਪੁਲਸ ਦੀ ਭਰਤੀ ਪ੍ਰੀਖਿਆ ਦੇ ਅਗਲੇ ਗੇੜ ਵਿਚ ਬੈਠਣ ਵਾਲੇ ਉਮੀਦਵਾਰਾਂ ਨੂੰ ਝਾਂਸਾ ਦੇਣ, ਤਿਕੜਮਬਾਜ਼ੀਆਂ ਕਰਨ ਵਾਲੇ ਅਤੇ ਭੋਲੇ-ਭਾਲੇ ਲੋਕਾਂ ਨੂੰ ਠੱਗਣ ਦੀ ਕੋਸ਼ਿਸ਼ ਕਰਨ ਵਾਲੇ ਟਾਊਟਾਂ, ਧੋਖੇਬਾਜ਼ਾਂ ਅਤੇ ਘੁਟਾਲੇਬਾਜ਼ਾਂ ਤੋਂ ਸੁਚੇਤ ਰਹਿਣ ਦੀ ਸਲਾਹ ਦਿੰਦੇ ਹੋਏ ਡੀ.ਜੀ.ਪੀ. ਨੇ ਸਪੱਸ਼ਟ ਕੀਤਾ ਕਿ ਕਿਸੇ ਵੀ ਗਲਤ ਢੰਗ-ਤਰੀਕੇ/ਉਕਸਾਹਟ ਵਿਚ ਨੌਕਰੀਆਂ ਦਾ ਕੋਈ ਵੀ ਵਾਅਦਾ ਪੂਰੀ ਤਰਾਂ ਗਲਤ ਹੈ। ਉਨ੍ਹਾਂ ਕਿਹਾ ਕਿ ਅਜਿਹੀ ਕੋਈ ਵੀ ਪੇਸ਼ਕਸ਼/ਵਾਅਦੇ ਕਰਨ ਵਾਲਿਆਂ ਬਾਰੇ ਕਿਸੇ ਤਰਾਂ ਦੀ ਇਤਲਾਹ ਹੈਲਪਲਾਈਨ ਨੰਬਰ 181 'ਤੇ ਦਿੱਤੀ ਜਾ ਸਕਦੀ ਹੈ ਜੋ ਪੰਜਾਬ ਪੁਲਸ ਦੀ 24 ਘੰਟੇ ਕਾਰਜਸ਼ੀਲ ਰਹਿਣ ਵਾਲੀ ਹੈਲਪਲਾਈਨ ਹੈ।
ਇਹ ਵੀ ਪੜ੍ਹੋ- ਬੇਅਦਬੀ ਮਾਮਲੇ ਦੇ ਦੋਸ਼ੀ ਸ਼ਕਤੀ ਸਿੰਘ ਦੇ ਘਰ ਪੁੱਜੇ ਅਣਪਛਾਤੇ ਕਾਰ ਸਵਾਰ, ਪਰਿਵਾਰ ਨੇ ਕੀਤੀ ਸੁਰੱਖਿਆ ਵਧਾਉਣ ਦੀ ਮੰਗ
ਡੀ.ਜੀ.ਪੀ. ਨੇ ਦੱਸਿਆ ਕਿ ਖੰਨਾ ਪੁਲਸ ਵੱਲੋਂ ਪੁਲਸ ਥਾਣਾ ਸਿਟੀ-2, ਖੰਨਾ ਵਿੱਚ 23 ਅਗਸਤ 2021 ਨੂੰ ਦਰਜ ਆਈ.ਪੀ.ਸੀ. ਦੀ ਧਾਰਾ 420,467,468,471, 120-ਬੀ, ਆਈ ਟੀ ਐਕਟ ਦੀ ਧਾਰਾ 66, 66 ਸੀ ਧਾਰਾ ਤਹਿਤ ਦਰਜ ਐਫ ਆਈ ਆਰ 170 ਤਹਿਤ ਦੇ ਅੰਕਿਤ ਤੇ ਵਿਕਾਸ ਵਾਸੀ ਖਨੌਰੀ (ਸੰਗਰੂਰ), ਰਣਬੀਰ ਸਿੰਘ (ਜ਼ਿਲ੍ਹਾ ਹਿਸਾਰ), ਅੰਮਿ੍ਰਤ ਵਾਸੀ ਸੋਨੀਪਤ, ਰਾਜਿੰਦਰ ਸਿੰਘ ਵਾਸੀ ਹਿਸਾਰ ਤੇ ਸਬ ਇੰਸਪੈਕਟਰ ਭਰਤੀ ਹੋਣ ਦੀ ਚਾਹਵਾਨ ਨਵਜੋਤ ਸਿੰਘ ਵਾਸੀ ਜੀਂਦ ਨੂੰ ਗਿ੍ਰਫਤਾਰ ਕੀਤਾ ਗਿਆ ਹੈ।ਸ੍ਰੀ ਗੁਪਤਾ ਨੇ ਦੱਸਿਆ ਕਿ ਵਿਕਾਸ ਵਾਸੀ ਖਨੌਰੀ ਦੇ ਦੱਸਣ ਉਤੇ ਨਵਜੋਤ ਨੂੰ ਅੱਜ ਸਵੇਰ ਜੀਂਦ (ਹਰਿਆਣਾ) ਵਿੱਚ ਉਸ ਦੇ ਪਿੰਡੋਂ ਗਿ੍ਰਫਤਾਰ ਕੀਤਾ ਗਿਆ। ਨਵਜੋਤ ਨੇ ਮੰਨਿਆ ਸੀ ਕਿ ਵਿਕਾਸ 21 ਅਗਸਤ 2021 ਨੂੰ ਸੈਕਟਰ-19, ਚੰਡੀਗੜ੍ਹ ਵਿਖੇ ਉਸ ਨੂੰ ਅਤੇ ਉਸ ਪਿਤਾ ਨੂੰ ਮਿਲਿਆ ਸੀ ਅਤੇ ਪ੍ਰੀਖਿਆ ਵਿੱਚ ਸਹੀ ਜਵਾਬ ਦੇਣ ਵਾਸਤੇ ਮਾਈਕਰੋ ਈਅਰ ਫੋਨ ਅਤੇ ਇਕ ਇਲੈਕਟ੍ਰਾਨਿਕ ਯੰਤਰ ਬਲੂਟੁੱਥ ਦਿੱਤਾ ਸੀ।
ਕਾਂਸਟੇਬਲਾਂ ਦੀ ਕੇਂਦਰੀ ਭਰਤੀ ਬੋਰਡ ਦੀ ਚੇਅਰਪਰਸਨ ਗੁਰਪ੍ਰੀਤ ਕੌਰ ਦਿਓ ਨੇ ਦੱਸਿਆ ਕਿ ਪ੍ਰੀਖਿਆ ਕੇਂਦਰਾਂ ਦੇ ਬਾਹਰਲੇ ਖੇਤਰ ਅਤੇ ਅੰਦਰਲੀਆਂ ਥਾਂਵਾਂ 'ਤੇ ਸੁਰੱਖਿਆ ਦੇ ਨਜਰੀਏ ਤੋਂ ਸਖਤ ਪ੍ਰੋਟੋਕੋਲ ਦੀ ਪਾਲਣਾ ਕੀਤੀ ਜਾ ਰਹੀ ਹੈ ਅਤੇ ਕਈ ਗੇੜਾਂ ਵਿਚ ਪੁਖਤਾ ਤਲਾਸੀ ਵੀ ਲਈ ਜਾਵੇਗੀ ਅਤੇ ਇਸ ਤੋਂ ਇਲਾਵਾ ਇਲੈਕਟ੍ਰਾਨਿਕ ਤੇ ਡਿਜੀਟਲ ਯੰਤਰਾਂ ਆਦਿ ਦੀ ਵਰਤੋਂ ਵਿਚ ਲਿਆਂਦੇ ਜਾ ਰਹੇ ਹਨ। ਪੰਜਾਬ ਪੁਲਸ ਦੀ ਵਿਸ਼ਾਲ ਭਰਤੀ ਮੁਹਿੰਮ ਛੇ ਭਰਤੀ ਬੋਰਡਾਂ ਰਾਹੀਂ ਚਲਾਈ ਜਾ ਰਹੀ ਹੈ ਅਤੇ ਹਰੇਕ ਬੋਰਡ ਨੂੰ ਏ.ਡੀ.ਜੀ.ਪੀ. ਰੈਂਕ ਦੇ ਅਧਿਕਾਰੀ ਅਧੀਨ ਗਠਿਤ ਕੀਤਾ ਗਿਆ ਹੈ।
ਹੁਣ ਤੱਕ ਸਬ-ਇੰਸਪੈਕਟਰਾਂ (ਜ਼ਿਲ੍ਹਾ, ਆਰਮਡ, ਇੰਟੈਲੀਜੈਂਸ ਅਤੇ ਇਨਵੈਸਟੀਗੇਸਨ ਕਾਡਰ) ਅਤੇ ਇੰਟੈਲੀਜੈਂਸ ਅਤੇ ਇਨਵੈਸਟੀਗੇਸਨ ਕਾਡਰ ਦੇ ਕਾਂਸਟੇਬਲਾਂ ਦੀਆਂ ਅਸਾਮੀਆਂ ਲਈ ਲਿਖਤੀ ਪ੍ਰੀਖਿਆ ਸਫਲਤਾਪੂਰਵਕ ਹੋ ਚੁੱਕੀ ਸੀ, ਜਦੋਂ ਕਿ ਇਨਵੈਸਟੀਗੇਸਨ ਕਾਡਰ ਦੇ ਹੈੱਡ ਕਾਂਸਟੇਬਲਾਂ ਲਈ ਲਿਖਤੀ ਪ੍ਰੀਖਿਆਵਾਂ ਭਲਕੇ ਸ਼ੁਰੂ ਹੋਣਗੀਆਂ ਅਤੇ 19 ਸਤੰਬਰ, 2021 ਤੱਕ ਚੱਲਣਗੀਆਂ। ਸਬ-ਇੰਸਪੈਕਟਰ ਦੀਆਂ 560 ਅਸਾਮੀਆਂ ਲਈ ਅਪਲਾਈ ਕਰਨ ਵਾਲੇ 1,10,524 ਉਮੀਦਵਾਰਾਂ ਵਿੱਚੋਂ ਤਕਰੀਬਨ 7,589 ਉਮੀਦਵਾਰ ਸੂਚਨਾ ਤਕਨਾਲੋਜੀ, ਕੰਪਿਊਟਰ ਸਾਇੰਸ, ਸਾਫਟਵੇਅਰ ਇੰਜੀਨੀਅਰਿੰਗ ਆਦਿ ਵਿੱਚ ਗ੍ਰੈਜੂਏਟ ਸਨ ਅਤੇ 1,714 ਉਮੀਦਵਾਰ ਪੋਸਟ ਗ੍ਰੈਜੂਏਟ ਸਨ। ਇਨਾਂ ਅਸਾਮੀਆਂ ’ਤੇ ਭਰਤੀ ਲਈ 80,826 ਪੁਰਸ਼ ਉਮੀਦਵਾਰਾਂ ਅਤੇ 29,698 ਮਹਿਲਾ ਉਮੀਦਵਾਰਾਂ ਨੇ ਅਪਲਾਈ ਕੀਤਾ ਸੀ।
ਇਹ ਵੀ ਪੜ੍ਹੋ- ਪੰਜਾਬ 'ਚ ਵਧ ਰਹੇ ਅਪਰਾਧਾਂ ਲਈ ਕੈਪਟਨ ਅਮਰਿੰਦਰ ਸਿੱਧੇ ਤੌਰ 'ਤੇ ਜ਼ਿੰਮੇਵਾਰ: ਹਰਪਾਲ ਸਿੰਘ ਚੀਮਾ
ਕਾਂਸਟੇਬਲਾਂ (ਇੰਟੈਲੀਜੈਂਸ ਤੇ ਇਨਵੈਸਟੀਗੇਸਨ ਕਾਡਰ) ਲਈ ਬਿਨੈ ਪੱਤਰ ਫਾਰਮ 26 ਜੁਲਾਈ-28 ਅਗਸਤ, 2021 ਤੱਕ ਲਾਈਵ ਹੋਏ ਸਨ। 1156 ਅਸਾਮੀਆਂ ਭਰਨ ਲਈ 7-10 ਸਤੰਬਰ, 2021 ਨੂੰ ਹੋਏ ਲਿਖਤੀ ਟੈਸਟ ਲਈ 53,632 ਉਮੀਦਵਾਰਾਂ ਨੇ ਅਪਲਾਈ ਕੀਤਾ ਸੀ। ਇਨਾਂ ਵਿੱਚੋਂ 42,276 ਉਮੀਦਵਾਰ ਪੁਰਸ ਤੇ 11,356 ਮਹਿਲਾਵਾਂ ਸਨ। ਇਨਾਂ ਵਿੱਚ ਅੱਗੇ 5055 ਉਮੀਦਵਾਰ ਆਈ ਟੀ, ਕੰਪਿਊਟਰ ਸਾਇੰਸ ਤੇ ਸਾਫਟਵੇਅਰ ਇੰਜਨਿਅਰਿੰਗ ਆਦਿ ਵਿੱਚ ਗਰੈਜੂਏਟ ਤੇ 1853 ਉਮੀਦਵਾਰ ਪੋਸਟ ਗਰੈਜੂਏਟ ਹਨ।
ਸਿਪਾਹੀ (ਜ਼ਿਲਾ ਤੇ ਆਰਮਡ ਕਾਡਰ) ਲਈ ਬਿਨੈ ਪੱਤਰ ਫਾਰਮ 16 ਜੁਲਾਈ-22 ਅਗਸਤ, 2021 ਨੂੰ ਲਾਈਵ ਹੋਏ ਸਨ। ਲਿਖਤੀ ਟੈਸਟ ਲਈ ਕੁੱਲ 4,70,775 ਉਮੀਦਵਾਰਾਂ ਨੇ ਅਪਲਾਈ ਕੀਤਾ ਸੀ। ਇਨਾਂ ਵਿੱਚੋਂ 3,68,819 ਉਮੀਦਵਾਰ ਪੁਰਸ ਤੇ 1,01,956 ਮਹਿਲਾਵਾਂ ਸਨ। ਇਨਾਂ ਵਿੱਚੋਂ 77,938 (ਕਰੀਬ 15 ਫੀਸਦੀ) ਉਮੀਦਵਾਰ ਗਰੈਜੂਏਟ ਜਾਂ ਇਸ ਦੇ ਬਰਾਬਰ ਯੋਗਤਾ ਵਾਲੇ ਹਨ ਜਦੋਂਕਿ ਘੱਟੋ-ਘੱਟ ਯੋਗਤਾ ਬਾਰਵੀਂ ਹੈ। ਕਰੀਬ 2648 ਉਮੀਦਵਾਰ ਆਈ.ਟੀ.ਆਈ. ਅਤੇ ਡਿਪਲੋਮਾ ਹੋਲਡਰ ਹਨ, 1135 ਇੰਜਨੀਅਰਿੰਗ ਗਰੈਜੂਏਟ ਤੇ 1510 ਉਮੀਦਵਾਰ ਪੋਸਟ ਗਰੈਜੂਏਟ ਪਾਸ ਹਨ।
ਹੈਂਡ ਕਾਂਸਟੇਬਲ (ਇਨਵੈਸਟੀਗੇਸਨ ਕਾਡਰ) ਦੀਆਂ 787 ਅਸਾਮੀਆਂ ਭਰਨ ਲਈ ਬਿਨੈ ਪੱਤਰ ਫਾਰਮ 4-31 ਅਗਸਤ, 2021 ਨੂੰ ਲਾਈਵ ਹੋਏ ਸਨ।12-19 ਸਤੰਬਰ, 2021 ਨੂੰ ਹੋਣ ਵਾਲੇ ਲਿਖਤੀ ਟੈਸਟ ਲਈ ਕੁੱਲ 75,544 ਉਮੀਦਵਾਰਾਂ ਨੇ ਅਪਲਾਈ ਕੀਤਾ ਸੀ। ਇਨਾਂ ਵਿੱਚੋਂ 3,68,819 ਉਮੀਦਵਾਰ ਪੁਰਸ ਤੇ 1,01,956 ਮਹਿਲਾਵਾਂ ਸਨ। ਇਨਾਂ ਵਿੱਚੋਂ ਬਹੁਤੇ ਉਮੀਦਵਾਰ (73 ਫੀਸਦੀ) ਬੀ.ਏ./ਬੀ.ਕਾਮ/ਬੀਐਸ.ਸੀ. ਗਰੈਜੂਏਟ ਹਨ।ਭਰਤੀ ਲਈ ਆਪਣਾ ਨਾਮ ਦਰਜ ਕਰਵਾਉਣ ਵਾਲਿਆਂ ਵਿੱਚੋਂ 58,427 ਪੁਰਸ ਤੇ 17,117 ਮਹਿਲਾ ਉਮੀਦਵਾਰ ਹਨ।
ਬੇਅਦਬੀ ਮਾਮਲੇ ਦੇ ਦੋਸ਼ੀ ਸ਼ਕਤੀ ਸਿੰਘ ਦੇ ਘਰ ਪੁੱਜੇ ਅਣਪਛਾਤੇ ਕਾਰ ਸਵਾਰ, ਪਰਿਵਾਰ ਨੇ ਕੀਤੀ ਸੁਰੱਖਿਆ ਵਧਾਉਣ ਦੀ ਮੰਗ
NEXT STORY 
