ਬੱਧਨੀ ਕਲਾਂ, (ਬੱਬੀ)- ਟੈਲੀਫੋਨ ਪ੍ਰਣਾਲੀ 'ਚ ਜਿਥੇ ਪ੍ਰਾਈਵੇਟ ਕੰਪਨੀਆਂ ਲੋਕਾਂ ਨੂੰ ਲੁਭਾਉਣ ਲਈ ਸਸਤੇ ਤੇ ਵਧੀਆ ਪਲਾਨ ਮੁਹੱਈਆ ਕਰਵਾ ਕੇ ਆਪਣੇ ਵੱਲ ਖਿੱਚ ਰਹੀਆਂ ਹਨ, ਉਥੇ ਹੀ ਭਾਰਤ ਦੂਰ ਸੰਚਾਰ ਵਿਭਾਗ ਵੱਲੋਂ ਬੀ. ਐੱਸ. ਐੱਨ. ਐੱਲ. ਦੀਆਂ ਸਥਾਨਕ ਸ਼ਹਿਰ ਅੰਦਰ ਦਿੱਤੀਆਂ ਜਾ ਰਹੀਆਂ ਘਟੀਆ ਸੇਵਾਵਾਂ ਤੋਂ ਟੈਲੀਫੋਨ ਖਪਤਕਾਰ ਬੇਹੱਦ ਪ੍ਰੇਸ਼ਾਨ ਹੋ ਗਏ ਹਨ। ਆਏ ਦਿਨ ਬੱਧਨੀ ਕਲਾਂ ਦੀ ਟੈਲੀਫੋਨ ਐਕਸਚੇਂਜ ਖਰਾਬ ਰਹਿੰਦੀ ਹੈ ਅਤੇ ਇੰਟਰਨੈੱਟ ਦੀ ਸਰਵਿਸ ਵੀ ਮਾੜੀ ਹੋਣ ਕਰਕੇ ਖਪਤਕਾਰਾਂ ਨੂੰ ਬਹੁਤ ਹੀ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
ਜਾਣਕਾਰੀ ਮੁਤਾਬਕ ਬਾਘਾਪੁਰਾਣਾ ਡਵੀਜ਼ਨ 'ਚ ਆਉਂਦੇ ਨਿਹਾਲ ਸਿੰਘ ਵਾਲਾ ਤੇ ਕਸਬਾ ਬੱਧਨੀ ਕਲਾਂ ਦੀਆਂ ਐਕਸਚੇਂਜਾਂ 'ਚ ਬੀਤੇ 3 ਕੁ ਸਾਲ ਪਹਿਲਾਂ ਬਰਾਂਡ ਬੈਂਡ ਦੇ ਤਕਰੀਬਨ 4 ਹਜ਼ਾਰ ਕੁਨੈਕਸ਼ਨ ਲੱਗੇ ਹੋਏ ਸਨ ਪਰ ਮਹਿਕਮੇ ਦੀ ਅਣਗਹਿਲੀ ਕਾਰਨ ਅੱਜ ਇਨ੍ਹਾਂ ਦੀ ਗਿਣਤੀ ਘੱਟ ਕੇ ਤਕਰੀਬਨ 1600 ਰਹਿ ਗਈ ਹੈ। ਬੱਧਨੀ ਕਲਾਂ ਟੈਲੀਫੋਨ ਐਕਸਚੇਂਜ 2 ਹਜ਼ਾਰ ਲਾਈਨ ਦੀ ਹੋਣ ਦੇ ਬਾਵਜੂਦ ਉਸ 'ਚ ਲੈਂਡਲਾਈਨ ਕੁਨੈਕਸ਼ਨ 250 ਰਹਿ ਗਏ ਅਤੇ ਇਨ੍ਹਾਂ ਬਚੇ ਖਪਤਕਾਰਾਂ ਨੂੰ ਵੀ ਮਹਿਕਮਾ ਸੰਤੁਸ਼ਟ ਕਰਨ 'ਚ ਅਸਫਲ ਸਿੱਧ ਹੋ ਰਿਹਾ ਹੈ। ਇਲਾਕੇ ਦੇ ਕਈ ਉਦਯੋਗਪਤੀਆਂ ਅਤੇ ਵਪਾਰੀਆਂ ਵੱਲੋਂ ਆਪਣੇ ਕੰਮ ਦੀ ਸਹੂਲਤ ਲਈ ਮਹਿੰਗੇ ਰੇਟ 'ਚ ਬਰਾਂਡ ਬੈਂਡ ਦੇ ਲਏ ਗਏ ਪਲਾਨ ਵੀ ਘਟੀਆ ਇੰਟਰਨੈੱਟ ਸੇਵਾਵਾਂ ਕਾਰਨ ਮਿੱਟੀ 'ਚ ਰੁਲ ਗਏ ਹਨ। ਪਤਾ ਲੱਗਾ ਹੈ ਕਿ ਬੱਧਨੀ ਕਲਾਂ ਟੈਲੀਫੋਨ ਐਕਸਚੇਂਜ ਦੀ ਕੁਨੈਕਟੀਵਿਟੀ ਨੂੰ ਮੋਗਾ ਤੋਂ ਵਾਇਆ ਬੁੱਟਰ ਅਤੇ ਵਾਇਆ ਨਿਹਾਲ ਸਿੰਘ ਵਾਲਾ ਬਾਘਾਪੁਰਾਣਾ 2 ਸਾਈਡਾਂ ਤੋਂ ਜੋੜਿਆ ਗਿਆ ਹੈ ਪਰ ਬੁੱਟਰ ਕਲਾਂ ਵਾਲੇ ਪਾਸੇ ਦੀ ਕੁਨੈਕਟੀਵਿਟੀ ਪਿਛਲੇ ਲੰਮੇ ਸਮੇਂ ਤੋਂ ਬੰਦ ਪਈ ਹੈ, ਜਿਸ ਨੂੰ ਕਿਸੇ ਨੇ ਅਜੇ ਤੱਕ ਨਹੀਂ ਜੋੜਿਆ। ਮੌਜੂਦਾ ਸਥਿਤੀ 'ਚ ਦੂਰ ਸੰਚਾਰ ਵਿਭਾਗ ਭਾਵਂੇ ਕੁੰਭਕਰਨੀ ਨੀਂਦ ਸੁੱਤਾ ਪਿਆ ਹੈ ਪਰ ਇਸ ਦਾ ਖਮਿਆਜ਼ਾ ਬੱਧਨੀ ਕਲਾਂ ਇਲਾਕੇ ਦੇ ਖਪਤਕਾਰਾਂ ਨੂੰ ਭੁਗਤਣਾ ਪੈ ਰਿਹਾ ਹੈ। ਇਸ ਸਬੰਧੀ ਜਦੋਂ ਵਿਭਾਗ ਦੇ ਇਕ ਡਿਪਟੀ ਜਨਰਲ ਮੈਨੇਜਰ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਬੀ. ਐੱਸ. ਐੱਨ. ਐੱਲ. ਖਪਤਕਾਰਾਂ ਨੂੰ ਬਿਹਤਰ ਸਹੂਲਤਾਂ ਦੇਣ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ ਪਰ ਜੋ ਬੱਧਨੀ ਕਲਾਂ ਐਕਸਚੇਂਜ ਤੋਂ ਖਪਤਕਾਰਾਂ ਨੂੰ ਪ੍ਰੇਸ਼ਾਨੀ ਆ ਰਹੀ ਹੈ, ਉਸ ਦਾ ਵੀ ਜਲਦ ਹੱਲ ਕੀਤਾ ਜਾਵੇਗਾ।
ਕਸਬਾ ਹਰਿਆਣਾ 'ਚ ਚੋਰ ਗਿਰੋਹ ਸਰਗਰਮ
NEXT STORY 
