ਕਾਕਾਮੀਗਾਹਾਰਾ (ਜਪਾਨ)- ਭਾਰਤ ਦੀ 'ਗੋਲ ਮਸ਼ੀਨ' ਦਿਲਪ੍ਰੀਤ ਸਿੰਘ ਦੇ ਦੋ ਗੋਲਾਂ ਦੀ ਬਦੌਲਤ ਮੌਜੂਦਾ ਚੈਂਪੀਅਨ ਭਾਰਤ ਨੇ ਵੀਰਵਾਰ ਨੂੰ ਇੱਥੇ ਪੂਲ 'ਏ' ਦੇ ਮੁਕਾਬਲੇ 'ਚ ਦੱਖਣੀ ਕੋਰੀਆ 'ਤੇ 8-2 ਦੀ ਸ਼ਾਨਦਾਰ ਜਿੱਤ ਦਰਜ ਕਰਦਿਆਂ ਏਸ਼ੀਆਈ ਖੇਡਾਂ ਦੇ ਪੁਰਸ਼ ਹਾਕੀ ਟੂਰਨਾਮੈਂਟ 'ਚ ਆਪਣਾ ਦਬਦਬਾ ਬਣਾਏ ਰੱਖਿਆ। ਟੂਰਨਾਮੈਂਟ 'ਚ ਭਾਰਤ ਦੇ ਸਭ ਤੋਂ ਵੱਧ ਗੋਲ ਕਰਨ ਵਾਲੇ ਖਿਡਾਰੀਆਂ 'ਚ ਸ਼ਾਮਲ ਦਿਲਪ੍ਰੀਤ ਨੇ ਆਪਣੇ ਖਾਤੇ 'ਚ ਦੋ ਹੋਰ ਗੋਲ ਜੋੜੇ। ਭਾਰਤ ਨੇ ਲਗਾਤਾਰ ਆਕ੍ਰਾਮਕ ਹਾਕੀ ਖੇਡਦਿਆਂ ਦੱਖਣੀ ਕੋਰੀਆ ਨੂੰ ਪਛਾੜਿਆ ਅਤੇ ਲਗਾਤਾਰ ਤੀਜੀ ਜਿੱਤ ਦਰਜ ਕੀਤੀ।
ਭਾਰਤ ਨੇ ਸ਼ੁਰੂਆਤ 'ਚ ਹੀ ਲੀਡ ਬਣਾ ਲਈ ਸੀ। ਸ਼ਿਲਾਨੰਦ ਲਾਕੜਾ ਨੇ 5ਵੇਂ ਮਿੰਟ 'ਚ ਪਹਿਲਾ ਗੋਲ ਕੀਤਾ ਅਤੇ ਫਿਰ 10ਵੇਂ ਮਿੰਟ 'ਚ ਦਿਲਪ੍ਰੀਤ ਨੇ ਲੀਡ ਨੂੰ ਦੁੱਗਣਾ ਕਰ ਦਿੱਤਾ। ਇੱਕ ਮਿੰਟ ਬਾਅਦ ਕਪਤਾਨ ਹਰਮਨਪ੍ਰੀਤ ਸਿੰਘ ਨੇ ਪੈਨਲਟੀ ਕਾਰਨਰ ਨੂੰ ਗੋਲ 'ਚ ਬਦਲ ਕੇ ਸਕੋਰ 3-0 ਕਰ ਦਿੱਤਾ, ਜਦਕਿ 13ਵੇਂ ਮਿੰਟ 'ਚ ਅਭਿਸ਼ੇਕ ਨੇ ਇੱਕ ਹੋਰ ਗੋਲ ਦਾਗ਼ਿਆ। ਇਸ ਤੋਂ ਬਾਅਦ 25ਵੇਂ ਮਿੰਟ 'ਚ ਦਿਲਪ੍ਰੀਤ ਨੇ ਮਨਦੀਪ ਸਿੰਘ ਦੇ ਰਿਵਰਸ-ਹਿੱਟ ਕਰਾਸ ਨੂੰ ਆਸਾਨੀ ਨਾਲ ਗੋਲ 'ਚ ਬਦਲ ਕੇ ਹਾਫ਼-ਟਾਈਮ ਤੱਕ ਭਾਰਤ ਨੂੰ 5-0 ਦੀ ਮਜ਼ਬੂਤ ਲੀਡ ਦਿਵਾਈ।
ਇਸ ਫਾਰਵਰਡ ਖਿਡਾਰੀ ਨੇ 32ਵੇਂ ਮਿੰਟ 'ਚ ਇੱਕ ਹੋਰ ਰਿਵਰਸ-ਸਵੀਪ ਸ਼ਾਟ ਨਾਲ ਆਪਣੇ ਦੋ ਗੋਲ ਪੂਰੇ ਕੀਤੇ। ਅਭਿਸ਼ੇਕ ਨੈਨ ਨੇ 38ਵੇਂ ਮਿੰਟ 'ਚ ਸਕੋਰ 7-0 ਕਰ ਦਿੱਤਾ, ਜਿਸ ਦੇ ਤਿੰਨ ਮਿੰਟ ਬਾਅਦ ਕਿਮ ਜੇਹੋ ਨੇ ਗੋਲ ਕਰਕੇ ਦੱਖਣੀ ਕੋਰੀਆ ਦਾ ਖਾਤਾ ਖੋਲ੍ਹਿਆ। ਕਿਮ ਯੋਂਗਬੋਕ ਨੇ 52ਵੇਂ ਮਿੰਟ 'ਚ ਗੋਲ ਦਾ ਅੰਤਰ ਘੱਟ ਕੀਤਾ, ਪਰ ਭਾਰਤ ਨੇ 57ਵੇਂ ਮਿੰਟ 'ਚ ਰਾਜਿੰਦਰ ਸਿੰਘ ਦੇ ਗੋਲ ਨਾਲ 8-2 ਨਾਲ ਜਿੱਤ ਪੱਕੀ ਕਰ ਲਈ।
ਇਸ ਜਿੱਤ ਨਾਲ ਭਾਰਤ ਦੀ ਸ਼ਾਨਦਾਰ ਸ਼ੁਰੂਆਤ ਜਾਰੀ ਰਹੀ। ਇਸ ਤੋਂ ਪਹਿਲਾਂ ਟੀਮ ਨੇ ਪੂਲ 'ਏ' ਦੇ ਆਪਣੇ ਪਹਿਲੇ ਦੋ ਮੈਚਾਂ 'ਚ ਇੰਡੋਨੇਸ਼ੀਆ ਨੂੰ 13-1 ਅਤੇ ਸ਼੍ਰੀਲੰਕਾ ਨੂੰ 16-1 ਨਾਲ ਹਰਾਇਆ ਸੀ। ਦਿਲਪ੍ਰੀਤ ਨੇ ਇੰਡੋਨੇਸ਼ੀਆ ਖ਼ਿਲਾਫ਼ ਪਹਿਲੇ ਮੈਚ 'ਚ ਹੀ ਚਾਰ ਗੋਲ ਕਰਕੇ ਆਪਣੀ ਛਾਪ ਛੱਡੀ ਸੀ। ਭਾਰਤ ਦਾ ਅਗਲਾ ਮੁਕਾਬਲਾ ਸ਼ਨੀਵਾਰ ਨੂੰ ਜਪਾਨ ਨਾਲ ਹੋਵੇਗਾ, ਜਿੱਥੇ ਟੀਮ ਏਸ਼ੀਆਈ ਖੇਡਾਂ ਦਾ ਖ਼ਿਤਾਬ ਬਚਾਉਣ ਅਤੇ 2028 ਲਾਸ ਏਂਜਲਸ ਓਲੰਪਿਕ ਲਈ ਸਿੱਧਾ ਕੁਆਲੀਫਿਕੇਸ਼ਨ ਹਾਸਲ ਕਰਨ ਦੀ ਆਪਣੀ ਮੁਹਿੰਮ ਜਾਰੀ ਰੱਖੇਗੀ।
ਜੋਸ਼ਨਾ-ਵੇਲਾਵਨ ਦੀ ਜੋੜੀ ਮਿਕਸਡ ਡਬਲਜ਼ ਸਕੁਐਸ਼ ਦੇ ਕੁਆਰਟਰ ਫਾਈਨਲ ਵਿੱਚ ਪੁੱਜੀ
NEXT STORY 
