ਲੁਧਿਆਣਾ : ਕਹਿੰਦੇ ਹਨ ਕਿ ਜੇਕਰ ਇਰਾਦੇ ਮਜ਼ਬੂਤ ਹੋਣ ਤਾਂ ਕੋਈ ਵੀ ਮੁਸੀਬਤ ਤੁਹਾਨੂੰ ਅੱਗੇ ਵਧਣ ਤੋਂ ਨਹੀਂ ਰੋਕ ਸਕਦੀ। ਲੁਧਿਆਣਾ ਦੇ 29 ਸਾਲਾ ਸ਼ੁਭਮ ਵਧਵਾ ਨੇ ਇਸ ਗੱਲ ਨੂੰ ਸੱਚ ਕਰ ਦਿਖਾਇਆ ਹੈ। ਸਾਲ 2016 ਵਿੱਚ ਇੱਕ ਭਿਆਨਕ ਸੜਕ ਹਾਦਸੇ ਦਾ ਸ਼ਿਕਾਰ ਹੋਣ ਤੋਂ ਬਾਅਦ, ਜਿਸ ਨੇ ਉਨ੍ਹਾਂ ਨੂੰ ਤਿੰਨ ਸਾਲਾਂ ਤੱਕ ਬਿਸਤਰੇ 'ਤੇ ਰਹਿਣ ਲਈ ਮਜ਼ਬੂਰ ਕਰ ਦਿੱਤਾ ਸੀ, ਅੱਜ ਸ਼ੁਭਮ ਵ੍ਹੀਲਚੇਅਰ ਟੇਬਲ ਟੈਨਿਸ ਵਿੱਚ ਏਸ਼ੀਆ ਦੇ ਚੌਥੇ ਅਤੇ ਵਿਸ਼ਵ ਦੇ 16ਵੇਂ ਨੰਬਰ ਦੇ ਖਿਡਾਰੀ ਬਣ ਗਏ ਹਨ।
ਹਾਦਸੇ ਤੋਂ ਲੈ ਕੇ ਚੈਂਪੀਅਨ ਬਣਨ ਤੱਕ ਦਾ ਸਫ਼ਰ
ਸ਼ੁਭਮ ਆਪਣੇ ਸਕੂਲ ਦੇ ਦਿਨਾਂ ਦੌਰਾਨ ਰਾਸ਼ਟਰੀ ਪੱਧਰ ਦੇ ਖਿਡਾਰੀ ਸਨ, ਪਰ ਫਿਰ ਉਨ੍ਹਾਂ ਨੇ ਮਾਡਲਿੰਗ ਵੱਲ ਰੁਖ ਕਰ ਲਿਆ ਸੀ। ਸਾਲ 2016 ਵਿੱਚ ਹੋਏ ਇੱਕ ਬਾਈਕ ਹਾਦਸੇ ਵਿੱਚ ਉਨ੍ਹਾਂ ਦੀ ਰੀੜ੍ਹ ਦੀ ਹੱਡੀ (spinal cord) ਵਿੱਚ ਗੰਭੀਰ ਸੱਟ ਲੱਗੀ, ਜਿਸ ਕਾਰਨ ਉਹ ਚੱਲਣ-ਫਿਰਨ ਤੋਂ ਅਸਮਰੱਥ ਹੋ ਗਏ। ਤਿੰਨ ਸਾਲ ਬਿਸਤਰੇ 'ਤੇ ਬਿਤਾਉਣ ਤੋਂ ਬਾਅਦ, ਦੋਸਤਾਂ ਦੇ ਹੌਂਸਲੇ ਸਦਕਾ ਉਨ੍ਹਾਂ ਨੇ 2019-20 ਵਿੱਚ ਦੁਬਾਰਾ ਟੇਬਲ ਟੈਨਿਸ ਦੇ ਮੈਦਾਨ ਵਿੱਚ ਵਾਪਸੀ ਕੀਤੀ, ਜਿਸ ਨੇ ਉਨ੍ਹਾਂ ਨੂੰ ਜੀਵਨ ਜਿਉਣ ਦੀ ਨਵੀਂ ਦਿਸ਼ਾ ਦਿੱਤੀ।
ਅੰਤਰਰਾਸ਼ਟਰੀ ਪੱਧਰ 'ਤੇ ਗੱਡੇ ਝੰਡੇ
ਹਾਲ ਹੀ ਵਿੱਚ ਆਸਟ੍ਰੇਲੀਆ ਦੇ ਗੋਲਡ ਕੋਸਟ ਵਿੱਚ ਹੋਏ 'ITTF ਵਰਲਡ ਪੈਰਾ ਫਿਊਚਰ 2026' ਟੂਰਨਾਮੈਂਟ ਵਿੱਚ ਸ਼ੁਭਮ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਆਪਣਾ ਪਹਿਲਾ ਅੰਤਰਰਾਸ਼ਟਰੀ ਸਿੰਗਲਜ਼ ਸੋਨ ਤਗਮਾ ਜਿੱਤਿਆ। ਉਨ੍ਹਾਂ ਨੇ ਜਾਪਾਨ ਅਤੇ ਆਸਟ੍ਰੇਲੀਆ ਦੇ ਦਿੱਗਜ ਖਿਡਾਰੀਆਂ ਨੂੰ ਮਾਤ ਦੇ ਕੇ ਇਹ ਉਪਲਬਧੀ ਹਾਸਲ ਕੀਤੀ। ਸ਼ੁਭਮ ਹੁਣ ਤੱਕ 7-8 ਰਾਸ਼ਟਰੀ ਸੋਨ ਤਗਮੇ ਅਤੇ 13 ਅੰਤਰਰਾਸ਼ਟਰੀ ਤਗਮੇ ਆਪਣੇ ਨਾਮ ਕਰ ਚੁੱਕੇ ਹਨ।
ਭਾਵਿਨਾ ਪਟੇਲ ਨਾਲ ਜੋੜੀ ਅਤੇ ਅਗਲੇ ਟੀਚੇ
ਸ਼ੁਭਮ ਵਿਸ਼ਵ ਦੀ ਨੰਬਰ ਇੱਕ ਖਿਡਾਰਨ ਅਤੇ ਅਰਜੁਨ ਐਵਾਰਡੀ ਭਾਵਿਨਾ ਪਟੇਲ ਨਾਲ ਮਿਕਸਡ ਡਬਲਜ਼ ਵਿੱਚ ਜੋੜੀ ਬਣਾਉਂਦੇ ਹਨ, ਜਿੱਥੇ ਉਹ ਵਿਸ਼ਵ ਰੈਂਕਿੰਗ ਵਿੱਚ 10ਵੇਂ ਸਥਾਨ 'ਤੇ ਹਨ। ਵਰਤਮਾਨ ਵਿੱਚ ਉਹ ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ (LPU) ਤੋਂ ਸਕਾਲਰਸ਼ਿਪ 'ਤੇ ਬੀ.ਟੈਕ (ਕੰਪਿਊਟਰ ਸਾਇੰਸ) ਦੀ ਪੜ੍ਹਾਈ ਵੀ ਕਰ ਰਹੇ ਹਨ। ਉਨ੍ਹਾਂ ਦਾ ਅਗਲਾ ਟੀਚਾ ਅਕਤੂਬਰ ਵਿੱਚ ਜਾਪਾਨ ਵਿੱਚ ਹੋਣ ਵਾਲੀਆਂ ਪੈਰਾ ਏਸ਼ੀਅਨ ਗੇਮਜ਼, ਨਵੰਬਰ ਵਿੱਚ ਥਾਈਲੈਂਡ ਵਿੱਚ ਵਿਸ਼ਵ ਚੈਂਪੀਅਨਸ਼ਿਪ ਅਤੇ ਅੰਤ ਵਿੱਚ ਪੈਰਾਲੰਪਿਕ ਲਈ ਕੁਆਲੀਫਾਈ ਕਰਨਾ ਹੈ।
ਦੱਖਣੀ ਅਫਰੀਕਾ ਤੋਂ ਹਾਰ ਭਾਰਤ ਨੂੰ ਜਗਾਉਣ ਵਾਲੀ ਹੈ : ਰਵੀ ਸ਼ਾਸਤਰੀ
NEXT STORY 
