ਫਿਲੌਰ (ਭਾਖੜੀ)— ਸਤਲੁਜ ਦਰਿਆ 'ਚ ਪਾਣੀ ਦਾ ਪੱਧਰ ਘੱਟ ਗਿਆ ਹੈ ਅਤੇ ਹੜ੍ਹ ਦਾ ਪਾਣੀ ਲੋਕਾਂ ਦੇ ਘਰਾਂ ਅਤੇ ਖੇਤਾਂ 'ਚ ਥੱਲੇ ਉੱਤਰ ਜਾਣ ਤੋਂ ਬਾਅਦ ਹੁਣ ਤਬਾਹੀ ਦੇ ਨਿਸ਼ਾਨ ਨਜ਼ਰ ਆਉਣੇ ਸ਼ੁਰੂ ਹੋ ਗਏ ਹਨ। ਪਾਣੀ ਘੱਟ ਹੁੰਦੇ ਹੀ ਲੋਕ ਮੁੜ ਆਪਣੀ ਨਵੀਂ ਜ਼ਿੰਦਗੀ ਸ਼ੁਰੂ ਕਰਨ ਲਈ ਘਰਾਂ ਵੱਲ ਮੁੜਨੇ ਸ਼ੁਰੂ ਹੋ ਗਏ ਹਨ।
ਮਨੁੱਖਾਂ ਅਤੇ ਉਨ੍ਹਾਂ ਦੇ ਮਵੇਸ਼ੀਆਂ ਲਈ ਖਾਣ ਲਈ ਨਹੀਂ ਬਚਿਆ ਇਕ ਵੀ ਦਾਣਾ ਤੇ ਪੀਣ ਨੂੰ ਪਾਣੀ
ਸਤਲੁਜ ਦਰਿਆ 'ਚ ਪਾਣੀ ਦਾ ਪੱਧਰ ਵਧਣ ਨਾਲ ਫਿਲੌਰ ਦੇ ਜਿਨ੍ਹਾਂ 30 ਪਿੰਡਾਂ 'ਚ ਹੜ੍ਹ ਆਇਆ ਸੀ। ਪਾਣੀ ਦੇ ਵਾਪਸ ਥੱਲੇ ਉੱਤਰਨ ਤੋਂ ਬਾਅਦ ਉਸ ਤੋਂ ਹੋਈ ਤਬਾਹੀ ਦੇ ਨਿਸ਼ਾਨ ਹੁਣ ਸਾਫ ਦਿਖਾਈ ਦੇਣੇ ਸ਼ੁਰੂ ਹੋ ਗਏ ਹਨ। ਪਾਣੀ ਦੇ ਥੱਲੇ ਉੱਤਰਦੇ ਹੀ ਲੋਕ ਆਪਣੇ ਘਰਾਂ 'ਚ ਮੁੜ ਨਵੀਂ ਜ਼ਿੰਦਗੀ ਸ਼ੁਰੂ ਕਰਨ ਲਈ ਜਾਣੇ ਸ਼ੁਰੂ ਹੋ ਗਏ ਹਨ। ਸਭ ਤੋਂ ਜ਼ਿਆਦਾ ਹੜ੍ਹ ਕਾਰਣ ਨੁਕਸਾਨ ਪਿੰਡ ਭੋਲੇਵਾਲ ਕਦੀਮ, ਮੋਤੀਪੁਰ ਖਾਲਸਾ, ਮੌ ਸਾਹਿਬ, ਮਿਯੋਵਾਲ, ਭੋਲੇਵਾਲ 'ਚ ਹੋਇਆ, ਜਿੱਥੇ ਲੋਕਾਂ ਨੂੰ ਆਪਣੇ ਘਰਾਂ ਤੋਂ ਸਾਮਾਨ ਕੱਢਣ ਦਾ ਪਾਣੀ ਨੇ ਸਮਾਂ ਹੀ ਨਹੀਂ ਦਿੱਤਾ ਅਤੇ ਉਨ੍ਹਾਂ ਦਾ ਘਰ 'ਚ ਪੂਰਾ ਸਾਮਾਨ ਖਤਮ ਹੋ ਗਿਆ। ਘਰਾਂ ਦੀਆਂ ਕੰਧਾਂ 'ਤੇ 6 ਤੋਂ 7 ਫੁੱਟ ਉੱਪਰ ਹੜ੍ਹ ਦੇ ਪਾਣੀ ਦਾ ਚਿੱਕੜ ਚਿੰਬੜਿਆ ਹੋਇਆ ਹੈ। ਇਹੀ ਹਾਲ ਜ਼ਮੀਨ ਦਾ ਹੈ ਜਿੱਥੇ ਚਿੱਕੜ 'ਚ ਪੈਦਲ ਚੱਲਣਾ ਵੀ ਮੁਸ਼ਕਿਲ ਹੈ। ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਘਰਾਂ 'ਚ ਖਾਣ ਲਈ ਅਨਾਜ ਦਾ ਇਕ ਵੀ ਦਾਣਾ ਨਹੀਂ ਬਚਿਆ ਜੋ ਫਸਲ ਅਤੇ ਸਬਜ਼ੀਆਂ ਖੇਤਾਂ 'ਚ ਲਾਈਆਂ ਸਨ, ਉਹ ਪੂਰੀ ਤਰ੍ਹਾਂ ਤਬਾਹ ਹੋ ਚੁੱਕੀਆਂ ਹਨ। ਖੂਹਾਂ ਦੇ ਪਾਣੀ ਦੂਸ਼ਿਤ ਹੋ ਗਏ ਹਨ ਜੋ ਪੀਣ ਦੇ ਬਿਲਕੁਲ ਕਾਬਿਲ ਨਹੀਂ ਰਹੇ। ਕੁਝ ਘਰਾਂ ਦੇ ਥੱਲਿਓਂ ਜ਼ਮੀਨ ਧਸਣ ਨਾਲ ਉਨ੍ਹਾਂ 'ਚ ਤਰੇੜਾਂ ਆ ਗਈਆਂ ਹਨ ਅਤੇ ਕੁਝ ਘਰ ਡਿੱਗਣ ਵਾਲੇ ਹੋ ਗਏ ਹਨ। ਨਾ ਖਾਣ ਲਈ ਕੁਝ ਬਚਿਆ ਨਾ ਪਹਿਨਣ ਲਈ ਅਤੇ ਨਾ ਹੀ ਪੀਣ ਯੋਗ ਪਾਣੀ ਬਚਿਆ ਹੈ। ਉਸ ਤੋਂ ਵੀ ਬੁਰਾ ਹਾਲ ਉਨ੍ਹਾਂ ਦੇ ਮਵੇਸ਼ੀਆਂ ਦਾ ਹੈ। ਉਨ੍ਹਾਂ ਦੇ ਖਾਣ ਲਈ ਵੀ ਉਨ੍ਹਾਂ ਦੇ ਖੇਤਾਂ 'ਚ ਚਾਰਾ ਤੱਕ ਨਹੀਂ ਬਚਿਆ।
ਪ੍ਰਸ਼ਾਸਨ ਨੇ ਰਾਹਤ ਕੈਂਪ ਤਾਂ ਬਣਾਏ, ਉਨ੍ਹਾਂ 'ਚ ਰਹਿਣ ਦੇ ਪ੍ਰਬੰਧ ਘੱਟ ਹੀ ਸਨ
ਪਿੰਡ ਦੇ ਪ੍ਰਾਇਮਰੀ ਸਕੂਲ 'ਚ ਪ੍ਰਸ਼ਾਸਨ ਰਾਹੀਂ ਬਣਾਏ ਰਾਹਤ ਕੈਂਪ 'ਚ ਸ਼ਰਨ ਲਈ ਬੈਠੇ ਲੋਕਾਂ ਨੇ ਦੱਸਿਆ ਕਿ ਪ੍ਰਸ਼ਾਸਨ ਨੇ ਸਕੂਲਾਂ 'ਚ ਉਨ੍ਹਾਂ ਦੇ ਠਹਿਰਨ ਦਾ ਪ੍ਰਬੰਧ ਤਾਂ ਕਰਵਾ ਦਿੱਤਾ ਪਰ ਉਨ੍ਹਾਂ ਦੇ ਖਾਣ ਲਈ ਅਤੇ ਸੌਣ ਲਈ ਬਿਸਤਰਿਆਂ ਦਾ ਕੋਈ ਖਾਸ ਪ੍ਰਬੰਧ ਨਹੀਂ ਕਰਵਾਇਆ। ਜਿਨ੍ਹਾਂ ਪਿੰਡਾਂ 'ਚ ਹੜ੍ਹ ਦਾ ਪਾਣੀ ਨਹੀਂ ਪੁੱਜਾ, ਉਥੋਂ ਦੇ ਪਿੰਡ ਵਾਸੀ ਅਤੇ ਗੁਰਦੁਆਰਿਆਂ ਤੋਂ ਲੋਕ ਉਨ੍ਹਾਂ ਦੇ ਖਾਣ ਲਈ ਖੁਦ ਹੀ ਲੰਗਰ ਭੇਜ ਰਹੇ ਹਨ ਅਤੇ ਕੁਝ ਲੋਕ ਉਨ੍ਹਾਂ ਦੇ ਮਵੇਸ਼ੀਆਂ ਲਈ ਚਾਰਾ ਲਿਆ ਰਹੇ ਹਨ। ਕੁਝ ਪਿੰਡ ਵਾਸੀਆਂ ਨੇ ਉਨ੍ਹਾਂ ਨੂੰ ਆਪਣੇ ਕੋਲੋਂ ਸੌਣ ਲਈ ਮੰਜੇ ਦੇ ਦਿੱਤੇ। ਖੁੱਲ੍ਹੇ ਆਸਮਾਨ ਥੱਲੇ ਬਿਨਾਂ ਬਿਜਲੀ ਦੇ ਉਹ ਰਾਤ ਬਸਰ ਕਰਨ ਲਈ ਮਜਬੂਰ ਹਨ।
ਹੜ੍ਹ ਦਾ ਪਾਣੀ ਰਾਤ ਨੂੰ ਕਹਿਰ ਬਣ ਕੇ ਟੁੱਟਿਆ ਪਿੰਡ ਵਾਸੀਆਂ 'ਤੇ
ਰਾਹਤ ਕੈਂਪ 'ਚ ਰਹਿ ਰਹੀਆਂ ਔਰਤਾਂ ਕੁਲਬੀਰ ਕੌਰ, ਪਰਮਜੀਤ ਕੌਰ ਅਤੇ ਗੁਰਮੇਲ ਕੌਰ ਨੇ ਦੱਸਿਆ ਕਿ ਉਹ ਆਪਣੇ ਘਰਾਂ 'ਚ ਸੌ ਰਹੇ ਸਨ। ਰਾਤ 3 ਵਜੇ ਉਨ੍ਹਾਂ ਦੇ ਪਿੰਡ ਭੋਲੇਵਾਲ ਕਦੀਮ 'ਚ ਦਰਿਆ ਦਾ ਪਾਣੀ ਇੰਨੀ ਤੇਜ਼ੀ ਨਾਲ ਉਨ੍ਹਾਂ ਦੇ ਘਰਾਂ 'ਚ ਆਇਆ ਕਿ ਲੋਕ ਸਭ ਕੁਝ ਉਥੇ ਆਪਣੇ ਘਰਾਂ 'ਚ ਛੱਡ ਮਵੇਸ਼ੀਆਂ ਨੂੰ ਨਾਲ ਲੈ ਕੇ ਕਿਸੇ ਤਰ੍ਹਾਂ ਜਾਨ ਬਚਾ ਕੇ ਆਪਣੇ ਪਰਿਵਾਰਾਂ ਸਮੇਤ ਨਿਕਲਣ 'ਚ ਕਾਮਯਾਬ ਹੋ ਗਏ। ਉਨ੍ਹਾਂ ਨੇ ਤਾਂ ਅਗਲੇ ਦਿਨ ਖਾਣ ਖਾਣ ਲਈ ਭਾਂਡੇ ਵੀ ਲੋਕਾਂ ਤੋਂ ਮੰਗ ਕੇ ਲਏ। ਉਨ੍ਹਾਂ ਦਾ ਪਿੰਡ ਪੂਰੀ ਤਰ੍ਹਾਂ ਬਰਬਾਦ ਹੋ ਗਿਆ। ਬੱਚਿਆਂ ਨੂੰ ਸਕੂਲ ਭੇਜਣ ਲਈ ਨਾ ਤਾਂ ਵਰਦੀ ਬਚੀ ਅਤੇ ਨਾ ਹੀ ਕਿਤਾਬਾਂ। ਉਨ੍ਹਾਂ ਨੂੰ ਸਮਝ ਨਹੀਂ ਆ ਰਿਹਾ, ਉਹ ਆਪਣੀ ਜ਼ਿੰਦਗੀ ਮੁੜੇ ਕਿਵੇਂ ਸ਼ੁਰੂ ਕਰਨਗੇ। ਅਜਿਹਾ ਹੀ ਹਾਲ ਦੂਜੇ ਪਿੰਡ ਵਾਸੀਆਂ ਦਾ ਵੀ ਸੀ।
ਹੜ੍ਹ ਪ੍ਰਭਾਵਿਤ ਪਿੰਡਾਂ 'ਚ ਬੀਮਾਰੀ ਫੈਲਣ ਦਾ ਡਰ
ਪਿੰਡ ਵਾਸੀ ਸੁਖਦੇਵ ਸਿੰਘ, ਗੁਰਦਿਆਲ ਸਿੰਘ, ਚਮਨ ਲਾਲ ਅਤੇ ਅਮਰੀਕ ਸਿੰਘ ਨੇ ਦੱਸਿਆ ਕਿ ਹੜ੍ਹ ਦਾ ਪਾਣੀ ਉਨ੍ਹਾਂ ਲਈ ਬਰਬਾਦੀ ਤਾਂ ਲੈ ਕੇ ਆਇਆ ਹੀ, ਨਾਲ ਹੀ ਕਈ ਮਾਰੂ ਬੀਮਾਰੀਆਂ ਵੀ ਲੈ ਕੇ ਆਇਆ ਹੈ। ਉਨ੍ਹਾਂ ਦੱਸਿਆ ਕਿ ਦਰਿਆ ਦੇ ਕੰਢੇ ਸੂਬੇ ਦੀ ਸਭ ਤੋਂ ਵੱਡੀ ਮ੍ਰਿਤਕ ਜਾਨਵਰਾਂ ਦੀ ਹੱਡਾ ਰੋੜੀ ਸੀ ਜਿਥੇ ਮਰੇ ਹੋਏ ਜਾਨਵਰਾਂ ਨੂੰ ਲਿਆ ਕੇ ਉਨ੍ਹਾਂ ਦੀ ਖੱਲ ਉਤਾਰੀ ਜਾਂਦੀ ਸੀ। ਹੜ੍ਹ ਦੇ ਇਸ ਪਾਣੀ 'ਚ ਹਜ਼ਾਰਾਂ ਦੀ ਗਿਣਤੀ 'ਚ ਮ੍ਰਿਤਕ ਜਾਨਵਰਾਂ ਦੀ ਚਮੜੀ ਅਤੇ ਹੱਡੀਆਂ ਉਨ੍ਹਾਂ ਦੇ ਖੇਤਾਂ ਅਤੇ ਘਰਾਂ ਅੰਦਰ ਆ ਗਈਆਂ ਹਨ ਜਿਨ੍ਹਾਂ ਤੋਂ ਭਿਆਨਕ ਬਦਬੂ ਆ ਰਹੀ ਹੈ। ਇਸ ਤੋਂ ਇਲਾਵਾ ਖੇਤਾਂ 'ਚ ਫਸਲਾਂ ਬਚਾਉਣ ਲਈ ਕਿਸਾਨਾਂ ਵੱਲੋਂ ਜਿਨ੍ਹਾਂ ਜ਼ਹਿਰੀਲੀਆਂ ਦਵਾਈਆਂ ਦਾ ਛਿੜਕਾਅ ਕੀਤਾ ਜਾਂਦਾ ਸੀ, ਉਸ ਕਾਰਨ ਹੁਣ ਪਾਣੀ ਜੋ ਉਨ੍ਹਾਂ ਦੇ ਘਰਾਂ 'ਚ ਘੁੰਮ ਰਿਹਾ ਹੈ ਉਹ ਜ਼ਹਿਰੀਲਾ ਹੋ ਗਿਆ ਹੈ ਜਿਸ ਕਾਰਣ ਘਰਾਂ ਦੀ ਸਾਫ-ਸਫਾਈ ਕਰ ਰਹੇ ਲੋਕਾਂ ਨੂੰ ਚਮੜੀ ਦੇ ਰੋਗ ਲਗ ਸਕਦੇ ਹਨ ਅਤੇ ਨਾਲ ਹੀ ਭਿਆਨਕ ਬੀਮਾਰੀਆਂ ਲਗ ਸਕਦੀਆਂ ਹਨ। ਪ੍ਰਸ਼ਾਸਨ ਨੂੰ ਚਾਹੀਦਾ ਹੈ ਕਿ ਹੜ੍ਹ ਤੋਂ ਪ੍ਰਭਾਵਿਤ ਸਾਰੇ ਪਿੰਡਾਂ 'ਚ ਜ਼ਿਆਦਾ ਗਿਣਤੀ 'ਚ ਡਾਕਟਰਾਂ ਦੀਆਂ ਟੀਮਾਂ ਭੇਜੀਆਂ ਜਾਣ।
ਏਜੰਟ ਦੀ ਠੱਗੀ ਦਾ ਸ਼ਿਕਾਰ ਔਰਤ ਖਾ ਰਹੀ ਹੈ ਦਰ-ਦਰ ਦੀਆਂ ਠੋਕਰਾਂ
NEXT STORY 
