ਸਪੋਰਟਸ ਡੈਸਕ : ਇੰਡੀਅਨ ਪ੍ਰੀਮੀਅਰ ਲੀਗ (IPL) 2026 ਦੇ ਇੱਕ ਅਹਿਮ ਮੁਕਾਬਲੇ ਵਿੱਚ ਰਾਜਸਥਾਨ ਰਾਇਲਜ਼ (RR) ਦੇ ਤੇਜ਼ ਗੇਂਦਬਾਜ਼ ਨਾਂਦਰੇ ਬਰਗਰ (Nandre Burger) ਨੂੰ ਮੈਦਾਨ 'ਤੇ ਗ਼ਲਤ ਵਿਵਹਾਰ ਕਰਨਾ ਮਹਿੰਗਾ ਪੈ ਗਿਆ ਹੈ । ਬੀ.ਸੀ.ਸੀ.ਆਈ. (BCCI) ਨੇ ਬਰਗਰ 'ਤੇ IPL ਕੋਡ ਆਫ਼ ਕੰਡਕਟ ਦੀ ਉਲੰਘਣਾ ਕਰਨ ਲਈ ਮੈਚ ਫੀਸ ਦਾ 10 ਫੀਸਦੀ ਜੁਰਮਾਨਾ ਲਗਾਇਆ ਹੈ। ਜੁਰਮਾਨੇ ਦੇ ਨਾਲ-ਨਾਲ ਉਨ੍ਹਾਂ ਦੇ ਅਨੁਸ਼ਾਸਨੀ ਰਿਕਾਰਡ ਵਿੱਚ ਇੱਕ 'ਡੇਮੈਰਿਟ ਪੁਆਇੰਟ' (Demerit Point) ਵੀ ਜੋੜ ਦਿੱਤਾ ਗਿਆ ਹੈ।
ਕਿਉਂ ਹੋਈ ਕਾਰਵਾਈ?
ਇਹ ਕਾਰਵਾਈ ਬੁੱਧਵਾਰ ਨੂੰ ਲਖਨਊ ਦੇ ਅਟਲ ਬਿਹਾਰੀ ਵਾਜਪਾਈ ਏਕਾਨਾ ਕ੍ਰਿਕਟ ਸਟੇਡੀਅਮ ਵਿੱਚ ਲਖਨਊ ਸੁਪਰ ਜਾਇੰਟਸ (LSG) ਵਿਰੁੱਧ ਖੇਡੇ ਗਏ ਮੈਚ ਦੌਰਾਨ ਹੋਈ ਬਦਤਮੀਜ਼ੀ ਕਾਰਨ ਕੀਤੀ ਗਈ ਹੈ। ਬਰਗਰ ਨੇ ਆਈ.ਪੀ.ਐੱਲ. ਕੋਡ ਆਫ਼ ਕੰਡਕਟ ਦੇ ਆਰਟੀਕਲ 2.5 ਦੇ ਤਹਿਤ ਲੈਵਲ 1 ਦਾ ਅਪਰਾਧ ਸਵੀਕਾਰ ਕਰ ਲਿਆ ਹੈ। ਇਹ ਨਿਯਮ ਕਿਸੇ ਦੂਜੇ ਖਿਡਾਰੀ ਵਿਰੁੱਧ ਅਪਮਾਨਜਨਕ ਭਾਸ਼ਾ, ਗ਼ਲਤ ਇਸ਼ਾਰੇ ਜਾਂ ਭੜਕਾਊ ਪ੍ਰਤੀਕਿਰਿਆ ਦੇਣ ਨਾਲ ਸਬੰਧਤ ਹੈ।
ਮੰਨਿਆ ਜਾ ਰਿਹਾ ਹੈ ਕਿ ਜਦੋਂ ਬਰਗਰ ਨੇ ਮਿਚੇਲ ਮਾਰਸ਼ ਨੂੰ ਆਊਟ ਕੀਤਾ, ਤਾਂ ਉਨ੍ਹਾਂ ਨੇ ਬੱਲੇਬਾਜ਼ ਵੱਲ ਕੋਈ ਇਤਰਾਜ਼ਯੋਗ ਇਸ਼ਾਰਾ ਕੀਤਾ ਜਾਂ ਕੁਝ ਬੋਲਿਆ ਸੀ, ਜਿਸ ਨੂੰ ਮੈਦਾਨੀ ਅੰਪਾਇਰਾਂ ਨੇ ਫੜ ਲਿਆ। ਬਰਗਰ ਨੇ ਮੈਚ ਰੈਫਰੀ ਦੁਆਰਾ ਸੁਣਾਈ ਗਈ ਸਜ਼ਾ ਨੂੰ ਸਵੀਕਾਰ ਕਰ ਲਿਆ ਹੈ, ਜਿਸ ਕਾਰਨ ਹੁਣ ਇਸ ਮਾਮਲੇ 'ਤੇ ਅੱਗੇ ਕੋਈ ਸੁਣਵਾਈ ਨਹੀਂ ਹੋਵੇਗੀ।
ਬਰਗਰ ਦਾ ਪ੍ਰਦਰਸ਼ਨ
ਭਾਵੇਂ ਬਰਗਰ ਸਜ਼ਾ ਦੇ ਘੇਰੇ ਵਿੱਚ ਆਏ ਹਨ, ਪਰ ਗੇਂਦਬਾਜ਼ੀ ਵਿੱਚ ਉਨ੍ਹਾਂ ਦਾ ਪ੍ਰਦਰਸ਼ਨ ਸ਼ਾਨਦਾਰ ਰਿਹਾ। ਉਨ੍ਹਾਂ ਨੇ ਲਖਨਊ ਸੁਪਰ ਜਾਇੰਟਸ ਵਿਰੁੱਧ 4 ਓਵਰਾਂ ਵਿੱਚ 27 ਰਨ ਦੇ ਕੇ 2 ਅਹਿਮ ਵਿਕਟਾਂ ਝਟਕਾਈਆਂ। ਉਨ੍ਹਾਂ ਨੇ ਪਹਿਲਾਂ ਕਪਤਾਨ ਰਿਸ਼ਭ ਪੰਤ ਨੂੰ ਆਊਟ ਕੀਤਾ ਅਤੇ ਫਿਰ ਖ਼ਤਰਨਾਕ ਬੱਲੇਬਾਜ਼ ਮਿਚੇਲ ਮਾਰਸ਼ ਨੂੰ ਚਲਦਾ ਕੀਤਾ। ਜ਼ਿਕਰਯੋਗ ਹੈ ਕਿ ਆਊਟ ਹੋਣ ਤੋਂ ਠੀਕ ਪਹਿਲਾਂ ਮਾਰਸ਼ ਨੇ ਬਰਗਰ ਨੂੰ ਛੱਕਾ ਜੜਿਆ ਸੀ, ਜਿਸ ਤੋਂ ਬਾਅਦ ਸ਼ਾਇਦ ਬਰਗਰ ਆਪਣੀਆਂ ਭਾਵਨਾਵਾਂ 'ਤੇ ਕਾਬੂ ਨਹੀਂ ਰੱਖ ਸਕੇ।
6,6,6,6,6,6,6,6...! ਭਾਰਤੀ ਬੱਲੇਬਾਜ਼ ਨੇ ਕਰਵਾਈ ਬੱਲੇ-ਬੱਲੇ, 11 ਗੇਂਦਾਂ 'ਚ ਠੋਕ'ਤੀ ਫ਼ਿਫਟੀ
NEXT STORY 
