ਟੋਰਾਂਟੋ, (ਭਾਸ਼ਾ) ਗ੍ਰੈਂਡਮਾਸਟਰ ਆਰ ਪ੍ਰਗਿਆਨੰਦਾ ਅਤੇ ਵਿਦਿਤ ਗੁਜਰਾਤੀ ਨੇ ਅਹਿਮ ਜਿੱਤਾਂ ਦਰਜ ਕੀਤੀਆਂ ਜਦਕਿ ਡੀ ਗੁਕੇਸ਼ ਨੇ ਇੱਥੇ ਕੈਂਡੀਡੇਟਸ ਸ਼ਤਰੰਜ ਟੂਰਨਾਮੈਂਟ ਦੇ ਛੇਵੇਂ ਦੌਰ ਵਿਚ ਭਾਰਤੀ ਪੁਰਸ਼ ਟੀਮ ਲਈ ਡਰਾਅ ਕੀਤਾ ਤੇ ਸੰਯੁਕਤ ਚੋਟੀ ਦੀ ਸਥਿਤੀ ਨੂੰ ਬਰਕਰਾਰ ਰੱਖਿਆ। ਪ੍ਰਗਿਆਨੰਦਾ ਨੇ ਅਜ਼ਰਬਾਈਜਾਨ ਦੇ ਨਿਜ਼ਾਤ ਅੱਬਾਸੋਵ ਨੂੰ ਹਰਾਇਆ ਜਦਕਿ ਗੁਜਰਾਤੀ ਨੇ ਫਰਾਂਸ ਦੀ ਫਿਰੋਜ਼ਾ ਅਲੀਰੇਜ਼ਾ ਨੂੰ ਹਰਾਇਆ। ਗੁਕੇਸ਼ ਨੇ ਅਮਰੀਕਾ ਦੇ ਹਿਕਾਰੂ ਨਾਕਾਮੁਰਾ ਨਾਲ ਡਰਾਅ ਖੇਡਿਆ। ਟੂਰਨਾਮੈਂਟ ਦੇ ਅਜੇ ਅੱਠ ਰਾਊਂਡ ਬਾਕੀ ਹਨ।
17 ਸਾਲਾ ਗੁਕੇਸ਼ ਅਤੇ ਇਆਨ ਨੇਪੋਮਨੀਆਚੀ ਦੀ ਪੁਰਸ਼ ਵਰਗ ਵਿੱਚ ਚਾਰ-ਚਾਰ ਅੰਕਾਂ ਦੀ ਸਾਂਝੀ ਬੜ੍ਹਤ ਹੈ। ਫੀਡੇ ਦੇ ਝੰਡੇ ਹੇਠ ਖੇਡ ਰਹੇ ਰੂਸ ਦੇ ਨੇਪੋਮਨੀਆਚਚੀ ਨੇ ਚੋਟੀ ਦਾ ਦਰਜਾ ਪ੍ਰਾਪਤ ਅਮਰੀਕਾ ਦੇ ਫੈਬੀਆਨੋ ਕਾਰੂਆਨਾ ਨਾਲ ਡਰਾਅ ਖੇਡਿਆ। ਹਾਲਾਂਕਿ, ਭਾਰਤ ਨੂੰ ਮਹਿਲਾ ਵਰਗ ਵਿੱਚ ਨਿਰਾਸ਼ਾ ਦਾ ਸਾਹਮਣਾ ਕਰਨਾ ਪਿਆ ਕਿਉਂਕਿ ਆਰ ਵੈਸ਼ਾਲੀ ਰੂਸ ਦੀ ਕੈਟਰੀਨਾ ਲਾਗਨੋ ਤੋਂ ਹਾਰ ਗਈ। ਜੇਕਰ ਪ੍ਰਗਿਆਨੰਦਾ ਦੀ ਵੱਡੀ ਭੈਣ ਵੈਸ਼ਾਲੀ ਵਾਪਸੀ ਕਰਨਾ ਚਾਹੁੰਦੀ ਹੈ ਤਾਂ ਉਸ ਨੂੰ ਬਹੁਤ ਵਧੀਆ ਖੇਡਣਾ ਹੋਵੇਗਾ। ਕੋਨੇਰੂ ਹੰਪੀ ਨੂੰ ਵੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਕਿਉਂਕਿ ਉਸ ਨੂੰ ਚੀਨ ਦੀ ਟਿੰਗਜੀ ਲੇਈ ਨੇ ਹਰਾਇਆ ਜਦੋਂ ਕਿ ਬੁਲਗਾਰੀਆ ਦੀ ਨੂਰਗੁਲ ਸਲੀਮੋਵਾ ਰੂਸ ਦੀ ਅਲੈਗਜ਼ੈਂਡਰਾ ਗੋਰਿਆਚਿਕੀਨਾ ਤੋਂ ਹਾਰ ਗਈ।
ਪ੍ਰਗਿਆਨੰਦਾ ਅਤੇ ਕਾਰੂਆਨਾ 3.5 ਅੰਕਾਂ ਨਾਲ ਸਾਂਝੇ ਤੀਜੇ ਸਥਾਨ 'ਤੇ ਹਨ, ਜਦਕਿ ਗੁਜਰਾਤ ਅਤੇ ਨਾਕਾਮੁਰਾ ਤਿੰਨ-ਤਿੰਨ ਅੰਕਾਂ ਨਾਲ ਸੰਯੁਕਤ ਪੰਜਵੇਂ ਸਥਾਨ 'ਤੇ ਹਨ। ਅਲੀਰੇਜ਼ਾ ਅਤੇ ਨਿਜ਼ਾਤ ਅੱਬਾਸੋਵ ਸਾਲ ਦੇ ਸਭ ਤੋਂ ਵੱਡੇ ਟੂਰਨਾਮੈਂਟ ਦੇ ਮੱਧ ਪੜਾਅ ਵਿੱਚ 1.5 ਅੰਕਾਂ ਨਾਲ ਜੂਝ ਰਹੇ ਹਨ। ਮਹਿਲਾ ਵਰਗ ਵਿੱਚ ਚੀਨ ਦੀ ਝੋਂਗਈ ਤਾਨ ਨੇ ਯੂਕਰੇਨ ਦੀ ਅੰਨਾ ਮੁਜਿਚੁਕ ਨੂੰ ਹਰਾਇਆ। ਉਸ ਦੇ ਛੇ ਮੈਚਾਂ ਵਿੱਚ 4.5 ਅੰਕ ਹਨ ਅਤੇ ਗੋਰਿਆਚਕੀਨਾ ਉਸ ਤੋਂ ਅੱਧਾ ਅੰਕ ਪਿੱਛੇ ਦੂਜੇ ਸਥਾਨ 'ਤੇ ਹੈ। ਕੈਟਰੀਨਾ ਲਾਗਨੋ 3.5 ਅੰਕਾਂ ਨਾਲ ਤੀਜੇ ਸਥਾਨ 'ਤੇ ਹੈ, ਜੋ ਲੇਈ ਤੋਂ ਅੱਧਾ ਅੰਕ ਅੱਗੇ ਹੈ। ਵੈਸ਼ਾਲੀ ਅਤੇ ਸਲੀਮੋ ਦੋਵਾਂ ਦੇ 2.5 ਅੰਕ ਹਨ ਜਦਕਿ ਹੰਪੀ ਅਤੇ ਮੁਜ਼ਿਚੁਕ ਦੋ-ਦੋ ਅੰਕਾਂ ਨਾਲ ਤਾਲਿਕਾ ਦੇ ਸਭ ਤੋਂ ਹੇਠਲੇ ਸਥਾਨ 'ਤੇ ਹਨ।
IPL 2024: 'ਲੋਕ ਮੇਰੇ ਵਿਵਹਾਰ ਤੋਂ ਨਿਰਾਸ਼ ਹਨ', ਕੋਹਲੀ ਨੇ ਗੰਭੀਰ ਨੂੰ ਗਲੇ ਲਗਾ ਕੇ ਤੋੜੀ ਚੁੱਪੀ
NEXT STORY 
