ਆਪਣੇ ਅੜੀਅਲ ਅਤੇ ਜ਼ਿੱਦੀ ਸੁਭਾਅ ਲਈ ਪ੍ਰਸਿੱਧ ਮਮਤਾ ਬੈਨਰਜੀ ਭਾਰਤ ਦੀਆਂ ਸਭ ਤੋਂ ਸਫਲ ਮਹਿਲਾ ਰਾਜਨੇਤਾਵਾਂ ’ਚੋਂ ਇਕ ਹੈ। ਪੱਛਮੀ ਬੰਗਾਲ ’ਚ ਖੱਬੇਪੱਖੀ ਪਾਰਟੀਆਂ ਦਾ 34 ਸਾਲਾਂ ਦਾ ਸ਼ਾਸਨ ਖ਼ਤਮ ਕਰ ਕੇ 2011 ’ਚ ਰਾਜ ਦੀ ਮੁੱਖ ਮੰਤਰੀ ਬਣੀ ਮਮਤਾ ਬੈਨਰਜੀ ਲਗਾਤਾਰ 15 ਸਾਲਾਂ ਤੱਕ ਸੱਤਾਧਾਰੀ ਰਹੀ।
ਮਮਤਾ ਬੈਨਰਜੀ ਨੇ ਆਪਣੇ ਸਿਆਸੀ ਕਰੀਅਰ ਦੀ ਸ਼ੁਰੂਆਤ ਕਾਂਗਰਸ ਤੋਂ ਕੀਤੀ ਸੀ ਪਰ 1998 ’ਚ ਕਾਂਗਰਸ ਤੋਂ ਵੱਖ ਹੋ ਕੇ ਉਨ੍ਹਾਂ ਨੇ ਤ੍ਰਿਣਮੂਲ ਕਾਂਗਰਸ ਦਾ ਗਠਨ ਕੀਤਾ। ਮਮਤਾ ਬੈਨਰਜੀ ਅੱਜ ਭਾਵੇਂ ਭਾਜਪਾ ਅਤੇ ਕਾਂਗਰਸ ਦੀ ਵਿਰੋਧੀ ਹੈ, ਪਰ ਭਾਜਪਾ ਅਤੇ ਕਾਂਗਰਸ ਦੋਵਾਂ ਦੀਆਂ ਹੀ ਕੇਂਦਰ ਸਰਕਾਰਾਂ ’ਚ ਉਹ ਮੰਤਰੀ ਰਹਿ ਚੁੱਕੀ ਹੈ ਅਤੇ ਸਮੇਂ-ਸਮੇਂ ’ਤੇ ਕਾਂਗਰਸ ਅਤੇ ਭਾਜਪਾ ਦੋਵਾਂ ਨੂੰ ਹੀ ਮਮਤਾ ਬੈਨਰਜੀ ਦੇ ਗੁੱਸੇ ਦਾ ਸ਼ਿਕਾਰ ਹੋਣਾ ਪਿਆ ਹੈ।
1999 ’ਚ ਸ਼੍ਰੀ ਅਟਲ ਬਿਹਾਰੀ ਵਾਜਪਾਈ ਦੀ ਭਾਜਪਾ ਦੀ ਅਗਵਾਈ ਵਾਲੀ ਐੱਨ. ਡੀ. ਏ. ਨਾਲ ਜੁੜ ਕੇ ਉਨ੍ਹਾਂ ਦੀ ਸਰਕਾਰ ’ਚ ਰੇਲ ਮੰਤਰੀ ਬਣੀ ਪਰ ਉਹ ਵਾਜਪਾਈ ਜੀ ਦੇ ਕੰਮਕਾਜ ਨੂੰ ਲੈ ਕੇ ਕਦੇ-ਕਦੇ ਨਾਰਾਜ਼ਗੀ ਪ੍ਰਗਟ ਕਰਦੀ ਰਹਿੰਦੀ ਅਤੇ ਅਚਾਨਕ ਆਪਣੇ ਘਰ ਕੋਲਕਾਤਾ ਚਲੀ ਜਾਂਦੀ।
ਇਸੇ ਕਾਰਨ ਇਕ ਦਿਨ ਵਾਜਪਾਈ ਜੀ ਨੇ ਕੋਲਕਾਤਾ ’ਚ ਮਮਤਾ ਬੈਨਰਜੀ ਦੇ ਘਰ ਜਾ ਕੇ ਉਨ੍ਹਾਂ ਦੀ ਮਾਂ ਦੇ ਪੈਰ ਛੂਹ ਕੇ ਉਨ੍ਹਾਂ ਨੂੰ ਕਿਹਾ ਸੀ ਕਿ, ‘‘ਤੁਹਾਡੀ ਬੇਟੀ ਬਹੁਤ ਸ਼ਰਾਰਤੀ ਹੈ। ਬਹੁਤ ਤੰਗ ਕਰਦੀ ਹੈ।’’
ਮਮਤਾ ਬੈਨਰਜੀ ਦੇ ਸਬੰਧ ’ਚ 11 ਜਨਵਰੀ, 2021 ਨੂੰ ਪੱਛਮੀ ਬੰਗਾਲ ਦੇ ਤਤਕਾਲੀ ਭਾਜਪਾ ਪ੍ਰਧਾਨ ਦਿਲੀਪ ਘੋਸ਼ ਨੇ ਕਿਹਾ ਸੀ ਕਿ, ‘‘ਮਮਤਾ ਬੈਨਰਜੀ ਨੇ ਹਮੇਸ਼ਾ ਡੋਨਾਲਡ ਟਰੰਪ ਦੀ ਤਰ੍ਹਾਂ ਅੜੀਅਲ ਅਤੇ ਤਾਨਾਸ਼ਾਹੀ ਰਵੱਈਆ ਦਿਖਾਇਆ ਹੈ ਅਤੇ ਉਨ੍ਹਾਂ ਨੂੰ ਲੋਕਤੰਤਰ ’ਚ ਵਿਸ਼ਵਾਸ ਨਹੀਂ ਹੈ।’’
ਅਤੇ ਹੁਣ 2 ਮਈ, 2026 ਨੂੰ ਪੱਛਮੀ ਬੰਗਾਲ ਦੇ ਈਸਟ ਮੇਦਿਨੀਪੁਰ ’ਚ ਦਿਲੀਪ ਘੋਸ਼ ਨੇ ਕਿਹਾ ਹੈ ਕਿ ‘‘ਮਮਤਾ ਬੈਨਰਜੀ ਇਕ ਤਾਨਾਸ਼ਾਹ ਮੁੱਖ ਮੰਤਰੀ ਹੈ। ਉਸ ਦੇ ਲਈ ਸੱਤਾ ਸਰਵਉੱਚ ਹੈ। ਉਨ੍ਹਾਂ ਦੀ ਹਾਲਤ ਡੋਨਾਲਡ ਟਰੰਪ ਵਰਗੀ ਹੀ ਹੈ। ਜਦੋਂ ਸੱਤਾ ਹੱਥੋਂ ਨਿਕਲਦੀ ਦਿਖਾਈ ਦਿੰਦੀ ਹੈ ਤਾਂ ਉਹ ਕਿਸੇ ਵੀ ਹੱਦ ਤੱਕ ਜਾਣ ਨੂੰ ਤਿਆਰ ਹੋ ਸਕਦੀ ਹੈ।’’
(ਜ਼ਿਕਰਯੋਗ ਹੈ ਕਿ 2020 ’ਚ ਅਮਰੀਕਾ ਦੀ ਰਾਸ਼ਟਰਪਤੀ ਚੋਣ ’ਚ ਜੋਅ ਬਾਈਡੇਨ ਸਾਹਮਣੇ ਬੁਰੀ ਤਰ੍ਹਾਂ ਹਾਰਨ ਵਾਲੇ ਡੋਨਾਲਡ ਟਰੰਪ ਨੂੰ ਯੂ. ਐੱਸ. ਕੈਪੀਟਲ ’ਚ ਹਮਲਾ ਕਰਨ ਲਈ ਭੀੜ ਨੂੰ ਉਕਸਾਉਣ ਕਾਰਨ ਦੁਨੀਆ ਭਰ ’ਚ ਭਾਰੀ ਆਲੋਚਨਾ ਦਾ ਸਾਹਮਣਾ ਕਰਨਾ ਪਿਆ ਸੀ।)
ਹਾਲ ਹੀ ਦੀਆਂ ਪੱਛਮੀ ਬੰਗਾਲ ਵਿਧਾਨ ਸਭਾ ਚੋਣਾਂ ’ਚ ਹਾਰ ਤੋਂ ਬਾਅਦ ਵੀ ਮਮਤਾ ਬੈਨਰਜੀ ਅਸਤੀਫ਼ਾ ਦੇਣ ਲਈ ਤਿਆਰ ਨਹੀਂ ਹੈ ਅਤੇ ਉਨ੍ਹਾਂ ਨੇ ਕਿਹਾ ਹੈ ਕਿ ਉਹ ਚੋਣ ਨਹੀਂ ਹਾਰੀ, ਇਸ ਲਈ ਅਸਤੀਫ਼ਾ ਨਹੀਂ ਦੇਵੇਗੀ।
ਅਤੇ ਹੁਣ 7 ਮਈ ਨੂੰ ਸੋਸ਼ਲ ਮੀਡੀਆ ਮੰਚ ‘ਐਕਸ’ ’ਤੇ ਮਮਤਾ ਬੈਨਰਜੀ ਨੇ ਇਕ ਪੋਸਟ ’ਚ ਕਿਹਾ ਹੈ ਕਿ, ‘‘ਉਹ ਚਾਹੁਣ ਤਾਂ ਮੈਨੂੰ ਹਟਾ ਦੇਣ, ਰਾਸ਼ਟਰਪਤੀ ਸ਼ਾਸਨ ਲਗਾਉਣਾ ਹੈ ਤਾਂ ਲਗਾ ਦੇਣ ਪਰ ਮੈਂ ਹਾਰ ਮੰਨਣ ਵਾਲਿਆਂ ’ਚੋਂ ਨਹੀਂ। ਲੋੜ ਪਈ ਤਾਂ ਮੈਂ ਅੰਤਰਰਾਸ਼ਟਰੀ ਕੋਰਟ ਜਾਵਾਂਗੀ।’’
ਰਾਜਨੀਤਕ ਮਾਹਿਰਾਂ ਅਨੁਸਾਰ ਮਮਤਾ ਬੈਨਰਜੀ ਦਾ ਇਸ ਤਰ੍ਹਾਂ ਦਾ ਵਿਵਹਾਰ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਵਿਵਹਾਰ ਨਾਲ ਬਹੁਤ ਮੇਲ ਖਾਂਦਾ ਹੈ ਅਤੇ ਦੋਵੇਂ ਹੀ ਪੁੱਠੇ-ਸਿੱਧੇ ਬੋਲ ਬੋਲ ਰਹੇ ਹਨ।
ਆਪਣੀ ਦੂਜੀ ਪਾਰੀ ਦੌਰਾਨ ਵੱਖ-ਵੱਖ ਦੇਸ਼ਾਂ ’ਚ ਅੰਨ੍ਹੇਵਾਹ ਟੈਰਿਫ ਲਗਾਉਣ, ਕਦੇ ਵਧਾਉਣ ਅਤੇ ਕਦੇ ਘਟਾਉਣ ਨੂੰ ਲੈ ਕੇ ਆਲੋਚਨਾਵਾਂ ’ਚ ਘਿਰੇ ਟਰੰਪ ਇਨ੍ਹੀਂ ਦਿਨੀਂ ਈਰਾਨ ’ਤੇ ਹਮਲੇ ਨੂੰ ਲੈ ਕੇ ਵਿਵਾਦਾਂ ’ਚ ਘਿਰੇ ਹੋਏ ਹਨ। ਜਿੱਥੇ ਉਨ੍ਹਾਂ ਦੀ ਆਪਣੀ ਹੀ ਪਾਰਟੀ ਦੇ ਕੁਝ ਮੈਂਬਰਾਂ ਵੱਲੋਂ ਉਨ੍ਹਾਂ ਦੀ ਆਲੋਚਨਾ ਕੀਤੀ ਜਾ ਰਹੀ ਹੈ, ਉੱਥੇ ਹੀ ਡੋਨਾਲਡ ਟਰੰਪ ਵੀ ‘ਮੈਂ ਨਾ ਮਾਨੂੰ’ ਦੀ ਰਟ ਲਗਾਉਂਦੇ ਹੋਏ ਇਕ ਵਾਰ ਫਿਰ ਅਮਰੀਕਾ ਦਾ ਰਾਸ਼ਟਰਪਤੀ ਬਣਨ ਦੇ ਸੁਪਨੇ ਸੰਜੋਈ ਬੈਠੇ ਹਨ।
ਬੀਤੇ ਦਿਨ ਵ੍ਹਾਈਟ ਹਾਊਸ ’ਚ ਇਕ ਪ੍ਰੋਗਰਾਮ ਦੌਰਾਨ ਡੋਨਾਲਡ ਟਰੰਪ ਨੇ ਕਿਹਾ ਹੈ ਕਿ ਉਹ 8-9 ਸਾਲਾਂ ਬਾਅਦ ਆਪਣਾ ਅਹੁਦਾ ਛੱਡਣਗੇ। (ਹਾਲਾਂਕਿ ਅਮਰੀਕਾ ਦੇ ਕਾਨੂੰਨ ਅਨੁਸਾਰ ਅਜਿਹਾ ਸੰਭਵ ਹੀ ਨਹੀਂ ਹੈ।) ਟਰੰਪ ਦਾ ਇਹ ਕਥਨ ਸੁਣ ਕੇ ਉੱਥੇ ਮੌਜੂਦ ਲੋਕ ਹੱਸਣ ਲੱਗੇ ਤਾਂ ਟਰੰਪ ਨੇ ਕਿਹਾ ਕਿ, ‘‘ਮੈਂ ਮਜ਼ਾਕ ਨਹੀਂ ਕਰ ਰਿਹਾ। ਅਜੇ ਤਾਂ ਮੇਰੇ ਕਾਰਜਕਾਲ ਦੀ ਸ਼ੁਰੂਆਤ ਹੋਈ ਹੈ ਅਤੇ ਅਜੇ ਬਹੁਤ ਕੰਮ ਬਾਕੀ ਹੈ।’’
ਇਸ ਦੌਰਾਨ ਟਰੰਪ ਦਾ ‘ਪੋਪ ਲੀਓ 14ਵੇਂ’ ਨਾਲ ਵਿਵਾਦ ਵੀ ਜਾਰੀ ਹੈ। ਉਨ੍ਹਾਂ ਨੇ ਪੋਪ ’ਤੇ ਈਰਾਨ ਦੀ ਮਦਦ ਕਰਨ ਅਤੇ ਆਪਣੀਆਂ ਟਿੱਪਣੀਆਂ ਨਾਲ ਦੁਨੀਆ ਨੂੰ ਹੋਰ ਅਸੁਰੱਖਿਅਤ ਬਣਾਉਣ ਦਾ ਦੋਸ਼ ਲਗਾਉਂਦੇ ਹੋਏ ਕਿਹਾ ਹੈ ਕਿ, ‘‘ਪੋਪ ਇਹ ਕਹਿਣਾ ਜ਼ਿਆਦਾ ਉਚਿਤ ਸਮਝਦੇ ਹਨ ਕਿ ਈਰਾਨ ਕੋਲ ਪ੍ਰਮਾਣੂ ਹਥਿਆਰ ਹੋਣਾ ਠੀਕ ਹੈ। ਮੈਨੂੰ ਨਹੀਂ ਲੱਗਦਾ ਕਿ ਇਹ ਚੰਗੀ ਗੱਲ ਹੈ। ਪੋਪ ਕਈ ਕੈਥੋਲਿਕ ਅਤੇ ਹੋਰ ਲੋਕਾਂ ਨੂੰ ਖ਼ਤਰੇ ’ਚ ਪਾ ਰਹੇ ਹਨ।’’
ਉਕਤ ਦੋਵਾਂ ਨੇਤਾਵਾਂ ਦੇ ਆਚਰਣ ਨੂੰ ਦੇਖ ਕੇ ਰਾਜਨੀਤਕ ਮਾਹਿਰਾਂ ਦਾ ਇਹ ਕਹਿਣਾ ਸਹੀ ਹੀ ਪ੍ਰਤੀਤ ਹੁੰਦਾ ਹੈ ਕਿ ਸੱਤਾ ਦੇ ਮੋਹ ਨੂੰ ਲੈ ਕੇ ਮਮਤਾ ਬੈਨਰਜੀ ਅਤੇ ਡੋਨਾਲਡ ਟਰੰਪ ਦੋਵਾਂ ਦਾ ਆਚਰਣ ਇਕੋ ਜਿਹਾ ਹੀ ਹੈ ਅਤੇ ਇਹ ਦੋਵੇਂ ਹੀ ਇਕੋ ਜਿਹੀ ਪੁੱਠੀ-ਸਿੱਧੀ ਬੋਲੀ ਬੋਲ ਰਹੇ ਹਨ।
—ਵਿਜੇ ਕੁਮਾਰ
‘ਭਾਰਤ ’ਚ ਪਾਕਿਸਤਾਨ ਜ਼ਿੰਦਾਬਾਦ ਦੇ ਨਾਅਰੇ ਲਗਾਉਂਦੇ’ ਦੇਸ਼ਧ੍ਰੋਹੀਆਂ ’ਤੇ ਕਾਰਵਾਈ ਜ਼ਰੂਰੀ!
NEXT STORY 
