ਨਵੀਂ ਦਿੱਲੀ— ਬੰਗਲਾਦੇਸ਼ ਦੇ ਤੇਜ਼ ਗੇਂਦਬਾਜ਼ ਤਸਕੀਨ ਅਹਿਮਦ ਨੇ ਕਿਹਾ ਕਿ ਭਾਰਤੀ ਖਿਡਾਰੀ ਦੁਨੀਆ ਦੇ ਸਰਵਸ੍ਰੇਸ਼ਠ ਹਨ ਅਤੇ ਕਿਸੇ ਵੀ ਸਥਿਤੀ 'ਚ ਚੰਗੀ ਬੱਲੇਬਾਜ਼ੀ ਕਰ ਸਕਦੇ ਹਨ। ਉਸ ਨੇ ਇਹ ਵੀ ਮੰਨਿਆ ਕਿ ਟੀ-20 ਸੀਰੀਜ਼ 'ਚ ਬੱਲੇਬਾਜ਼ੀ ਦੀਆਂ ਕਮਜ਼ੋਰੀਆਂ ਨੇ ਮਹਿਮਾਨ ਟੀਮ ਨੂੰ ਨਿਰਾਸ਼ ਕੀਤਾ ਹੈ। ਭਾਰਤ ਨੇ ਇੱਕ ਮੈਚ ਬਾਕੀ ਰਹਿ ਕੇ 2-0 ਦੀ ਬੜ੍ਹਤ ਬਣਾ ਲਈ ਹੈ।
ਬੰਗਲਾਦੇਸ਼ ਨੂੰ ਦੂਜਾ ਟੀ-20 ਮੈਚ 86 ਦੌੜਾਂ ਨਾਲ ਹਾਰਨ ਤੋਂ ਬਾਅਦ ਸੀਰੀਜ਼ 'ਚ ਵ੍ਹਾਈਟ ਵਾਸ਼ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਉਹ ਪਹਿਲਾ ਮੈਚ 7 ਵਿਕਟਾਂ ਨਾਲ ਹਾਰ ਗਿਆ ਸੀ। ਤਸਕੀਨ ਨੇ ਬੁੱਧਵਾਰ ਨੂੰ ਮੀਡੀਆ ਨੂੰ ਕਿਹਾ, “ਇਸ ਵਿੱਚ ਕੋਈ ਸ਼ੱਕ ਨਹੀਂ ਹੈ ਕਿ ਉਹ ਸਿਰਫ਼ ਆਪਣੇ (ਘਰ) ਹਾਲਾਤ ਵਿੱਚ ਹੀ ਨਹੀਂ ਬਲਕਿ ਪੂਰੀ ਦੁਨੀਆ ਵਿੱਚ ਸਭ ਤੋਂ ਵਧੀਆ ਹਨ। ਉਹ ਸਾਡੇ ਨਾਲੋਂ ਜ਼ਿਆਦਾ ਤਜ਼ਰਬੇਕਾਰ ਅਤੇ ਬਿਹਤਰ ਖਿਡਾਰੀ ਹਨ।
ਤਸਕੀਨ, ਤਨਜ਼ੀਮ ਹਸਨ ਸਾਕਿਬ ਅਤੇ ਮੁਸਤਫਿਜ਼ੁਰ ਰਹਿਮਾਨ ਦੀ ਤੇਜ਼ ਗੇਂਦਬਾਜ਼ੀ ਤਿਕੜੀ ਨੇ ਪਾਵਰਪਲੇ ਦੇ ਅੰਦਰ ਭਾਰਤੀ ਸਿਖਰਲੇ ਕ੍ਰਮ ਚਕਮਾ ਦੇ ਕੇਬੰਗਲਾਦੇਸ਼ ਨੂੰ ਮਜ਼ਬੂਤ ਸਥਿਤੀ ਵਿੱਚ ਪਹੁੰਚਾਇਆ। ਹਾਲਾਂਕਿ, ਸਪਿਨਰ ਉਸ ਬੜ੍ਹਤ ਨੂੰ ਬਰਕਰਾਰ ਨਹੀਂ ਰੱਖ ਸਕੇ ਜਿਸ ਕਾਰਨ ਨਿਤੀਸ਼ ਕੁਮਾਰ ਰੈੱਡੀ ਅਤੇ ਰਿੰਕੂ ਸਿੰਘ ਦੀ ਜੋੜੀ ਨੇ ਮੇਜ਼ਬਾਨ ਟੀਮ ਨੂੰ 221/9 ਦੇ ਮਜ਼ਬੂਤ ਸਕੋਰ ਤੱਕ ਪਹੁੰਚਾਇਆ। ਤਸਕਿਨ ਨੇ ਕਿਹਾ, 'ਅਸੀਂ ਪਾਵਰਪਲੇ 'ਚ ਚੰਗਾ ਪ੍ਰਦਰਸ਼ਨ ਕੀਤਾ, ਪਰ ਅੰਤ 'ਚ ਉਨ੍ਹਾਂ ਨੇ ਚੰਗੀ ਬੱਲੇਬਾਜ਼ੀ ਕੀਤੀ ਅਤੇ ਬਦਕਿਸਮਤੀ ਨਾਲ ਸਪਿਨਰਾਂ ਦਾ ਦਿਨ ਬੁਰਾ ਰਿਹਾ। ਆਮ ਤੌਰ 'ਤੇ ਸਾਡੇ ਕੋਲ ਅਜਿਹੇ ਬੁਰੇ ਦਿਨ ਨਹੀਂ ਹੁੰਦੇ ਹਨ ਪਰ ਟੀ-20 'ਚ ਕਿਸੇ ਵੀ ਦਿਨ ਕੁਝ ਵੀ ਹੋ ਸਕਦਾ ਹੈ।
ਉਸ ਨੇ ਕਿਹਾ, 'ਸਪਿਨਰ ਗੇਂਦ ਨਾਲ ਚੰਗਾ ਪ੍ਰਦਰਸ਼ਨ ਨਹੀਂ ਕਰ ਸਕੇ ਕਿਉਂਕਿ ਉੱਥੇ ਤ੍ਰੇਲ ਸੀ। ਅਸੀਂ 11ਵੇਂ ਜਾਂ 12ਵੇਂ ਓਵਰ ਤੱਕ ਖੇਡ ਵਿੱਚ ਸੀ ਅਤੇ ਇਸ ਵਿਕਟ 'ਤੇ ਜੇਕਰ ਅਸੀਂ ਉਨ੍ਹਾਂ ਨੂੰ 180 ਦੌੜਾਂ ਤੋਂ ਘੱਟ ਤੱਕ ਰੋਕ ਦਿੰਦੇ ਤਾਂ ਇਹ ਟੀਚਾ ਹਾਸਲ ਕੀਤਾ ਜਾ ਸਕਦਾ ਸੀ। ਜਵਾਬ ਵਿੱਚ, ਬੰਗਲਾਦੇਸ਼ ਨੇ ਆਪਣੇ 20 ਓਵਰਾਂ ਵਿੱਚ ਸਿਰਫ 135/9 ਦਾ ਸਕੋਰ ਬਣਾਇਆ, ਜੇਕਰ ਤਜਰਬੇਕਾਰ ਮਹਿਮੂਦੁੱਲਾ ਨੇ 39 ਗੇਂਦਾਂ ਵਿੱਚ 41 ਦੌੜਾਂ ਦਾ ਯੋਗਦਾਨ ਨਾ ਪਾਇਆ ਹੁੰਦਾ ਤਾਂ ਸਕੋਰ ਹੋਰ ਵੀ ਘੱਟ ਹੁੰਦਾ।
ਕੋਚ ਅਤੇ ਕਪਤਾਨ ਨੇ ਨਿਡਰ ਹੋ ਕੇ ਖੇਡਣ ਦਾ ਦਿੱਤਾ ਲਾਇਸੈਂਸ : ਨਿਤੀਸ਼ ਰੈੱਡੀ
NEXT STORY 
