ਮਾਛੀਵਾੜਾ ਸਾਹਿਬ(ਟੱਕਰ)- ਪੰਜਾਬ ਸਰਕਾਰ ਵਲੋਂ ਨਸ਼ੇ ਨੂੰ ਜੜ੍ਹ ਤੋਂ ਖਤਮ ਕਰਨ ਅਤੇ ਲੋਕਾਂ ਦੀ ਸੁਰੱਖਿਆ ਲਈ ਵੱਡੇ-ਵੱਡੇ ਦਾਅਵੇ ਕੀਤੇ ਜਾ ਰਹੇ ਹਨ ਪਰ ਦੂਸਰੇ ਪਾਸੇ ਹਾਲਾਤ ਇਹ ਹਨ ਕਿ ਪੁਲਸ ਕਰਮਚਾਰੀਆਂ ਦੀ ਘਾਟ ਕਾਰਨ ਮਾਛੀਵਾੜਾ ਥਾਣਾ ਦੀਆਂ 2 ਚੌਂਕੀਆਂ ਨੂੰ ਤਾਲੇ ਵੱਜ ਗਏ ਹਨ ਜਿਸ ਲਈ ਹੁਣ ਸਰਕਾਰ ਹੀ ਦੱਸੇ ਕਿ ਇਲਾਕੇ ਦੇ 40 ਪਿੰਡਾਂ ਦੇ ਲੋਕਾਂ ਦੀਆਂ ਸੁਰੱਖਿਆ ਅਤੇ ਉਨ੍ਹਾਂ ਦੀਆਂ ਸ਼ਿਕਾਇਤਾਂ ਦਾ ਨਿਪਟਾਰਾ ਕਿਵੇਂ ਹੋਵੇਗਾ।
ਇਹ ਵੀ ਪੜ੍ਹੋ- ਪੰਜਾਬ 'ਚ 16 ਫਰਵਰੀ ਨੂੰ ਮੌਸਮ ਬਦਲਣ ਦੇ ਸੰਕੇਤ, ਵਿਭਾਗ ਨੇ ਦਿੱਤੀ ਵੱਡੀ ਅਪਡੇਟ
ਮਾਛੀਵਾੜਾ ਪੁਲਸ ਥਾਣਾ ਅਧੀਨ 2 ਪੁਲਸ ਚੌਂਕੀਆਂ ਬਹਿਲੋਲਪੁਰ ਤੇ ਸ਼ੇਰਪੁਰ ਬੇਟ ਆਉਂਦੀਆਂ ਹਨ, ਜਿੱਥੇ ਪਿਛਲੇ ਡੇਢ ਸਾਲ ਤੋਂ ਮੁਲਾਜ਼ਮਾਂ ਦੀ ਘਾਟ ਕਾਰਨ ਸ਼ੇਰਪੁਰ ਚੌਂਕੀ ਤਾਂ ਮੁਕੰਮਲ ਤੌਰ ’ਤੇ ਬੰਦ ਕਰ ਦਿੱਤੀ ਹੈ ਜਿਸ ਨੂੰ ਤਾਲਾ ਲੱਗਿਆ ਹੋਇਆ ਹੈ। ਸ਼ੇਰਪੁਰ ਚੌਂਕੀ ਅਧੀਨ ਆਉਂਦੇ 20 ਤੋਂ ਵੱਧ ਪਿੰਡਾਂ ਵਿਚ ਜੇਕਰ ਕੋਈ ਝਗੜਾ ਹੋ ਜਾਂਦਾ ਹੈ ਤਾਂ ਉਸਦੀ ਸ਼ਿਕਾਇਤ ਹੁਣ ਕਈ ਕਿਲੋਮੀਟਰ ਦੂਰ ਮਾਛੀਵਾੜਾ ਥਾਣਾ ਵਿਖੇ ਆ ਕੇ ਦਰਜ ਕਰਵਾਉਣੀ ਪੈਂਦੀ ਹੈ, ਇੱਥੋਂ ਤੱਕ ਨਿਪਟਾਰਾ ਵੀ ਪੁਲਸ ਥਾਣਾ ਵਿਖੇ ਹੀ ਹੁੰਦਾ ਹੈ, ਜਿਸ ਕਾਰਨ ਲੋਕ ਬੇਹੱਦ ਪ੍ਰੇਸ਼ਾਨ ਹੋ ਰਹੇ ਹਨ। ਸ਼ੇਰਪੁਰ ਚੌਂਕੀ ਅਧੀਨ ਸਤਲੁਜ ਦਰਿਆ ਦਾ ਕਈ ਕਿਲੋਮੀਟਰ ਲੰਬਾ ਧੁੱਸੀ ਬੰਨ੍ਹ ਪੈਂਦਾ ਹੈ ਜਿੱਥੇ ਕਿ ਰਾਤ ਨੂੰ ਨਾਜਾਇਜ਼ ਮਾਈਨਿੰਗ ਕੋਈ ਨਵੀਂ ਗੱਲ ਨਹੀਂ। ਸਰਕਾਰ ਵਲੋਂ ਦਾਅਵੇ ਤਾਂ ਕੀਤੇ ਜਾਂਦੇ ਹਨ ਕਿ ਅਸੀਂ ਕਿਤੇ ਵੀ ਨਾਜਾਇਜ਼ ਮਾਈਨਿੰਗ ਬਰਦਾਸ਼ਤ ਨਹੀਂ ਕਰਾਂਗੇ ਅਤੇ ਜੇਕਰ ਚੌਂਕੀਆਂ ਵਿਚ ਮੁਲਾਜ਼ਮ ਹੀ ਨਹੀਂ ਹੋਣਗੇ ਤਾਂ ਉਹ ਨਾਜਾਇਜ਼ ਮਾਈਨਿੰਗ ਕਿਵੇਂ ਰੁਕੇਗੀ।
ਇਹ ਵੀ ਪੜ੍ਹੋ- ਕੁੜੀ ਨੂੰ ਗੋਲੀ ਮਾਰਨ ਵਾਲੇ ਪ੍ਰਿੰਸ ਲਈ ਅਗਲੇ 12 ਘੰਟੇ ਬੇਹੱਦ ਨਾਜ਼ੁਕ, ਲੜ ਰਿਹੈ ਜ਼ਿੰਦਗੀ ਤੇ ਮੌਤ ਦੀ ਲੜਾਈ
ਦੂਸਰੀ ਚੌਂਕੀ ਬਹਿਲੋਲਪੁਰ ਦੀ ਗੱਲ ਕਰੀਏ ਤਾਂ ਇੱਥੇ ਕੇਵਲ ਇੱਕ ਸਹਾਇਕ ਥਾਣੇਦਾਰ ਤੇ ਇੱਕ ਮੁਨਸ਼ੀ ਹੈ। ਜੇਕਰ ਦੋਵਾਂ ਨੂੰ ਕਿਤੇ ਪਰਚਾ ਦਰਜ ਕਰ ਤਫ਼ਤੀਸ਼ ਕਰਨ ਲਈ, ਅਪਰਾਧਿਕ ਥਾਂ ਦਾ ਮੌਕਾ ਦੇਖਣ ਜਾਂ ਅਦਾਲਤ ਵਿਚ ਮੁਲਜ਼ਮਾਂ ਨੂੰ ਪੇਸ਼ ਕਰਨ ਲਈ ਜਾਣਾ ਪੈਂਦਾ ਹੈ ਤਾਂ ਇੱਥੇ ਵੀ ਚੌਂਕੀ ਨੂੰ ਤਾਲਾ ਲਗਾਉਣਾ ਪੈਂਦਾ ਹੈ। ਬਹਿਲੋਲਪੁਰ ਚੌਂਕੀ ਅਧੀਨ ਕਈ ਵੱਡੀ ਅਬਾਦੀ ਵਾਲੇ ਪਿੰਡ ਪੈਂਦੇ ਹਨ ਅਤੇ ਝਗੜੇ ਜਾਂ ਸ਼ਿਕਾਇਤ ਹੋਣ ਦੀ ਸੂਰਤ ਵਿਚ ਇਨ੍ਹਾਂ ਲੋਕਾਂ ਨੂੰ ਵੀ ਆਪਣੀ ਸ਼ਿਕਾਇਤ ਦਰਜ ਕਰਵਾਉਣ ਲਈ ਕਈ ਕਿਲੋਮੀਟਰ ਦਾ ਲੰਬਾ ਪੈਂਡਾ ਤੈਅ ਕਰ ਮਾਛੀਵਾੜਾ ਥਾਣਾ ਆਉਣਾ ਪੈਂਦਾ ਹੈ।
ਇਹ ਵੀ ਪੜ੍ਹੋ- ਮੂਸੇਵਾਲਾ ਦੇ ਪਰਿਵਾਰ ਦੇ ਹੱਕ 'ਚ ਨਿੱਤਰੇ ਰਾਜਾ ਵੜਿੰਗ, ਕਿਹਾ- 'ਤੰਗ ਕਰ ਰਹੀ ਪੰਜਾਬ ਪੁਲਸ'
ਬਹਿਲੋਲਪੁਰ ਚੌਂਕੀ ਵਿਚ ਪਏ ਕੀਮਤੀ ਰਿਕਾਰਡ ਦੀ ਸੁਰੱਖਿਆ ‘ਰੱਬ ਆਸਰੇ’ ਹੀ ਹੁੰਦੀ ਹੈ ਕਿਉਂਕਿ ਇੱਥੇ ਮੁਲਾਜ਼ਮ ਹੀ ਤਾਇਨਾਤ ਨਹੀਂ । ਲੋਕਾਂ ਦੀ ਸੁਰੱਖਿਆ ਤਾਂ ਇੱਕ ਪਾਸੇ ਚੌਂਕੀ ਦੀ ਇਮਾਰਤ ਆਪਣੀ ਸੁਰੱਖਿਆ ਲਈ ਹੀ ਮੁਹਤਾਜ ਹੈ। ਬੇਸ਼ੱਕ ਬਹਿਲੋਲਪੁਰ ਚੌਂਕੀ ’ਚ ਤਾਇਨਾਤ ਮੁਲਾਜ਼ਮ ਆਪਣੀ ਵਲੋਂ ਪੂਰੀ ਕੋਸ਼ਿਸ਼ ਕਰਦੇ ਹਨ ਕਿ ਸ਼ਿਕਾਇਤਾਂ ਦਾ ਨਿਪਟਾਰਾ ਕਰੀਏ ਤਾਂ ਜੋ ਲੋਕਾਂ ਨੂੰ ਮੁਸ਼ਕਿਲ ਨਾ ਆਵੇ ਪਰ 2 ਮੁਲਾਜ਼ਮ 24 ਘੰਟੇ 40 ਪਿੰਡਾਂ ਦੇ ਹਜ਼ਾਰਾਂ ਲੋਕਾਂ ਦੀਆਂ ਸੁਰੱਖਿਆ ਕਿਵੇਂ ਕਰਨਗੇ। ਇਹ ਤਾਂ ਸਰਕਾਰ ਹੀ ਦੱਸ ਸਕਦੀ ਹੈ।
ਪਿਛਲੇ ਸਮਿਆਂ ਦੌਰਾਨ ਬਹਿਲੋਲਪੁਰ ਤੇ ਸ਼ੇਰਪੁਰ ਪੁਲਸ ਚੌਂਕੀ ਵਿਚ 6 ਤੋਂ 7 ਮੁਲਾਜ਼ਮ ਇੱਕ ਚੌਂਕੀ ਵਿਚ ਤਾਇਨਾਤ ਰਹਿੰਦੇ ਸਨ ਪਰ ਉਸ ਸਮੇਂ ਪਿੰਡਾਂ ਦੀ ਅਬਾਦੀ ਬਹੁਤ ਘੱਟ ਸੀ ਪਰ ਹੁਣ ਜਦੋਂ ਵਸੋਂ ਵੱਧ ਗਈ ਤਾਂ ਹਰੇਕ ਚੌਂਕੀ ਵਿਚ ਘੱਟੋ-ਘੱਟ 8 ਤੋਂ 10 ਮੁਲਾਜ਼ਮ ਤਾਇਨਾਤ ਰਹਿਣੇ ਚਾਹੀਦੇ ਹਨ ਤਾਂ ਹੀ ਲੋਕਾਂ ਦੀਆਂ ਸ਼ਿਕਾਇਤਾਂ ਦਾ ਨਿਪਟਾਰਾ, ਉਨ੍ਹਾਂ ਦੀ ਸੁਰੱਖਿਆ ਅਤੇ ਜ਼ੁਰਮ ਨੂੰ ਨੱਥ ਪਾਈ ਜਾ ਸਕੇਗੀ। ਦੂਸਰੇ ਪਾਸੇ ਜੇਕਰ ਹਾਲਾਤ ਇਹੋ ਰਹੇ ਕਿ ਚੌਂਕੀਆਂ ਨੂੰ ਤਾਲੇ ਲੱਗੇ ਰਹੇ, ਮੁਲਾਜ਼ਮ ਤਾਇਨਾਤ ਨਾ ਕੀਤੇ ਗਏ ਤਾਂ ਸਰਕਾਰ ਦਾ ‘ਯੁੱਧ ਨਸ਼ਿਆਂ ਵਿਰੁੱਧ’ ਮੁਹਿੰਮ ਅਤੇ ਹੋਰ ਸੁਰੱਖਿਆ ਦੇ ਦਾਅਵੇ ਖੋਖਲੇ ਸਾਬਿਤ ਹੋਣਗੇ।
ਮਾਛੀਵਾੜਾ ਪੁਲਸ ਥਾਣਾ ਵਿਚ ਵੀ ਮੁਲਾਜ਼ਮਾਂ ਦੀ ਵੱਡੀ ਘਾਟ
ਮਾਛੀਵਾੜਾ ਪੁਲਸ ਥਾਣਾ ਦੀ ਗੱਲ ਕਰੀਏ ਤਾਂ ਇੱਥੇ ਵੀ ਮੁਲਾਜ਼ਮਾਂ ਦੀ ਵੱਡੀ ਘਾਟ ਦੇਖਣ ਨੂੰ ਮਿਲਦੀ ਹੈ। ਪਿਛਲੇ ਸਮਿਆਂ ਦੌਰਾਨ ਜਦੋਂ ਮਾਛੀਵਾੜਾ ਸ਼ਹਿਰ ਦੀ ਅਬਾਦੀ 15 ਤੋਂ 18 ਹਜ਼ਾਰ ਸੀ ਤਾਂ ਇੱਕ ਸਾਲ ਵਿਚ 100 ਮਾਮਲੇ ਦਰਜ ਨਹੀਂ ਹੁੰਦੇ ਸਨ ਤਾਂ ਥਾਣੇ ਵਿਚ 50 ਤੋਂ 55 ਮੁਲਾਜ਼ਮ ਤਾਇਨਾਤ ਕੀਤੇ ਸਨ। ਹੁਣ ਹਾਲਾਤ ਇਹ ਹੈ ਕਿ ਮਾਛੀਵਾੜਾ ਸ਼ਹਿਰ ਦੀ ਅਬਾਦੀ 35 ਹਜ਼ਾਰ ਤੋਂ ਵੱਧ ਗਈ ਹੈ ਅਤੇ ਮੁਲਾਜ਼ਮ 25 ਹਨ ਜੋ ਕਿ ਕਰੀਬ ਮਾਛੀਵਾੜਾ ਸ਼ਹਿਰ ਤੇ ਪਿੰਡਾਂ ਦੀ 1 ਲੱਖ ਤੋਂ ਵੱਧ ਲੋਕਾਂ ਦੀ ਸੁਰੱਖਿਆ ਲਈ ਬਹੁਤ ਨਾਕਾਫ਼ੀ ਹਨ। ਪੁਲਸ ਮੁਲਾਜ਼ਮਾਂ ਦੀ ਐਨੀ ਵੱਡੀ ਘਾਟ ਹੋਣ ਦੇ ਬਾਵਜ਼ੂਦ ਵੀ 25 ਮੁਲਾਜ਼ਮਾਂ ਸਿਰ 1 ਲੱਖ ਤੋਂ ਵੱਧ ਲੋਕਾਂ ਦੀ ਸੁਰੱਖਿਆ, ਜ਼ੁਰਮ ਨੂੰ ਨੱਥ ਪਾਉਣਾ ਸੰਭਵ ਹੀ ਨਹੀਂ। ਜੇਕਰ ਸਰਕਾਰ ਲੋਕਾਂ ਦੀ ਸੁਰੱਖਿਆ ਤੇ ਨਸ਼ਿਆਂ ਨੂੰ ਖਤਮ ਕਰਨਾ ਚਾਹੁੰਦੀ ਹੈ ਤਾਂ ਇਸ ਸਮੇਂ ਮਾਛੀਵਾੜਾ ਥਾਣਾ ਵਿਚ ਘੱਟੋ-ਘੱਟ 50 ਤੋਂ 75 ਮੁਲਾਜ਼ਮ ਤਾਇਨਾਤ ਚਾਹੀਦੇ ਹਨ।
ਲੋਕਾਂ ਦੀ ਸੁਰੱਖਿਆ ਤਾਂ ‘ਰੱਬ ਆਸਰੇ’ ਹੀ ਹੈ: ਪਰਮਜੀਤ ਢਿੱਲੋਂ
ਹਲਕਾ ਸਮਰਾਲਾ ਤੋਂ ਸ਼੍ਰੋਮਣੀ ਅਕਾਲੀ ਦਲ ਦੇ ਮੁੱਖ ਸੇਵਾਦਾਰ ਪਰਮਜੀਤ ਸਿੰਘ ਢਿੱਲੋਂ ਨੇ ਕਿਹਾ ਕਿ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦਾਅਵੇ ਕਰਦੇ ਹਨ ਕਿ ਉਹ ਘਰ-ਘਰ ਨੌਕਰੀ ਦੇਣਗੇ ਅਤੇ ਨੌਜਵਾਨਾਂ ਨੂੰ ਰੋਜ਼ਗਾਰ ਦੇਣਗੇ ਪਰ ਮਾਛੀਵਾੜਾ ਥਾਣਾ ਅਧੀਨ ਪੈਂਦੀਆਂ ਪੁਲਸ ਚੌਂਕੀਆਂ ਨੂੰ ਲੱਗੇ ਤਾਲ੍ਹੇ ਤੇ ਮੁਲਾਜ਼ਮਾਂ ਦੀ ਵੱਡੀ ਘਾਟ ਇਹ ਦਰਸਾ ਰਹੀ ਹੈ ਕਿ 4 ਸਾਲਾਂ ਵਿਚ ‘ਆਪ’ ਸਰਕਾਰ ਨੇ ਨੌਕਰੀਆਂ ਦੇਣ ਦੇ ਕੇਵਲ ਦਾਅਵੇ ਹੀ ਕੀਤੇ। ਢਿੱਲੋਂ ਨੇ ਕਿਹਾ ਕਿ ਮਾਛੀਵਾੜਾ ਇਲਾਕੇ ਦੇ ਲੋਕਾਂ ਦੀ ਸੁਰੱਖਿਆ ‘ਰੱਬ ਆਸਰੇ’ ਹੀ ਹੈ ਕਿਉਂਕਿ 25 ਮੁਲਾਜ਼ਮ 1 ਲੱਖ ਤੋਂ ਵੱਧ ਲੋਕਾਂ ਦੀ ਸੁਰੱਖਿਆ ਕਿਵੇਂ ਕਰ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਇੱਕ ਪਾਸੇ ਤਾਂ ਸਰਕਾਰ ਆਪ੍ਰੇਸ਼ਨ ਪਰਹਾਰ 2.0 ਚਲਾ ਰਹੀ ਹੈ ਕਿ ਨਸ਼ਿਆਂ ਨੂੰ ਨੱਥ ਪਾਈ ਜਾ ਸਕੇ ਪਰ ਹੈਰਾਨੀ ਦੀ ਗੱਲ ਤਾਂ ਇਹ ਹੈ ਕਿ ਇਸ ਮੁਹਿੰਮ ਤਹਿਤ ਕੇਵਲ ਪਿਆਦੇ ਹੀ ਫੜੇ ਜਾ ਰਹੇ ਹਨ ਜਦਕਿ ਵੱਡੇ ਤਸਕਰ ਪੁਲਸ ਪਹੁੰਚ ਤੋਂ ਬਾਹਰ ਹਨ।
ਸਰਕਾਰ ਨਵੀਂ ਭਰਤੀ ਕਰ ਰਹੀ, ਜਲਦ ਹੋਰ ਪੁਲਸ ਕਰਮਚਾਰੀ ਤਾਇਨਾਤ ਕਰਾਂਗੇ: ਡੀ.ਐੱਸ.ਪੀ.
ਮਾਛੀਵਾੜਾ ਥਾਣਾ ਅਧੀਨ ਪੈਂਦੀਆਂ ਸਟਾਫ਼ ਦੀ ਘਾਟ ਕਾਰਨ ਬੰਦ ਹੋਈਆਂ ਪੁਲਸ ਚੌਂਕੀਆਂ ਸਬੰਧੀ ਜਦੋਂ ਡੀ.ਐੱਸ.ਪੀ. ਸਮਰਾਲਾ ਤਰਲੋਚਨ ਸਿੰਘ ਨਾਲ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਸਰਕਾਰ ਵਲੋਂ ਨਵੀਂ ਭਰਤੀ ਕੀਤੀ ਜਾ ਰਹੀ ਹੈ ਅਤੇ ਜਲਦ ਹੀ ਪੁਲਸ ਥਾਣਿਆਂ ਅਤੇ ਚੌਂਕੀਆਂ ਵਿਚ ਨਵੇਂ ਕਰਮਚਾਰੀ ਤਾਇਨਾਤ ਕਰ ਦਿੱਤੇ ਜਾਣਗੇ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
Whatsapp Channel: https://whatsapp.com/channel/0029Va94hsaHAdNVur4L170e
'ਪੰਜਾਬੀਆਂ ਨੂੰ ਭੂਤ ਕੱਢਣੇ ਆਉਂਦੇ ਐ...', ਅਕਾਲੀ-ਭਾਜਪਾ ਗੱਠਜੋੜ ਦੀਆਂ ਚਰਚਾਵਾਂ 'ਤੇ ਰਾਜਾ ਵੜਿੰਗ ਦਾ ਬਿਆਨ
NEXT STORY 
