ਸਪੋਰਟਸ ਡੈਸਕ : ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਨੇ ਦਿੱਲੀ ਕੈਪੀਟਲਸ 'ਤੇ 9 ਵਿਕਟਾਂ ਦੀ ਸ਼ਾਨਦਾਰ ਜਿੱਤ ਦਰਜ ਕਰਕੇ ਆਈ.ਪੀ.ਐੱਲ. 2026 ਦੀ ਅੰਕ ਸੂਚੀ ਵਿੱਚ ਆਪਣੀ ਸਥਿਤੀ ਹੋਰ ਮਜ਼ਬੂਤ ਕਰ ਲਈ ਹੈ। ਇਸ ਵੱਡੀ ਜਿੱਤ ਤੋਂ ਬਾਅਦ ਟੀਮ ਦੇ ਸਟਾਰ ਆਲਰਾਊਂਡਰ ਕਰੁਣਾਲ ਪੰਡਯਾ ਨੇ ਵੱਡਾ ਬਿਆਨ ਦਿੰਦਿਆਂ ਕਿਹਾ ਕਿ ਟੀਮ ਦਾ ਪੂਰਾ ਧਿਆਨ ਟੂਰਨਾਮੈਂਟ ਵਿੱਚ ਬਹੁਤ ਅੱਗੇ ਦੀ ਸੋਚਣ ਦੀ ਬਜਾਏ ਸਿਰਫ਼ ਸਹੀ ਚੀਜ਼ਾਂ ਨੂੰ ਲਗਾਤਾਰ ਕਰਨ 'ਤੇ ਹੈ।
ਪ੍ਰੋਸੈਸ 'ਤੇ ਭਰੋਸਾ ਹੀ ਸਫਲਤਾ ਦੀ ਕੁੰਜੀ
ਅਰੁਣ ਜੇਟਲੀ ਸਟੇਡੀਅਮ ਵਿੱਚ ਮਿਲੀ ਜਿੱਤ ਤੋਂ ਬਾਅਦ ਪੰਡਯਾ ਨੇ ਕਿਹਾ ਕਿ ਆਈ.ਪੀ.ਐੱਲ. ਵਰਗੀ ਲੀਗ ਵਿੱਚ ਹਰ ਟੀਮ ਮਜ਼ਬੂਤ ਹੁੰਦੀ ਹੈ, ਇਸ ਲਈ ਜ਼ਿਆਦਾ ਅੱਗੇ ਦੀ ਸੋਚ ਨੁਕਸਾਨਦੇਹ ਹੋ ਸਕਦੀ ਹੈ। ਉਨ੍ਹਾਂ ਦੱਸਿਆ ਕਿ ਸੀਜ਼ਨ ਦੇ ਲਗਭਗ 60 ਫੀਸਦੀ ਮੈਚ ਖੇਡੇ ਜਾ ਚੁੱਕੇ ਹਨ ਅਤੇ 6 ਲੀਗ ਮੈਚ ਬਾਕੀ ਹਨ। ਉਨ੍ਹਾਂ ਦਾ ਮੁੱਖ ਟੀਚਾ ਛੋਟੇ-ਛੋਟੇ ਮੁਕਾਬਲੇ ਜਿੱਤ ਕੇ ਅੰਤ ਵਿੱਚ ਵੱਡੇ ਨਤੀਜੇ ਹਾਸਲ ਕਰਨਾ ਹੈ। ਪੰਡਯਾ ਅਨੁਸਾਰ ਨਿੱਜੀ ਰਿਕਾਰਡਾਂ ਨਾਲੋਂ ਟੀਮ ਲਈ ਟਰਾਫੀ ਜਿੱਤਣਾ ਜ਼ਿਆਦਾ ਮਹੱਤਵਪੂਰਨ ਹੈ, ਕਿਉਂਕਿ ਇਹੀ ਅਸਲੀ ਵਿਰਾਸਤ ਬਣਾਉਂਦੀ ਹੈ।
ਵਿਰਾਟ ਕੋਹਲੀ ਨੇ ਰਚਿਆ ਇਤਿਹਾਸ
ਇਸੇ ਮੈਚ ਦੌਰਾਨ RCB ਦੇ ਦਿੱਗਜ ਬੱਲੇਬਾਜ਼ ਵਿਰਾਟ ਕੋਹਲੀ ਨੇ ਆਈ.ਪੀ.ਐੱਲ. ਵਿੱਚ 9000 ਦੌੜਾਂ ਪੂਰੀਆਂ ਕਰਨ ਦਾ ਇਤਿਹਾਸਕ ਮੁਕਾਮ ਹਾਸਲ ਕੀਤਾ। ਇਸ ਪ੍ਰਾਪਤੀ 'ਤੇ ਟਿੱਪਣੀ ਕਰਦਿਆਂ ਪੰਡਯਾ ਨੇ ਕਿਹਾ ਕਿ ਵਿਰਾਟ ਪਿਛਲੇ 15-20 ਸਾਲਾਂ ਦੇ ਸਭ ਤੋਂ ਬਿਹਤਰੀਨ ਖਿਡਾਰੀਆਂ ਵਿੱਚੋਂ ਇੱਕ ਹਨ ਅਤੇ ਉਨ੍ਹਾਂ ਦੀ ਫਿਟਨੈੱਸ ਨੇ ਕ੍ਰਿਕਟ ਨੂੰ ਦੇਖਣ ਦਾ ਨਜ਼ਰੀਆ ਬਦਲ ਦਿੱਤਾ ਹੈ।
ਗੇਂਦਬਾਜ਼ੀ ਵਿੱਚ ਨਵੇਂ ਪ੍ਰਯੋਗ: 'ਟ੍ਰੈਂਡਸੈਟਰ' ਬਣੇ ਕਰੁਣਾਲ
ਕਰੁਣਾਲ ਪਾਂਡਿਆ ਇਸ ਸੀਜ਼ਨ ਵਿੱਚ ਆਪਣੀ ਗੇਂਦਬਾਜ਼ੀ ਵਿੱਚ ਕੀਤੇ ਨਵੇਂ ਪ੍ਰਯੋਗਾਂ, ਜਿਵੇਂ ਕਿ ਬਾਊਂਸਰ ਅਤੇ ਸਾਈਡ-ਆਰਮ ਡਿਲੀਵਰੀ ਲਈ ਕਾਫੀ ਚਰਚਾ ਵਿੱਚ ਹਨ। ਟੀਮ ਦੇ ਮੈਂਟਰ ਦਿਨੇਸ਼ ਕਾਰਤਿਕ ਨੇ ਉਨ੍ਹਾਂ ਨੂੰ ਇਸ ਲਈ “ਟ੍ਰੈਂਡਸੈਟਰ” ਵੀ ਕਿਹਾ ਹੈ। ਪੰਡਯਾ ਨੇ ਖੁਲਾਸਾ ਕੀਤਾ ਕਿ ਸਪਿਨਰ ਹੁੰਦੇ ਹੋਏ ਬਾਊਂਸਰ ਪਾਉਣ ਦਾ ਵਿਚਾਰ ਉਨ੍ਹਾਂ ਨੂੰ ਪਿੰਡਾਂ ਵਿੱਚ ਖੇਡੀ ਗਈ ਕ੍ਰਿਕਟ ਤੋਂ ਮਿਲਿਆ, ਜਿੱਥੇ ਛੋਟੇ ਮੈਦਾਨਾਂ ਵਿੱਚ ਬੱਲੇਬਾਜ਼ਾਂ ਨੂੰ ਰੋਕਣ ਲਈ ਉਨ੍ਹਾਂ ਨੇ ਇਹ ਕਲਾ ਸਿੱਖੀ ਸੀ।
ਕਪਤਾਨ ਅਤੇ ਕੋਚ ਦਾ ਮਿਲਿਆ ਸਾਥ
ਪੰਡਯਾ ਨੇ ਆਪਣੀ ਸਫਲਤਾ ਦਾ ਸਿਹਰਾ ਫਿਟਨੈੱਸ ਅਤੇ ਸਪਿਨ ਕੋਚ ਮਲੋਲਨ ਰੰਗਰਾਜਨ ਨੂੰ ਦਿੱਤਾ, ਜਿਨ੍ਹਾਂ ਨੇ ਉਨ੍ਹਾਂ ਨੂੰ ਮੈਦਾਨ 'ਤੇ ਨਵੇਂ ਪ੍ਰਯੋਗ ਕਰਨ ਦੀ ਪੂਰੀ ਆਜ਼ਾਦੀ ਦਿੱਤੀ। ਉਨ੍ਹਾਂ ਨੇ RCB ਦੇ ਕਪਤਾਨ ਰਜਤ ਪਾਟੀਦਾਰ ਦੀ ਵੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਉਨ੍ਹਾਂ ਦਾ ਸ਼ਾਂਤ ਸੁਭਾਅ ਟੀਮ ਦੇ ਦਬਾਅ ਨੂੰ ਘੱਟ ਕਰਨ ਅਤੇ ਖਿਡਾਰੀਆਂ ਨੂੰ ਖੁੱਲ੍ਹ ਕੇ ਖੇਡਣ ਦਾ ਮੌਕਾ ਦੇਣ ਵਿੱਚ ਮਦਦਗਾਰ ਸਾਬਤ ਹੋ ਰਿਹਾ ਹੈ।
ਸਿੰਧੂ ਨੇ BWF ਕੌਂਸਲ ਦੇ ਮੈਂਬਰ ਵਜੋਂ ਅਹੁਦਾ ਸੰਭਾਲਿਆ
NEXT STORY 
