ਨਵੀਂ ਦਿੱਲੀ : ਪਾਕਿਸਤਾਨ ਸੁਪਰ ਲੀਗ (PSL) ਨੂੰ ਇੱਕ ਵਾਰ ਫਿਰ ਵੱਡਾ ਝਟਕਾ ਲੱਗਾ ਹੈ। ਸ਼੍ਰੀਲੰਕਾ ਦੇ ਸਾਬਕਾ ਕਪਤਾਨ ਅਤੇ ਸਟਾਰ ਆਲਰਾਊਂਡਰ ਦਾਸੁਨ ਸ਼ਨਾਕਾ ਨੇ ਆਗਾਮੀ ਇੰਡੀਅਨ ਪ੍ਰੀਮੀਅਰ ਲੀਗ (IPL) ਵਿੱਚ ਖੇਡਣ ਦਾ ਫੈਸਲਾ ਕੀਤਾ ਹੈ। ਸ਼ਨਾਕਾ ਨੂੰ ਰਾਜਸਥਾਨ ਰਾਇਲਜ਼ ਨੇ ਸੱਟ ਕਾਰਨ ਬਾਹਰ ਹੋਏ ਸੈਮ ਕਰਨ ਦੀ ਜਗ੍ਹਾ ਆਪਣੀ ਟੀਮ ਵਿੱਚ ਸ਼ਾਮਲ ਕੀਤਾ ਹੈ।
ਕਾਬਲੇਗੌਰ ਹੈ ਕਿ ਇਸ ਤੋਂ ਪਹਿਲਾਂ ਜ਼ਿੰਬਾਬਵੇ ਦੇ ਤੇਜ਼ ਗੇਂਦਬਾਜ਼ ਬਲੇਸਿੰਗ ਮੁਜ਼ਰਬਾਨੀ ਨੇ ਵੀ ਇਸਲਾਮਾਬਾਦ ਯੂਨਾਈਟਿਡ ਦਾ ਸਾਥ ਛੱਡ ਕੇ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਨਾਲ ਜੁੜਨ ਦਾ ਫੈਸਲਾ ਕੀਤਾ ਸੀ।
ਗੁਹਾਟੀ ਵਿੱਚ ਟੀਮ ਨਾਲ ਜੁੜਨਗੇ ਸ਼ਨਾਕਾ
ਟੀਮ ਦੇ ਇੱਕ ਸੂਤਰ ਅਨੁਸਾਰ, ਸ਼ਨਾਕਾ ਜਲਦੀ ਹੀ ਪੀ.ਐੱਸ.ਐੱਲ. ਨਾਲ ਆਪਣੀਆਂ ਰਸਮੀ ਕਾਰਵਾਈਆਂ ਪੂਰੀਆਂ ਕਰਕੇ ਆਈ.ਪੀ.ਐੱਲ. ਦੇ ਕਰਾਰ 'ਤੇ ਦਸਤਖਤ ਕਰਨਗੇ। ਉਹ ਸਿੱਧਾ ਗੁਹਾਟੀ ਪਹੁੰਚਣਗੇ, ਜਿੱਥੇ ਰਾਜਸਥਾਨ ਰਾਇਲਜ਼ ਦਾ ਪਹਿਲਾ ਮੁਕਾਬਲਾ ਚੇਨਈ ਸੁਪਰ ਕਿੰਗਜ਼ (CSK) ਨਾਲ ਹੋਣਾ ਹੈ।
ਨੀਲਾਮੀ 'ਚ ਰਹੇ ਸਨ ਅਨਸੋਲਡ
ਦੱਸ ਦੇਈਏ ਕਿ ਦਸੰਬਰ ਵਿੱਚ ਹੋਈ ਮਿੰਨੀ ਨੀਲਾਮੀ ਵਿੱਚ ਸ਼ਨਾਕਾ ਨੂੰ ਕਿਸੇ ਵੀ ਫਰੈਂਚਾਈਜ਼ੀ ਨੇ ਨਹੀਂ ਖਰੀਦਿਆ ਸੀ, ਜਿਸ ਤੋਂ ਬਾਅਦ ਉਹ ਪੀ.ਐੱਸ.ਐੱਲ. ਵਿੱਚ ਲਾਹੌਰ ਕਲੰਦਰਜ਼ ਨਾਲ ਜੁੜ ਗਏ ਸਨ। ਸ਼ਨਾਕਾ ਦੀ ਕਪਤਾਨੀ ਵਿੱਚ ਸ਼੍ਰੀਲੰਕਾ ਦੀ ਟੀਮ ਟੀ-20 ਵਿਸ਼ਵ ਕੱਪ ਦੇ ਸੁਪਰ-8 ਪੜਾਅ ਤੋਂ ਬਾਹਰ ਹੋ ਗਈ ਸੀ।
ਰਾਜਸਥਾਨ ਰਾਇਲਜ਼ 'ਚ ਸ਼੍ਰੀਲੰਕਾਈ ਕਨੈਕਸ਼ਨ
ਰਾਜਸਥਾਨ ਰਾਇਲਜ਼ ਵਿੱਚ ਸ਼ਨਾਕਾ ਦਾ ਸਵਾਗਤ ਖਾਸ ਹੋਵੇਗਾ ਕਿਉਂਕਿ ਟੀਮ ਦੇ ਮੁੱਖ ਕੋਚ ਸ਼੍ਰੀਲੰਕਾ ਦੇ ਦਿੱਗਜ ਕੁਮਾਰ ਸੰਗਾਕਾਰਾ ਹਨ। ਇਸ ਤੋਂ ਇਲਾਵਾ ਭਾਰਤ ਦੇ ਸਾਬਕਾ ਬੱਲੇਬਾਜ਼ੀ ਕੋਚ ਵਿਕਰਮ ਰਾਠੌਰ ਵੀ ਸਹਾਇਕ ਕੋਚ ਵਜੋਂ ਟੀਮ ਦਾ ਹਿੱਸਾ ਹਨ। ਰਾਠੌਰ ਨੇ ਹਾਲ ਹੀ ਵਿੱਚ ਵਿਸ਼ਵ ਕੱਪ ਦੌਰਾਨ ਸ਼੍ਰੀਲੰਕਾਈ ਟੀਮ ਦੇ ਬੱਲੇਬਾਜ਼ੀ ਸਲਾਹਕਾਰ ਵਜੋਂ ਵੀ ਸੇਵਾਵਾਂ ਨਿਭਾਈਆਂ ਸਨ।
ਜਾਪਾਨ ਨੇ ਆਸਟ੍ਰੇਲੀਆ ਨੂੰ ਹਰਾ ਕੇ ਤੀਜੀ ਵਾਰ ਜਿੱਤਿਆ AFC ਮਹਿਲਾ ਏਸ਼ੀਆ ਕੱਪ
NEXT STORY 
