ਜਲੰਧਰ (ਚੋਪੜਾ)–ਵਿਧਾਇਕ ਰਮਨ ਅਰੋੜਾ ਖ਼ਿਲਾਫ਼ ਵਿਜੀਲੈਂਸ ਵਿਭਾਗ ਦੀ ਭ੍ਰਿਸ਼ਟਾਚਾਰ ਦੇ ਮਾਮਲੇ ਵਿਚ ਜਾਂਚ ਲਗਾਤਾਰ ਤੇਜ਼ ਹੁੰਦੀ ਜਾ ਰਹੀ ਹੈ। ਇਹ ਜਾਂਚ ਸਿਰਫ਼ ਰਮਨ ਅਰੋੜਾ ਤਕ ਸੀਮਤ ਨਹੀਂ ਰਹੀ, ਉਨ੍ਹਾਂ ਦੇ ਨਜ਼ਦੀਕੀ ਰਿਸ਼ਤੇਦਾਰਾਂ ਅਤੇ ਸਹਿਯੋਗੀਆਂ ਤਕ ਵੀ ਪਹੁੰਚ ਰਹੀ ਹੈ। ਵਿਜੀਲੈਂਸ ਵਿਭਾਗ ਹੁਣ ਪੂਰੀ ਤਾਕਤ ਨਾਲ ਰਮਨ ਅਰੋੜਾ, ਉਨ੍ਹਾਂ ਦੇ ਰਿਸ਼ਤੇਦਾਰ ਰਾਜੂ ਮਦਾਨ ਅਤੇ ਹੋਰ ਕਰੀਬੀ ਲੋਕਾਂ ਵੱਲੋਂ ਕਥਿਤ ਤੌਰ ’ਤੇ ਨਾਜਾਇਜ਼ ਤੌਰ ’ਤੇ ਕਬਜ਼ਾ ਕੀਤੀਆਂ ਜਾਇਦਾਦਾਂ, ਜਾਅਲੀ ਦਸਤਾਵੇਜ਼ਾਂ ਰਾਹੀਂ ਕੀਤੀ ਗਈ ਖ਼ਰੀਦੋ-ਫਰੋਖ਼ਤ ਅਤੇ ਸਰਕਾਰੀ ਤੰਤਰ ਦੀ ਦੁਰਵਰਤੋਂ ਦੇ ਮਾਮਲਿਆਂ ਦੀਆਂ ਪਰਤਾਂ ਖੋਲ੍ਹਣ ਵਿਚ ਜੁਟਿਆ ਹੋਇਆ ਹੈ।
ਏਜੰਸੀ ਕੋਲ ਇਨ੍ਹਾਂ ਪ੍ਰਾਪਰਟੀਆਂ ਬਾਰੇ ਪੁਖ਼ਤਾ ਸ਼ਿਕਾਇਤਾਂ ਅਤੇ ਦਸਤਾਵੇਜ਼ ਪਹੁੰਚ ਚੁੱਕੇ ਹਨ, ਜਿਸ ਕਾਰਨ ਕਈ ਲੋਕਾਂ ’ਤੇ ਗ੍ਰਿਫ਼ਤਾਰੀ ਦੀ ਤਲਵਾਰ ਲਟਕਦੀ ਨਜ਼ਰ ਆ ਰਹੀ ਹੈ। ਵਿਧਾਇਕ ਰਮਨ ਅਰੋੜਾ ਦੇ ਨਜ਼ਦੀਕੀ ਰਿਸ਼ਤੇਦਾਰ ਰਾਜੂ ਮਦਾਨ ਹੁਣ ਵਿਜੀਲੈਂਸ ਦੇ ਸਿੱਧੇ ਨਿਸ਼ਾਨੇ ’ਤੇ ਆ ਗਏ ਹਨ। ਉਨ੍ਹਾਂ ਖ਼ਿਲਾਫ਼ ਇਕ ਤੋਂ ਬਾਅਦ ਇਕ ਕਈ ਗੰਭੀਰ ਦੋਸ਼ਾਂ ਅਤੇ ਦਸਤਾਵੇਜ਼ੀ ਸਬੂਤਾਂ ਕਾਰਨ ਜਾਂਚ ਏਜੰਸੀ ਉਨ੍ਹਾਂ ਨੂੰ ਵੀ ਮੁੱਖ ਮੁਲਜ਼ਮਾਂ ਦੀ ਸੂਚੀ ਵਿਚ ਸ਼ਾਮਲ ਮੰਨ ਰਹੀ ਹੈ। ਵਿਜੀਲੈਂਸ ਨੂੰ ਸ਼ਿਕਾਇਤਾਂ ਮਿਲੀਆਂ ਹਨ ਕਿ ਰਾਜੂ ਮਦਾਨ ਅਤੇ ਹੋਰ ਲੋਕਾਂ ਨੇ ਭੂ-ਮਾਫ਼ੀਆ ਨਾਲ ਮਿਲ ਕੇ ਵਿਵਾਦਿਤ ਜਾਇਦਾਦਾਂ ’ਤੇ ਕਬਜ਼ਾ ਕਰਕੇ ਉਨ੍ਹਾਂ ਨੂੰ ਕਰੋੜਾਂ ਰੁਪਏ ਵਿਚ ਵੇਚਿਆ ਜਾਂ ਉਨ੍ਹਾਂ ’ਤੇ ਨਾਜਾਇਜ਼ ਮਾਰਕੀਟ ਅਤੇ ਸ਼ੋਅਰੂਮ ਤਿਆਰ ਕਰਵਾਏ।
ਇਹ ਵੀ ਪੜ੍ਹੋ: MLA ਰਮਨ ਅਰੋੜਾ ਦੇ ਮਾਮਲੇ 'ਚ ਨਵਾਂ ਮੋੜ, ਸਾਹਮਣੇ ਆਏ ਗਵਾਹ, ਮਹਿਲਾ ਇੰਸਪੈਕਟਰ ਵੀ ਘਿਰੀ
ਵਿਜੀਲੈਂਸ ਦੇ ਹੱਥ ਸਭ ਤੋਂ ਅਹਿਮ ਅਤੇ ਗੰਭੀਰ ਮਾਮਲਾ ਉਹ ਪਲਾਟ ਹੈ, ਜੋ ਅਗਰਵਾਲ ਢਾਬਾ ਰੋਡ ’ਤੇ ਨਾਰਾਇਣ ਦਾਸ ਪਕੌੜਿਆਂ ਵਾਲਾ ਦੇ ਸਾਹਮਣੇ ਸਥਿਤ ਹੈ। ਇਸ ਪਲਾਟ ਦੀ ਇਕ ਫਰਜ਼ੀ ਪਾਵਰ ਆਫ਼ ਅਟਾਰਨੀ ਤਿਆਰ ਕਰਵਾਈ ਗਈ ਸੀ। ਦਸਤਾਵੇਜ਼ਾਂ ਅਨੁਸਾਰ ਇਹ ਪਾਵਰ ਆਫ਼ ਅਟਾਰਨੀ ਵਿਧਾਇਕ ਰਮਨ ਅਰੋੜਾ ਦੇ ਕਰੀਬੀ ਦੀਪਕ ਭੱਲਾ ਦੇ ਨਾਂ ’ਤੇ ਸੀ, ਜਿਸ ਨੇ ਕੁਝ ਸਮਾਂ ਪਹਿਲਾਂ ਖ਼ੁਦਕੁਸ਼ੀ ਕਰ ਲਈ ਸੀ। ਇਸ ਪਾਵਰ ਆਫ਼ ਅਟਾਰਨੀ ਵਿਚ ਰਾਜੂ ਮਦਾਨ ਨੇ ਖ਼ੁਦ ਨੂੰ ਬਤੌਰ ਗਵਾਹ ਪੇਸ਼ ਕੀਤਾ ਸੀ। ਹੁਣ ਵਿਜੀਲੈਂਸ ਕੋਲ ਉਹ ਤਸਵੀਰਾਂ ਅਤੇ ਦਸਤਾਵੇਜ਼ ਵੀ ਹਨ, ਜਿਨ੍ਹਾਂ ਵਿਚ ਰਾਜੂ ਮਦਾਨ ਸਬ-ਰਜਿਸਟਰਾਰ-1 ਵਿਚ ਫੋਟੋ ਖਿਚਵਾ ਰਹੇ ਹਨ। ਸੂਤਰਾਂ ਅਨੁਸਾਰ ਇਸ ਪ੍ਰਕਿਰਿਆ ਵਿਚ ਆਧਾਰ ਕਾਰਡ ਸਮੇਤ ਕਈ ਹੋਰ ਦਸਤਾਵੇਜ਼ ਵੀ ਫਰਜ਼ੀ ਲਗਾਏ ਗਏ ਸਨ। ਹੁਣ ਸਾਰਿਆਂ ਦੀਆਂ ਨਜ਼ਰਾਂ ਇਸ ’ਤੇ ਜੁਟੀਆਂ ਹਨ ਕਿ ਜਦੋਂ ਰੈਵੇਨਿਊ ਰਿਕਾਰਡ ਅਤੇ ਹੋਰ ਦਸਤਾਵੇਜ਼ਾਂ ਦੀ ਤਹਿ ਤਕ ਜਾਂਚ ਹੋਵੇਗੀ ਤਾਂ ਕੀ ਸੱਚ ਸਾਹਮਣੇ ਆਵੇਗਾ। ਜੇਕਰ ਵਿਜੀਲੈਂਸ ਨੂੰ ਇਹ ਸਾਬਿਤ ਕਰਨ ਵਿਚ ਸਫ਼ਲਤਾ ਮਿਲਦੀ ਹੈ ਕਿ ਪ੍ਰਾਪਰਟੀਆਂ ’ਤੇ ਕਬਜ਼ਾ ਜਬਰਨ ਕੀਤਾ ਗਿਆ, ਦਸਤਾਵੇਜ਼ ਫਰਜ਼ੀ ਸਨ ਜਾਂ ਫਿਰ ਖ਼ਰੀਦ ਵਿਚ ਬਲੈਕ ਮਨੀ ਦੀ ਵਰਤੋਂ ਹੋਈ ਤਾਂ ਨਾ ਸਿਰਫ਼ ਵਿਧਾਇਕ ਰਮਨ ਅਰੋੜਾ, ਸਗੋਂ ਰਾਜੂ ਮਦਾਨ, ਮਹੇਸ਼ ਰਾਜਨ ਅਤੇ ਹੋਰ ਨਜ਼ਦੀਕੀ ਲੋਕ ਵੀ ਗੰਭੀਰ ਕਾਨੂੰਨੀ ਸ਼ਿਕੰਜੇ ਵਿਚ ਫਸ ਸਕਦੇ ਹਨ।
ਇਹ ਵੀ ਪੜ੍ਹੋ: ਪੰਜਾਬ ਵਾਸੀਆਂ ਲਈ ਖੜ੍ਹੀ ਹੋਈ ਵੱਡੀ ਮੁਸੀਬਤ! 3 ਮਹੀਨਿਆਂ ਲਈ ਬੰਦ ਹੋਇਆ ਇਸ ਹਾਈਵੇਅ ਵਾਲਾ ਰਸਤਾ
ਹਰਬੰਸ ਨਗਰ, ਜੇ. ਪੀ. ਨਗਰ ਰੋਡ ’ਤੇ ਵਿਵਾਦਿਤ ਜਾਇਦਾਦ
ਵਿਜੀਲੈਂਸ ਨੂੰ ਜੋ ਇਨਪੁੱਟ ਪ੍ਰਾਪਤ ਹੋਏ ਹਨ, ਉਨ੍ਹਾਂ ਅਨੁਸਾਰ ਹਰਬੰਸ ਨਗਰ, ਜੇ. ਪੀ. ਨਗਰ ਰੋਡ ’ਤੇ ਸਥਿਤ ਐੱਸ. ਬੀ. ਆਈ. ਬੈਂਕ ਕੋਲ 60 ਮਰਲੇ ਦੀ ਵਿਵਾਦਿਤ ਜਾਇਦਾਦ ਦਾ ਬਿਆਨਾ ਵਿਧਾਇਕ ਦੇ ਕਰੀਬੀ ਮਹੇਸ਼ ਦੇ ਨਾਂ ’ਤੇ ਹੋਇਆ ਹੈ। ਇਸ ਪ੍ਰਾਪਰਟੀ ’ਤੇ ਕਥਿਤ ਤੌਰ ’ਤੇ ਨਗਰ ਨਿਗਮ ਦੀ ਮਸ਼ੀਨਰੀ ਦੀ ਵਰਤੋਂ ਕਰ ਕੇ ਜਬਰਨ ਕਬਜ਼ਾ ਕਰਵਾਇਆ ਗਿਆ। ਇਹ ਮਾਮਲਾ ਹੁਣ ਗੰਭੀਰ ਜਾਂਚ ਦੇ ਘੇਰੇ ਵਿਚ ਹੈ ਅਤੇ ਸਾਰੇ ਦਸਤਾਵੇਜ਼ਾਂ ਦੀ ਪੜਤਾਲ ਕੀਤੀ ਜਾ ਰਹੀ ਹੈ।
ਗਵਰਨਮੈਂਟ ਸਕੂਲ ਦੇ ਨੇੜੇ ਵਿਵਾਦਿਤ ਮਕਾਨ ’ਤੇ ਵੀ ਜਾਂਚ
ਆਦਰਸ਼ ਨਗਰ ਦੀ ਬੈਕਸਾਈਡ ਚੌਪਾਟੀ ਦੇ ਸਾਹਮਣੇ ਸਥਿਤ ਸਰਕਾਰੀ ਸਕੂਲ ਦੇ ਨੇੜੇ ਇਕ ਵਿਵਾਦਿਤ ਮਕਾਨ ਵੀ ਸਾਹਮਣੇ ਆਇਆ ਹੈ। ਵਿਜੀਲੈਂਸ ਮੁਤਾਬਕ ਵਿਧਾਇਕ ਰਮਨ ਅਰੋੜਾ ਨੇ ਇਸ ਮਕਾਨ ’ਤੇ ਜਬਰਨ ਕਬਜ਼ਾ ਕੀਤਾ ਅਤੇ ਉਨ੍ਹਾਂ ਦੇ ਗੰਨਮੈਨ ਨਿਯਮਿਤ ਤੌਰ ’ਤੇ ਉਥੇ ਡੇਰਾ ਜਮਾਈ ਰੱਖਦੇ ਸਨ। ਵਿਜੀਲੈਂਸ ਨੇ ਇਸ ਮਕਾਨ ਦਾ ਵੀ ਰਿਕਾਰਡ ਤਲਬ ਕੀਤਾ ਹੈ।
ਇਹ ਵੀ ਪੜ੍ਹੋ: ਪੰਜਾਬ 'ਚ ਮੁੜ ਆਵੇਗਾ ਤੂਫ਼ਾਨ ਤੇ ਭਾਰੀ ਮੀਂਹ! 1 ਜੂਨ ਤੱਕ ਇਹ ਜ਼ਿਲ੍ਹੇ ਰਹਿਣ Alert
ਰਾਜੂ ਮਦਾਨ ਦੇ ਨਾਂ ’ਤੇ 100 ਮਰਲਾ ਜ਼ਮੀਨ, ਜਬਰਨ ਕਬਜ਼ੇ ਦਾ ਦੋਸ਼
ਵਿਜੀਲੈਂਸ ਨੂੰ ਇਨਪੁੱਟ ਮਿਲੇ ਹਨ ਨਾਹਲਾਂ ਗੰਦਾ ਨਾਲਾ ਇਲਾਕੇ ਦੀ 100 ਮਰਲੇ ਦੀ ਜ਼ਮੀਨ ਜੋ ਰਾਜੂ ਮਦਾਨ ਦੇ ਨਾਂ ’ਤੇ ਦਰਜ ਹੈ, ਉਸ ’ਤੇ ਵੀ ਵਿਜੀਲੈਂਸ ਦੀਆਂ ਨਜ਼ਰਾਂ ਗੱਡੀਆਂ ਹੋਈਆਂ ਹਨ। ਵਿਭਾਗ ਅਨੁਸਾਰ ਇਹ ਜ਼ਮੀਨ ਵਿਵਾਦਿਤ ਵੀ ਸੀ ਅਤੇ ਇਸ ’ਤੇ ਕਬਜ਼ਾ ਪੁਲਸ ਦੀ ਮਦਦ ਨਾਲ ਕਰਵਾਇਆ ਗਿਆ। ਹੁਣ ਇਸ ਜ਼ਮੀਨ ਦਾ ਪੂਰਾ ਰੈਵੇਨਿਊ ਰਿਕਾਰਡ ਮੰਗਵਾਇਆ ਗਿਆ ਹੈ ਤਾਂ ਜੋ ਜਾਂਚ ਵਿਚ ਕੋਈ ਕਸਰ ਨਾ ਰਹਿ ਜਾਵੇ।
ਪਠਾਨਕੋਟ ਬਾਈਪਾਸ ਅਤੇ ਹੋਰ ਇਲਾਕਿਆਂ ਦੀਆਂ ਜਾਇਦਾਦਾਂ ’ਤੇ ਵੀ ਜਾਂਚ ਤੇਜ਼
ਵਿਜੀਲੈਂਸ ਨੂੰ ਇਨਪੁੱਟ ਮਿਲੇ ਹਨ ਕਿ ਪਠਾਨਕੋਟ ਬਾਈਪਾਸ ਰਣਵੀਰ ਕਲਾਸਿਕ ਨੇੜੇ ਇਕ ਪਲਾਟ ਜਿਸ ਦੀ ਰਜਿਸਟਰੀ ਗੌਰਵ ਦੇ ਨਾਂ ’ਤੇ ਹੈ, ਵੀ ਵਿਵਾਦਾਂ ਵਿਚ ਹੈ। ਇਸ ਤੋਂ ਇਲਾਵਾ ਨਾਗਰਾ ਫਾਟਕ ਦੇ ਨੇੜੇ ਸਥਿਤ 80 ਮਰਲੇ ਦੀ ਨਵੀਂ ਫੈਕਟਰੀ, ਜੋ 2024 ਵਿਚ ਬਣਾਈ ਗਈ, ਦਾ ਵੀ ਪੂਰਾ ਰਿਕਾਰਡ ਰੈਵੇਨਿਊ ਅਧਿਕਾਰੀਆਂ ਤੋਂ ਮੰਗਿਆ ਗਿਆ ਹੈ।
ਇਹ ਵੀ ਪੜ੍ਹੋ: ਪੰਜਾਬ ਦੇ ਇਸ ਜ਼ਿਲ੍ਹੇ 'ਚ 10 ਜੂਨ ਤੱਕ ਲੱਗੀ ਵੱਡੀ ਪਾਬੰਦੀ, ਸਖ਼ਤ ਹੁਕਮ ਜਾਰੀ
ਮਹੇਸ਼ ਦੀ ਕਰੋੜਾਂ ਰੁਪਏ ਦੀ ਦੁਕਾਨ ਦੀ ਵੀ ਕਰਵਾਈ ਜਾ ਰਹੀ ਹੈ ਜਾਂਚ
ਮਕਸੂਦਾਂ ਦੀ ਸਬਜ਼ੀ ਮੰਡੀ ਵਿਚ ਦੁਕਾਨ ਜਿਸ ਦੀ ਡੀਲ 4.25 ਕਰੋੜ ਰੁਪਏ ਵਿਚ ਮਹੇਸ਼ ਦੇ ਨਾਂ ’ਤੇ ਹੋਈ ਸੀ, ਉਸ ਦੀ ਪੂਰੀ ਫਾਈਲ ਵਿਜੀਲੈਂਸ ਨੇ ਕਬਜ਼ੇ ਵਿਚ ਲੈ ਲਈ ਹੈ। ਇਸ ਦੇ ਨਾਲ ਹੀ ਲਾਜਪਤ ਨਗਰ ਸਥਿਤ ਨਹਿਰੀ ਵਿਭਾਗ ਦੀ 80 ਮਰਲੇ ਦੀ ਸਰਕਾਰੀ ਜ਼ਮੀਨ, ਜਿਸ ਨੂੰ ਕਥਿਤ ਤੌਰ ’ਤੇ ਨਿੱਜੀ ਲੋਕਾਂ ਨੂੰ ਵੰਡਣ ਦਾ ਯਤਨ ਕੀਤਾ ਗਿਆ, ਦਾ ਮਾਮਲਾ ਡੀ. ਸੀ. ਤਕ ਪਹੁੰਚ ਚੁੱਕਾ ਹੈ।
ਧੀਣਾ ਕੈਂਟ ਵਿਚ ਨਾਜਾਇਜ਼ ਮਾਰਕੀਟ ਦਾ ਨਿਰਮਾਣ
ਵਿਜੀਲੈਂਸ ਨੂੰ ਇਕ ਹੋਰ ਇਨਪੁੱਟ ਮਿਲਿਆ ਹੈ ਕਿ ਰਮਨ ਅਰੋੜਾ ਨੇ ਧੀਣਾ ਕੈਂਟ ਪਿੰਡ ਵਿਚ 36 ਵਪਾਰਕ ਦੁਕਾਨਾਂ ਦਾ ਨਿਰਮਾਣ ਕਰਵਾ ਕੇ ਉਥੇ ਨਾਜਾਇਜ਼ ਮਾਰਕੀਟ ਬਣਾ ਦਿੱਤੀ। ਹੁਣ ਇਨ੍ਹਾਂ ਦੁਕਾਨਾਂ ਦੇ ਨਿਰਮਾਣ ਨਾਲ ਜੁੜੇ ਨਕਸ਼ੇ, ਪਰਮਿਸ਼ਨ ਅਤੇ ਪ੍ਰਵਾਨਗੀਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਇਹ ਵੀ ਪੜ੍ਹੋ: ਗ੍ਰਿਫ਼ਤਾਰ MLA ਰਮਨ ਅਰੋੜਾ ਬਾਰੇ ਸਨਸਨੀਖੇਜ਼ ਖ਼ੁਲਾਸਾ, ਫਰਜ਼ੀ ਜਬਰ-ਜ਼ਿਨਾਹ ਮਾਮਲੇ 'ਚ...
ਦੀਪ ਨਗਰ ਕੈਂਟ ਵਿਚ ਬਣ ਰਿਹਾ ਨਵਾਂ ਸ਼ੋਅਰੂਮ
ਰਾਜੂ ਮਦਾਨ ਅਤੇ ਅਸ਼ੋਕ ਖ਼ਿਲਾਫ਼ ਇਕ ਹੋਰ ਮਾਮਲਾ ਸਾਹਮਣੇ ਆਇਆ। ਦੋਸ਼ ਹੈ ਕਿ ਦੋਵਾਂ ਨੇ ਪਰਾਗਪੁਰ ਰੋਡ ਸਥਿਤ ਸ਼ਰਾਬ ਦੀ ਦੁਕਾਨ ਕੋਲ ਇਕ ਸ਼ੋਅਰੂਮ ਦਾ ਨਿਰਮਾਣ ਸ਼ੁਰੂ ਕਰਵਾਇਆ ਹੈ, ਜਿਸ ਦਾ ਪੂਰਾ ਰੈਵੇਨਿਊ ਰਿਕਾਰਡ ਤਲਬ ਕੀਤਾ ਗਿਆ ਹੈ।
ਏ. ਜੀ. ਆਈ. ਜਲੰਧਰ ਹਾਈਟਸ-1 ਕੋਲ 22 ਮਰਲਾ ਪਲਾਟ ਦੀ ਕਰੋੜਾਂ ਦੀ ਹੋਈ ਡੀਲ
ਵਿਜੀਲੈਂਸ ਮੁਤਾਬਕ 66 ਫੁੱਟੀ ਰੋਡ ’ਤੇ ਏ. ਜੀ. ਆਈ. ਜਲੰਧਰ ਹਾਈਟਸ-1 ਦੇ ਨੇੜੇ 22 ਮਰਲੇ ਦੀ ਇਕ ਮਹਿੰਗੀ ਪ੍ਰਾਪਰਟੀ ਦੀ ਕਰੋੜਾਂ ਦੀ ਡੀਲ ਰਮਨ ਅਰੋੜਾ ਦੇ ਬੇਟੇ ਰਾਜਨ ਅਰੋੜਾ ਅਤੇ ਉਨ੍ਹਾਂ ਦੇ ਸਹਿਯੋਗੀ ਭੁਪਿੰਦਰ ਦੇ ਨਾਂ ’ਤੇ ਦਰਜ ਹੋਈ ਹੈ। ਹੁਣ ਵਿਜੀਲੈਂਸ ਇਸ ਪ੍ਰਾਪਰਟੀ ਦੀ ਰਜਿਸਟ੍ਰੇਸ਼ਨ, ਭੁਗਤਾਨ ਅਤੇ ਸਰਕਲ ਰੇਟ ਨਾਲ ਤੁਲਨਾ ਕਰ ਕੇ ਜਾਂਚ ਕਰ ਰਹੀ ਹੈ ਕਿ ਕੀ ਇਸ ਵਿਚ ਬਲੈਕ ਮਨੀ ਦੀ ਵਰਤੋਂ ਕੀਤੀ ਗਈ।
ਇਹ ਵੀ ਪੜ੍ਹੋ: ਜਲੰਧਰ 'ਚ ਗੋਲ਼ੀ ਮਾਰ ਕੇ ਕਤਲ ਕੀਤੇ ਵਕੀਲ ਦੇ ਮਾਮਲੇ 'ਚ ਵੱਡਾ ਖ਼ੁਲਾਸਾ, ਖਿਡਾਰੀ ਦੀ ਮਾਂ ਨੇ ...
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
1 ਜੂਨ ਤੋਂ ਬਦਲਣ ਜਾ ਰਹੇ ਹਨ ਕਈ ਅਹਿਮ ਨਿਯਮ, ATM ਲੈਣ-ਦੇਣ 'ਤੇ ਲਾਗੂ ਹੋਵੇਗਾ ਨਵਾਂ ਫੀਸ ਸਟਰੱਕਚਰ
NEXT STORY 
