ਲਾਹੌਰ– ਪਾਕਿਸਤਾਨ ਨੇ ਆਪਣੇ ਕਪਤਾਨ ਬਾਬਰ ਆਜ਼ਮ ਦੇ 100ਵੇਂ ਟੀ-20 ਮੈਚ ਦਾ ਜਸ਼ਨ 5 ਮੈਚਾਂ ਦੀ ਲੜੀ ਦੇ ਪਹਿਲੇ ਮੈਚ ’ਚ ਨਿਊਜ਼ੀਲੈਂਡ ਨੂੰ 88 ਦੌੜਾਂ ਨਾਲ ਹਰਾ ਕੇ ਮਨਾਇਆ। ਤੇਜ਼ ਗੇਂਦਬਾਜ਼ ਹੈਰਿਸ ਰਾਊਫ ਨੇ ਕਰੀਅਰ ਦਾ ਸਰਵਸ੍ਰੇਸ਼ਠ ਪ੍ਰਦਰਸ਼ਨ ਕਰਦੇ ਹੋਏ 18 ਦੌੜਾਂ ਦੇ ਕੇ 4 ਵਿਕਟਾਂ ਲਈਆਂ।
ਨਿਊਜ਼ੀਲੈਂਡ ਦੀ ਟੀਮ 4 ਓਵਰ ਬਾਕੀ ਰਹਿੰਦਿਆਂ 94 ਦੌੜਾਂ ’ਤੇ ਹੀ ਆਊਟ ਹੋ ਗਈ। ਉਸ ਨੇ ਆਖਰੀ 5 ਵਿਕਟਾਂ 6 ਦੌੜਾਂ ਦੇ ਅੰਦਰ ਗੁਆ ਦਿੱਤੀਆਂ। ਇਸ ਤੋਂ ਪਹਿਲਾਂ ਪਾਕਿਸਤਾਨ ਨੇ 182 ਦੌੜਾਂ ਬਣਾਈਆਂ। ਨੌਜਵਾਨ ਬੱਲੇਬਾਜ਼ ਸਾਈਮ ਅਯੂਬ ਤੇ ਫਖਰ ਜ਼ਮਾਨ ਦੋਵਾਂ ਨੇ 47 ਦੌੜਾਂ ਦੀ ਪਾਰੀ ਖੇਡੀ। ਅਫਗਾਨਿਸਤਾਨ ਤੋਂ ਲੜੀ 1-2 ਨਾਲ ਹਰਾਉਣ ਤੋਂ ਬਾਅਦ ਪਾਕਿਸਤਾਨ ਨੇ ਇਸ ਲੜੀ ’ਚ ਆਪਣੀ ਪੂਰੀ ਮਜ਼ਬੂਤ ਟੀਮ ਉਤਾਰੀ ਹੈ।
ਉੱਥੇ ਹੀ ਨਿਊਜ਼ੀਲੈਂਡ ਦੀ ਟੀਮ ਵਿਚ ਉਸਦੇ ਪ੍ਰਮੁੱਖ ਖਿਡਾਰੀ ਨਹੀਂ ਹਨ ਜਿਹੜੇ ਭਾਰਤ ’ਚ ਆਈ. ਪੀ. ਐੱਲ. ਖੇਡ ਰਹੇ ਹਨ। ਨਿਊਜ਼ੀਲੈਂਡ ਇਸ ਦੌਰੇ ’ਤੇ 5 ਟੀ-20 ਤੇ 5 ਵਨ ਡੇ ਖੇਡੇਗੀ। ਨਿਊਜ਼ੀਲੈਂਡ ਲਈ ਮੈਟ ਹੈਨਰੀ ਨੇ ਟੁਕੜਿਆਂ ’ਚ ਹੈਟ੍ਰਿਕ ਲਈ। ਉਸ ਨੇ ਆਪਣੇ ਤੀਜੇ ਓਵਰ ਦੀਆਂ ਆਖਰੀ ਦੋ ਗੇਂਦਾਂ ’ਤੇ ਸ਼ਾਦਾਬ ਖਾਨ ਤੇ ਇਫਤਿਖਾਰ ਅਹਿਮਦ ਨੂੰ ਆਊਟ ਕੀਤਾ। ਉੱਥੇ ਹੀ, ਅਗਲੇ ਓਵਰ ਦੀ ਪਹਿਲੀ ਗੇਂਦ ’ਤੇ ਸ਼ਾਹੀਨ ਸ਼ਾਹ ਅਫਰੀਦੀ ਨੂੰ ਡੀਪ ’ਤੇ ਡੈਰਿਲ ਮਿਸ਼ੇਲ ਦੇ ਹੱਥੋਂ ਕੈਚ ਕਰਵਾਇਆ।
ਸੂਬਾ ਸਰਕਾਰ ਖੇਡ ਸੱਭਿਆਚਾਰ ਪੈਦਾ ਕਰਨ ਲਈ ਨਿਰੰਤਰ ਯਤਨਸ਼ੀਲ : ਮੀਤ ਹੇਅਰ
NEXT STORY 
