ਜਲੰਧਰ (ਮ੍ਰਿਦੁਲ)–ਵਿਜੀਲੈਂਸ ਬਿਊਰੋ ਨੇ ਭ੍ਰਿਸ਼ਟਾਚਾਰ ਦੇ ਦੋਸ਼ ਵਿਚ ਗ੍ਰਿਫ਼ਤਾਰ ਕੀਤੇ ਵਿਧਾਇਕ ਰਮਨ ਅਰੋੜਾ ਅਤੇ ਮਹੇਸ਼ ਮਖੀਜਾ ਉਰਫ਼ ਰਾਜੂ ਨੂੰ ਆਹਮੋ-ਸਾਹਮਣੇ ਬਿਠਾ ਕੇ ਪੁੱਛਗਿੱਛ ਕੀਤੀ। ਇਹ ਪੁੱਛਗਿੱਛ ਲਗਭਗ 12 ਘੰਟੇ ਚੱਲੀ, ਜਿਸ ਵਿਚ ਵਿਜੀਲੈਂਸ ਦੇ ਹੱਥ ਭ੍ਰਿਸ਼ਟਾਚਾਰ ਸਬੰਧੀ ਕਈ ਅਹਿਮ ਸੁਰਾਗ ਲੱਗੇ। ਇਸ ਤੋਂ ਬਾਅਦ ਵਿਜੀਲੈਂਸ ਨੇ ਚਰਨਜੀਤਪੁਰਾ ਵਿਚ ਮਹੇਸ਼ ਮਖੀਜਾ ਨੂੰ ਭਜਾਉਣ ਅਤੇ ਉਨ੍ਹਾਂ ਦੇ ਦਸਤਾਵੇਜ਼ ਸਮੇਤ ਕੈਸ਼ ਨੂੰ ਇੱਧਰ-ਉਧਰ ਕਰਨ ਵਾਲੇ ਦੋਸਤ ਨੰਨੀ ਆਨੰਦ ਨੂੰ ਵੀ ਰਸਮੀ ਤੌਰ ’ਤੇ ਕੇਸ ਵਿਚ ਨਾਮਜ਼ਦ ਕਰ ਲਿਆ ਹੈ। ਵਿਜੀਲੈਂਸ ਨੂੰ ਸ਼ੱਕ ਹੈ ਕਿ ਉਸ ਨੂੰ ਮਖੀਜਾ ਦੇ ਕਈ ਰਾਜ਼ ਪਤਾ ਹਨ ਅਤੇ ਨੰਨੀ ਦੀ ਵੀ ਹੁਣ ਜਲਦ ਹੀ ਗ੍ਰਿਫ਼ਤਾਰੀ ਹੋ ਸਕਦੀ ਹੈ।
ਇਹ ਵੀ ਪੜ੍ਹੋ: ਪੰਜਾਬੀਆਂ ਲਈ Good News, ਹੁਣ ਆਦਮਪੁਰ ਤੋਂ ਇਸ ਰੂਟ ਲਈ ਸ਼ੁਰੂ ਹੋਵੇਗੀ ਸਿੱਧੀ ਫਲਾਈਟ
ਸੂਤਰਾਂ ਦੀ ਮੰਨੀਏ ਤਾਂ ਸ਼ਨੀਵਾਰ ਵਿਧਾਇਕ ਰਮਨ ਅਰੋੜਾ ਅਤੇ ਮਹੇਸ਼ ਮਖੀਜਾ ਨੂੰ ਆਹਮੋ-ਸਾਹਮਣੇ ਬਿਠਾ ਕੇ 12 ਘੰਟੇ ਲੰਮੀ ਪੁੱਛਗਿੱਛ ਕੀਤੀ ਗਈ, ਜਿਸ ਵਿਚ ਸਭ ਤੋਂ ਵੱਡਾ ਸਵਾਲ ਇਹੀ ਰਿਹਾ ਕਿ ਆਖਿਰ ਵਿਧਾਇਕ ਰਮਨ ਅਰੋੜਾ ਦਾ ਪੈਸਾ ਮਹੇਸ਼ ਮਖੀਜਾ ਕਿਥੇ ਲੁਕਾਉਂਦਾ ਹੈ। ਵਿਜੀਲੈਂਸ ਨੇ ਦੋਵਾਂ ਤੋਂ ਸਵਾਲ ਕੀਤੇ ਕਿ ਉਨ੍ਹਾਂ ਨੇ ਕਿਸ-ਕਿਸ ਵਿਅਕਤੀ ਤੋਂ ਕਿੰਨੇ ਪੈਸੇ ਲਏ ਸਨ। ਬਾਅਦ ਵਿਚ ਉਸੇ ਪੈਸੇ ਨਾਲ ਜਾਇਦਾਦਾਂ ਕਿਥੇ-ਕਿਥੇ ਬਣਾਈਆਂ ਹਨ। ਵਿਜੀਲੈਂਸ ਵੱਲੋਂ ਮਹੇਸ਼ ਮਖੀਜਾ ਦੀ ਥਾਰ ਗੱਡੀ ਤੋਂ ਬਰਾਮਦ ਹੋਏ ਦਸਤਾਵੇਜ਼ਾਂ ਦੀ ਸਕਰੂਟਨੀ ਕੀਤੀ ਜਾ ਰਹੀ ਹੈ। ਇਨ੍ਹਾਂ ਦਸਤਾਵੇਜ਼ਾਂ ’ਤੇ ਜਿਨ੍ਹਾਂ-ਜਿਨ੍ਹਾਂ ਲੋਕਾਂ ਦੇ ਨਾਂ ’ਤੇ ਪ੍ਰਾਪਰਟੀਆਂ ਖ਼ਰੀਦੀਆਂ ਗਈਆਂ ਹਨ, ਉਹ ਮਖੀਜਾ ਅਤੇ ਰਮਨ ਅਰੋੜਾ ਦੇ ਕਿਸ ਤਰ੍ਹਾਂ ਸੰਪਰਕ ਵਿਚ ਸਨ ਅਤੇ ਉਨ੍ਹਾਂ ਨਾਲ ਕਿਸ ਤਰ੍ਹਾਂ ਕੁਨੈਕਸਨ ਹੈ।
ਸੂਤਰਾਂ ਅਨੁਸਾਰ ਵਿਜੀਲੈਂਸ ਵੱਲੋਂ ਨਾਮਜ਼ਦ ਮੁਲਜ਼ਮ ਨੰਨੀ ਆਨੰਦ ਜੋ ਕਿ ਮਹੇਸ਼ ਮਖੀਜਾ ਦਾ ਗੁਆਂਢੀ ਵੀ ਹੈ, ਉਨ੍ਹਾਂ ਦੀ ਦੋਸਤੀ ਕਾਫ਼ੀ ਡੂੰਘੀ ਅਤੇ ਪੁਰਾਣੀ ਹੈ। ਮਹੇਸ਼ ਮਖੀਜਾ ਨੇ ਸਾਰਾ ਕੈਸ਼ ਉਸੇ ਰਾਹੀਂ ਇਧਰ-ਉਧਰ ਕੀਤਾ, ਹਾਲਾਂਕਿ ਵਿਜੀਲੈਂਸ ਨੂੰ ਹੁਣ ਤਕ 2 ਬੈਗ ਬਰਾਮਦ ਹੋਏ ਹਨ, ਜਿਨ੍ਹਾਂ ਵਿਚ ਕਈ ਕਾਗਜ਼ਾਤ ਮਿਲੇ ਹਨ। ਇਨ੍ਹਾਂ ਹੀ ਬੈਗਾਂ ਨੂੰ ਨੰਨੀ ਆਨੰਦ ਵੱਲੋਂ ਲੁਕੋਇਆ ਗਿਆ ਸੀ, ਹਾਲਾਂਕਿ ਵਿਜੀਲੈਂਸ ਨੇ ਇਸ ਗੱਲ ਦੀ ਅਧਿਕਾਰਕ ਪੁਸ਼ਟੀ ਨਹੀਂ ਕੀਤੀ।
ਇਹ ਵੀ ਪੜ੍ਹੋ: ਪੰਜਾਬ 'ਚ ਬਦਲਿਆ ਮੌਸਮ, ਤੇਜ਼ ਹਨ੍ਹੇਰੀ-ਝੱਖੜ ਦੇ ਨਾਲ ਪਿਆ ਮੀਂਹ
ਰਮਨ ਅਰੋੜਾ ਨੇ ਮਖੀਜਾ ਨੂੰ ਸੌਂਪੀ ਸੀ ਮਕਸੂਦਾਂ ਮੰਡੀ ਏਰੀਆ ਵਿਚ ਨਾਜਾਇਜ਼ ਉਗਰਾਹੀ ਦੀ ਜ਼ਿੰਮੇਵਾਰੀ
ਵਿਜੀਲੈਂਸ ਨੇ ਵਿਧਾਇਕ ਰਮਨ ਅਰੋੜਾ ਅਤੇ ਮਖੀਜਾ ਦੀ ਆਹਮੋ-ਸਾਹਮਣੇ ਪੁੱਛਗਿੱਛ ਤੋਂ ਬਾਅਦ ਰੋਹਿਤ ਕਪੂਰ ਅਤੇ ਮਖੀਜਾ ਤੋਂ ਵੀ ਆਹਮੋ-ਸਾਹਮਣੇ ਪੁੱਛਗਿੱਛ ਕੀਤੀ, ਜਿਸ ਵਿਚ ਪਤਾ ਲੱਗਾ ਕਿ ਸ਼ਹਿਰ ਵਿਚ ਲਾਟਰੀ ਕਾਰੋਬਾਰੀਆਂ ਅਤੇ ਹੋਰ ਗਲਤ ਕਾਰੋਬਾਰ ਕਰਨ ਵਾਲਿਆਂ ਨਾਲ ਸੈਟਿੰਗ ਕਰ ਕੇ ਲੱਖਾਂ ਰੁਪਏ ਇਕੱਠੇ ਕੀਤੇ ਗਏ। ਵਿਜੀਲੈਂਸ ਦੀ ਜਾਂਚ ਵਿਚ ਪਤਾ ਲੱਗਾ ਕਿ ਕੁਝ ਲੋਕਾਂ ਤੋਂ ਉਗਰਾਹੀ ਕਰਨ ਦੀ ਜ਼ਿੰਮੇਵਾਰੀ ਮਖੀਜਾ ਦੇ ਮੋਢਿਆਂ ’ਤੇ ਸੀ। ਖਾਸ ਕਰਕੇ ਮਕਸੂਦਾਂ ਮੰਡੀ ਦੇ ਆਸ-ਪਾਸ ਦੇ ਇਲਾਕਿਆਂ ਵਿਚ ਹੋਣ ਵਾਲੇ ਕਾਲੇ ਕਾਰੋਬਾਰ ਦਾ ਸਾਰਾ ਹਿਸਾਬ-ਕਿਤਾਬ ਮਖੀਜਾ ਕੋਲ ਹੀ ਸੀ।
ਕੇਂਦਰ ਸਰਕਾਰ ਦੀ ਜ਼ਮੀਨ ਦਾ ਸੌਦਾ ਮਹੇਸ਼ ਮਖੀਜਾ ਨੇ ਬਸਤੀਆਂ ਇਲਾਕੇ ਦੇ ਟੇਲਰ ਰਾਹੀਂ ਕੀਤਾ
ਵਿਜੀਲੈਂਸ ਨੂੰ ਪਤਾ ਲੱਗਾ ਕਿ ਬਸਤੀ ਗੁਜ਼ਾਂ ਤੋਂ ਜੇ. ਪੀ. ਨਗਰ ਰੋਡ ’ਤੇ ਸਥਿਤ ਕੇਂਦਰ ਸਰਕਾਰ ਦੀ ਕਰੋੜਾਂ ਰੁਪਏ ਦੀ ਜ਼ਮੀਨ ਜਿਸ ’ਤੇ ਪਹਿਲਾਂ ਡੰਪ ਹੋਇਆ ਕਰਦਾ ਸੀ, ਦਾ ਸੌਦਾ ਬਸਤੀਆ ਇਲਾਕੇ ਦੇ ਹੀ ਰਹਿਣ ਵਾਲੇ ਇਕ ਟੇਲਰ ਨੇ ਮਹੇਸ਼ ਮਖੀਜਾ ਨਾਲ ਕਰਵਾਇਆ ਸੀ। ਉਕਤ ਜ਼ਮੀਨ ਟੇਲਰ ਦੇ ਜਾਣਕਾਰਾਂ ਦੇ ਨਾਂ ’ਤੇ ਅਲਾਟ ਹੋਈ ਸੀ। ਉਕਤ ਟੇਲਰ ਕੋਲ ਖੁਦ ਮਹੇਸ਼ ਮਖੀਜਾ ਆਪਣੇ ਇਕ ਰਾਜ਼ਦਾਰ ਅਤੇ ਇਕ ਫਾਈਨਾਂਸਰ ਨਾਲ ਪਹੁੰਚਿਆ ਸੀ, ਜਿਸ ਤੋਂ ਬਾਅਦ ਜ਼ਮੀਨ ਦੇ ਕਾਗਜ਼ਾਤ ਤਿਆਰ ਕੀਤੇ ਗਏ।
ਇਹ ਵੀ ਪੜ੍ਹੋ: ਜਲੰਧਰ 'ਚੋਂ ਹੈਰਾਨ ਕਰਦਾ ਮਾਮਲਾ! ਚਲਾ ਰਿਹਾ ਸੀ ਕਾਰ, ਹੈਲਮੇਟ ਨਾ ਪਹਿਣਨ 'ਤੇ ਕੱਟਿਆ ਚਲਾਨ
ਮਹੇਸ਼ ਮਖੀਜਾ ਤੋਂ ਬਰਾਮਦ ਮੋਬਾਇਲ ਅਤੇ ਸਿਮ ਨੂੰ ਫਾਰੈਂਸਿਕ ਜਾਂਚ ਲਈ ਭੇਜਿਆ
ਉਥੇ ਹੀ ਗ੍ਰਿਫ਼ਤਾਰ ਕੀਤੇ ਮਹੇਸ਼ ਮਖੀਜਾ ਤੋਂ ਬਰਾਮਦ ਕੀਤੇ 4 ਮੋਬਾਇਲਾਂ ਅਤੇ ਸਿਮ ਕਾਰਡਾਂ ਨੂੰ ਫਾਰੈਂਸਿਕ ਲੈਬ ਵਿਚ ਜਾਂਚ ਲਈ ਭੇਜ ਦਿੱਤਾ ਹੈ। ਵਿਜੀਲੈਂਸ ਵੱਲੋਂ ਹੁਣ ਤਕ ਚਾਰਾਂ ਮੋਬਾਇਲਾਂ ਵਿਚ ਚੱਲ ਰਹੇ ਵ੍ਹਟਸਐਪ ਨੰਬਰਾਂ ’ਤੇ ਚੈਟਾਂ ਨੂੰ ਰਿਕਵਰ ਕੀਤਾ ਜਾ ਚੁੱਕਾ ਹੈ ਪਰ ਕਈ ਚੈਟ ਅਤੇ ਫੋਨ ਨੰਬਰ ਰਿਕਵਰ ਕਰਨ ਲਈ ਉਨ੍ਹਾਂ ਨੂੰ ਫਾਰੈਂਸਿਕ ਜਾਂਚ ਲਈ ਭੇਜ ਦਿੱਤਾ ਹੈ ਅਤੇ ਜਲਦ ਹੀ ਉਸ ਦੀ ਡਿਟੇਲ ਆਉਣ ਵਾਲੀ ਹੈ। ਅਧਿਕਾਰਕ ਸੂਤਰਾਂ ਦੀ ਮੰਨੀਏ ਤਾਂ ਮਖੀਜਾ ਦੇ ਮੋਬਾਇਲ ’ਤੇ ਜਿਨ੍ਹਾਂ-ਜਿਨ੍ਹਾਂ ਲੋਕਾ ਨਾਲ ਗੱਲ ਹੋਈ ਹੈ, ਉਸ ਦੀ ਸਾਰੀ ਲਿਸਟ ਤਿਆਰ ਕਰਕੇ ਉਨ੍ਹਾਂ ਨੂੰ ਵੀ ਹਿਰਾਸਤ ਵਿਚ ਲਿਆ ਜਾਵੇਗਾ।
ਵਿਜੀਲੈਂਸ ਦਫ਼ਤਰ 'ਚ ਕੂਲਰ ਦੀ ਹਵਾ ਲੈਂਦੇ ਹੋਏ ਕਿਤਾਬ ਪੜ੍ਹਦਾ ਰਿਹਾ ਅਰੋੜਾ ਦਾ ਪੀ. ਏ. ਸ਼ਿਵਮ ਮਦਾਨ
ਜਦੋਂ ਵਿਜੀਲੈਂਸ ਦੇ ਅਧਿਕਾਰੀ ਵਿਧਾਇਕ ਰਮਨ ਅਰੋੜਾ ਅਤੇ ਮਹੇਸ਼ ਮਖੀਜਾ ਤੋਂ ਪੁੱਛਗਿੱਛ ਕਰ ਰਹੇ ਸਨ ਤਾਂ ਵਿਧਾਇਕ ਦਾ ਪੀ. ਏ. ਸ਼ਿਵਮ ਮਦਾਨ ਵਿਜੀਲੈਂਸ ਦਫ਼ਤਰ ਦੇ ਬਾਹਰ ਇਕ ਕੂਲਰ ਦੇ ਅੱਗੇ ਬੈਠ ਕੇ ਸ਼ਾਂਤੀ ਨਾਲ ਚਾਹ ਦੀਆਂ ਚੁਸਕੀਆਂ ਲੈਂਦਿਆਂ ਕਿਤਾਬ ਪੜ੍ਹਦਾ ਰਿਹਾ। ਕਾਫ਼ੀ ਲੰਮੀ ਪੁੱਛਗਿੱਛ ਦੌਰਾਨ ਸ਼ਿਵਮ ਮਦਾਨ ਨੂੰ ਟਾਈਮ ਪਾਸ ਕਰਨ ਲਈ ਕਿਤਾਬ ਦਿੱਤੀ ਗਈ ਸੀ।
ਇਹ ਵੀ ਪੜ੍ਹੋ: ਪੰਜਾਬ 'ਚ 'ਲਵ ਮੈਰਿਜ' ਦਾ ਖ਼ੌਫ਼ਨਾਕ ਅੰਜਾਮ! ਤੈਸ਼ 'ਚ ਆਏ ਭਰਾ ਨੇ ਤੜਕਸਾਰ ਭੈਣ ਨਾਲ ਕੀਤਾ ਰੂਹ ਕੰਬਾਊ ਕਾਂਡ
ਡੀ. ਏ. ਵੀ. ਕਾਲਜ ਤੋਂ ਜਲੰਧਰ ਹਾਈਟਸ ਸ਼ਿਫ਼ਟ ਹੋਇਆ ਬੁੱਕੀ ਵੀ ਵਿਜੀਲੈਂਸ ਦੇ ਰਾਡਾਰ ’ਤੇ
ਵਿਜੀਲੈਂਸ ਦੀ ਜਾਂਚ ਵਿਚ ਮਹੇਸ਼ ਮਖੀਜਾ ਦੇ ਇਕ ਹੋਰ ਸਾਥੀ ਦਾ ਨਾਂ ਸਾਹਮਣੇ ਆਇਆ ਹੈ, ਜੋ ਸ਼ਹਿਰ ਦਾ ਇਕ ਵੱਡਾ ਬੁੱਕੀ ਹੈ। ਉਸ ਨੂੰ ਵੀ ਵਿਜੀਲੈਂਸ ਨੇ ਆਪਣੇ ਰਾਡਾਰ ’ਤੇ ਲੈ ਲਿਆ ਹੈ। ਉਕਤ ਬੁੱਕੀ ਪਹਿਲਾਂ ਡੀ. ਏ. ਵੀ. ਕਾਲਜ ਕੋਲ ਸਥਿਤ ਕਾਲੋਨੀ ਵਿਚ ਰਹਿੰਦਾ ਸੀ ਪਰ ਹੁਣ ਉਹ ਸ਼ਿਫਟ ਹੋ ਕੇ ਜਲੰਧਰ ਹਾਈਟਸ ਵਿਚ ਰਹਿਣ ਲੱਗਾ ਹੈ। ਮਹੇਸ਼ ਮਖੀਜਾ ਅਤੇ ਉਕਤ ਵਿਅਕਤੀ ਦੀ ਪੁਰਾਣੀ ਦੋਸਤੀ ਅਤੇ ਡੂੰਘੇ ਰਿਸ਼ਤੇ ਦੀ ਵਿਜੀਲੈਂਸ ਜਾਂਚ ਕਰ ਰਹੀ ਹੈ। ਵਿਜੀਲੈਂਸ ਨੂੰ ਸ਼ੱਕ ਹੈ ਕਿ ਭ੍ਰਿਸ਼ਟਾਚਾਰ ਤਹਿਤ ਕਮਾਇਆ ਧਨ ਇਸੇ ਬੁੱਕੀ ਰਾਹੀਂ ਤਾਂ ਨਹੀਂ ਟਿਕਾਣੇ ਲਗਾਇਆ ਗਿਆ।
ਫ਼ਰਾਰ ਰਾਜੂ ਮਦਾਨ ਅਤੇ ਰਾਜਨ ਅਰੋੜਾ ਦੀ ਭਾਲ ’ਚ ਛਾਪੇਮਾਰੀ ਜਾਰੀ
ਵਿਧਾਇਕ ਰਮਨ ਅਰੋੜਾ ਦੇ ਕੁੜਮ ਰਾਜੂ ਮਦਾਨ ਅਤੇ ਬੇਟਾ ਰਾਜਨ ਅਰੋੜਾ ਹਾਲੇ ਤਕ ਫ਼ਰਾਰ ਹਨ। ਉਨ੍ਹਾਂ ਬਾਰੇ ਵਿਜੀਲੈਂਸ ਨੂੰ ਕਈ ਸੁਰਾਗ ਮਿਲੇ ਹਨ। ਹੁਣ ਵਿਜੀਲੈਂਸ ਦੀਆਂ ਕਈ ਟੀਮਾਂ ਦੋਵਾਂ ਦੀ ਭਾਲ ਵਿਚ ਛਾਪੇਮਾਰੀ ਕਰ ਰਹੀਆਂ ਹਨ। ਵਿਜੀਲੈਂਸ ਵੱਲੋਂ ਰਾਜੂ ਮਦਾਨ ਨੂੰ ਵੀ ਸਰੰਡਰ ਕਰਨ ਲਈ ਪ੍ਰੈਸ਼ਰ ਪਾਇਆ ਗਿਆ ਹੈ। ਇਸ ਤੋਂ ਇਲਾਵਾ ਪਰਿਵਾਰ ਦੇ ਮੋਬਾਇਲ ਨੰਬਰ ਵੀ ਵਿਜੀਲੈਂਸ ਨੇ ਸਰਵੀਲਾਂਸ ’ਤੇ ਲਗਾਏ ਹਨ ਤਾਂ ਜੋ ਦੋਵਾਂ ਦੀ ਜਲਦ ਗ੍ਰਿਫ਼ਤਾਰੀ ਹੋ ਸਕੇ।
ਇਹ ਵੀ ਪੜ੍ਹੋ: MLA ਰਮਨ ਅਰੋੜਾ ਦੀ ਲੀਕ ਹੋਈ ਆਡੀਓ ਨਾਲ ਮਚਿਆ ਹੜਕੰਪ, ਇੰਝ ਖੁੱਲ੍ਹੇ ਪੱਤੇ
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
200 ਤੇ 500 ਰੁਪਏ ਦੇ ਨੋਟਾਂ ਨੂੰ ਲੈ ਕੇ ਆਈ ਅਹਿਮ ਖ਼ਬਰ, ਕੀ ਤੁਹਾਡੇ ਕੋਲ ਵੀ ਇਹ ਹਨ ਨੋਟ
NEXT STORY 
