ਲੁਧਿਆਣਾ (ਖੁਰਾਣਾ) - ਅਮਰੀਕਾ ਤੇ ਇਜ਼ਰਾਈਲ ਵੱਲੋਂ ਖਾੜੀ ਦੇਸ਼ਾਂ ’ਤੇ ਕੀਤੇ ਹਮਲਿਆਂ ਕਾਰਨ ਕਮਰਸ਼ੀਅਲ ਗੈਸ ਦੀਆਂ ਕੀਮਤਾਂ ਵਿਚ 10 ਰੁਪਏ ਕਿਲੋ ਤੱਕ ਦਾ ਭਾਰੀ ਉਛਾਲ ਆ ਗਿਆ ਹੈ ਜਿਸ ਕਾਰਨ ਐੱਲ.ਪੀ.ਜੀ. ਗੈਸ ਨਾਲ ਜੁੜੀ ਕਮਰਸ਼ੀਅਲ ਇੰਡਸਟਰੀ ਤੇ ਖੁਦਰਾ ਬਾਜ਼ਾਰ ਵਿਚ ਵੱਡੀ ਹਫੜਾ ਦਫੜੀ ਮਚ ਗਈ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿਚ ਗੈਸ ਦੀਆਂ ਕੀਮਤਾਂ ਵਿਚ ਉਛਾਲ ਦਾ ਸਿਲਸਿਲਾ ਲਗਾਤਾਰ ਭਾਰੀ ਹੋਣ ਵਰਗੀਆਂ ਸੰਭਾਵਨਾਵਾਂ ਨੂੰ ਨਜ਼ਰ ਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ।
ਕੇਂਦਰੀ ਪੈਟ੍ਰੋਲੀਅਮ ਤੇ ਕੁਦਰਤੀ ਗੈਸ ਮੰਤਰਾਲਾ ਵੱਲੋਂ ਜਾਰੀ ਕੀਤੇ ਨਿਰਦੇਸ਼ਾਂ ਮੁਤਾਬਕ ਖਪਤਕਾਰਾਂ ਨੂੰ ਸਪੱਸ਼ਟ ਕੀਤਾ ਗਿਆ ਹੈ ਕਿ ਘਰੇਲੂ ਗੈਸ ਸਿਲੰਡਰ ਦੀ ਬੁਕਿੰਗ ਲਈ ਹੁਣ ਘੱਟ ਤੋਂ ਘੱਟ 21 ਦਿਨ ਤੱਕ ਦਾ ਇੰਤਜ਼ਾਰ ਕਰਨਾ ਪਵੇਗਾ ਮਤਲਬ ਜਿਨ੍ਹਾਂ ਖਪਤਕਾਰਾਂ ਦੇ ਰਸੋਈ ਘਰਾਂ ਵਿਚ ਕੇਵਲ 1 ਹੀ ਸਿਲੰਡਰ ਹੈ, ਨੂੰ ਸਿਲੰਡਰ ਦੀ ਡਲਿਵਰੀ ਲੈਣ ਤੋਂ ਬਾਅਦ ਫਿਰ ਤੋਂ ਸਿਲੰਡਰ ਦੀ ਬੁਕਿੰਗ ਕਰਵਾਉਣ ਲਈ ਘੱਟ ਤੋਂ ਘੱਟ 21 ਦਿਨ ਇੰਤਜ਼ਾਰ ਕਰਨਾ ਪਵੇਗਾ ਅਤੇ ਜਿਨ੍ਹਾਂ ਖਪਤਕਾਰਾਂ ਦੇ ਕੋਲ 2 ਗੈਸ ਸਿਲੰਡਰ ਹਨ, ਉਹ ਡਲਿਵਰੀ ਲੈਣ ਤੋਂ 30 ਦਿਨ ਬਾਅਦ ਦੂਜੇ ਸਿਲੰਡਰ ਦੀ ਬੁਕਿੰਗ ਕਰਵਾ ਸਕਣਗੇ।
ਇਸ ਗੱਲ ਨੂੰ ਵੀ ਯਕੀਨੀ ਬਣਾਇਆ ਜਾ ਰਿਹਾ ਹੈ ਕਿ ਹਰ ਗੈਸ ਕੰਪਨੀ ਕਮਰਸ਼ੀਅਲ ਇੰਡਸਟਰੀ ਤੇ ਵਪਾਰਕ ਅਦਾਰਿਆਂ ਦੀ ਜਗ੍ਹਾ ’ਤੇ ਸਭ ਤੋਂ ਪਹਿਲਾਂ ਘਰੇਲੂ ਖਪਤਕਾਰਾਂ ਨੂੰ ਗੈਸ ਸਿਲੰਡਰਾਂ ਦੀ ਸਪਲਾਈ ਮੁਹੱਈਆ ਕਰਵਾਉਣ ’ਤੇ ਤਵੱਜੋਂ ਦੇਣਗੀਆਂ ਜਿਸ ਲਈ ਮੰਤਰਾਲਾ ਵੱਲੋਂ ਕੁਝ ਨਿਯਮ ਤੇ ਸ਼ਰਤਾਂ ਲਾਗੂ ਕੀਤੀਆਂ ਗਈਆਂ ਹਨ ਤਾਂ ਕਿ ਖਪਤਕਾਰਾਂ ਦੇ ਰਸੋਈ ਘਰਾਂ ਤੱਕ ਪੁੱਜਣ ਵਾਲੇ ਘਰੇਲੂ ਗੈਸ ਸਿਲੰਡਰਾਂ ਦੀ ਕਿੱਲਤ ਨਾ ਪੈਦਾ ਹੋ ਸਕੇ।
ਮਿਲੀ ਜਾਣਕਾਰੀ ਮੁਤਾਬਕ ਮੌਜੂਦਾ ਸਮੇਂ ਦੌਰਾਨ ਭਾਰਤ ਵਿਚ 80 ਫੀਸਦੀ ਤੱਕ ਐੱਲ.ਪੀ.ਜੀ. ਗੈਸ ਖਾੜੀ ਦੇਸ਼ਾਂ ਤੋਂ ਸਪਲਾਈ ਹੋ ਰਹੀ ਹੈ ਜਿਥੇ ਲੱਗੀ ਜੰਗ ਕਾਰਨ ਕਿਸੇ ਵੀ ਸਮੇਂ ਗੈਸ ਦੀ ਕਿੱਲਤ ਪੈਦਾ ਹੋ ਸਕਦੀ ਹੈ। ਅਜਿਹੇ ਵਿਚ ਕੇਂਦਰੀ ਪੈਟ੍ਰੋਲੀਅਮ ਅਤੇ ਕੁਦਰਤੀ ਗੈਸ ਮੰਤਰਾਲਾ ਵੱਲੋਂ ਉਕਤ ਸਥਿਤੀ ’ਤੇ ਕਾਬੂ ਪਾਉਣ ਲਈ ਨਿਯਮ ਲਾਗੂ ਕੀਤੇ ਗਏ ਹਨ ਕਿ ਗੈਸ ਸਿਲੰਡਰ ਦੀ ਸਪਲਾਈ ਲੈਣ ਵਾਲੇ ਖਪਤਕਾਰ 21 ਦਿਨ ਤੋਂ ਪਹਿਲਾਂ ਮੁੜ ਗੈਸ ਸਿਲੰਡਰ ਦੀ ਬੁਕਿੰਗ ਨਹੀਂ ਕਰਵਾ ਸਕਣਗੇ।
ਦੱਸਿਆ ਜਾ ਰਿਹਾ ਹੈ ਕਿ ਮੌਜੂਦਾ ਸਮੇਂ ਦੌਰਾਨ ਬਾਜ਼ਾਰ ਵਿਚ 19 ਕਿਲੋ ਵਾਲੇ ਕਮਰਸ਼ੀਅਲ ਗੈਸ ਸਿਲੰਡਰ ਦੀ ਕੀਮਤ ਮੌਜੂਦਾ ਸਮੇਂ ਵੱਲੋਂ 1853 ਰੁ. ਚੱਲ ਰਹੀ ਹੈ ਜਿਸ ’ਤੇ ਗੈਸ ਕੰਪਨੀ ਵੱਲੋਂ ਦਿੱਤੇ ਜਾਣ ਵਾਲੇ ਡਿਸਕਾਊਂਟ ਨੂੰ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤਾ, ਜਦੋਂਕਿ ਇਸ ਤੋਂ ਪਹਿਲਾਂ ਕੰਪਨੀਆਂ ਵੱਲੋਂ ਗੈਸ ਏਜੰਸੀ ਡੀਲਰਾਂ ਨੂੰ ਡੇਢ ਸੌ ਤੋਂ 200 ਰੁ. ਤੱਕ ਦਾ ਭਾਰੀ ਡਿਸਕਾਊਂਟ ਦਿੱਤਾ ਜਾ ਰਿਹਾ ਸੀ।
ਕਾਲਾਬਜ਼ਾਰੀ ਕਈ ਗੁਣਾ ਜ਼ਿਆਦਾ ਵਧਣ ਦੀ ਸੰਭਾਵਨਾ
ਬਾਜ਼ਾਰ ਵਿਚ ਗੈਸ ਸਿਲੰਡਰਾਂ ਦੀ ਸ਼ਾਰਟੇਜ ਆਉਣ ਕਾਰਨ ਘਰੇਲੂ ਗੈਸ ਦੀ ਕਾਲਾਬਜ਼ਾਰੀ ਕਈ ਗੁਣਾ ਜ਼ਿਆਦਾ ਵਧਣ ਦੀਆਂ ਸੰਭਾਵਨਾਵਾਂ ਤੇਜ਼ੀ ਨਾਲ ਪੈਦਾ ਹੋਣ ਲੱਗੀਆਂ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਗਲੀ ਮੁਹੱਲੇ ਅਤੇ ਬਜ਼ਾਰਾਂ ਵਿਚ ਘਰੇਲੂ ਗੈਸ ਦੀ ਬਲੈਕ ਕਰਨ ਵਾਲਾ ਮਾਫੀਆ ਹੁਣ ਬੰਬਨੁਮਾ ਦੇਸੀ ਗੈਸ ਸਿਲੰਡਰਾਂ ਤੇ ਐੱਲ.ਪੀ.ਜੀ. ਨਾਲ ਚੱਲਣ ਵਾਲੇ ਆਟੋ ਰਿਕਸ਼ਾ ਵਿਚ ਗੈਸ ਦੀ ਪਲਟੀ ਮਾਰਨ ਬਦਲੇ ਲੋਕਾਂ ਤੋਂ 100 ਰੁ. ਦੀ ਜਗ੍ਹਾ ਡੇਢ ਸੌ ਰੁਪਏ ਕਿਲੋ ਦੀ ਨਾਜਾਇਜ਼ ਵਸੂਲੀ ਕਰਨ ਵਿਚ ਜੁਟ ਗਏ ਹਨ।
ਇਥੇ ਸਵਾਲ ਹੁਣ ਵੀ ਉਹੀ ਖੜ੍ਹਾ ਹੈ ਕਿ ਸ਼ਹਿਰ ਦੇ ਉਹੀ ਇਲਾਕਿਆਂ ਵਿਚ ਸਰਗਰਮ ਗੈਸ ਮਾਫੀਆ ਦੇ ਅੱਡਿਆਂ ’ਤੇ ਆਖਰ ਕਿਹੜੀਆਂ ਗੈਸ ਏਜੰਸੀਆਂ ਦੇ ਡਲਿਵਰੀਮੈਨ ਘਰੇਲੂ ਗੈਸ ਸਿਲੰਡਰਾਂ ਦੀ ਕਿੱਲਤ ਹੋਣ ਦੇ ਬਾਵਜੂਦ ਮਾਫੀਆ ਦੇ ਟਿਕਾਣਿਆਂ ‘ਤੇ ਵੱਡੀ ਗਿਣਤੀ ਵਿਚ ਸਿਲੰਡਰ ਦਾ ਗੈਰ ਕਾਨੂੰਨੀ ਜਖੀਰਾ ਉਤਾਰ ਰਹੇ ਹਨ।
ਕੇਵਲ ਰਜਿਸਟਰਡ ਮੋਬਾਇਲ ਨੰਬਰ ਤੋਂ ਹੋਵੇਗੀ ਸਿਲੰਡਰ ਦੀ ਬੁਕਿੰਗ
ਅਰੁਣ ਇੰਡੇਨ ਗੈਸ ਸਰਵਿਸ ਦੇ ਮੁਖੀ ਅਰੁਣ ਅਗਰਵਾਲ ਨੇ ਖਪਤਕਾਰ ਕੇਵਲ ਆਪਣੇ ਰਜਿਸਟਰਡ ਮੋਬਾਇਲ ਨੰਬਰ ਤੋਂ ਹੀ ਗੈਸ ਸਿਲੰਡਰ ਦੀ ਬੁਕਿੰਗ ਕਰਵਾ ਸਕਣਗੇ ਜਿਸ ਵਿਚ ਵ੍ਹਟਸਐਪ ਗੈਸ ਕੰਪਨੀ ਵੱਲੋਂ ਜਾਰੀ ਕੀਤੇ ਗਏ ਟੋਲ ਫ੍ਰੀ ਨੰਬਰ ’ਤੇ ਮਿਸਡ ਕਾਲ ਦੇਣ ਸਮੇਤ ਪੇ.ਟੀ.ਐੱਮ. ਵਰਗੇ ਪਲੇਟਫਾਰਮ ’ਤੇ ਗੈਸ ਦੀ ਈ-ਬੁਕਿੰਗ ਕੀਤੀ ਜਾ ਰਹੀ ਹੈ ਅਤੇ ਇਸ ਦੇ ਲਈ ਹਰ ਕਸਟਮਰ ਨੂੰ ਸਿਲੰਡਰ ਦੀ ਸਪਲਾਈ ਲੈਣ ਤੋਂ ਤੁਰੰਤ ਬਾਅਦ ਹੀ ਗੈਸ ਕੰਪਨੀ ਦੇ ਡਲਿਵਰੀ ਮੈਨ ਨੂੰ ਮੋਬਾਇਲ ਫੋਨ ਨੰਬਰ ’ਤੇ ਆਇਆ ਡੀ.ਏ.ਸੀ. ਕੋਡ ਦੇਣਾ ਜ਼ਰੂਰੀ ਹੋਵੇਗਾ ਤਾਂ ਕਿ ਗੈਸ ਸਿਲੰਡਰ ਦੀ ਡਲਿਵਰੀ ਸਹੀ ਹੱਥਾਂ ਤੱਕ ਪੁੱਜ ਸਕੇ।
ਅਰੁਣ ਅਗਰਵਾਲ ਨੇ ਦੱਸਿਆ ਕਿ ਹਾਲ ਦੀ ਘੜੀ ਘਰੇਲੂ ਗੈਸ ਦੀ ਕੋਈ ਦਿੱਕਤ ਨਹੀਂ ਹੈ ਪਰ ਜੇਕਰ ਹਰ ਖਪਤਕਾਰ ਅਤੇ ਡੀਲਰ ਕੰਪਨੀ ਵੱਲੋਂ ਜਾਰੀ ਕੀਤੇ ਨਿਯਮਾਂ ਅਤੇ ਸ਼ਰਤਾਂ ਦੀ ਪਾਲਣਾ ਕਰੇਗਾ ਤਾਂ ਅੱਗੇ ਵੀ ਸਥਿਤੀ ਕਾਬੂ ਵਿਚ ਰਹਿਣ ਦੀ ਸੰਭਾਵਨਾ ਹੈ, ਨਹੀਂ ਤਾਂ ਘਰੇਲੂ ਗੈਸ ਦੀ ਸਪਲਾਈ ਲਈ ਕਿੱਲਤ ਪੈਦਾ ਹੋਣ ਵਰਗੀਆਂ ਸੰਭਾਵਨਾਵਾਂ ਨੂੰ ਨਜ਼ਰ ਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ।
ਸਰਪੰਚ ਦੇ ਕਤਲ ਮਗਰੋਂ ਪਰਿਵਾਰਕ ਮੈਂਬਰਾਂ ਨੇ ਲਾਇਆ ਧਰਨਾ, ਵਿਧਾਇਕ 'ਤੇ ਪਰਚਾ ਦਰਜ ਕਰਨ ਦੀ ਮੰਗ
NEXT STORY 
