ਜਲਾਲਾਬਾਦ (ਸੇਤੀਆ) - 29 ਅਪ੍ਰੈਲ, 2019 ਨੂੰ ਹੋਈ ਵੋਟਰ ਸੂਚੀਆਂ ਦੀ ਆਖ਼ਰੀ ਪ੍ਰਕਾਸ਼ਨਾ ਮੁਤਾਬਕ ਜ਼ਿਲਾ ਫ਼ਾਜ਼ਿਲਕਾ 'ਚ 12087 ਨਵੇਂ ਵੋਟਰ ਬਣੇ ਹਨ। ਇਸ ਤਰ੍ਹਾਂ ਜ਼ਿਲੇ 'ਚ ਵੋਟਰਾਂ ਦੀ ਗਿਣਤੀ 723522 ਹੋ ਗਈ ਹੈ, ਜੋ 31 ਜਨਵਰੀ, 2019 ਦੀ ਪ੍ਰਕਾਸ਼ਨਾ ਮੁਤਾਬਕ 7,11,435 ਸੀ। ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾਂ ਜ਼ਿਲਾ ਪ੍ਰਬੰਧਕੀ ਕੰਪਲੈਕਸ ਵਿਖੇ ਐੱਸ.ਐੱਸ.ਪੀ. ਸ੍ਰੀ ਦੀਪਕ ਹਿਲੌਰੀ ਨਾਲ ਸਾਂਝੇ ਤੌਰ 'ਤੇ ਚੋਣ ਪ੍ਰਬੰਧਾਂ ਦਾ ਜਾਇਜ਼ਾ ਲੈਂਦਿਆਂ ਡਿਪਟੀ ਕਮਿਸ਼ਨਰ-ਕਮ-ਜ਼ਿਲਾ ਚੋਣ ਅਫ਼ਸਰ ਮਨਪ੍ਰੀਤ ਸਿੰਘ ਛੱਤਵਾਲ ਨੇ ਕੀਤਾ।
ਕਿੰਨੀ ਹੈ ਮਰਦ ਅਤੇ ਮਹਿਲਾਂ ਵੋਟਰਾਂ ਦੀ ਸੰਖਿਆ
ਮਰਦ ਵੋਟਰਾਂ ਦੀ ਗਿਣਤੀ 3,78,010 ਤੋਂ ਵਧ ਕੇ 3,83,755 ਅਤੇ ਮਹਿਲਾ ਵੋਟਰਾਂ ਦੀ ਗਿਣਤੀ 3,33,407 ਤੋਂ ਵਧ ਕੇ 3,39,753 ਹੋ ਗਈ ਹੈ ਜਦਕਿ ਤੀਜੇ ਲਿੰਗ ਦੇ 14 ਵੋਟਰ ਹਨ। ਇਸੇ ਤਰ੍ਹਾਂ 227 ਸਰਵਿਸ ਵੋਟਰਾਂ ਦੀ ਗਿਣਤੀ ਵਧੀ ਹੈ, ਜੋ ਪਹਿਲਾਂ ਦੇ 1863 ਦੇ ਮੁਕਾਬਲੇ ਹੁਣ 2090 ਸਰਵਿਸ ਵੋਟਰ ਰਜਿਸਟਰਡ ਹੋਏ ਹਨ।
ਜ਼ਿਲੇ ਦੀਆਂ 483 ਥਾਵਾਂ 'ਤੇ ਸਥਾਪਤ ਹੋਣਗੇ 782 ਪੋਲਿੰਗ ਸਟੇਸ਼ਨ
ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਜ਼ਿਲੇ ਦੇ 4 ਵਿਧਾਨ ਸਭਾ ਹਲਕਿਆਂ ਫ਼ਾਜ਼ਿਲਕਾ, ਅਬੋਹਰ, ਜਲਾਲਾਬਾਦ, ਬੱਲੂਆਣਾ 'ਚ 483 ਥਾਵਾਂ 'ਤੇ 782 ਪੋਲਿੰਗ ਸਟੇਸ਼ਨ ਸਥਾਪਤ ਕੀਤੇ ਜਾਣਗੇ, ਜਿਨ੍ਹਾਂ 'ਚੋਂ 601 ਦਿਹਾਤੀ ਤੇ 181 ਸ਼ਹਿਰੀ ਪੋਲਿੰਗ ਸਟੇਸ਼ਨ ਹਨ। 782 ਪੋਲਿੰਗ ਸਟੇਸ਼ਨਾਂ 'ਚੋਂ 283 ਬੂਥਾਂ ਨੂੰ ਸੰਵੇਦਨਸ਼ੀਲ ਅਤੇ 4 ਬੂਥਾਂ ਨੂੰ ਅਤਿ ਸੰਵੇਦਨਸ਼ੀਲ ਐਲਾਨਿਆ ਗਿਆ ਹੈ। ਜ਼ਿਲੇ ਦੇ ਕੁੱਲ 782 ਪੋਲਿੰਗ ਸਟੇਸ਼ਨਾਂ 'ਚੋਂ 393 ਬੂਥਾਂ ਦੀ ਆਨਲਾਈਨ ਕੈਮਰਿਆਂ ਨਾਲ ਨਿਗਰਾਨੀ (ਵੈਬ ਕਾਸਟਿੰਗ) ਕੀਤੀ ਜਾਵੇਗੀ, ਜਿਨ੍ਹਾਂ 'ਚੋਂ ਜਲਾਲਾਬਾਦ ਦੇ 120, ਫ਼ਾਜ਼ਿਲਕਾ ਦੇ 103, ਅਬੋਹਰ ਦੇ 80 ਅਤੇ ਬੱਲੂਆਣਾ ਦੇ 90 ਬੂਥ ਸ਼ਾਮਲ ਹਨ। ਉਨ੍ਹਾਂ ਦੱਸਿਆ ਕਿ ਲੋਕ ਸਭਾ ਹਲਕਾ ਫ਼ਿਰੋਜ਼ਪੁਰ 'ਚ ਚੋਣ ਲੜ ਰਹੇ ਉਮੀਦਵਾਰਾਂ ਦੀ ਗਿਣਤੀ 22 ਹੋਣ ਕਰਕੇ ਹੁਣ ਹਰੇਕ ਬੂਥ ਉਪਰ 2 ਈ.ਵੀ.ਐੱਮ. ਮਸ਼ੀਨਾਂ ਅਤੇ 1 ਵੀ.ਵੀ.ਪੈਟ ਮਸ਼ੀਨ ਲਾਈ ਜਾਵੇਗੀ। ਛੱਤਵਾਲ ਨੇ ਦੱਸਿਆ ਕਿ ਚਾਰੋ ਵਿਧਾਨ ਸਭਾ ਹਲਕਿਆਂ 'ਚ ਇਕ-ਇਕ ਬੂਥ 'ਤੇ ਮਹਿਲਾ ਅਤੇ ਇਕ-ਇਕ ਬੂਥ 'ਤੇ ਸਿਰਫ਼ ਦਿਵਿਆਂਗ ਚੋਣ ਮੁਲਾਜ਼ਮ ਤੈਨਾਤ ਕੀਤੇ ਜਾਣਗੇ।
ਚੋਣ ਪ੍ਰਕਿਰਿਆ 'ਚ ਸਿਵਲ ਤੇ ਪੁਲਸ ਪ੍ਰਸ਼ਾਸਨ ਦੇ 6885 ਮੁਲਾਜ਼ਮ ਹੋਣਗੇ ਤੈਨਾਤ
ਜ਼ਿਲਾ ਫ਼ਾਜ਼ਿਲਕਾ 'ਚ ਚੋਣ ਪ੍ਰਕਿਰਿਆ ਸਫ਼ਲਤਾਪੂਰਵਕ ਨੇਪਰੇ ਚਾੜ੍ਹਨ ਲਈ ਕੁੱਲ 6885 ਸਿਵਲ ਅਤੇ ਪੁਲਸ ਮੁਲਾਜ਼ਮ ਤਾਈਨਾਤ ਕੀਤੇ ਗਏ ਹਨ, ਜਿਨ੍ਹਾਂ 'ਚੋਂ 3772 ਸਿਵਲ ਅਤੇ 3113 ਪੁਲਸ ਜਵਾਨ ਹਨ। 782 ਪੋਲਿੰਗ ਬੂਥਾਂ 'ਤੇ 943 ਪ੍ਰੀਜ਼ਾਈਡਿੰਗ ਅਫ਼ਸਰ, 943 ਸਹਾਇਕ ਪ੍ਰੀਜ਼ਾਈਡਿੰਗ ਅਫ਼ਸਰ, 1886 ਪੋਲਿੰਗ ਅਫ਼ਸਰ, 331 ਮਾਈਕਰੋ ਆਬਜ਼ਰਵਰ ਤੈਨਾਤ ਕੀਤੇ ਗਏ ਹਨ ਅਤੇ 71 ਸੈਕਟਰ ਅਫ਼ਸਰ ਹੋਣਗੇ। ਜਦਕਿ ਬੂਥਾਂ 'ਤੇ 2051 ਪੁਲਸ ਦੇ ਮੁਲਾਜ਼ਮ ਸੁਰੱਖਿਆ ਲਈ ਮੌਜੂਦ ਰਹਿਣਗੇ, 71 ਪੁਲਸ ਪੈਟਰੌਲਿੰਗ ਪਾਰਟੀਆਂ ਪੂਰੇ ਜ਼ਿਲੇ 'ਚ ਗਸ਼ਤ ਕਰਨਗੀਆਂ। ਬਾਕੀ ਰਹਿੰਦੇ ਪੁਲਸ ਮੁਲਾਜ਼ਮਾਂ ਨੂੰ ਰਾਖਵਾਂ ਰੱਖਿਆ ਗਿਆ ਹੈ।
'84 'ਤੇ ਪਿਤਰੋਦਾ ਦੇ ਬਿਆਨ ਨਾਲ ਸਹਿਮਤ ਨਹੀਂ : ਕੈਪਟਨ
NEXT STORY 
