15 ਅਗਸਤ, 1947 ਨੂੰ ਸੈਂਕੜੇ ਸਾਲਾਂ ਦੀ ਗੁਲਾਮੀ ਤੋਂ ਮੁਕਤੀ ਮਗਰੋਂ ਅੱਜ ਅਸੀਂ ਆਜ਼ਾਦੀ ਦਾ 80ਵਾਂ ਦਿਵਸ ਮਨਾ ਰਹੇ ਹਾਂ। ਇਹ ਆਜ਼ਾਦੀ ਸਾਨੂੰ ਲੰਬੇ ਸੰਗਰਾਮ ਦੌਰਾਨ ਅਣਗਿਣਤ ਆਜ਼ਾਦੀ ਘੁਲਾਟੀਆਂ ਦੇ ਬਲੀਦਾਨਾਂ ਨਾਲ ਹਾਸਲ ਹੋਈ ਹੈ।
ਅੱਜ ਦੇ ਦੌਰ ’ਚ ਜਦੋਂ ਕਿ ਚਾਰੇ ਪਾਸੇ ਅਸ਼ਾਂਤੀ ਪਾਈ ਜਾਂਦੀ ਹੈ, ਇੱਥੇ ਅਸੀਂ ਆਪਣੇ ਪਾਠਕਾਂ ਲਈ ਇਸੇ ਮਹੀਨੇ ਸਾਹਮਣੇ ਆਈਆਂ ਕੁਝ ਚੰਗੀਆਂ ਖ਼ਬਰਾਂ ਪੇਸ਼ ਕਰ ਰਹੇ ਹਾਂ ਜੋ ਇਸ ਗੱਲ ਦਾ ਪ੍ਰਤੀਕ ਹਨ ਕਿ ਭਾਰਤ ਦੇ ਉੱਜਵਲ ਭਵਿੱਖ ਲਈ ਨੈਤਿਕਤਾ, ਭਾਈਚਾਰਾ ਅਤੇ ਈਮਾਨਦਾਰੀ ਦੇ ਰਾਹ ’ਤੇ ਚੱਲਣ ਵਾਲੇ ਦੇਸ਼ ਪ੍ਰੇਮੀਆਂ ਦੀ ਕਮੀ ਨਹੀਂ ਹੈ :
* 3 ਅਗਸਤ ਨੂੰ ‘ਫਰੀਦਾਬਾਦ’ (ਹਰਿਆਣਾ) ’ਚ ਇਕ ਔਰਤ ਵੱਲੋਂ ਚੋਰੀ ਦੇ ਡਰ ਕਾਰਨ ਇਕ ਬੋਰੀ ’ਚ ਲੁਕਾ ਕੇ ਰੱਖੇ ਸੋਨੇ-ਚਾਂਦੀ ਦੇ ਗਹਿਣਿਆਂ ਵਾਲੀ ਬੋਰੀ ਨੂੰ ਪਰਿਵਾਰ ਦੇ ਇਕ ਹੋਰ ਮੈਂਬਰ ਨੇ ਅਣਜਾਣੇ ’ਚ ਕਬਾੜ ਸਮਝ ਕੇ ਇਕ ਕਬਾੜੀਏ ਨੂੰ ਵੇਚ ਦਿੱਤਾ। ਜਦੋਂ ਕਬਾੜੀਏ ਨੇ ਘਰ ਜਾ ਕੇ ਬੋਰੀ ਖੋਲ੍ਹੀ, ਤਾਂ ਉਸ ’ਚ ਭਾਰੀ ਮਾਤਰਾ ’ਚ ਗਹਿਣੇ ਦੇਖ ਕੇ ਉਹ ਹੈਰਾਨ ਰਹਿ ਗਿਆ। ਉਸ ਨੇ ਤੁਰੰਤ ਉਸ ਪਰਿਵਾਰ ਨਾਲ ਸੰਪਰਕ ਕੀਤਾ ਅਤੇ ਉਨ੍ਹਾਂ ਦੀ ਪੂਰੀ ਜ਼ਿੰਦਗੀ ਦੀ ਕਮਾਈ ਉਨ੍ਹਾਂ ਨੂੰ ਸੁਰੱਖਿਅਤ ਸੌਂਪ ਦਿੱਤੀ।
* 6 ਅਗਸਤ ਨੂੰ ਪੇਂਡੂ ਬੱਚਿਆਂ ਦਾ ਭਵਿੱਖ ਸੰਵਾਰਨ ਦੀ ਅਨੋਖੀ ਮੁਹਿੰਮ ਚਲਾਉਣ ਵਾਲੇ ਰਾਜਸਥਾਨ ਦੇ ਇਕ ਆਈ. ਏ. ਐੱਸ. ਅਧਿਕਾਰੀ ‘ਜਤਿੰਦਰ ਕੁਮਾਰ ਸੋਨੀ’ ਦਾ ਇਕ ਵੀਡੀਓ ਵਾਇਰਲ ਹੋਇਆ ਜਿਨ੍ਹਾਂ ਨੇ ਸਰਕਾਰ ਦੀ ਬੇਧਿਆਨੀ ਦੀਆਂ ਸ਼ਿਕਾਰ 70 ਤੋਂ ਵੱਧ ਗ੍ਰਾਮ ਪੰਚਾਇਤਾਂ ’ਚ ਜਰਜਰ ਅਤੇ ਖੰਡਰ ਹੋ ਚੁੱਕੀਆਂ ਇਮਾਰਤਾਂ ਨੂੰ ਆਪਣੇ ਅਣਥੱਕ ਯਤਨਾਂ ਨਾਲ ਸ਼ਾਨਦਾਰ ਅਤੇ ਆਧੁਨਿਕ ਲਾਇਬ੍ਰੇਰੀਆਂ ’ਚ ਬਦਲ ਦਿੱਤਾ ਹੈ।
* 10 ਅਗਸਤ ਨੂੰ ਅਯੁੱਧਿਆ ਦੇ ‘ਰਾਮ ਮੰਤਰੀ ਕੰਪਲੈਕਸ’ ’ਚ ਸੇਵਾਦਾਰ ‘ਧਰੁਵੇਸ਼ ਮਿਸ਼ਰਾ’ ਨੂੰ ਲੱਖਾਂ ਰੁਪਏ ਮੁੱਲ ਦੀ ਹੀਰਿਆਂ ਨਾਲ ਜੜੀ ਇਕ ਸੋਨੇ ਦੀ ਚੇਨ ਮਿਲੀ। ‘ਧਰੁਵੇਸ਼ ਮਿਸ਼ਰਾ’ ਨੇ ਇਸ ਦੀ ਮਾਲਕਣ ਔਰਤ ਦਾ ਪਤਾ ਲਾ ਕੇ ਉਸ ਦੀ ਅਮਾਨਤ ਉਸ ਨੂੰ ਮੋੜ ਦਿੱਤੀ ਜੋ ਉਸ ਦੇ ਸਵਰਗੀ ਪਤੀ ਦੀ ਆਖ਼ਰੀ ਨਿਸ਼ਾਨੀ ਸੀ।
* 10 ਅਗਸਤ ਨੂੰ ਹੀ ‘ਹਰਿਦੁਆਰ’ (ਉੱਤਰਾਖੰਡ) ਤੋਂ ਪਵਿੱਤਰ ਗੰਗਾ ਜਲ ਲੈ ਕੇ ਪਰਤ ਰਹੇ ‘ਮੇਰਠ’ ਪਹੁੰਚੇ ਕਾਂਵੜੀਆਂ ਨੇ ਇਕ ਮੁਸਲਮਾਨ ਦਾ ਜਨਾਜ਼ਾ ਆਉਂਦਾ ਦੇਖ ਕੇ ਨਾ ਸਿਰਫ਼ ਆਪਣੀ ਪਵਿੱਤਰ ਯਾਤਰਾ ਨੂੰ ਕੁਝ ਦੇਰ ਲਈ ਉੱਥੇ ਹੀ ਰੋਕ ਦਿੱਤਾ, ਸਗੋਂ ਪੂਰੇ ਸਤਿਕਾਰ ਨਾਲ ਖੜ੍ਹੇ ਹੋ ਕੇ ਜਨਾਜ਼ੇ ਨੂੰ ਪਹਿਲਾਂ ਰਸਤਾ ਦਿੱਤਾ।
* 12 ਅਗਸਤ ਨੂੰ ‘ਨੂਹ’ (ਹਰਿਆਣਾ) ’ਚ ਮਦਰੱਸੇ ਦੇ ਸੈਂਕੜੇ ਵਿਦਿਆਰਥੀਆਂ ਨੇ ਇਕ ਹੱਥ ’ਚ ਕੁਰਾਨ ਅਤੇ ਦੂਜੇ ਹੱਥ ’ਚ ਭਾਰਤ ਦਾ ਰਾਸ਼ਟਰੀ ਝੰਡਾ ਫੜ ਕੇ ‘ਯਾਸੀਨ ਮੇਵਾਤ ਡਿਗਰੀ ਕਾਲਜ’ ਤੋਂ ਲੈ ਕੇ ‘ਗਾਂਧੀ ਪਾਰਕ’ ਤੱਕ ਮਾਰਚ ਕੱਢਿਆ।‘ਪਸਮਾਂਦਾ ਵਿਕਾਸ ਫਾਊਂਡੇਸ਼ਨ’ ਵੱਲੋਂ ਆਯੋਜਿਤ ਇਸ ਮਾਰਚ ਨੂੰ ‘ਇਕ ਹੱਥ ’ਚ ਕੁਰਾਨ, ਇਕ ਹੱਥ ’ਚ ਤਿਰੰਗਾ’ ਦਾ ਨਾਂ ਦਿੱਤਾ ਗਿਆ ਸੀ। ਇਸ ਮਾਰਚ ’ਚ ਲਗਭਗ 200 ਬੱਚਿਆਂ, 150 ਮੁਸਲਮਾਨ ਔਰਤਾਂ ਅਤੇ ਜ਼ਿਲੇ ਦੇ 100 ਦੇ ਲਗਭਗ ਧਾਰਮਿਕ ਆਗੂਆਂ ਨੇ ਹਿੱਸਾ ਲਿਆ। ਇਸ ਮਾਰਚ ’ਚ ਹਿੱਸਾ ਲੈਣ ਵਾਲੇ ਬੱਚਿਆਂ ਨੇ ਰਾਸ਼ਟਰ ਭਗਤੀ ਅਤੇ ਰਾਸ਼ਟਰ ਨਿਰਮਾਣ ਨਾਲ ਸਬੰਧਤ ਨਾਅਰੇ ਲਾਏ।
* 12 ਅਗਸਤ ਨੂੰ ਹੀ ‘ਮੁਜ਼ੱਫਰਨਗਰ’ (ਉੱਤਰ ਪ੍ਰਦੇਸ਼) ’ਚ ‘ਮੁਹੰਮਦ ਸ਼ਾਕਿਰ’ ਨੇ ਆਪਣੇ ਦੋ ਹਿੰਦੂ ਮਿੱਤਰਾਂ ‘ਮਿੰਟੂ’ ਅਤੇ ‘ਗੌਰਵ’ ਨਾਲ ਮਿਲ ਕੇ ਹਰਿਦੁਆਰ ਤੋਂ 201 ਲੀਟਰ ਗੰਗਾ ਜਲ ਦੀ ਭਾਰੀ ਕਾਂਵੜ ਚੁੱਕੀ। ਸਿਰ ’ਤੇ ਟੋਪੀ ਪਹਿਨੇ ਸ਼ਾਕਿਰ ‘ਬਮ-ਬਮ ਭੋਲੇ’ ਦੇ ਜੈਕਾਰੇ ਲਾਉਂਦੇ ਹੋਏ ਪੈਦਲ ਯਾਤਰਾ ’ਤੇ ਨਿਕਲੇ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਇਸ ਪਹਿਲ ਦਾ ਮੰਤਵ ਸਮਾਜ ’ਚ ‘ਜਾਤ-ਪਾਤ ਛੋੜੋ, ਇਨਸਾਨੀਅਤ ਜੋੜੋ’ ਦਾ ਸੁਨੇਹਾ ਦੇਣਾ ਅਤੇ ਭਾਈਚਾਰੇ ਨੂੰ ਮਜ਼ਬੂਤ ਕਰਨਾ ਹੈ।
* 12 ਅਗਸਤ ਨੂੰ ‘ਗਯਾ’ (ਬਿਹਾਰ) ਜ਼ਿਲੇ ਦੀ ‘ਆਮਸ ਪੰਚਾਇਤ’ ਦੇ ਸਾਬਕਾ ਮੁਖੀ ‘ਬੁਲਾਕੀ ਮਾਂਝੀ’ ਅਤੇ ਉਨ੍ਹਾਂ ਦੀ ਪਤਨੀ ਮਤੀਆ ਦੇਵੀ, ਜਿਨ੍ਹਾਂ ਦੀ ਈਮਾਨਦਾਰੀ ਅੱਜ ਵੀ ਮਿਸਾਲ ਬਣੀ ਹੋਈ ਹੈ, ਦਾ ਵੀਡੀਓ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋਇਆ।
ਇਸ ’ਚ ਦੱਸਿਆ ਗਿਆ ਹੈ ਕਿ ਸਾਲ 2001 ਤੋਂ 2011 ਤੱਕ ਪੂਰੇ 10 ਸਾਲ ਪੰਚਾਇਤ ਦੇ ਮੁਖੀ ਰਹੇ ‘ਬੁਲਾਕੀ ਮਾਂਝੀ’ ਨੇ ਸਰਕਾਰੀ ਫੰਡ ’ਚੋਂ ਇਕ ਰੁਪਿਆ ਵੀ ਆਪਣੇ ’ਤੇ ਖ਼ਰਚ ਨਹੀਂ ਕੀਤਾ। ਅੱਜ 80 ਸਾਲ ਦੀ ਉਮਰ ’ਚ ਵੀ ‘ਬੁਲਾਕੀ ਮਾਂਝੀ’ ਆਪਣੇ ਪੁਰਾਣੇ ‘ਖਪਰੈਲ’ ਦੇ ਮਕਾਨ ’ਚ ਰਹਿੰਦੇ ਹਨ ਅਤੇ ਉਨ੍ਹਾਂ ਦੇ ਬੱਚੇ ਦਿੱਲੀ ’ਚ ਮਜ਼ਦੂਰੀ ਕਰਦੇ ਹਨ।
* 12 ਅਗਸਤ ਨੂੰ ਹੀ ਸ਼੍ਰੀਨਗਰ ’ਚ ਆਯੋਜਿਤ ਵਿਸ਼ਾਲ ਤਿਰੰਗਾ ਯਾਤਰਾ ’ਚ ਲੋਕਾਂ ਨੇ ਬੇਮਿਸਾਲ ਏਕਤਾ ਅਤੇ ਉਤਸ਼ਾਹ ਦਾ ਪ੍ਰਦਰਸ਼ਨ ਕੀਤਾ। ਉਪ-ਰਾਜਪਾਲ ਮਨੋਜ ਸਿਨਹਾ ਨੇ ਕਿਹਾ ਕਿ ਕਸ਼ਮੀਰ ਦੇ ਲੋਕਾਂ ਦੀ ਇਹ ਇਕਜੁੱਟਤਾ, ਈਮਾਨਦਾਰੀ, ਸਖ਼ਤ ਮਿਹਨਤ ਅਤੇ ਸੇਵਾ ਭਾਵਨਾ ਪੂਰੇ ਦੇਸ਼ ਲਈ ਇਕ ਪ੍ਰੇਰਣਾ ਬਣ ਗਈ ਹੈ।
* 12 ਅਗਸਤ ਨੂੰ ਹੀ ਨਕਸਲ ਪ੍ਰਭਾਵਿਤ ‘ਬਸਤਰ’ (ਛੱਤੀਸਗੜ੍ਹ) ’ਚ ਉਪ-ਮੁੱਖ ਮੰਤਰੀ ‘ਵਿਜੇ ਸ਼ਰਮਾ’ ਦੀ ਅਗਵਾਈ ’ਚ ਤਿੰਨ ਦਿਨਾ ਇਤਿਹਾਸਕ ‘ਬਸਤਰ ਤਿਰੰਗਾ ਯਾਤਰਾ-2026’ ਸ਼ੁਰੂ ਕੀਤੀ ਗਈ। ਇਹ ਯਾਤਰਾ ਉਨ੍ਹਾਂ ਨਾਜ਼ੁਕ ਇਲਾਕਿਆਂ ’ਚੋਂ ਹੋ ਕੇ ਲੰਘੀ ਜੋ ਕਦੇ ਨਕਸਲ ਹਿੰਸਾ ਦੇ ਗਵਾਹ ਸਨ। ਲੋਕਾਂ ਨੇ ਹੱਥਾਂ ’ਚ ਤਿਰੰਗੇ ਲੈ ਕੇ ਇਸ ਯਾਤਰਾ ਦਾ ਸਵਾਗਤ ਕੀਤਾ, ਜੋ ਬਸਤਰ ’ਚ ਅਮਨ-ਚੈਨ ਅਤੇ ਭਾਈਚਾਰੇ ਦੇ ਨਵੇਂ ਯੁੱਗ ਦਾ ਸੰਕੇਤ ਦੇ ਰਿਹਾ ਹੈ।
‘ਵਿਜਈ ਵਿਸ਼ਵ ਤਿਰੰਗਾ ਪਿਆਰਾ, ਝੰਡਾ ਊਂਚਾ ਰਹੇ ਹਮਾਰਾ’ ਦੀ ਕਾਮਨਾ ਨਾਲ ਆਪਣੇ ਪਾਠਕਾਂ ਨੂੰ ਆਜ਼ਾਦੀ ਦਿਵਸ ਦੀ ਵਧਾਈ ਦਿੰਦੇ ਹੋਏ ਅਸੀਂ ਆਸ ਕਰਦੇ ਹਾਂ ਕਿ ਆਉਣ ਵਾਲੇ ਦਿਨਾਂ ’ਚ ਸਾਡੇ ਦਿਲਾਂ ਨੂੰ ਦੁਖਾਉਣ ਵਾਲੀਆਂ ਨਹੀਂ ਸਗੋਂ ਕੁਝ ਚੰਗਾ ਕਰਨ ਨੂੰ ਪ੍ਰੇਰਿਤ ਕਰਨ ਵਾਲੀਆਂ ਖ਼ਬਰਾਂ ਪੜ੍ਹਨ ਨੂੰ ਮਿਲਣਗੀਆਂ ਅਤੇ ਸਾਡਾ ਪਿਆਰਾ ਦੇਸ਼ ਵਿਕਾਸ ਅਤੇ ਤਰੱਕੀ ਦੀਆਂ ਪੌੜੀਆਂ ਚੜ੍ਹਦਾ ਜਾਵੇਗਾ।
—ਵਿਜੇ ਕੁਮਾਰ
ਨਸ਼ੇ ’ਚ ਪਾਇਲਟ : ਯਾਤਰੀ ਸੁਰੱਖਿਆ ’ਤੇ ਖ਼ਤਰਾ ਅਤੇ ਰੈਗੂਲੇਟਰ ਦੀ ਜ਼ਿੰਮੇਵਾਰੀ
NEXT STORY 
