ਲੰਡਨ- ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਐਤਵਾਰ ਨੂੰ ਇੱਥੇ ਐੱਫ. ਆਈ. ਐੱਚ. ਪ੍ਰੋ ਲੀਗ ਮੈਚ ਵਿਚ ਆਸਟ੍ਰੇਲੀਆ ਨੂੰ ਸਖਤ ਟੱਕਰ ਦਿੱਤੀ ਪਰ ਆਖਰੀ ਮਿੰਟ ਵਿਚ ਗੋਲ ਖਾ ਕੇ 1-2 ਨਾਲ ਹਾਰ ਗਈ। ਇਹ ਆਸਟ੍ਰੇਲੀਆ ਵਿਰੁੱਧ ਭਾਰਤ ਦੀ ਲਗਾਤਾਰ ਦੂਜੀ ਹਾਰ ਹੈ। ਟੀਮ ਨੂੰ ਇਸ ਤੋਂ ਪਹਿਲਾਂ ਸ਼ੁੱਕਰਵਾਰ ਨੂੰ 2-3 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।
ਵੈਸ਼ਣਵੀ ਫਾਲਕੇ ਦੇ ਮੈਦਾਨੀ ਗੋਲ ਦੀ ਮਦਦ ਨਾਲ ਭਾਰਤੀ ਟੀਮ ਨੇ ਮੈਚ ਦੇ ਤੀਜੇ ਮਿੰਟ ਵਿਚ ਹੀ ਬੜ੍ਹਤ ਕਾਇਮ ਕਰ ਲਈ ਸੀ। ਆਸਟ੍ਰੇਲੀਆ ਨੇ ਮੈਚ ਦੇ 37ਵੇਂ ਮਿੰਟ ਵਿਚ ਐਮੀ ਲਾਟਨ ਦੇ ਗੋਲ ਨਾਲ ਸਕੋਰ ਬਰਾਬਰ ਕਰ ਲਿਆ। ਮੈਚ ਨਿਯਮਤ ਸਮੇਂ ਵਿਚ ਬਰਾਬਰੀ ਵੱਲ ਵੱਧ ਰਿਹਾ ਸੀ ਪਰ 60ਵੇਂ ਮਿੰਟ ਵਿਚ ਲੈਕਸੀ ਪਿਕਰਿੰਗ ਨੇ ਪੈਨਲਟੀ ਕਾਰਨਰ ਨੂੰ ਗੋਲ ਵਿਚ ਬਦਲ ਕੇ ਭਾਰਤੀ ਖੇਮੇ ਨੂੰ ਨਿਰਾਸ਼ ਕਰ ਦਿੱਤਾ।
ਭਾਰਤੀ ਟੀਮ ਨੇ ਮੈਚ ਦੇ ਸ਼ੁਰੂਆਤੀ ਮਿੰਟ ਵਿਚ ਹੀ ਆਸਟ੍ਰੇਲੀਆ ਦੀ ਡਿਫੈਂਡਿੰਗ ਲਾਈਨ ’ਤੇ ਦਬਾਅ ਬਣਾਉਂਦੇ ਹੋਏ ਲਗਾਤਾਰ ਤਿੰਨ ਪੈਨਲਟੀ ਕਾਰਨਰ ਹਾਸਲ ਕੀਤੇ। ਟੀਮ ਨੇ ਇਸ ਦਬਾਅ ਨੂੰ ਜਾਰੀ ਰੱਖਦੇ ਹੋਏ ਤੀਜੇ ਮਿੰਟ ਵਿਚ ਬੜ੍ਹਤ ਕਾਇਮ ਕਰ ਲਈ। ਨਵਨੀਤ ਕੌਰ ਨੇ ਆਸਟ੍ਰੇਲੀਆਈ ਖਿਡਾਰਨਾਂ ਨੂੰ ਝਕਾਨੀ ਦਿੰਦੇ ਹੋਏ ਗੇਂਦ ਨੂੰ ਸ਼ਰਮੀਲਾ ਦੇਵੀ ਵੱਲ ਵਧਾਇਆ। ਸ਼ਰਮੀਲਾ ਨੇ ਉਸ ਨੂੰ ਵੈਸ਼ਣਵੀ ਵੱਲ ਖੇਡ ਦਿੱਤਾ, ਜਿਸ ਨੇ ਉਸ ਨੂੰ ਗੋਲ ਪੋਸਟ ਦੀ ਦਿਸ਼ਾ ਵਿਚ ਮੋੜ ਕੇ ਟੀਮ ਦਾ ਖਾਤਾ ਖੋਲ੍ਹ ਦਿੱਤਾ। ਨਵਨੀਤ ਕੋਲ ਇਸ ਬੜ੍ਹਤ ਨੂੰ ਦੁੱਗਣਾ ਕਰਨ ਦਾ ਮੌਕਾ ਸੀ ਪਰ ਉਹ ਟੀਚੇ ਤੋਂ ਖੁੰਝ ਗਈ।
ਆਸਟ੍ਰੇਲੀਆ ਨੂੰ ਵੀ ਸ਼ੁਰੂਆਤੀ ਕੁਆਰਟਰ ਵਿਚ ਦੋ ਪੈਨਲਟੀ ਕਾਰਨਰ ਮਿਲੇ ਪਰ ਟੀਮ ਉਸ ਨੂੰ ਗੋਲ ਵਿਚ ਨਹੀਂ ਬਦਲ ਸਕੀ। ਮੈਚ ਦੇ ਦੂਜੇ ਕੁਆਰਟਰ 'ਚ ਦੋਵਾਂ ਟੀਮਾਂ ਵਿਚਾਲੇ ਨੇੜਲਾ ਮੁਕਾਬਲਾ ਦੇਖਣ ਨੂੰ ਮਿਲਿਆ ਪਰ ਕਿਸੇ ਨੂੰ ਵੀ ਗੋਲ ਕਰਨ 'ਚ ਸਫਲਤਾ ਨਹੀਂ ਮਿਲੀ।
ਹਾਫ ਤੋਂ ਬਾਅਦ ਆਸਟ੍ਰੇਲੀਆ ਖੇਡ ਦੀ ਗਤੀ ਨੂੰ ਵਧਾਉਣ ਦੀ ਆਪਣੀ ਕੋਸ਼ਿਸ਼ ਵਿਚ ਸਫਲ ਰਿਹਾ। ਲਾਟਨ ਨੇ 37ਵੇਂ ਮਿੰਟ ਵਿਚ ਸ਼ਾਨਦਾਰ ਮੈਦਾਨੀ ਗੋਲ ਨਾਲ ਸਕੋਰ ਨੂੰ ਬਰਾਬਰ ਕਰ ਦਿੱਤਾ। ਉਸ ਨੇ ਭਾਰਤੀ ਡਿਫੈਂਡਰਾਂ ਤੋਂ ਗੇਂਦ ਲੈ ਕੇ ਸ਼ਾਨਦਾਰ ਕੰਟਰੋਲ ਬਣਾਇਆ ਤੇ ਫਿਰ ਸਰਕਲ ਦੇ ਨੇੜਿਓਂ ਕਰਾਰਾ ਹਮਲਾ ਕਰ ਕੇ ਗੇਂਦ ਨੂੰ ਭਾਰਤੀ ਗੋਲ ਪੋਸਟਾਂ ਵਿਚ ਪਾ ਦਿੱਤਾ।
ਮੈਚ ਦੇ ਚੌਥੇ ਕੁਆਰਟਰ ਵਿਚ ਭਾਰਤੀ ਟੀਮ ਦਾ ਦਬਦਬਾ ਰਿਹਾ। ਟੀਮ ਨੇ ਇਸ ਕੁਆਰਟਰ ਦੀ ਸ਼ੁਰੂਆਤ ਵਿਚ ਪੈਨਲਟੀ ਕਾਰਨਰ ’ਤੇ ਖੁੰਝਣ ਤੋਂ ਬਾਅਦ 54ਵੇਂ ਮਿੰਟ ਵਿਚ ਲਗਾਤਾਰ ਚਾਰ ਪੈਨਲਟੀ ਕਾਰਨਰ ਹਾਸਲ ਕੀਤੇ। ਭਾਰਤੀ ਖਿਡਾਰਨਾਂ ਹਾਲਾਂਕਿ ਇਸ ਵਿਚੋਂ ਕਿਸੇ ਨੂੰ ਵੀ ਗੋਲ ਵਿਚ ਬਦਲਣ ਵਿਚ ਸਫਲ ਨਹੀਂ ਰਹੀਆਂ।
ਮੈਚ ਵਿਚ ਜਦੋਂ ਸਿਰਫ 34 ਸੈਕੰਡ ਦੀ ਖੇਡ ਬਚੀ ਸੀ ਤਦ ਆਸਟ੍ਰੇਲੀਆ ਨੇ ਪੈਨਲਟੀ ਕਾਰਨਰ ਨੂੰ ਗੋਲ ਵਿਚ ਬਦਲ ਕੇ ਜੇਤੂ ਬੜ੍ਹਤ ਬਣਾ ਲਈ। ਟੈਟਮ ਸਟੀਵਰਟ ਨੇ ਪਿਕਰਿੰਗ ਨੂੰ ਬਿਹਤਰੀਨ ਪਾਸ ਦਿੱਤਾ, ਜਿਸ ਨੇ ਗੇਂਦ ਨੂੰ ਗੋਲ ਵਿਚ ਪਹੁੰਚਾ ਕੇ ਆਸਟ੍ਰੇਲੀਆ ਨੂੰ 3 ਅੰਕ ਦਿਵਾਏ। ਭਾਰਤੀ ਟੀਮ ਹੁਣ ਮੰਗਲਵਾਰ ਨੂੰ ਅਰਜਨਟੀਨਾ ਵਿਰੁੱਧ ਖੇਡੇਗੀ।
ਕੋਹਲੀ ਨੇ ਨਹੀਂ ਕੀਤੀ ਕਈ ਮਹੀਨੇ ਇਸ ਦਿਗੱਜ ਨਾਲ ਗੱਲਬਾਤ!
NEXT STORY 
