ਨਵੀਂ ਦਿੱਲੀ- ਭਾਰਤੀ ਬੈਡਮਿੰਟਨ ਸਟਾਰ ਪੀਵੀ ਸਿੰਧੂ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਉਸ ਵਿਚ ਅਜੇ ਵੀ ਬਹੁਤ ਕੁਝ ਹਾਸਲ ਕਰਨ ਦੀ ਸਮਰੱਥਾ ਹੈ ਅਤੇ ਉਸ 'ਚ BWF ਸਰਕਟ ਵਿੱਚ ਬਹੁਤ ਸਾਰੇ ਖ਼ਿਤਾਬ ਜਿੱਤਣ ਦੀ ਸਮਰੱਥਾ ਹੈ ਪਰ ਉਸ ਦੀਆਂ ਨਜ਼ਰਾਂ 2028 ਲਾਸ ਏਂਜਲਸ ਓਲੰਪਿਕ ਖੇਡਾਂ 'ਤੇ ਹੋਣਗੀਆਂ। ਅਮਰੀਕਾ ਵਿੱਚ ਹੋਣ ਵਾਲੇ ਓਲੰਪਿਕ ਦੇ ਸਮੇਂ ਤੱਕ ਉਹ 33 ਸਾਲ ਦੀ ਹੋ ਜਾਵੇਗੀ। ਹਾਲਾਂਕਿ, ਦੋ ਵਾਰ ਦੀ ਓਲੰਪਿਕ ਤਮਗਾ ਜੇਤੂ ਨੇ ਕਿਹਾ ਕਿ ਜੇਕਰ ਉਹ ਸੱਟ ਤੋਂ ਮੁਕਤ ਅਤੇ ਸਰੀਰਕ ਤੌਰ 'ਤੇ ਫਿੱਟ ਰਹਿੰਦੀ ਹੈ ਤਾਂ ਉਹ ਆਪਣਾ ਤੀਜਾ ਓਲੰਪਿਕ ਤਮਗਾ ਜਿੱਤਣ ਦਾ ਟੀਚਾ ਰੱਖੇਗੀ।
ਸਾਬਕਾ ਵਿਸ਼ਵ ਚੈਂਪੀਅਨ ਸਿੰਧੂ ਨੇ 2016 ਰੀਓ ਓਲੰਪਿਕ ਵਿੱਚ ਚਾਂਦੀ ਅਤੇ 2020 ਟੋਕੀਓ ਓਲੰਪਿਕ ਵਿੱਚ ਕਾਂਸੀ ਦਾ ਤਗਮਾ ਜਿੱਤਿਆ ਸੀ। ਉਹ ਪ੍ਰੀ-ਕੁਆਰਟਰ ਫਾਈਨਲ ਵਿੱਚ ਹਾਰਨ ਤੋਂ ਬਾਅਦ ਪੈਰਿਸ ਓਲੰਪਿਕ ਤੋਂ ਖਾਲੀ ਹੱਥ ਪਰਤੀ ਸੀ। ਹੈਦਰਾਬਾਦ ਦੀ ਰਹਿਣ ਵਾਲੀ 29 ਸਾਲਾ ਸਿੰਧੂ ਨੇ ਪੀਟੀਆਈ ਨੂੰ ਕਿਹਾ, ''ਜੇਕਰ ਮੈਂ ਫਿੱਟ ਹਾਂ, ਜੇਕਰ ਮੈਂ ਇਹ ਕਰਨ ਦੇ ਯੋਗ ਹਾਂ, ਜੇਕਰ ਮੈਂ ਸੱਟ ਤੋਂ ਮੁਕਤ ਹਾਂ, ਤਾਂ ਯਕੀਨੀ ਤੌਰ 'ਤੇ ਮੈਂ ਲਾਸ ਏਂਜਲਸ ਓਲੰਪਿਕ 'ਚ ਹਿੱਸਾ ਲਵਾਂਗੀ। ਇਹ ਮੈਂ ਤੁਹਾਨੂੰ ਦੱਸ ਸਕਦੀ ਹਾਂ। ਸਿੰਧੂ ਨੇ ਮਹਾਨ ਖਿਡਾਰੀ ਪ੍ਰਕਾਸ਼ ਪਾਦੁਕੋਣ ਦੀ ਅਗਵਾਈ ਵਿੱਚ ਵੱਡੀਆਂ ਉਮੀਦਾਂ ਨਾਲ ਪੈਰਿਸ ਖੇਡਾਂ ਵਿੱਚ ਪ੍ਰਵੇਸ਼ ਕੀਤਾ ਸੀ ਪਰ ਉਹ ਰਾਊਂਡ ਆਫ 16 ਵਿੱਚ ਚੀਨ ਦੀ ਹੀ ਬਿੰਗ ਜੀਓ ਤੋਂ ਹਾਰ ਕੇ ਬਾਹਰ ਹੋ ਗਈ ਸੀ।
ਸਿੰਧੂ ਨੇ ਕਿਹਾ, ''ਇਹ ਕਈ ਵਾਰ ਹੁੰਦਾ ਹੈ। ਮੇਰੇ ਦੋ ਓਲੰਪਿਕ ਸ਼ਾਨਦਾਰ ਸਨ ਅਤੇ ਤੀਜੇ ਵਿੱਚ ਮੈਂ ਤਮਗਾ ਨਹੀਂ ਜਿੱਤ ਸਕੀ। ਪਰ ਮੈਨੂੰ ਲੱਗਦਾ ਹੈ ਕਿ ਮੈਂ ਚੰਗਾ ਖੇਡਿਆ। ਮੈਂ ਆਪਣੀਆਂ ਗਲਤੀਆਂ ਤੋਂ ਸਿੱਖਦੀ ਹਾਂ ਅਤੇ ਮਜ਼ਬੂਤੀ ਨਾਲ ਵਾਪਸ ਆਉਂਦੀ ਹਾਂ। ਗੱਲ ਇੱਥੇ ਹੀ ਖਤਮ ਨਹੀਂ ਹੁੰਦੀ। ਮੈਂ ਇੱਕ ਵਾਰ ਵਿੱਚ ਇੱਕ ਸਾਲ ਬਾਰੇ ਸੋਚ ਰਹੀ ਹਾਂ ਅਤੇ ਹੁਣ ਅਗਲੀ ਓਲੰਪਿਕ ਚਾਰ ਸਾਲ ਬਾਅਦ ਫਿਰ ਤੋਂ ਹੈ।''
ਉਸ ਨੇ ਕਿਹਾ,''ਇਸ ਲਈ ਮੇਰਾ ਮੁੱਖ ਟੀਚਾ ਫਿੱਟ ਰਹਿਣਾ, ਪ੍ਰੇਰਿਤ ਰਹਿਣਾ ਅਤੇ ਸੱਟ ਤੋਂ ਮੁਕਤ ਰਹਿਣਾ ਹੈ। ਅਤੇ ਜੋ ਵੀ ਮੈਂ ਕਰਦੀ ਹਾਂ, ਮੈਨੂੰ ਇਸਦਾ ਆਨੰਦ ਲੈਣਾ ਪੈਂਦਾ ਹੈ। ਪੈਰਿਸ ਓਲੰਪਿਕ ਤੋਂ ਛੇਤੀ ਬਾਹਰ ਹੋਣ ਬਾਰੇ ਗੱਲ ਕਰਦਿਆਂ ਸਿੰਧੂ ਨੇ ਕਿਹਾ ਕਿ ਉਸ ਨੂੰ ਕੋਈ ਪਛਤਾਵਾ ਨਹੀਂ ਹੈ ਕਿਉਂਕਿ, “ਇਹ ਦੁਨੀਆ ਦਾ ਅੰਤ ਨਹੀਂ ਹੈ। ਮੈਨੂੰ ਕੋਈ ਪਛਤਾਵਾ ਨਹੀਂ ਹੈ, ਇਹ ਮੇਰੇ ਲਈ ਖਤਮ ਨਹੀਂ ਹੋਇਆ ਹੈ। ਮੈਂ ਯਕੀਨੀ ਤੌਰ 'ਤੇ ਹੋਰ ਖੇਡਣਾ ਚਾਹਾਂਗੀ ਅਤੇ ਕਿਉਂ ਨਹੀਂ?
ਪਟਨਾ ਪਾਈਰੇਟਸ ਨੇ ਪੀਕੇਐਲ ਵਿੱਚ ਜੈਪੁਰ ਪਿੰਕ ਪੈਂਥਰਜ਼ ਨੂੰ ਹਰਾਇਆ
NEXT STORY 
