ਕੋਲਕਾਤਾ : ਲੱਗਭਗ ਇਕ ਮਹੀਨੇ ਤੋਂ ਬਾਅਦ ਆਪਣੇ ਘਰੇਲੂ ਮੈਦਾਨ ’ਤੇ ਵਾਪਸੀ ਕਰਨ ਵਾਲੀ ਕੋਲਕਾਤਾ ਨਾਈਟ ਰਾਈਡਰਜ਼ (ਕੇ. ਕੇ. ਆਰ.) ਦੀ ਟੀਮ ਆਪਣੀ ਉਮੀਦ ਜਿਊਂਦੀ ਰੱਖਣ ਲਈ ਸ਼ਨੀਵਾਰ ਨੂੰ ਇੱਥੇ ਇੰਡੀਅਨ ਪ੍ਰੀਮੀਅਰ ਲੀਗ (ਆਈ. ਪੀ. ਐੱਲ.) ਦੇ ਮੈਚ ’ਚ ਚੋਟੀ ਦੇ ਦੋ ’ਚ ਜਗ੍ਹਾ ਬਣਾਉਣ ਦੀ ਕੋਸ਼ਿਸ਼ ’ਚ ਲੱਗੀ ਗੁਜਰਾਤ ਟਾਈਟਨਜ਼ ਦਾ ਸਾਹਮਣਾ ਕਰੇਗੀ। ਤਜ਼ਰੇਬਕਾਰ ਅਜਿੰਕਯ ਰਹਾਨੇ ਦੀ ਕਪਤਾਨੀ ’ਚ ਕੇ. ਕੇ. ਆਰ. ਨੇ ਪਿਛਲੇ ਸਾਲ ਦੀ ਤਰ੍ਹਾਂ ਇਸ ਸਾਲ ਵੀ ਚੰਗਾ ਪ੍ਰਦਰਸ਼ਨ ਨਹੀਂ ਕੀਤਾ ਹੈ ਜਿਸ ਨਾਲ ਉਸ ਨੂੰ ਫਿਰ ਤੋਂ ਕਪਤਾਨ ਨਿਯੁਕਤ ਕਰਨ ਦੇ ਫੈਸਲੇ ’ਤੇ ਸਵਾਲ ਉੱਠਣ ਲੱਗ ਗਏ ਹਨ।
ਕੇ. ਕੇ. ਆਰ. ਨੂੰ ਮੌਜੂਦਾ ਸੈਸ਼ਨ ’ਚ ਆਪਣੀ ਪਹਿਲੀ ਜਿੱਤ ਲਈ 7ਵੇਂ ਮੈਚ (ਅੱਧੇ ਪੜਾਅ) ਤੱਕ ਇੰਤਜ਼ਾਰ ਕਰਨਾ ਪਿਆ ਸੀ। ਉਹ ਇਸ ਦੌਰਾਨ ਇਕ ਸੰਤੁਲਿਤ ਟੀਮ ਸੁਮੇਲ ਤਿਆਰ ਕਰਨ ’ਚ ਅਸਫਲ ਰਿਹਾ। ਕੇ. ਕੇ. ਆਰ. ਨੇ ਇਸ ਤੋਂ ਬਾਅਦ ਲਗਾਤਾਰ 4 ਮੈਚ ਜਿੱਤੇ ਪਰ ਪਿਛਲੇ ਮੈਚ ’ਚ ਵਿਰਾਟ ਕੋਹਲੀ ਦੇ ਸ਼ਾਨਦਾਰ ਸੈਂਕੜੇ ਦੇ ਕਾਰਨ ਉਸ ਨੂੰ ਰਾਇਲ ਚੈਲੰਜਰਜ਼ ਬੈਂਗਲੁਰੂ (ਆਰ. ਸੀ. ਬੀ.) ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।
ਕੇ. ਕੇ. ਆਰ. ਦੇ ਹੁਣ 3 ਮੈਚ ਬਚੇ ਹਨ ਤੇ ਜੇਕਰ ਉਹ ਸਾਰੇ ਮੈਚ ਜਿੱਤ ਜਾਂਦੀ ਹੀ ਤਾਂ ਵੱਧ ਤੋਂ ਵੱਧ 15 ਅੰਕਾਂ ਤੱਕ ਪਹੁੰਚ ਸਕੇਗੀ। ਇਸ ਦੇ ਬਾਵਜੂਦ ਉਸ ਦੀ ਪਲੇਅ ਆਫ ’ਚ ਜਗ੍ਹਾ ਪੱਕੀ ਨਹੀਂ ਹੋ ਸਕੇਗੀ ਤੇ ਇਸ ਦੇ ਲਈ ਉਸ ਨੂੰ ਅਗਰ-ਮਗਰ ਦੇ ਸਮੀਕਰਨਾਂ ’ਚੋਂ ਲੰਘਣਾ ਪਵੇਗਾ। ਇਕ ਹੋਰ ਹਾਰ ਨਾਲ ਉਸ ਦੀ ਅੱਗੇ ਵਧਣ ਦੀ ਸੰਭਾਵਨਾ ਖਤਮ ਹੋ ਜਾਵੇਗੀ।
ਕੇ. ਕੇ. ਆਰ. ਦੀਅਾਂ ਲਗਾਤਾਰ 4 ਮੈਚਾਂ ’ਚ ਜਿੱਤ ਦਾ ਸਿਹਰਾ ਕਾਫੀ ਹੱਦ ਤੱਕ ਸੁਨੀਲ ਨਾਰਾਇਣ ਤੇ ਵਰੁਣ ਚੱਕਰਵਰਤੀ ਦੀ ਸਪਿੰਨ ਜੋੜੀ ਨੂੰ ਜਾਂਦਾ ਹੈ ਜਦਕਿ ਉਪ ਕਪਤਾਨ ਰਿੰਕੂ ਸਿੰਘ ਨੇ ਵੀ ਲਗਾਤਾਰ ਯੋਗਦਾਨ ਦਿੱਤਾ ਹੈ। ਚੱਕਰਵਰਤੀ ਖੱਬੇ ਪੈਰ ’ਚ ਸੱਟ ਲੱਗਣ ਦੇ ਕਾਰਨ ਆਰ. ਸੀ. ਬੀ. ਵਿਰੁੱਧ ਨਹੀਂ ਖੇਡ ਸਕਿਆ ਸੀ ਜਿਹੜਾ ਟੀਮ ਨੂੰ ਮਹਿੰਗਾ ਪਿਆ। ਕੇ. ਕੇ. ਆਰ. ਦੇ ਮੁੱਖ ਕੋਚ ਅਭਿਸ਼ੇਕ ਨਾਇਰ ਨੇ ਉਸ ਦੀ ਵਾਪਸੀ ਦੇ ਸੰਕੇਤ ਦਿੱਤੇ ਹਨ ਜਿਹੜੀ ਟੀਮ ਲਈ ਚੰਗੀ ਖਬਰ ਹੈ। ਕੇ. ਕੇ. ਆਰ. ਦੀ ਬੱਲੇਬਾਜ਼ੀ ’ਚ ਪੂਰੇ ਸੈਸ਼ਨ ’ਚ ਨਿਰੰਤਰਤਾ ਦੀ ਕਮੀ ਰਹੀ ਹੈ। ਉਸ ਦੇ ਬੱਲੇਬਾਜ਼ੀ ਕ੍ਰਮ ਨੂੰ ਲੈ ਕੇ ਵੀ ਸਵਾਲ ਉੱਠਦੇ ਰਹੇ ਹਨ।
ਇਸ ਦੇ ਉਲਟ ਸ਼ੁਭਮਨ ਗਿੱਲ ਦੀ ਅਗਵਾਈ ਵਾਲੀ ਗੁਜਰਾਤ ਦਾ ਇਸ ਸੈਸ਼ਨ ’ਚ ਹੁਣ ਤੱਕ ਜ਼ਿਅਾਦਾਤਰ ਚੰਗਾ ਪ੍ਰਦਰਸ਼ਨ ਰਿਹਾ ਹੈ। ਉਸ ਦੇ ਚੋਟੀ ’ਤੇ ਕਾਬਜ਼ ਆਰ. ਸੀ. ਬੀ. ਦੇ ਬਰਾਬਰ 16 ਅੰਕ ਹਨ ਪਰ ਨੈੱਟ ਰਨ ਰੇਟ ਦੇ ਕਾਰਨ ਉਹ ਦੂਜੇ ਸਥਾਨ ’ਤੇ ਹੈ। ਗੁਜਰਾਤ ਦੇ ਇਸ ਸ਼ਾਨਦਾਰ ਪ੍ਰਦਰਸ਼ਨ ਦਾ ਸਿਹਰਾ ਕਾਫੀ ਹੱਦ ਤੱਕ ਉਸ ਦੇ ਗੇਂਦਬਾਜ਼ਾਂ ਨੂੰ ਜਾਂਦਾ ਹੈ। ਉਸ ਵੱਲੋਂ ਕੈਗਿਸੋ ਰਬਾਡਾ, ਮੁਹੰਮਦ ਸਿਰਾਜ ਤੇ ਜੈਸਨ ਹੋਲਡਰ ਨੇ ਤੇਜ਼ ਗੇਂਦਬਾਜ਼ੀ ਵਿਭਾਗ ਚੰਗੀ ਤਰ੍ਹਾਂ ਸੰਭਾਲਿਆ ਹੈ ਜਦਕਿ ਸਟਾਰ ਸਪਿੰਨਰ ਰਾਸ਼ਿਦ ਖਾਨ ਨੇ ਮੰਨੋ ਜਿਵੇਂ ਆਪਣਾ ਪੁਰਾਣਾ ਜਾਦੂ ਫਿਰ ਤੋਂ ਹਾਸਲ ਕਰ ਲਿਆ ਹੈ। ਬੱਲੇਬਾਜ਼ੀ ’ਚ ਉਸ ਦੇ ਚੋਟੀਕ੍ਰਮ ’ਚ ਗਿੱਲ ਤੇ ਸਾਈ ਸੁਦਰਸ਼ਨ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਪਿਛਲੇ ਸਾਲ ਟੂਰਨਾਮੈਂਟ ’ਚ ਸਭ ਤੋਂ ਜ਼ਿਆਦਾ 759 ਦੌੜਾਂ ਬਣਾਉਣ ਵਾਲਾ ਸੁਦਰਸ਼ਨ ਇਸ ਵਾਰ ਵੀ ਹੁਣ ਤੱਕ 501 ਦੌੜਾਂ ਬਣਾ ਚੁੱਕਾ ਹੈ। ਉਹ ਅਜੇ ਤੱਕ ਸਭ ਤੋਂ ਜ਼ਿਆਦਾ ਦੌੜਾਂ ਬਣਾਉਣ ਵਾਲੇ ਬੱਲੇਬਾਜ਼ਾਂ ਦੀ ਅੰਕ ਸੂਚੀ ’ਚ ਚੋਟੀ ’ਤੇ ਕਾਬਜ਼ ਹੈਨਰਿਕ ਕਲਾਸੇਨ ਤੋਂ ਸਿਰਫ 7 ਦੌੜਾਂ ਪਿੱਛੇ ਹੈ। ਉਸ ਨੇ ਆਪਣੀਆਂ ਪਿਛਲੀਆਂ 6 ਪਾਰੀਆਂ ’ਚ 5 ਅਰਧ ਸੈਂਕੜੇ ਲਾਏ ਹਨ, ਜਿਨ੍ਹਾਂ ’ਚ ਇਕ ਸੈਂਕੜਾ ਵੀ ਸ਼ਾਮਲ ਹੈ। ਗਿੱਲ ਵੀ ਬਿਹਤਰੀਨ ਫਾਰਮ ’ਚ ਨਜ਼ਰ ਆ ਰਿਹਾ ਹੈ, ਉੱਥੇ ਹੀ, ਵਾਸ਼ਿੰਗਟਨ ਸੁੰਦਰ ਨੇ ਮੱਧਕ੍ਰਮ ’ਚ ਚੰਗੀ ਭੂਮਿਕਾ ਨਿਭਾਈ ਹੈ। ਗੁਜਰਾਤ ਨੂੰ ਜੇਕਰ ਚੋਟੀ ਦੇ ਦੋ ’ਚ ਜਗ੍ਹਾ ਬਣਾਉਣੀ ਹੈ ਤਾਂ ਉਸ ਦੇ ਇਨ੍ਹਾਂ ਪ੍ਰਮੁੱਖ ਖਿਡਾਰੀਆਂ ਨੂੰ ਆਪਣਾ ਚੰਗਾ ਪ੍ਰਦਰਸ਼ਨ ਜਾਰੀ ਰੱਖਣਾ ਪਵੇਗਾ।
ਕੀ RCB ਦੇ ਇਸ ਧਾਕੜ ਕ੍ਰਿਕਟਰ ਨੂੰ ਡੇਟ ਕਰ ਰਹੀ ਹੈ ਸ਼ਹਿਨਾਜ਼ ਗਿੱਲ ?
NEXT STORY 
