ਲੀਡਸ– ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ (118) ਤੇ ਸਲਾਮੀ ਬੱਲੇਬਾਜ਼ ਕੇ. ਐੱਲ. ਰਾਹੁਲ (137) ਦੇ ਸੈਂਕੜਿਆਂ ਨਾਲ ਭਾਰਤ ਨੇ ਸੋਮਵਾਰ ਨੂੰ ਇੱਥੇ 5 ਮੈਚਾਂ ਦੀ ਐਂਡਰਸਨ-ਤੇਂਦੁਲਕਰ ਟਰਾਫੀ ਦੇ ਪਹਿਲੇ ਟੈਸਟ ਮੈਚ ਦੇ ਚੌਥੇ ਦਿਨ ਇੰਗਲੈਂਡ ਨੂੰ ਜਿੱਤ ਲਈ 371 ਦੌੜਾਂ ਵੱਡਾ ਟੀਚਾ ਦਿੱਤਾ, ਜਿਸ ਨੇ ਸਟੰਪ ਤੱਕ ਬਿਨਾਂ ਵਿਕਟ ਗਵਾਏ 21 ਦੌੜਾਂ ਬਣਾ ਲਈਆਂ ਸਨ।
ਭਾਰਤ ਤੀਜੇ ਸੈਸ਼ਨ ਵਿਚ ਦੂਜੀ ਪਾਰੀ ਵਿਚ 364 ਦੌੜਾਂ ’ਤੇ ਸਿਮਟ ਗਿਆ ਤੇ ਪੰਤ ਨੇ ਆਪਣੀ ਪਾਰੀ ਦੌਰਾਨ 140 ਗੇਂਦਾਂ ਦਾ ਸਾਹਮਣਾ ਕਰਦੇ ਹੋਏ 15 ਚੌਕੇ ਤੇ 3 ਛੱਕੇ ਲਾਏ। ਉੱਥੇ ਹੀ, ਰਾਹੁਲ ਨੇ ਸਵੇਰੇ 47 ਦੌੜਾਂ ਤੋਂ ਅੱਗੇ ਖੇਡਣਾ ਸ਼ੁਰੂ ਕੀਤਾ ਤੇ 62ਵੇਂ ਓਵਰ ਵਿਚ 202 ਗੇਂਦਾਂ ਵਿਚ ਆਪਣਾ ਨੌਵਾਂ ਟੈਸਟ ਸੈਂਕੜਾ ਪੂਰਾ ਕੀਤਾ। ਰਾਹੁਲ ਨੇ 247 ਗੇਂਦਾਂ ਦਾ ਸਾਹਮਣਾ ਕਰਦੇ ਹੋਏ ਆਪਣੀ ਪਾਰੀ ਵਿਚ 18 ਚੌਕੇ ਲਾਏ। ਦਿਨ ਦੀ ਖੇਡ ਖਤਮ ਹੋਣ ਤੱਕ ਬੇਨ ਡਕੇਟ 9 ਤੇ ਜੈਕ ਕਰਾਓਲੇ 12 ਦੌੜਾਂ ਬਣਾ ਕੇ ਖੇਡ ਰਹੇ ਸਨ। 5 ਟੈਸਟਾਂ ਦੀ ਲੜੀ ਵਿਚ ਬੜ੍ਹਤ ਹਾਸਲ ਕਰਨ ਲਈ ਇੰਗਲੈਂਡ ਨੂੰ ਆਖਰੀ ਦਿਨ 350 ਦੌੜਾਂ ਹੋਰ ਬਣਾਉਣੀਆਂ ਪੈਣਗੀਆਂ।
ਭਾਰਤ ਨੇ ਸਵੇਰ ਦੇ ਸੈਸ਼ਨ ਵਿਚ ਕਪਤਾਨ ਸ਼ੁਭਮਨ ਗਿੱਲ (8) ਦੇ ਰੂਪ ਵਿਚ ਇਕ ਵਿਕਟ ਗਵਾਈ। ਇਸ ਤੋਂ ਬਾਅਦ ਰਾਹੁਲ ਤੇ ਪੰਤ ਨੇ ਚੌਥੀ ਵਿਕਟ ਲਈ 195 ਦੌੜਾਂ ਦੀ ਸਾਂਝੇਦਾਰੀ ਕਰ ਕੇ ਟੀਮ ਨੂੰ ਮਜ਼ਬੂਤ ਸਕੋਰ ਤੱਕ ਪਹੁੰਚਾਇਆ। ਪਹਿਲੇ ਸੈਸ਼ਨ ਵਿਚ ਪੰਤ ਨੇ ਹਾਲਾਂਕਿ ਆਪਣੀ ਤੇਜ਼ਤਰਾਰ ਖੇਡਣ ਦੀ ਆਦਤ ’ਤੇ ਲਗਾਮ ਲਗਾਈ ਪਰ ਲੰਚ ਤੋਂ ਬਾਅਦ ਤੇਵਰ ਬਦਲ ਕੇ ਮੈਚ ਵਿਚ ਆਪਣਾ ਦੂਜਾ ਸੈਂਕੜਾ ਪੂਰਾ ਕੀਤਾ। ਉਸ ਨੇ ਪਹਿਲੀ ਪਾਰੀ ਵਿਚ 134 ਦੌੜਾਂ ਬਣਾਈਆਂ ਸਨ। ਸੈਂਕੜਾ ਲਾਉਣ ਤੋਂ ਬਾਅਦ ਵੀ ਪੰਤ ਨੇ ਇਹ ਹੀ ਹਮਲਾਵਰ ਲੈਅ ਜਾਰੀ ਰੱਖੀ। ਉਸ ਨੇ ਜੋ ਰੂਟ ਦੇ ਤੀਜੇ ਓਵਰ ਵਿਚ 19 ਦੌੜਾਂ ਜੋੜੀਆਂ ਪਰ ਸ਼ੋਏਬ ਬਸ਼ੀਰ ਦੀ ਗੇਂਦ ’ਤੇ ਲਾਂਗ ਆਨ ’ਤੇ ਜੈਕ ਕਰਾਓਲੇ ਦੇ ਹੱਥੋਂ ਕੈਚ ਆਊਟ ਹੋ ਗਿਆ। ਭਾਰਤ ਨੇ ਦੂਜੇ ਸੈਸ਼ਨ ਵਿਚ ਇਕਲੌਤੀ ਵਿਕਟ ਪੰਤ ਦੇ ਰੂਪ ਵਿਚ ਗਵਾਈ।
ਭਾਰਤ ਦਾ ਦਿਨ ਦੇ ਜ਼ਿਆਦਾਤਰ ਸਮੇਂ ਵਿਚ ਪ੍ਰਦਰਸ਼ਨ ਸ਼ਾਨਦਾਰ ਰਿਹਾ ਪਰ ਤੀਜੇ ਸੈਸ਼ਨ ਵਿਚ ਰਾਹੁਲ ਦੇ ਆਊਟ ਹੋਣ ਤੋਂ ਬਾਅਦ ਟੀਮ ਨੇ 16 ਦੌੜਾਂ ਦੇ ਅੰਦਰ 5 ਵਿਕਟਾਂ ਗਵਾ ਦਿੱਤੀਆਂ। ਇਨ੍ਹਾਂ ਵਿਚੋਂ 3 ਵਿਕਟਾਂ ਤਾਂ ਜੋਸ਼ ਟੰਗ ਦੇ ਇਕ ਓਵਰ ਵਿਚ ਡਿੱਗੀਆਂ, ਜਿਨ੍ਹਾਂ ਵਿਚ ਸ਼ਾਰਦੁਲ ਠਾਕੁਰ, ਮੁਹੰਮਦ ਸਿਰਾਜ ਤੇ ਜਸਪ੍ਰੀਤ ਬੁਮਰਾਹ ਸਾਰੇ 91ਵੇਂ ਓਵਰ ਵਿਚ ਪਹਿਲੀਆਂ 4 ਗੇਂਦਾਂ ’ਤੇ ਆਊਟ ਹੋ ਗਏ। ਕਰੁਣ ਨਾਇਰ ਨੇ 20 ਦੌੜਾਂ ਤੇ ਆਲਰਾਊਂਡਰ ਰਵਿੰਦਰ ਜਡੇਜਾ ਨੇ ਅਜੇਤੂ 25 ਦੌੜਾਂ ਬਣਾਈਆਂ। ਭਾਰਤ ਨੇ ਬੱਦਲਾਂ ਤੇ ਹਵਾਵਾਂ ਵਿਚਾਲੇ 2 ਵਿਕਟਾਂ ’ਤੇ 90 ਦੌੜਾਂ ਤੋਂ ਅੱਗੇ ਖੇਡਣਾ ਸ਼ੁਰੂ ਕੀਤਾ ਸੀ ਪਰ ਸ਼ੁਰੂਆਤ ਚੰਗੀ ਨਹੀਂ ਰਹੀ। ਪਹਿਲੀ ਪਾਰੀ ਵਿਚ ਸੈਂਕੜਾ ਲਾਉਣ ਵਾਲਾ ਸੁਭਮਨ ਗਿੱਲ 2 ਦੌੜਾਂ ਜੋੜਨ ਤੋਂ ਬਾਅਦ ਆਊਟ ਹੋ ਗਿਆ।
18 ਮਹੀਨਿਆਂ ਵਿਚ ਪਹਿਲਾ ਟੈਸਟ ਸੈਂਕੜਾ ਲਾਇਆ ਲੋਕੇਸ਼ ਰਾਹੁਲ ਨੇ। ਉਸ ਨੇ ਦਸੰਬਰ 2023 ਵਿਚ ਸੈਂਚੂਰੀਅਨ ਵਿਚ ਦੱਖਣੀ ਅਫਰੀਕਾ ਵਿਰੁੱਧ ਪਿਛਲਾ ਸੈਂਕੜਾ ਲਾਇਆ ਸੀ। ਉਸ ਨੇ 9 ਟੈਸਟ ਸੈਂਕੜਿਆਂ ਵਿਚੋਂ 8 ਪਾਰੀ ਦਾ ਆਗਾਜ਼ ਕਰਦੇ ਹੋਏ ਲਾਏ ਹਨ।
ਭਾਰਤ ਟੀਮ 364 ਦੌੜਾਂ 'ਤੇ ਆਲਆਊਟ, ਇੰਗਲੈਂਡ ਨੂੰ ਮਿਲਿਆ 371 ਦੌੜਾਂ ਦਾ ਟਾਰਗੇਟ
NEXT STORY 
