ਫ਼ਿਲੌਰ (ਭਾਖੜੀ)- ਦਲਿਤ ਲੜਕੀ ਦੀ ਇਕ ਹਫਤਾ ਪਹਿਲਾਂ ਸ਼ੱਕੀ ਹਾਲਾਤ ਵਿਚ ਹੋਈ ਮੌਤ ਦੇ ਮਾਮਲੇ ਨੇ ਤੂਲ ਫੜ ਲਿਆ ਹੈ। ਮ੍ਰਿਤਕ ਲੜਕੀ ਨੂੰ ਨਿਆਂ ਦਿਵਾਉਣ ਲਈ ਬਸਪਾ ਦੀ ਪ੍ਰਦੇਸ਼ ਕਮੇਟੀ ਦੇ ਮੈਂਬਰ ਖੁਸ਼ੀ ਰਾਮ ਨੇ ਸ਼ਹਿਰ ਤੇ ਪਿੰਡ ਵਾਸੀਆਂ ਦੇ ਸਹਿਯੋਗ ਨਾਲ ਸੰਘਰਸ਼ ਛੇੜਿਆ ਹੋਇਆ ਸੀ।
ਐੱਸ.ਸੀ., ਐੱਸ.ਟੀ. ਕਮਿਸ਼ਨ ਦੇ ਚੇਅਰਮੈਨ ਨੇ 'ਜਗ ਬਾਣੀ' ਵਿਚ ਛਪੀ ਖ਼ਬਰ ’ਤੇ ਸੁਮੋਟੋ ਨੋਟਿਸ ਲਿਆ ਜਿਸ ਤੋਂ ਬਾਅਦ ਦੁਪਹਿਰ 2 ਵਜੇ ਪੁਲਸ ਨੇ ਮ੍ਰਿਤਕ ਲੜਕੀ ਦੇ ਪਿਤਾ ਦੇ ਬਿਆਨਾਂ ’ਤੇ ਹੋਟਲ ਹਾਨ ਦੇ ਸੇਲਜ਼ ਮੈਨੇਜਰ ਆਕਾਸ਼ਦੀਪ ਤੇ ਉਸ ਦੀ ਪਤਨੀ ਸਲੋਮੀ ’ਤੇ ਮਰਨ ਲਈ ਮਜਬੂਰ ਕਰਨ ਦੀਆਂ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਹੈ। ਹਾਲ ਦੀ ਘੜੀ ਦੋਵੇਂ ਮੁਲਜ਼ਮ ਪਤੀ-ਪਤਨੀ ਫਰਾਰ ਦੱਸੇ ਜਾਂਦੇ ਹਨ।
ਮ੍ਰਿਤਕ ਲੜਕੀ ਅਨੂ, ਜਿਸ ਨੇ ਹੋਟਲ ਮੈਨੇਜਮੈਂਟ ਦਾ ਕੋਰਸ ਕੀਤਾ ਹੋਇਆ ਸੀ, ਦੇ ਪਿਤਾ ਬੂਟਾ ਰਾਮ ਨੇ ਪੁਲਸ ਨੂੰ ਦਿੱਤੇ ਬਿਆਨਾਂ ਵਿਚ ਦੱਸਿਆ ਕਿ ਉਨ੍ਹਾਂ ਦੀ ਬੇਟੀ ਲੁਧਿਆਣਾ ਦੇ ਫਿਰੋਜ਼ਪੁਰ ਰੋਡ ‘ਤੇ ਸਥਿਤ ਹੋਟਲ ਆਨ ਵਿਚ ਪਿਛਲੇ ਡੇਢ ਸਾਲ ਤੋਂ ਕੰਮ ਕਰ ਰਹੀ ਸੀ। ਉਸੇ ਹੋਟਲ ਦੇ ਇਕ ਸੇਲਜ਼ ਮੈਨੇਜਰ ਆਕਾਸ਼ਦੀਪ ਜੋ ਵਿਆਹੁਤਾ ਸੀ, ਉਨ੍ਹਾਂ ਦੀ ਬੇਟੀ ਅਨੂ ਨੂੰ ਖੁਦ ਨੂੰ ਕੁਆਰਾ ਦੱਸ ਕੇ ਉਸ ਨਾਲ ਵਿਆਹ ਕਰਨ ਦਾ ਝਾਂਸਾ ਦੇ ਕੇ ਉਸ ਨੂੰ ਆਪਣੇ ਪਿਆਰ ਦੇ ਜਾਲ ਵਿਚ ਫਸਾ ਰੱਖਿਆ ਸੀ। ਉਹ ਲੰਬੇ ਸਮੇਂ ਤੋਂ ਉਨ੍ਹਾਂ ਦੀ ਲੜਕੀ ਦਾ ਸ਼ੋਸ਼ਣ ਕਰ ਰਿਹਾ ਸੀ। ਅਨੂ ਨੂੰ ਜਦੋਂ ਪਤਾ ਲੱਗਾ ਕਿ ਆਕਾਸ਼ਦੀਪ ਵਿਆਹੁਤਾ ਹੈ ਤਾਂ ਉਹ ਪਿੱਛੇ ਹਟ ਗਈ। ਆਕਾਸ਼ ਨੇ ਅਨੂ ਦਾ ਪਿੱਛਾ ਨਹੀਂ ਛੱਡਿਆ ਤੇ ਉਹ ਜਬਰੀ ਅਨੂ ਨੂੰ ਮਿਲਣ ਲਈ ਉਸ ਨੂੰ ਧਮਕੀਆਂ ਦੇਣ ਲਗ ਪਿਆ।
ਹੋਟਲ ਆਨ ਦਾ ਸੇਲਜ਼ ਮੈਨਜਰ ਆਕਾਸ਼ਦੀਪ ਦੀ ਪਤਨੀ ਸਲੋਮੀ ਨੂੰ ਆਪਣੇ ਪਤੀ ਦੇ ਅਨੂ ਦੇ ਨਾਲ ਪ੍ਰੇਮ ਪ੍ਰਸੰਗਾਂ ਦਾ ਪਤਾ ਲੱਗਾ ਤਾਂ ਉਹ ਵੀ ਆਪਣੇ ਪਤੀ ਨੂੰ ਪਿੱਛੇ ਹਟਣ ਦੀ ਜਗ੍ਹਾ ਅਨੂ ਦੇ ਪਿੱਛੇ ਹੱਥ ਧੋ ਕੇ ਪੈ ਗਈ। ਇਕ ਪਾਸੇ ਜਿਥੇ ਆਕਾਸ਼ ਅਨੂ ਨੂੰ ਆਏ ਦਿਨ ਮਿਲਣ ਲਈ ਬਲੈਕਮੇਲ ਕਰਦਾ ਤਾਂ ਦੂਜੇ ਪਾਸੇ ਉਸ ਦੀ ਪਤਨੀ ਸਲੋਮੀ ਅਨੂ ਨੂੰ ਪਿੱਛਾ ਛੱਡਣ ਲਈ ਧਮਕੀਆਂ ਦਿੰਦੀ। ਇਸੇ ਚੱਕਰ ਵਿਚ ਅਨੂ ਬੇਹੱਦ ਪ੍ਰੇਸ਼ਾਨ ਤੇ ਬੀਮਾਰ ਰਹਿਣ ਲਗ ਪਈ।
ਘਟਨਾ ਦੇ ਦਿਨ 16 ਜੁਲਾਈ ਨੂੰ ਆਕਾਸ਼ ਦੀ ਪਤਨੀ ਸਲੋਮੀ ਅਨੂ ਨੂੰ ਧਮਕਾਉਣ ਉਸ ਦੇ ਘਰ ਦੇ ਬਾਹਰ ਆ ਗਈ। 16 ਜੁਲਾਈ ਨੂੰ ਮ੍ਰਿਤਕ ਲੜਕੀ ਅਨੂ ਨੇ ਲੁਧਿਆਣਾ ਤੋਂ ਸ਼ਾਮ 6 ਵਜੇ ਆਪਣੇ ਘਰ ਫੋਨ ਕਰਕੇ ਕਿਹਾ ਕਿ ਉਸ ਦੀ ਸਿਹਤ ਅੱਜ ਠੀਕ ਨਹੀਂ ਹੈ, ਉਹ ਜਦੋਂ ਫਿਲੌਰ ਪੁੱਜੇਗੀ ਤਾਂ ਅੱਗੇ ਉਸ ਦਾ ਭਰਾ ਉਸ ਨੂੰ ਬੱਸ ਅੱਡੇ ਤੋਂ ਲੈਣ ਆ ਜਾਵੇ।
ਅਨੂ ਦੇ ਇਸ ਫੋਨ ਤੋਂ ਅਜਿਹਾ ਲਗਦਾ ਹੈ ਜਾਂ ਤਾਂ ਉਸ ਨੂੰ ਉਸੇ ਦਿਨ ਡਰ ਸੀ ਕਿ ਅੱਜ ਉਸ ਦੇ ਨਾਲ ਕੁਝ ਹੋਣ ਵਾਲਾ ਹੈ। ਉਸ ਤੋਂ ਬਾਅਦ ਅਨੂ ਦਾ ਭਰਾ ਉਸ ਨੂੰ ਲੈਣ ਬੱਸ ਅੱਡੇ ਪੁੱਜ ਗਿਆ ਜਿਸ ਤੋਂ ਬਾਅਦ ਅਨੂ ਦਾ ਫੋਨ ਲਗਾਤਾਰ ਬਿਜੀ ਆਉਂਦਾ ਰਿਹਾ ਅਤੇ ਉਸ ਤੋਂ ਬਾਅਦ ਹਾਦਸਾ ਵਾਪਰ ਗਿਆ।
ਹੁਣ ਤੱਕ ਦੀ ਜਾਂਚ ਵਿਚ ਜੋ ਗੱਲ ਸਾਹਮਣੇ ਆਈ ਹੈ, ਆਕਾਸ਼ ਦੀ ਪਤਨੀ ਸਲੋਮੀ ਅਨੂ ਦੇ ਘਰ ਪੁੱਜੀ। ਉਸ ਨੇ ਘਰ ਦੇ ਬਾਹਰ ਖੜ੍ਹੇ ਹੋ ਕੇ ਅਨੂ ਨੂੰ ਵੀਡੀਓ ਕਾਲ ਕਰਨ ਲਈ ਕਿਹਾ ਕਿ ਉਹ ਖੁਦ ਆਪਣੀਆਂ ਅੱਖਾਂ ਨਾਲ ਦੇਖ ਲਵੇ ਕਿ ਉਹ ਉਸ ਦੇ ਘਰ ਦੇ ਬਾਹਰ ਖੜ੍ਹੀ ਹੈ। ਅੱਜ ਉਹ ਉਸ ਨੂੰ ਉਸ ਦੇ ਘਰ ਬਦਨਾਮ ਕਰਕੇ ਜਾਵੇਗੀ। ਇਸ ਤੋਂ ਬਾਅਦ ਅਨੂ ਨੇ ਆਕਾਸ਼ ਨੂੰ ਫੋਨ ਕਰਕੇ ਕਿਹਾ ਇਸ ਵਿਚ ਉਸ ਦਾ ਕੀ ਕਸੂਰ ਹੈ।
ਪਹਿਲਾਂ ਤੂੰ ਖੁਦ ਉਸ ਨੂੰ ਕੁਆਰਾ ਦੱਸ ਕੇ ਉਸ ਦੀ ਜ਼ਿੰਦਗੀ ਬਰਬਾਦ ਕੀਤੀ ਤੇ ਹੁਣ ਤੁਸੀਂ ਦੋਵੇਂ ਪਤੀ-ਪਤਨੀ ਉਸ ਨੂੰ ਜਿਊਣ ਨਹੀਂ ਦੇ ਰਹੇ। ਅਨੂ ਬੇਹੱਦ ਪ੍ਰੇਸ਼ਾਨ ਹੋ ਗਈ ਤੇ ਉਸ ਨੇ ਆਪਣੀ ਜੀਵਨ ਲੀਲਾ ਖਤਮ ਕਰ ਲਈ। ਪੁਲਸ ਨੇ ਹੋਟਲ ਆਨ ਦੇ ਸੇਲਜ਼ ਮੈਨੇਜਰ ਆਕਾਸ਼ਦੀਪ ਤੇ ਉਸ ਦੀ ਪਤਨੀ ਸਲੋਮੀ ਵਿਰੁੱਧ ਖੁਦਕੁਸ਼ੀ ਲਈ ਮਜਬੂਰ ਕਰਨ ਦਾ ਕੇਸ ਦਰਜ ਕਰ ਦਿੱਤਾ।
ਮ੍ਰਿਤਕ ਲੜਕੀ ਅਨੂ ਤੇ ਉਸ ਦੇ ਪਰਿਵਾਰ ਵਾਲਿਆਂ ਨੂੰ ਨਿਆਂ ਦਿਵਾਉਣ ਲਈ ਬਸਪਾ ਪਾਰਟੀ ਦੇ ਨੇਤਾ ਖੁਸ਼ੀ ਰਾਮ ਨੇ ਲਗਾਤਾਰ ਸੰਘਰਸ਼ ਛੇੜਿਆ ਹੋਇਆ ਸੀ। ਖੁਸ਼ੀ ਰਾਮ ਨੇ ਸੈਂਕੜੇ ਲੋਕਾਂ ਦੇ ਨਾਲ ਕੈਂਡਲ ਮਾਰਚ ਕੱਢੇ। ਜਗ ਬਾਣੀ ਨੇ ਨਿਆਂ ਦਿਵਾਉਣ ਲਈ ਅਖ਼ਬਾਰ ਵਿਚ ਪ੍ਰਮੁੱਖਤਾ ਨਾਲ ਮਾਮਲੇ ਨੂੰ ਛਾਪਿਆ ਜਿਸ ਤੋਂ ਬਾਅਦ ਪ੍ਰਸ਼ਾਸਨ ਜਾਗਿਆ। ਜਗ ਬਾਣੀ ਵਿਚ ਛਪੀ ਖ਼ਬਰ ’ਤੇ ਪੰਜਾਬ ਐੱਸ.ਸੀ., ਐੱਸ.ਟੀ. ਕਮਿਸ਼ਨ ਐਕਟ ਦੇ ਚੇਅਰਮੈਨ ਨੇ ਸੂਮੋਟੋ ਨੋਟਿਸ ਲਿਆ ਜਿਸ ਤੋਂ ਬਾਅਦ ਪੁਲਸ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ ਤੇ ਉਨ੍ਹਾਂ ਨੇ ਜਾਂਚ ਕਰਕੇ ਦੁਪਹਿਰ 2 ਵਜੇ ਮੁਲਜ਼ਮਾਂ ਵਿਰੁੱਧ ਕੇਸ ਦਰਜ ਕਰ ਦਿੱਤਾ।
ਜ਼ਮੀਨ ਦੀ ਗਲਤ ਤਰੀਕੇ ਨਾਲ ਰਜਿਸਟਰੀ ਕਰਵਾਉਣ ਦੇ ਦੋਸ਼ 'ਚ 4 ਨਾਮਜ਼ਦ
NEXT STORY 
