ਜਲੰਧਰ (ਨਰੇਸ਼)— ਪਾਕਿਸਤਾਨ ਦੀ ਡਾਵਾਂਡੋਲ ਹੋ ਰਹੀ ਅਰਥਵਿਵਸਥਾ ਅਤੇ ਮੁਦਰਾ ਦੀ ਬੁਰੀ ਹਾਲਤ ਦਾ ਸਿੱਧਾ ਅਸਰ ਭਾਰਤ ਦੇ ਖੇਡ ਸਾਮਾਨ ਨਿਰਮਾਤਾਵਾਂ 'ਤੇ ਪੈਣਾ ਸ਼ੁਰੂ ਹੋ ਗਿਆ ਹੈ। ਡਾਲਰ ਦੇ ਮੁਕਾਬਲੇ ਪਾਕਿਸਤਾਨ ਦਾ ਰੁਪਿਆ 164 ਤਕ ਹੇਠਾਂ ਆ ਗਿਆ ਹੈ ਜਦਕਿ ਭਾਰਤੀ ਰੁਪਿਆ 69 ਰੁਪਏ ਪ੍ਰਤੀ ਡਾਲਰ 'ਤੇ ਹੈ। ਪਾਕਿਸਤਾਨ ਦੀ ਮੁਦਰਾ ਦੀ ਕੀਮਤ ਭਾਰਤੀ ਮੁਦਰਾ ਦੇ ਮੁਕਾਬਲੇ ਢਾਈ ਗੁਣਾ ਹੋ ਜਾਣ ਦੇ ਕਾਰਨ ਪਾਕਿਸਤਾਨੀ ਖੇਡ ਸਾਮਾਨ ਨਿਰਮਾਤਾ ਭਾਰਤ ਦੇ ਮੁਕਾਬਲੇ ਸਸਤਾ ਸਾਮਾਨ ਵੇਚਣ ਦੀ ਸਥਿਤੀ 'ਚ ਆ ਗਏ ਹਨ। ਇਸ ਨਾਲ ਦਰਾਮਦਕਾਰ ਭਾਰਤੀ ਨਿਰਮਾਤਾਵਾਂ 'ਤੇ ਮੁੱਲ ਘੱਟ ਕਰਨ ਦਾ ਦਬਾਅ ਬਣਾ ਰਹੇ ਹਨ ਜਿਸ ਦੇ ਚਲਦੇ ਫਿਕਰਮੰਦ ਬਰਾਮਦਕਾਰਾਂ ਨੇ ਕੇਂਦਰ ਸਰਕਾਰ ਤੋਂ ਮਦਦ ਮੰਗੀ ਹੈ।
ਰੋਜ਼ਗਾਰ 'ਤੇ ਪਵੇਗਾ ਅਸਰ
ਭਾਰਤ ਦੀ ਖੇਡ ਸਾਮਾਨ ਬਰਾਮਦ ਲਗਭਗ 1900 ਕਰੋੜ ਰੁਪਏ ਦੀ ਹੈ, ਜਦਕਿ ਪਾਕਿਸਤਾਨ ਦੀ ਖੇਡ ਸਾਮਾਨ ਬਰਾਮਦ ਪਹਿਲਾਂ ਹੀ ਭਾਰਤ ਦੇ ਮੁਕਾਬਲੇ ਦੁਗਣੀ ਹੈ ਅਤੇ ਜੇਕਰ ਪਾਕਿਸਤਾਨ ਦੀ ਸਥਿਤੀ ਨਾ ਸੁਧਰੀ ਤਾਂ ਉਹ ਭਾਰਤੀ ਬਰਾਮਦਕਾਰਾਂ ਦੇ ਖਰੀਦਾਰਾਂ 'ਤੇ ਵੀ ਕਬਜ਼ਾ ਕਰ ਸਕਦਾ ਹੈ। ਖੇਡ ਸਾਮਾਨ ਬਰਾਮਦ ਇੰਡਸਟਰੀ ਸਮਾਲ ਸਕੇਲ ਇੰਡਸਟਰੀ ਹੈ ਅਤੇ ਇਸ ਇੰਡਸਟਰੀ ਨਾਲ ਲੱਖਾਂ ਦੀ ਗਿਣਤੀ 'ਚ ਲੋਕਾਂ ਨੂੰ ਰੋਜ਼ਗਾਰ ਮਿਲਦਾ ਹੈ। ਅਜਿਹੇ 'ਚ ਜੇਕਰ ਇੰਡਸਟਰੀ ਦੀ ਬਰਾਮਦ ਪ੍ਰਭਾਵਿਤ ਹੁੰਦੀ ਹੈ ਤਾਂ ਇਸ ਦਾ ਸਿੱਧਾ ਅਸਰ ਦੇਸ਼ ਦੇਸ਼ 'ਚ ਰੋਜ਼ਗਾਰ ਦੀ ਸਥਿਤੀ 'ਤੇ ਵੀ ਪਵੇਗਾ।
ਜ਼ਿਕਰਯੋਗ ਹੈ ਕਿ ਦੇਸ਼ 'ਚ ਜਲੰਧਰ ਅਤੇ ਮੇਰਠ ਖੇਡ ਸਾਮਾਨ ਬਰਾਮਦ ਦੇ 2 ਵੱਡੇ ਕੇਂਦਰ ਹਨ ਅਤੇ ਦੋਹਾਂ ਸਥਾਨਾਂ ਦੇ ਖੇਡ ਸਾਮਾਨ ਬਰਾਮਦਕਾਰਾਂ ਨੂੰ ਕੌਮਾਂਤਰੀ ਬਾਜ਼ਾਰ 'ਚ ਪਾਕਿਸਤਾਨ ਤੋਂ ਵੱਡੀ ਚੁਣੌਤੀ ਮਿਲ ਰਹੀ ਹੈ। ਆਜ਼ਾਦੀ ਤੋਂ ਪਹਿਲਾਂ ਦੇਸ਼ 'ਚ ਖੇਡ ਸਾਮਾਨ ਦੇ ਨਿਰਮਾਣ ਦਾ ਵੱਡਾ ਕੇਂਦਰ ਪਾਕਿਸਤਾਨ ਦਾ ਸਿਆਲਕੋਟ ਹੀ ਸੀ ਪਰ ਆਜ਼ਾਦੀ ਦੇ ਬਾਅਦ ਭਾਰਤ 'ਚ ਜਲੰਧਰ ਖੇਡ ਉਦਯੋਗ ਦੇ ਵੱਡੇ ਕੇਂਦਰ ਦੇ ਤੌਰ 'ਤੇ ਉਭਰਿਆ ਅਤੇ ਬਾਅਦ 'ਚ ਮੇਰਠ 'ਚ ਵੀ ਖੇਡ ਉਦਯੋਗ ਨੇ ਆਪਣਾ ਵਿਕਾਸ ਕੀਤਾ ਅਤੇ ਇਨ੍ਹਾਂ ਦੋਹਾਂ ਸਥਾਨਾਂ 'ਤੇ ਹੁਣ ਖੇਡ ਉਦਯੋਗ ਚੁਣੌਤੀਆਂ ਦਾ ਸਾਹਮਣਾ ਕਰ ਰਿਹਾ ਹੈ।
ਇਸ ਸਾਰੇ ਮਾਮਲੇ 'ਤੇ ਸਪੋਰਟਕਸ ਦੇ ਚੇਅਰਮੈਨ ਮਹੇਸ਼ ਚੱਡਾ ਨੇ ਕਿਹਾ, ''ਅਮਰੀਕਾ ਅਤੇ ਚੀਨ ਵਿਚਾਲੇ ਮੱਧ ਚਲ ਰਹੀ ਟਰੇਡ ਵਾਰ ਨਾਲ ਭਾਰਤੀ ਬਰਾਮਦਕਾਰਾਂ ਨੂੰ ਫਾਇਦਾ ਹੋਣ ਦੀ ਉਮੀਦ ਜਗੀ ਸੀ ਪਰ ਪਾਕਿਸਤਾਨ ਦੇ ਵਿਗੜੇ ਹਾਲਾਤ ਨੇ ਸਾਡੇ ਨਵੀਂ ਚਿੰਤਾ ਖੜ੍ਹੀ ਕਰ ਦਿੱਤੀ ਹੈ। ਮੁਦਰਾ ਦੀ ਕੀਮਤ ਘੱਟ ਹੋਣ ਨਾਲ ਪਾਕਿਸਤਾਨੀ ਬਰਾਮਦਾਰ ਵਿਸ਼ਵ ਬਾਜ਼ਾਰ 'ਚ ਭਾਰਤ ਦੇ ਮੁਕਾਬਲੇ ਸਸਤਾ ਸਾਮਾਨ ਆਫਰ ਕਰ ਰਹੇ ਹਨ ਅਤੇ ਗ੍ਰਾਹਕ ਪਾਕਿਸਤਾਨ ਨੂੰ ਤਰਜੀਹ ਦੇਣ ਲੱਗੇ ਹਨ। ਜੇਕਰ ਭਾਰਤ ਸਰਕਾਰ ਨੇ ਤੁਰੰਤ ਸਾਨੂੰ ਪਾਕਿਸਤਾਨ ਦੇ ਮੁਕਾਬਲੇ ਖੜ੍ਹਾ ਕਰਨ ਲਈ ਕੋਈ ਕਦਮ ਨਾ ਚੁੱਕਿਆ ਤਾਂ ਦੇਸ਼ ਦੀ ਸਪੋਰਟਸ ਗੁਡਸ ਇੰਡਸਟਰੀ ਲਈ ਕਾਫੀ ਵੱਡਾ ਝਟਕਾ ਸਾਬਤ ਹੋ ਸਕਦਾ ਹੈ।
ਇਸ ਸਾਰੇ ਮਾਮਲੇ 'ਤੇ ਸਪੋਰਟਕਸ ਦੇ ਸਾਬਕਾ ਚੇਅਰਮੈਨ ਅਕਲੇਸ਼ ਕੋਹਲੀ ਨੇ ਕਿਹਾ, ''ਅਸੀਂ ਹਰ ਮਾਮਲੇ 'ਚ ਪਾਕਿਸਤਾਨ ਤੋਂ ਅੱਗੇ ਹਾਂ ਪਰ ਸਿਰਫ ਖੇਡ ਸਾਮਾਨ ਬਰਾਮਦ ਹੀ ਇਕ ਅਜਿਹਾ ਖੇਤਰ ਜਿਸ 'ਚ ਪਾਕਿ ਸਾਨੂੰ ਸ਼ਿਕਸਤ ਦਿੰਦਾ ਹੈ। ਪਾਕਿਸਤਾਨ ਦਾ ਖੇਡ ਸਾਮਾਨ ਬਰਾਮਦ ਸਾਡੇ ਮੁਕਾਬਲੇ ਕਿਤੇ ਜ਼ਿਆਦਾ ਹੈ। ਅਜਿਹਾ ਪਾਕਿਸਤਾਨ ਸਰਕਾਰ ਵੱਲੋਂ ਖੇਡ ਸਾਮਾਨ ਬਰਾਮਦਕਾਰਾਂ ਨੂੰ ਦਿੱਤੀਆਂ ਗਈਆਂ ਸਹੂਲਤਾਂ ਦੇ ਚਲਦੇ ਹੈ। ਦੋਹਾਂ ਦੇਸ਼ਾਂ 'ਚ ਕੱਚੇ ਮਾਲ ਦੀ ਕੀਮਤ ਅਤੇ ਲੇਬਰ ਦੇ ਖਰਚ 'ਚ ਕੋਈ ਖਾਸ ਫਰਕ ਨਹੀਂ ਹੈ ਪਰ ਪਾਕਿਸਤਾਨ ਸਰਕਾਰ ਇਸ ਉਦਯੋਗ ਨੂੰ ਲੈ ਕੇ ਗੰਭੀਰ ਹੈ। ਇਸ ਤੋਂ ਇਲਾਵਾ ਹੁਣ ਉਨ੍ਹਾਂ ਨੂੰ ਸਸਤੀ ਮੁਦਰਾ ਦਾ ਵੀ ਫਾਇਦਾ ਹੈ। ਸਰਕਾਰ ਸਾਨੂੰ ਪਾਕਿਸਤਾਨ ਦੇ ਮੁਕਾਬਲੇ ਖੜ੍ਹਾ ਕਰਨ ਲਈ ਸਥਿਤੀ ਦਾ ਜਾਇਜ਼ਾ ਲੈਣ ਦੇ ਬਾਅਦ ਇਨਸੈਂਟਿਵ ਦੇਵੇ ਤਾਂ ਅਸੀਂ ਪਾਕਿਸਤਾਨ ਨੂੰ ਸਖਤ ਟੱਕਰ ਦੇ ਸਕਦੇ ਹਾਂ।
ਸ਼੍ਰੋਮਣੀ ਅਕਾਲੀ ਦਲ ਦਿੱਲੀ ਦੇ ਵਫਦ ਨੇ ਹਰਿਆਣਾ ਦੇ ਮੁੱਖ ਮੰਤਰੀ ਨਾਲ ਕੀਤੀ ਮੁਲਾਕਾਤ
NEXT STORY