ਪਟਨਾ (ਰਮਨਦੀਪ ਸਿੰਘ ਸੋਢੀ/ਹਰਪ੍ਰੀਤ ਸਿੰਘ ਕਾਹਲੋਂ)— ਪਟਨਾ ਸਾਹਿਬ ਦੀ ਧਰਤੀ ਰੂਹਾਨੀਅਤ ਨਾਲ ਸਰਾਬੋਰ ਹੈ। ਸਾਹਿਬ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦੇ 352ਵੇਂ ਪ੍ਰਕਾਸ਼ ਪੁਰਬ ਨੂੰ ਧਿਆਨ 'ਚ ਰੱਖਦਿਆਂ ਬਿਹਾਰ ਦੇ ਲੋਕ ਤਿਆਰ ਬਰ ਤਿਆਰ ਹਨ। ਸਹਾਇਤਾ ਲਈ ਥਾਂ ਥਾਂ 'ਹੈਲਪ ਡੈਸਕ' ਸਥਾਪਤ ਹੋ ਗਏ ਹਨ। ਸੁਰੱਖਿਆ ਨੂੰ ਲੈ ਕੇ ਬਿਹਾਰ ਪੁਲਸ ਪੂਰੀ ਤਰ੍ਹਾਂ ਮੁਸਤੈਦ ਹੈ ਅਤੇ ਸੇਵਾ ਲਈ ਭੇਟਾ ਰਹਿਤ ਬੱਸ ਅਤੇ ਆਟੋ ਦੀ ਸੇਵਾ ਆਪਣੇ ਸਟੇਸ਼ਨਾਂ 'ਤੇ ਸੰਗਤਾਂ ਨੂੰ ਉਡੀਕਦੀ ਤਿਆਰ ਬਰ ਤਿਆਰ ਹੈ।
ਫਿਰ ਤੋਂ ਬਿਹਾਰ ਵਾਸੀਆਂ ਦੀ ਸਤਿ ਸ੍ਰੀ ਅਕਾਲ ਤੁਹਾਡਾ ਸਵਾਗਤ ਕਰਦੀ ਹੈ ਅਤੇ ਸੰਗਤਾਂ ਦੀ ਸਹੂਲਤ ਲਈ ਹਰ ਸੂਚਨਾ ਵਾਹਿਗੁਰੂ ਜੀ ਕਾ ਖ਼ਾਲਸਾ ਦੇ ਸੰਬੋਧਨ ਨਾਲ ਮਾਰਗਦਰਸ਼ਨ ਕਰਦੀ ਹੈ। 350ਵੇਂ ਪ੍ਰਕਾਸ਼ ਪੁਰਬ ਤੋਂ ਬਾਅਦ ਪਿਛਲੇ ਸਾਲ ਦੇ ਸ਼ੁਕਰਾਨਾ ਸਮਾਗਮਾਂ ਨੇ ਬਿਹਾਰ ਨੂੰ ਸੰਸਾਰ 'ਚ ਬਹੁਤ ਸਾਰਥਿਕ ਰੂਪ 'ਚ ਪੇਸ਼ ਕੀਤਾ ਹੈ। ਸਾਂਝੀਵਾਲਤਾ ਅਤੇ ਮੁਹੱਬਤ ਦੇ ਅਜਿਹੇ ਇਸ਼ਤਿਹਾਰ ਤੁਹਾਨੂੰ ਤਸੱਲੀ ਦੇਣਗੇ ਅਤੇ ਉਮੀਦ ਦੇਣਗੇ ਕਿ ਧਰਮ ਦੇ ਬੁਨਿਆਦੀ ਸੁਭਾਅ ਨੂੰ ਬੰਦੇ ਅੱਜ ਵੀ ਧਾਰਨ ਕਰੀ ਬੈਠੇ ਹਨ।
ਆਓ ਤਾਂ ਕਿਵੇਂ ਆਓ
ਗੁਰਪੁਰਬ ਮੌਕੇ ਬਿਹਾਰ ਪ੍ਰਸ਼ਾਸਨ ਨੇ ਪੁਖਤਾ ਇੰਤਜ਼ਾਮ ਕੀਤੇ ਹੋਏ ਹਨ। ਦੂਰ ਦੁਰਾਡਿਓਂ ਆਉਣ ਵਾਲੀਆਂ ਸਿੱਖ ਸੰਗਤਾਂ ਲਈ ਰੋਜ਼ਾਨਾ ਭਾਰਤੀ ਰੇਲ ਮਹਿਕਮੇ ਨੇ ਰੇਲਗੱਡੀਆਂ ਦੀ ਸੇਵਾ ਸ਼ੁਰੂ ਕੀਤੀ ਹੈ, ਜੋ ਪਟਨਾ ਸਾਹਿਬ ਸਟੇਸ਼ਨ 'ਤੇ ਉਚੇਚਾ ਪਹੁੰਚਦਾ ਕਰਦੀ ਹੈ। ਹਵਾਈ ਸੇਵਾਵਾਂ 'ਚ ਦਿੱਲੀ ਤੋਂ ਪਟਨਾ ਦੇ ਜੈ ਪ੍ਰਕਾਸ਼ ਨਰਾਇਣ ਹਵਾਈ ਅੱਡੇ ਲਈ ਲੱਗਭਗ 20 ਉਡਾਣਾਂ ਪਹੁੰਚ ਰਹੀਆਂ ਹਨ। ਬਿਹਾਰ ਆਵਾਜਾਈ ਵੱਲੋਂ ਰੇਲ ਸਟੇਸ਼ਨ, ਹਵਾਈ ਅੱਡੇ ਤੋਂ 15 ਬੱਸਾਂ ਦਾ ਇੰਤਜ਼ਾਮ ਕੀਤਾ ਗਿਆ ਹੈ, ਜੋ ਤੈਅਸ਼ੁਦਾ ਥਾਂ 'ਤੇ ਪਹੁੰਚਾਉਂਦੀਆਂ ਹਨ। ਅੱਗੇ ਦੇ ਸਫਰ ਲਈ ਪ੍ਰਸ਼ਾਸਨ ਨੇ 50 ਈ-ਰਿਕਸ਼ਾ ਅਤੇ 20 ਆਟੋ ਰਿਕਸ਼ਾ ਨੂੰ ਸੇਵਾ ਵਿਚ ਹਾਜ਼ਰ ਰੱਖਿਆ ਹੈ। ਸਬੰਧਿਤ ਅਧਿਕਾਰੀਆਂ ਮੁਤਾਬਕ ਆਉਣ ਵਾਲੇ ਦਿਨਾਂ 'ਚ ਸੰਗਤ ਵਧਣ ਦੇ ਨਾਲ ਹੀ ਇਨ੍ਹਾਂ ਸੇਵਾਵਾਂ ਨੂੰ ਹੋਰ ਵਧਾ ਦਿੱਤਾ ਜਾਵੇਗਾ।
ਤੁਹਾਡੇ ਪਟਨਾ ਪਹੁੰਚਣ ਦੇ ਨਾਲ ਹੀ ਤੁਹਾਨੂੰ ਕਿਸੇ ਵੀ ਮੁਸ਼ਕਲ ਦਾ ਸਾਹਮਣਾ ਨਾ ਕਰਨਾ ਪਵੇ, ਇਸ ਲਈ ਧਿਆਨ ਰਹੇ ਤੁਸੀਂ ਸਿੱਧਾ ਸਬੰਧਤ ਥਾਵਾਂ 'ਤੇ ਬਣੇ ਹੈਲਪ ਡੈਸਕ ਨਾਲ ਸੰਪਰਕ ਕਰੋ। ਪ੍ਰਸ਼ਾਸਨ ਨੇ 40 ਹੈਲਪ ਡੈਸਕਾਂ ਦਾ ਪ੍ਰਬੰਧ ਕੀਤਾ ਹੈ। ਇਸ ਦੇ ਨਾਲ ਹੀ ਐਂਬੂਲੈਂਸ ਸਮੇਤ 40 ਮੈਡੀਕਲ ਕੈਂਪਾਂ ਦਾ ਪ੍ਰਬੰਧ ਵੀ ਹੈ। ਹੈਲਪ ਡੈਸਕ ਅੰਦਰ ਤਰਤੀਬਬੱਧ ਬਿਹਾਰ ਪੁਲਸ ਤੋਂ ਇਲਾਵਾ ਸਿਹਤ ਕਰਮਚਾਰੀ ਅਤੇ ਬਿਹਾਰ ਸਰਕਾਰ ਦੇ ਹੋਰ ਮੁਲਾਜ਼ਮ ਬਤੌਰ ਵਲੰਟੀਅਰ ਤੁਹਾਡੀ ਸੇਵਾ 'ਚ ਹਾਜ਼ਰ ਹਨ। ਇਨ੍ਹਾਂ ਸੇਵਾਦਾਰਾਂ ਵੱਲੋਂ ਹੀ ਆਵਾਜਾਈ ਅਤੇ ਹੋਰ ਪ੍ਰਬੰਧ ਕੀਤੇ ਜਾਂਦੇ ਹਨ। ਹੁਣ ਤੱਕ 550 ਪੁਲਸ ਜਵਾਨ ਡਿਊਟੀ 'ਤੇ ਤਾਇਨਾਤ ਹਨ ਅਤੇ ਆਉਂਦੇ ਦਿਨਾਂ ਤੱਕ 1000 ਪੁਲਸ ਮੁਲਾਜ਼ਮਾਂ ਦੀ ਡਿਊਟੀ ਗੁਰਪੁਰਬ ਮੌਕੇ ਰਹੇਗੀ।
ਸ਼ਨੀਵਾਰ ਹੋਣ ਵਾਲੇ ਪ੍ਰੋਗਰਾਮਾਂ ਦਾ ਵੇਰਵਾ
1- ਤਖ਼ਤ ਪਟਨਾ ਸਾਹਿਬ ਵਿਖੇ ਸ਼ਨੀਵਾਰ ਸਵੇਰੇ 2 ਵਜੇ ਸ੍ਰੀ ਅਖੰਡ ਪਾਠ ਸਾਹਿਬ ਆਰੰਭ ਹੋਣਗੇ, ਜਿਸ ਦੀ ਸਮਾਪਤੀ 14 ਜਨਵਰੀ ਨੂੰ ਅੰਮ੍ਰਿਤ ਵੇਲੇ 1.20 ਵਜੇ ਹੋਵੇਗੀ।
2- ਗੁਰਦੁਆਰਾ ਗਊ ਘਾਟ ਵਿਖੇ ਸਵੇਰੇ 8.30 ਤੋਂ ਲੈ ਕੇ ਦੁਪਹਿਰ 1 ਵਜੇ ਤੱਕ ਵਿਸ਼ੇਸ਼ ਦੀਵਾਨ ਸਜਣਗੇ, ਜਿਸ ਵਿਚ ਸਿੱਖ ਪੰਥ ਪ੍ਰਸਿੱਧ ਰਾਗੀ ਜਥੇ, ਪ੍ਰਚਾਰਕ ਅਤੇ ਤਖ਼ਤ ਸਾਹਿਬ ਦੇ ਹਜ਼ੂਰੀ ਰਾਗੀ ਅਤੇ ਕਥਾ ਵਾਚਕ ਸ਼ਾਮਲ ਹੋਣਗੇ। ਦੀਵਾਨ ਦੀ ਸਮਾਪਤੀ ਉਪਰੰਤ ਗੁਰੂ ਕਾ ਲੰਗਰ ਅਤੁੱਟ ਵਰਤੇਗਾ।
3- ਇਸ ਤੋਂ ਬਾਅਦ ਗੁਰਦੁਆਰਾ ਗਊ ਘਾਟ ਤੋਂ ਨਗਰ ਕੀਰਤਨ ਆਰੰਭ ਹੋ ਕੇ ਸ਼ਾਮ ਨੂੰ 7 ਵਜੇ ਤਖ਼ਤ ਸਾਹਿਬ ਵਿਖੇ ਪਹੁੰਚੇਗਾ। ਇਸ ਨਗਰ ਕੀਰਤਨ ਵਿਚ ਹਾਥੀ, ਘੋੜੇ, ਊਠ, ਬੈਂਡ ਵਾਜਾ, ਗਤਕਾ ਪਾਰਟੀ, ਸ਼ਬਦੀ ਜਥੇ, ਝਾੜੂ ਦੀ ਸੇਵਾ ਅਤੇ ਸਕੂਲੀ ਬੱਚਿਆਂ ਸਮੇਤ ਹਜ਼ਾਰਾਂ ਦੀ ਗਿਣਤੀ 'ਚ ਸੰਗਤ ਵੀ ਸ਼ਾਮਲ ਹੋਵੇਗੀ।
ਰੌਣਕ ਬਾਜ਼ਾਰ ਦੀ ਰੌਣਕ
ਤਖ਼ਤ ਪਟਨਾ ਸਾਹਿਬ ਤੋਂ ਗੁਰਦੁਆਰਾ ਬਾਲ ਲੀਲ੍ਹਾ ਨੂੰ ਆਉਂਦੀ ਗਲੀ ਦਾ ਰੌਣਕ ਬਾਜ਼ਾਰ ਇਸ ਸ਼ਹਿਰ ਦਾ ਪੁਰਾਣਾ ਬਾਜ਼ਾਰ ਹੈ। ਜਿੱਥੇ ਸਮਾਗਮ ਸ਼ੁਰੂ ਹੋਣ ਤੋਂ ਇਕ ਦਿਨ ਪਹਿਲਾਂ ਹੀ ਸ਼ਰਧਾਲੂਆਂ ਦੀ ਚਹਿਲ ਪਹਿਲ ਨਜ਼ਰ ਆ ਰਹੀ ਹੈ।
ਸਾਂਝੀਵਾਲਤਾ ਦੇ ਨਾਮ 'ਜੀ ਆਇਆ ਨੂੰ'
ਜੈ ਪ੍ਰਕਾਸ਼ ਨਾਰਾਇਣ ਹਵਾਈ ਅੱਡੇ ਤੋਂ ਪਟਨਾ ਸਾਹਿਬ ਨੂੰ ਆਉਂਦੇ ਹੋਏ ਇਕ ਮੰਦਰ ਦੀ ਛੱਤ 'ਤੇ ਲੱਗਾ ਹੋਇਆ ਬੋਰਡ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦੇ ਪ੍ਰਕਾਸ਼ ਪੁਰਬ ਦੀਆਂ ਵਧਾਈਆਂ ਦਿੰਦਾ ਤੁਹਾਨੂੰ ਜੀ ਆਇਆਂ ਨੂੰ ਕਹੇਗਾ। ਸ਼ਰਧਾ, ਰੂਹਾਨੀਅਤ ਦੀ ਜ਼ਮੀਨ 'ਚ ਭਾਈਚਾਰੇ ਦੀ ਇਹੋ ਖੋਜ ਹੀ ਧਰਮ ਦਾ ਰਾਹ ਹੈ।
ਚੇਅਰਮੈਨੀਆਂ ਨਾ ਮਿਲਣ ਕਾਰਨ ਵਿਧਾਇਕਾਂ 'ਚ ਉੱਠਣ ਲੱਗੇ ਬਗਾਵਤੀ ਸੁਰ
NEXT STORY 
