ਸਪੋਰਟਸ ਡੈਸਕ- ਟੀ-20 ਵਰਲਡ ਕੱਪ 2026 ਦੇ ਚੌਥੇ ਮੈਚ ਵਿੱਚ ਨਿਊਜ਼ੀਲੈਂਡ ਅਤੇ ਅਫ਼ਗਾਨਿਸਤਾਨ ਵਿਚਾਲੇ ਖੇਡੇ ਗਏ ਮੁਕਾਬਲੇ ਦੌਰਾਨ ਇੱਕ ਖਤਰਨਾਕ ਹਾਦਸਾ ਟਲ ਗਿਆ। ਐਤਵਾਰ 8 ਫਰਵਰੀ ਨੂੰ ਚੇਨਈ ਦੇ ਐੱਮ. ਏ. ਚਿਦੰਬਰਮ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਨਿਊਜ਼ੀਲੈਂਡ ਦੇ ਦੋ ਖਿਡਾਰੀ ਕੈਚ ਫੜਨ ਦੀ ਕੋਸ਼ਿਸ਼ ਵਿੱਚ ਆਪਸ ਵਿੱਚ ਬੁਰੀ ਤਰ੍ਹਾਂ ਟਕਰਾ ਗਏ, ਜਿਸ ਕਾਰਨ ਇੱਕ ਪਲ ਲਈ ਮੈਦਾਨ 'ਤੇ ਮੌਜੂਦ ਖਿਡਾਰੀ ਅਤੇ ਦਰਸ਼ਕ ਸਹਿਮ ਗਏ ਸਨ।
ਅਫ਼ਗਾਨਿਸਤਾਨ ਦੀ ਪਾਰੀ ਦੇ ਤੀਜੇ ਓਵਰ ਵਿੱਚ ਤੇਜ਼ ਗੇਂਦਬਾਜ਼ ਮੈਟ ਹੈਨਰੀ ਗੇਂਦਬਾਜ਼ੀ ਕਰ ਰਹੇ ਸਨ ਅਤੇ ਰਹਿਮਾਨੁੱਲ੍ਹਾ ਗੁਰਬਾਜ਼ ਸਟ੍ਰਾਈਕ 'ਤੇ ਸਨ। ਹੈਨਰੀ ਦੀ ਇੱਕ ਬਾਊਂਸਰ ਗੇਂਦ 'ਤੇ ਗੁਰਬਾਜ਼ ਨੇ ਪੁੱਲ ਸ਼ਾਟ ਲਗਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਗੇਂਦ ਬੱਲੇ ਦਾ ਉਪਰਲਾ ਕਿਨਾਰਾ ਲੈ ਕੇ ਵਿਕਟ ਦੇ ਪਿੱਛੇ ਹਵਾ ਵਿੱਚ ਉੱਚੀ ਉੱਠ ਗਈ। ਗੇਂਦ ਨੂੰ ਫੜਨ ਲਈ ਨਿਊਜ਼ੀਲੈਂਡ ਦੇ ਤਿੰਨ ਫੀਲਡਰ ਦੌੜੇ, ਜਿਨ੍ਹਾਂ ਵਿੱਚ ਵਿਕਟਕੀਪਰ ਟਿਮ ਸਾਈਫਰਟ ਵੀ ਸ਼ਾਮਲ ਸੀ।
ਕੈਚ ਫੜਨ ਦੇ ਚੱਕਰ ਵਿੱਚ ਟਿਮ ਸਾਈਫਰਟ ਅਤੇ ਫਿਨ ਐਲਨ ਦੀ ਆਪਸ ਵਿੱਚ ਜ਼ੋਰਦਾਰ ਟੱਕਰ ਹੋ ਗਈ ਅਤੇ ਦੋਵੇਂ ਤੇਜ਼ੀ ਨਾਲ ਮੈਦਾਨ 'ਤੇ ਡਿੱਗ ਪਏ। ਅਗਲੇ ਕੁਝ ਸੈਕਿੰਡਾਂ ਲਈ ਦੋਵੇਂ ਖਿਡਾਰੀ ਹਿੱਲ ਨਹੀਂ ਸਕੇ ਅਤੇ ਇੱਕ-ਦੂਜੇ ਨੂੰ ਦੇਖਦੇ ਰਹੇ, ਜਿਸ ਕਾਰਨ ਮੈਦਾਨ 'ਤੇ ਚਿੰਤਾ ਦਾ ਮਾਹੌਲ ਬਣ ਗਿਆ ਸੀ। ਹਾਲਾਂਕਿ, ਰਾਹਤ ਦੀ ਗੱਲ ਇਹ ਰਹੀ ਕਿ ਦੋਵਾਂ ਨੂੰ ਕੋਈ ਗੰਭੀਰ ਸੱਟ ਨਹੀਂ ਲੱਗੀ ਅਤੇ ਉਹ ਕੁਝ ਦੇਰ ਬਾਅਦ ਉੱਠ ਕੇ ਖੜ੍ਹੇ ਹੋ ਗਏ।
ਖਿਡਾਰੀ ਭਾਵੇਂ ਸੁਰੱਖਿਅਤ ਰਹੇ ਪਰ ਇਸ ਟੱਕਰ ਕਾਰਨ ਕੈਚ ਛੁੱਟ ਗਿਆ ਅਤੇ ਅਫ਼ਗਾਨਿਸਤਾਨ ਦੇ ਸਲਾਮੀ ਬੱਲੇਬਾਜ਼ ਰਹਿਮਾਨੁੱਲ੍ਹਾ ਗੁਰਬਾਜ਼ ਨੂੰ 7 ਦੌੜਾਂ ਦੇ ਨਿੱਜੀ ਸਕੋਰ 'ਤੇ ਜੀਵਨਦਾਨ ਮਿਲ ਗਿਆ। ਗੁਰਬਾਜ਼ ਨੇ ਇਸ ਦਾ ਫਾਇਦਾ ਉਠਾਇਆ ਅਤੇ ਆਊਟ ਹੋਣ ਤੋਂ ਪਹਿਲਾਂ ਆਪਣੇ ਸਕੋਰ ਵਿੱਚ 20 ਦੌੜਾਂ ਹੋਰ ਜੋੜ ਕੇ 27 ਦੌੜਾਂ ਬਣਾਈਆਂ। ਅੰਤ ਵਿੱਚ ਲੌਕੀ ਫਰਗੂਸਨ ਨੇ ਗੁਰਬਾਜ਼ ਨੂੰ ਆਊਟ ਕਰਕੇ ਨਿਊਜ਼ੀਲੈਂਡ ਨੂੰ ਰਾਹਤ ਦਿਵਾਈ।
ਜ਼ਿਕਰਯੋਗ ਹੈ ਕਿ ਟੀ-20 ਵਰਲਡ ਕੱਪ 2026 ਦੇ ਪਹਿਲੇ ਹੀ ਦਿਨ ਦੋ ਵੱਡੇ ਉਲਟਫੇਰ ਹੁੰਦੇ-ਹੁੰਦੇ ਰਹਿ ਗਏ ਸਨ ਅਤੇ ਹੁਣ ਦੂਜੇ ਦਿਨ ਇਸ ਹਾਦਸੇ ਨੇ ਪ੍ਰਸ਼ੰਸਕਾਂ ਦੇ ਸਾਹ ਰੋਕ ਦਿੱਤੇ ਸਨ।
T20 WC NZ vs AFG: ਅਫਗਾਨਿਸਤਾਨ ਨੇ ਛੇ ਵਿਕਟਾਂ 'ਤੇ 182 ਦੌੜਾਂ ਬਣਾਈਆਂ
NEXT STORY 
