ਬਲੋਮਫੋਂਟੇਨ, (ਭਾਸ਼ਾ)–ਮੁਸ਼ੀਰ ਖਾਨ ਦੇ ਦੂਜੇ ਸੈਂਕੜੇ ਤੋਂ ਬਾਅਦ ਸਵਾਮੀ ਪਾਂਡੇ ਦੀ ਅਗਵਾਈ ਵਿਚ ਗੇਂਦਬਾਜ਼ਾਂ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਭਾਰਤ ਨੇ ਆਈ. ਸੀ. ਸੀ. ਅੰਡਰ-19 ਵਿਸ਼ਵ ਕੱਪ ਦੇ ਸੁਪਰ ਸਿਕਸ ਗੇੜ ਦੇ ਮੁਕਾਬਲੇ ਵਿਚ ਮੰਗਲਵਾਰ ਨੂੰ ਇੱਥੇ ਨਿਊਜ਼ੀਲੈਂਡ ਨੂੰ 214 ਦੌੜਾਂ ਨਾਲ ਹਰਾ ਦਿੱਤਾ। ਭਾਰਤ ਨੇ ਮੁਸ਼ੀਰ ਦੀਆਂ 131 ਤੇ ਸਲਾਮੀ ਬੱਲੇਬਾਜ਼ ਆਦਰਸ਼ ਸਿੰਘ ਦੀਆਂ 52 ਦੌੜਾਂ ਦੀ ਬਦੌਲਤ 8 ਵਿਕਟਾਂ ’ਤੇ 295 ਦੌੜਾਂ ਦਾ ਮਜ਼ਬੂਤ ਸਕੋਰ ਖੜ੍ਹਾ ਕੀਤਾ।
ਨਿਊਜ਼ੀਲੈਂਡ ਦੀ ਟੀਮ ਇਸ ਦੇ ਜਵਾਬ ਵਿਚ ਖੱਬੇ ਹੱਥ ਦੇ ਸਪਿਨਰਾਂ ਪਾਂਡੇ (19 ਦੌੜਾਂ ’ਤੇ 4 ਵਿਕਟਾਂ) ਤੇ ਮੁਸ਼ੀਰ (10 ਦੌੜਾਂ ’ਤੇ 2 ਵਿਕਟਾਂ) ਤੋਂ ਇਲਾਵਾ ਤੇਜ਼ ਗੇਂਦਬਾਜ਼ ਰਾਜ ਲਿੰਬਾਨੀ (17 ਦੌੜਾਂ ’ਤੇ 2 ਵਿਕਟਾਂ) ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੇ ਸਾਹਮਣੇ 28.1 ਓਵਰਾਂ ਵਿਚ ਸਿਰਫ 81 ਦੌੜਾਂ ’ਤੇ ਹੀ ਸਿਮਟ ਗਈ। ਲਿੰਬਾਨੀ ਨੇ ਨਿਊਜ਼ੀਲੈਂਡ ਦੀ ਪਾਰੀ ਦੀ ਪਹਿਲੀ ਤੇ ਪੰਜਵੀਂ ਗੇਂਦ ’ਤੇ ਕ੍ਰਮਵਾਰ ਟਾਮ ਜੋਨਸ (00) ਤੇ ਸਨੇਹਿਤ ਰੈੱਡੀ (00) ਨੂੰ ਆਊਟ ਕੀਤਾ, ਜਿਸ ਤੋਂ ਬਾਅਦ ਪਾਂਡੇ ਨੇ ਲੈਕਲੇਨ ਸਟੈਕਪੋਲ (5) ਤੇ ਜੇਮਸ ਨੈਲਸਨ (10) ਨੂੰ ਪੈਵੇਲੀਅਨ ਭੇਜ ਕੇ ਨਿਊਜ਼ੀਲੈਂਡ ਦਾ ਸਕੋਰ 22 ਦੌੜਾਂ ’ਤੇ 4 ਵਿਕਟਾਂ ਕੀਤਾ ਅਤੇ ਟੀਮ ਕਦੇ ਵੀ ਇਨ੍ਹਾਂ ਝਟਕਿਆਂ ਤੋਂ ਉੱਭਰ ਨਹੀਂ ਸਕੀ। ਕਪਤਾਨ ਆਸਕਰ ਜੈਕਸਨ 19 ਦੌੜਾਂ ਬਣਾ ਕੇ ਟੀਮ ਦਾ ਟਾਪ ਸਕੋਰਰ ਰਿਹਾ। ਭਾਰਤ ਇਕ ਵਾਰ ਫਿਰ ਇਸ ਟੂਰਨਾਮੈਂਟ ਵਿਚ ਖਿਤਾਬ ਦਾ ਪ੍ਰਮੁੱਖ ਦਾਅਵੇਦਾਰ ਨਜ਼ਰ ਆ ਰਿਹਾ ਹੈ। ਦੌੜਾਂ ਦੇ ਲਿਹਾਜ਼ ਨਾਲ ਇਹ ਨਿਊਜ਼ੀਲੈਂਡ ਦੀ ਤੀਜੀ ਸਭ ਤੋਂ ਵੱਡੀ ਹਾਰ ਤੇ ਤੀਜਾ ਸਭ ਤੋਂ ਘੱਟ ਸਕੋਰ ਹੈ।
ਇਹ ਵੀ ਪੜ੍ਹੋ : ਰਾਹੁਲ ਤੇ ਜਡੇਜਾ ਦੀਆਂ ਸੱਟਾਂ ਨੇ ਚੋਣਕਾਰਾਂ ਦੀਆਂ ਮੁਸ਼ਕਿਲਾਂ ਵਧਾਈਆਂ
ਇਸ ਤੋਂ ਪਹਿਲਾਂ ਮੇਨਗਾਂਗ ਓਵਲ ਦੀ ਬੱਲੇਬਾਜ਼ੀ ਦੀ ਅਨੁਕੂਲ ਪਿੱਚ ’ਤੇ ਮੁਸ਼ੀਰ ਨੇ ਨਿਊਜ਼ੀਲੈਂਡ ਦੇ ਗੇਂਦਬਾਜ਼ੀ ਹਮਲੇ ਦੀਆਂ ਧੱਜੀਆਂ ਉਡਾਈਆਂ ਤੇ ਮੌਜੂਦਾ ਪ੍ਰਤੀਯੋਗਿਤਾ ਵਿਚ 300 ਦੌੜਾਂ ਦੇ ਅੰਕੜੇ ਨੂੰ ਪਾਰ ਕਰਨ ਵਾਲਾ ਪਹਿਲਾ ਬੱਲੇਬਾਜ਼ ਬਣਿਆ। ਮੁਸ਼ੀਰ ਨੇ 126 ਗੇਂਦਾਂ ਵਿਚ 13 ਚੌਕਿਆਂ ਤੇ 3 ਛੱਕਿਆਂ ਦੀ ਮਦਦ ਨਾਲ 131 ਦੌੜਾਂ ਦੀ ਪਾਰੀ ਖੇਡੀ। ਮੁਸ਼ੀਰ ਨੇ ਵਿਕਟ ਦੇ ਚਾਰੇ ਪਾਸੇ ਸ਼ਾਟਾਂ ਲਾਈਆਂ ਤੇ ਦੌੜ ਕੇ ਵੀ ਢੇਰ ਸਾਰੀਆਂ ਦੌੜਾਂ ਬਣਾਈਆਂ। ਉਹ ਆਖਰੀ ਓਵਰਾਂ ਵਿਚ ਤਾਬੜਤੋੜ ਬੱਲੇਬਾਜ਼ੀ ਕਰਨ ਵਿਚ ਵੀ ਸਫਲ ਰਿਹਾ। ਭਾਰਤ ਦੀ ਸ਼ੁਰੂਆਤ ਹਾਲਾਂਕਿ ਚੰਗੀ ਨਹੀਂ ਰਹੀ।
ਪਿਛਲੇ ਮੈਚ ਵਿਚ ਸੈਂਕੜਾ ਲਾਉਣ ਵਾਲੇ ਅਰਸ਼ਿਨ ਕੁਲਕਰਨੀ (9) ਦੀ ਵਿਕਟ ਟੀਮ ਨੇ ਜਲਦੀ ਗੁਆ ਿਦੱਤੀ। ਮੁਸ਼ੀਰ ਤੇ ਆਦਰਸ਼ ਨੇ ਇਸ ਤੋਂ ਬਾਅਦ ਦੂਜੀ ਵਿਕਟ ਲਈ 77 ਦੌੜਾਂ ਜੋੜ ਕੇ ਪਾਰੀ ਨੂੰ ਸੰਭਾਲਿਆ। ਆਦਰਸ਼ ਸ਼ੁਰੂਆਤ ਤੋਂ ਹੀ ਚੰਗੀ ਲੈਅ ਵਿਚ ਨਜ਼ਰ ਆਇਆ। ਉਹ ਹਾਲਾਂਕਿ 18ਵੇਂ ਓਵਰ ਵਿਚ ਜੈਕ ਕਮਿੰਗ (37 ਦੌੜਾਂ ’ਤੇ 1 ਵਿਕਟ) ਦੀ ਆਫ ਸਾਈਡ ਤੋਂ ਬਾਹਰ ਦੀ ਗੇਂਦ ਨੂੰ ਡ੍ਰਾਈਵ ਕਰਨ ਦੀ ਕੋਸ਼ਿਸ਼ ਵਿਚ ਓਲੀਵਰ ਤੇਵਤੀਆ ਨੂੰ ਕੈਚ ਦੇ ਬੈਠਾ। ਖੱਬੇ ਹੱਥ ਦੇ ਇਸ ਸਲਾਮੀ ਬੱਲੇਬਾਜ਼ ਨੇ 58 ਗੇਂਦਾਂ ਦਾ ਸਾਹਮਣਾ ਕਰਦੇ ਹੋਏ 6 ਚੌਕੇ ਲਾਏ। ਭਾਰਤੀ ਕਪਤਾਨ ਉਦੈ ਸਹਾਰਨ (57 ਗੇਂਦਾਂ ’ਚ 35 ਦੌੜਾਂ, 2 ਚੌਕੇ) ਚੰਗੀ ਸ਼ੁਰੂਆਤ ਦਾ ਫਾਇਦਾ ਚੁੱਕਣ ਵਿਚ ਅਸਫਲ ਰਿਹਾ। ਉਸਨੇ ਇਸ ਮੈਚ ਤੋਂ ਪਹਿਲਾਂ ਲਗਾਤਾਰ ਤਿੰਨ ਅਰਧ ਸੈਂਕੜੇ ਲਾਏ ਸਨ। ਸਹਾਰਨ ਨੇ ਹਾਲਾਂਕਿ ਮੁਸ਼ੀਰ ਦੇ ਨਾਲ ਤੀਜੀ ਵਿਕਟ ਲਈ 87 ਦੌੜਾਂ ਜੋੜ ਕੇ ਭਾਰਤ ਦੇ ਵੱਡੇ ਸਕੋਰ ਦਾ ਮੰਚ ਤਿਆਰ ਕੀਤਾ। ਭਾਰਤ ਨੇ ਹਾਲਾਂਕਿ ਆਖਰੀ ਓਵਰਾਂ ਵਿਚ ਲਗਾਤਾਰ ਫਰਕ ’ਤੇ ਵਿਕਟਾਂ ਗੁਆਈਆਂ ਤੇ ਟੀਮ 300 ਦੌੜਾਂ ਦੇ ਅੰਕੜੇ ਨੂੰ ਪਾਰ ਕਰਨ ਵਿਚ ਅਸਫਲ ਰਹੀ। ਮੁਸ਼ੀਰ ਸੈਂਕੜਾ ਪੂਰਾ ਕਰਨ ਤੋਂ ਬਾਅਦ 48ਵੇਂ ਓਵਰ ਵਿਚ ਮੇਸਨ ਕਲਾਰਕ ਦਾ ਸ਼ਿਕਾਰ ਬਣਿਆ। ਕਲਾਰਕ ਨੇ 64 ਦੌੜਾਂ ਦੇ ਕੇ 4 ਵਿਕਟਾਂ ਲਈਆਂ।
ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ-ਇਸ ਖ਼ਬਰ ਸਬੰਧੀ ਆਪਣੀ ਰਾਏ ਕੁਮੈਂਟ ਕਰਕੇ ਦਿਓ।
'ਤੁਹਾਨੂੰ ਆਪਣੇ ਦਿਲ ਦੀ ਸੁਣਨੀ ਚਾਹੀਦੀ ਹੈ', ਸਾਨੀਆ ਨਾਲ ਵੱਖ ਹੋਣ 'ਤੇ ਸ਼ੋਏਬ ਮਲਿਕ ਨੇ ਤੋੜੀ ਚੁੱਪੀ
NEXT STORY 
