ਸਪੋਰਟਸ ਡੈਸਕ- ਨਿਊ ਚੰਡੀਗੜ੍ਹ ਦੇ ਮਹਾਰਾਜਾ ਯਾਦਵਿੰਦਰ ਸਿੰਘ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ਵਿੱਚ ਖੇਡੇ ਗਏ ਆਈਪੀਐਲ 2026 ਦੇ 17ਵੇਂ ਮੁਕਾਬਲੇ ਵਿੱਚ ਸਨਰਾਈਜ਼ਰਜ਼ ਹੈਦਰਾਬਾਦ (SRH) ਨੇ ਪੰਜਾਬ ਕਿੰਗਜ਼ ਵਿਰੁੱਧ ਚੌਕਿਆਂ-ਛੱਕਿਆਂ ਦੀ ਬਾਰਿਸ਼ ਤਾਂ ਕੀਤੀ ਪਰ ਟੀਮ ਦਾ ਇੱਕ ਵੱਡਾ ਸੁਪਨਾ ਅਧੂਰਾ ਰਹਿ ਗਿਆ। ਸਨਰਾਈਜ਼ਰਜ਼ ਦੇ ਖਿਡਾਰੀ ਕਈ ਵਾਰ ਆਖ ਚੁੱਕੇ ਹਨ ਕਿ ਉਨ੍ਹਾਂ ਦੀ ਚੀਟਾ 20 ਓਵਰਾਂ ਵਿੱਚ 300 ਦੌੜਾਂ ਬਣਾਉਣ ਦਾ ਹੈ। ਇਸ ਮੈਚ 'ਚ ਵੀ ਸ਼ੁਰੂਆਤੀ ਧਮਾਕੇਦਾਰ ਪ੍ਰਦਰਸ਼ਨ ਨੂੰ ਦੇਖ ਕੇ ਲੱਗ ਰਿਹਾ ਸੀ ਕਿ ਅੱਜ ਇਹ ਸੁਪਨਾ ਪੂਰਾ ਹੋ ਜਾਵੇਗਾ ਪਰ ਆਖਰੀ ਓਵਰਾਂ 'ਚ ਕਹਾਣੀ ਬਦਲ ਗਈ।
ਸਨਰਾਈਜ਼ਰਜ਼ ਦੀ ਸ਼ੁਰੂਆਤ ਬੇਹੱਦ ਤੂਫ਼ਾਨੀ ਰਹੀ। ਅਭਿਸ਼ੇਕ ਸ਼ਰਮਾ ਅਤੇ ਟ੍ਰੈਵਿਸ ਹੈੱਡ ਦੀ ਜੋੜੀ ਨੇ ਪਾਵਰਪਲੇਅ ਦੇ ਪਹਿਲੇ 6 ਓਵਰਾਂ ਵਿੱਚ ਹੀ 105 ਦੌੜਾਂ ਜੋੜ ਕੇ ਪੰਜਾਬ ਦੇ ਗੇਂਦਬਾਜ਼ਾਂ ਦੇ ਪਸੀਨੇ ਛੁਡਾ ਦਿੱਤੇ। ਅਭਿਸ਼ੇਕ ਨੇ ਮਹਿਜ਼ 28 ਗੇਂਦਾਂ ਵਿੱਚ 74 ਦੌੜਾਂ ਦੀ ਤਾਬੜਤੋੜ ਪਾਰੀ ਖੇਡੀ, ਜਦਕਿ ਹੈੱਡ ਨੇ 23 ਗੇਂਦਾਂ ਵਿੱਚ 38 ਦੌੜਾਂ ਦਾ ਯੋਗਦਾਨ ਪਾਇਆ। ਟੀਮ ਨੇ ਸਿਰਫ਼ 11.4 ਓਵਰਾਂ ਵਿੱਚ ਹੀ 150 ਦੌੜਾਂ ਦਾ ਅੰਕੜਾ ਛੂਹ ਲਿਆ ਸੀ ਅਤੇ ਪ੍ਰੋਜੈਕਟਿਡ ਸਕੋਰ ਕਈ ਵਾਰ 300 ਦੇ ਪਾਰ ਨਜ਼ਰ ਆ ਰਿਹਾ ਸੀ।
ਹੈਦਰਾਬਾਦ ਦੀ ਇਸ ਤੇਜ਼ ਰਫ਼ਤਾਰ ਨੂੰ ਬ੍ਰੇਕ ਉਦੋਂ ਲੱਗੀ ਜਦੋਂ ਹੈਨਰਿਕ ਕਲਾਸਨ ਬੱਲੇਬਾਜ਼ੀ ਕਰਨ ਆਏ। ਕਲਾਸਨ, ਜਿਨ੍ਹਾਂ ਨੂੰ ਟੀਮ ਨੇ 23 ਕਰੋੜ ਰੁਪਏ ਵਿੱਚ ਰਿਟੇਨ ਕੀਤਾ ਸੀ, ਨੇ ਬਹੁਤ ਹੀ ਸੁਸਤ ਬੱਲੇਬਾਜ਼ੀ ਕੀਤੀ। ਉਨ੍ਹਾਂ ਨੇ 33 ਗੇਂਦਾਂ ਵਿੱਚ ਸਿਰਫ਼ 39 ਦੌੜਾਂ ਬਣਾਈਆਂ, ਜਿਸ ਵਿੱਚ ਸਿਰਫ਼ ਇੱਕ ਚੌਕਾ ਅਤੇ ਇੱਕ ਛੱਕਾ ਸ਼ਾਮਲ ਸੀ। ਉਨ੍ਹਾਂ ਦੀ ਇਸ ਪਾਰੀ ਕਾਰਨ ਆਖਰੀ 5 ਓਵਰਾਂ ਵਿੱਚ ਰਨ ਰੇਟ ਬੁਰੀ ਤਰ੍ਹਾਂ ਡਿੱਗ ਗਿਆ ਅਤੇ ਟੀਮ ਸਿਰਫ਼ 43 ਦੌੜਾਂ ਹੀ ਜੋੜ ਸਕੀ। ਅੰਤ ਵਿੱਚ ਸਨਰਾਈਜ਼ਰਜ਼ ਦੀ ਟੀਮ 20 ਓਵਰਾਂ ਵਿੱਚ 6 ਵਿਕਟਾਂ ਗੁਆ ਕੇ 219 ਦੌੜਾਂ ਹੀ ਬਣਾ ਸਕੀ।
ਜਾਬ ਕਿੰਗਜ਼ ਵੱਲੋਂ ਸ਼ਸ਼ਾਂਕ ਸਿੰਘ ਨੇ ਸ਼ਾਨਦਾਰ ਗੇਂਦਬਾਜ਼ੀ ਕਰਦਿਆਂ 3 ਓਵਰਾਂ ਵਿੱਚ 20 ਰਨ ਦੇ ਕੇ 2 ਵਿਕਟਾਂ ਲਈਆਂ ਅਤੇ ਮੈਚ ਨੂੰ ਸੰਭਾਲਿਆ। ਇਸ ਤੋਂ ਇਲਾਵਾ ਅਰਸ਼ਦੀਪ ਸਿੰਘ ਨੇ ਵੀ 2 ਵਿਕਟਾਂ ਝਟਕਾਈਆਂ ਅਤੇ ਜੇਵੀਅਰ ਬਾਰਟਲੇਟ ਨੂੰ ਇੱਕ ਸਫਲਤਾ ਮਿਲੀ। ਭਾਵੇਂ ਹੈਦਰਾਬਾਦ ਨੇ ਇੱਕ ਵੱਡਾ ਸਕੋਰ ਖੜ੍ਹਾ ਕੀਤਾ ਹੈ, ਪਰ 300 ਦੌੜਾਂ ਬਣਾਉਣ ਦਾ ਉਨ੍ਹਾਂ ਦਾ ਸੁਪਨਾ ਫਿਲਹਾਲ ਟੁੱਟ ਗਿਆ ਹੈ।
IPL 2026 CSK vs DC : ਦਿੱਲੀ ਕੈਪੀਟਲਜ਼ ਨੇ ਜਿੱਤੀ ਟਾਸ, ਚੇਨਈ ਕਰੇਗੀ ਪਹਿਲਾਂ ਬੱਲੇਬਾਜ਼ੀ
NEXT STORY 
