ਮਹਾਰਾਸ਼ਟਰ ’ਚ 24 ਅਕਤੂਬਰ ਨੂੰ ਨਤੀਜਿਆਂ ਦੇ ਐਲਾਨ ਹੋਣ ਤੋਂ ਤੁਰੰਤ ਬਾਅਦ ਭਾਜਪਾ ਅਤੇ ਸ਼ਿਵ ਸੈਨਾ ’ਚ ਸੱਤਾ ਦੀ ਵੰਡ ’ਤੇ ਠਣ ਗਈ ਸੀ, ਜਿਸ ਦਾ ਨਤੀਜਾ ਦੋਵਾਂ ਦਾ ਗੱਠਜੋੜ ਟੁੱਟਣ ਅਤੇ 12 ਨਵੰਬਰ ਨੂੰ ਸੂਬੇ ’ਚ ਰਾਸ਼ਟਰਪਤੀ ਸ਼ਾਸਨ ਦੇ ਰੂਪ ’ਚ ਨਿਕਲਿਆ।
ਦੂਸਰੇ ਪਾਸੇ ਰਾਕਾਂਪਾ, ਸ਼ਿਵ ਸੈਨਾ ਅਤੇ ਕਾਂਗਰਸ ਦੇ ਬਾਹਰੀ ਜਾਂ ਅੰਦਰੂਨੀ ਸਮਰਥਨ ਨਾਲ ਸਰਕਾਰ ਬਣਾਉਣ ਦੀ ਚਰਚਾ ਵਿਚਾਲੇ ਅਖੀਰ 22 ਨਵੰਬਰ ਨੂੰ ਊਧਵ ਠਾਕਰੇ ਨੂੰ ਮੁੱਖ ਮੰਤਰੀ ਬਣਾ ਕੇ ਇਨ੍ਹਾਂ ਤਿੰਨਾਂ ਦਲਾਂ ਦੀ ਸਾਂਝੀ ਸਰਕਾਰ ਬਣਾਉਣ ’ਤੇ ਸਹਿਮਤੀ ਹੋ ਗਈ, ਜਿਸ ਦਾ ਐਲਾਨ 24 ਨਵੰਬਰ ਨੂੰ ਕੀਤਾ ਜਾਣਾ ਸੀ।
23 ਨਵੰਬਰ ਦੀਆਂ ਅਖਬਾਰਾਂ ’ਚ ਛਪੇ ਉਕਤ ਸਮਾਚਾਰ ਦੀ ਸਿਆਹੀ ਸੁੱਕੀ ਵੀ ਨਹੀਂ ਸੀ ਕਿ 22 ਅਤੇ 23 ਨਵੰਬਰ ਦੀ ਅੱਧੀ ਰਾਤ ਨੂੰ ਨਾਟਕੀ ਘਟਨਾਚੱਕਰ ’ਚ ਰਾਕਾਂਪਾ ਸੁਪਰੀਮੋ ਸ਼ਰਦ ਪਵਾਰ ਦੇ ਭਤੀਜੇ ਅਜੀਤ ਪਵਾਰ ਭਾਜਪਾ ਨਾਲ ਜਾ ਮਿਲੇ।
ਅਚਾਨਕ 23 ਨਵੰਬਰ ਨੂੰ ਤੜਕੇ 5.47 ਵਜੇ ਸੂਬੇ ’ਚ ਰਾਸ਼ਟਰਪਤੀ ਸ਼ਾਸਨ ਖਤਮ ਕਰ ਦਿੱਤਾ ਗਿਆ ਅਤੇ ਉਸੇ ਦਿਨ ਸਵੇਰੇ 8.01 ਵਜੇ ਦੇਵੇਂਦਰ ਫੜਨਵੀਸ ਨੂੰ ਮੁੱਖ ਮੰਤਰੀ ਅਤੇ ਅਜੀਤ ਪਵਾਰ ਨੂੰ ਉਪ ਮੁੱਖ ਮੰਤਰੀ ਦੀ ਸਹੁੰ ਚੁਕਾ ਦਿੱਤੀ ਗਈ।
23 ਨਵੰਬਰ ਸਵੇਰੇ ਇਹ ਖਬਰ ਆਉਂਦੇ ਹੀ ਮਹਾਰਾਸ਼ਟਰ ’ਚ ਭੂਚਾਲ ਜਿਹਾ ਆ ਗਿਆ ਅਤੇ ਸ਼ਿਵ ਸੈਨਾ ਨੇ ਦੋਸ਼ ਲਾਇਆ ਕਿ ‘‘ਅਜੀਤ ਪਵਾਰ ਨੇ ਜੇਲ ਜਾਣ ਤੋਂ ਬਚਣ ਲਈ ਭਾਜਪਾ ਨਾਲ ਹੱਥ ਮਿਲਾਇਆ ਹੈ ਅਤੇ ਭਾਜਪਾ ਨੇ ਉਨ੍ਹਾਂ ਨੂੰ ਬਲੈਕਮੇਲ ਕੀਤਾ।’’
ਉਸੇ ਦਿਨ ਸ਼ਾਮ ਨੂੰ ਸੁਪਰੀਮ ਕੋਰਟ ’ਚ ਸ਼ਿਵ ਸੈਨਾ, ਰਾਕਾਂਪਾ ਅਤੇ ਕਾਂਗਰਸ ਨੇ ਦੇਵੇਂਦਰ ਫੜਨਵੀਸ ਦੀ ਤਾਜਪੋਸ਼ੀ ਵਿਰੁੱਧ ਪਟੀਸ਼ਨ ਲਾ ਕੇ ਤੁਰੰਤ ਇਸ ਮਾਮਲੇ ’ਚ ਸੁਣਵਾਈ ਕਰਨ ਦੀ ਅਪੀਲ ਕੀਤੀ। ਸੁਪਰੀਮ ਕੋਰਟ ਨੇ ਐਤਵਾਰ 24 ਨਵੰਬਰ ਨੂੰ ਇਸ ਮਾਮਲੇ ’ਚ ਸੁਣਵਾਈ ਕਰਦੇ ਹੋਏ ਰਾਸ਼ਟਰਪਤੀ ਸ਼ਾਸਨ ਰੱਦ ਕਰ ਕੇ ਫੜਨਵੀਸ ਨੂੰ ਸਰਕਾਰ ਬਣਾਉਣ ਦੀ ਸਿਫਾਰਿਸ਼ ਕਰਨ ਵਾਲੇ ਰਾਜਪਾਲ ਦੇ ਹੁਕਮ ਅਤੇ ਉਨ੍ਹਾਂ ਨੂੰ ਦਿੱਤੇ ਵਿਧਾਇਕਾਂ ਦੇ ਸਮਰਥਨ ਪੱਤਰ ਦੀਆਂ ਕਾਪੀਆਂ ਪੇਸ਼ ਕਰਨ ਲਈ ਕਿਹਾ।
ਸੋਮਵਾਰ 25 ਨਵੰਬਰ ਨੂੰ ਸੁਪਰੀਮ ਕੋਰਟ ਨੇ ਸ਼ਿਵ ਸੈਨਾ, ਰਾਕਾਂਪਾ ਅਤੇ ਕਾਂਗਰਸ ਵਲੋਂ ਤੁਰੰਤ ਫਲੋਰ ਟੈਸਟ ਕਰਾਉਣ ਦੀ ਅਪੀਲ ’ਤੇ 26 ਨਵੰਬਰ ਨੂੰ ਸਵੇਰੇ 10.37 ਵਜੇ ਮਹਾਰਾਸ਼ਟਰ ਦੀ ਭਾਜਪਾ ਸਰਕਾਰ ਨੂੰ 27 ਨਵੰਬਰ ਨੂੰ ਫਲੋਰ ਟੈਸਟ ਦਾ ਹੁਕਮ ਦੇ ਦਿੱਤਾ।
ਮਾਣਯੋਗ ਜੱਜਾਂ ਨੇ ਕਿਹਾ ਕਿ ਸ਼ਾਮ 5 ਵਜੇ ਤੋਂ ਪਹਿਲਾਂ ਸਾਰੇ ਵਿਧਾਇਕ ਸਹੁੁੰ ਚੁੱਕ ਲੈਣ। ਅਦਾਲਤ ਨੇ ਫਲੋਰ ਟੈਸਟ ਲਈ ਗੁਪਤ ਮਤਦਾਨ ਨਾ ਕਰਨ ਅਤੇ ਫਲੋਰ ਟੈਸਟ ਦਾ ਲਾਈਵ ਪ੍ਰਸਾਰਣ ਕਰਨ ਦੇ ਹੁਕਮ ਦੇ ਨਾਲ ਹੀ ਪ੍ਰੋਟੈਮ ਸਪੀਕਰ ਦੀ ਤੁਰੰਤ ਨਿਯੁਕਤੀ ਕਰਨ ਦਾ ਹੁਕਮ ਵੀ ਦੇ ਦਿੱਤਾ।
ਉਕਤ ਹੁਕਮ ਤੋਂ ਬਾਅਦ ਸਿਆਸੀ ਹਲਚਲ ਹੋਰ ਤੇਜ਼ੀ ਨਾਲ ਵਧੀ ਅਤੇ ਫੈਸਲੇ ਤੋਂ ਤੁਰੰਤ ਬਾਅਦ ਅਚਾਨਕ ਅਜੀਤ ਪਵਾਰ ਫੜਨਵੀਸ ਨੂੰ ਮਿਲਣ ਗਏ ਅਤੇ ਉਥੋਂ ਆਪਣੇ ਭਰਾ ਸ਼੍ਰੀਨਿਵਾਸ ਪਵਾਰ ਦੇ ਘਰ ਚਲੇ ਗਏ। ਇਸ ਤੋਂ ਕੁਝ ਹੀ ਸਮੇਂ ਬਾਅਦ ਦੁਪਹਿਰ 2.30 ਵਜੇ ਅਜੀਤ ਪਵਾਰ ਨੇ ਅਸਤੀਫਾ ਦੇ ਦਿੱਤਾ ਅਤੇ ਉਨ੍ਹਾਂ ਦੇ ਅਸਤੀਫੇ ਤੋਂ ਬਾਅਦ ਦੁਪਹਿਰ 3.30 ਵਜੇ ਪ੍ਰੈੱਸ ਕਾਨਫਰੰਸ ’ਚ ਦੇਵੇਂਦਰ ਫੜਨਵੀਸ ਨੇ ਵੀ ਅਸਤੀਫਾ ਦੇ ਦਿੱਤਾ।
ਇਸ ਤਰ੍ਹਾਂ ਜਿੱਥੇ ਮਹਾਰਾਸ਼ਟਰ ’ਚ ਸ਼ਾਸਨ ਦੀ ਇਕ ਹੋਰ ਪਾਰੀ ਖੇਡਣ ਦਾ ਭਾਜਪਾ ਦਾ ਸੁਪਨਾ ਟੁੱਟ ਗਿਆ, ਉਥੇ ਹੀ ਅਖੀਰ ਇਕ ਵਾਰ ਫਿਰ ਸ਼ਿਵ ਸੈਨਾ, ਰਾਕਾਂਪਾ ਅਤੇ ਕਾਂਗਰਸ ਦੀ ਸਰਕਾਰ ਬਣਨ ਦਾ ਰਸਤਾ ਸਾਫ ਹੋ ਗਿਆ। ਸੰਜੇ ਰਾਊਤ ਨੇ ਕਿਹਾ ਹੈ ਕਿ ‘‘ਹੁਣ ਊਧਵ ਠਾਕਰੇ 5 ਸਾਲ ਲਈ ਮੁੱਖ ਮੰਤਰੀ ਹੋਣਗੇ। ‘ਅਜੀਤ ਦਾਦਾ’ ਨੇ ਅਸਤੀਫਾ ਦੇ ਦਿੱਤਾ ਹੈ ਅਤੇ ਹੁਣ ਉਹ ਵੀ ਸਾਡੇ ਨਾਲ ਹਨ।’’ ਗੱਠਜੋੜ ਦਾ ਨਾਂ ਮਹਾਰਾਸ਼ਟਰ ਵਿਕਾਸ ਅਘਾੜੀ ਰੱਖਿਆ ਗਿਆ ਹੈ।
ਇਹ ਲੋਕਤੰਤਰ ਅਤੇ ਨਿਆਂ ਪਾਲਿਕਾ ਦੀ ਨਿਰਪੱਖਤਾ ਦੀ ਜਿੱਤ ਹੈ ਅਤੇ ਇਹ ਪਹਿਲਾ ਮੌਕਾ ਹੈ, ਜਦੋਂ ਮਹਾਰਾਸ਼ਟਰ ’ਚ ਸ਼ਿਵ ਸੈਨਾ ਦੀ ਵਿਰੋਧੀ ਵਿਚਾਰਧਾਰਾ ਵਾਲੀਆਂ ਦੋ ਪਾਰਟੀਆਂ ਰਾਕਾਂਪਾ ਅਤੇ ਕਾਂਗਰਸ ਮਿਲ ਕੇ ਸਰਕਾਰ ਬਣਾਉਣ ਜਾ ਰਹੀਆਂ ਹਨ, ਜਿਸ ਤਰ੍ਹਾਂ ਭਾਜਪਾ ਨੇ ਹਰਿਆਣਾ ’ਚ ਆਪਣੀ ਵਿਰੋਧੀ ‘ਜਜਪਾ’ ਦੇ ਨਾਲ ਗੱਠਜੋੜ ਕਰ ਕੇ ਸਰਕਾਰ ਬਣਾਈ ਹੈ।
ਇਸ ਦੌਰਾਨ ਜਿਥੇ ਰਾਜਪਾਲ ਨੇ ਭਾਜਪਾ ਦੇ ਵਿਧਾਇਕ ਕਾਲੀ ਦਾਸ ਕੋਲਬੰਕਰ ਨੂੰ ਪ੍ਰੋਟੈਮ ਸਪੀਕਰ ਦੀ ਸਹੁੰ ਚੁਕਾ ਦਿੱਤੀ ਹੈ, ਉਥੇ ਹੀ 27 ਨਵੰਬਰ ਨੂੰ ਸਵੇਰੇ 8 ਵਜੇ ਮਹਾਰਾਸ਼ਟਰ ਵਿਧਾਨ ਸਭਾ ਦਾ ਵਿਸ਼ੇਸ਼ ਸੈਸ਼ਨ ਬੁਲਾ ਲਿਆ ਗਿਆ ਹੈ, ਜਿਸ ’ਚ ਸਾਰੇ ਵਿਧਾਇਕਾਂ ਨੂੰ ਸਹੁੰ ਚੁਕਾਈ ਜਾਏਗੀ ਅਤੇ ਰਾਜਪਾਲ ਦਾ ਸੱਦਾ ਮਿਲਣ ਤੋਂ ਬਾਅਦ ਜੇਕਰ ਕੋਈ ਚੁੱਕ-ਥੱਲ ਨਾ ਹੋਈ ਤਾਂ ਊਧਵ ਠਾਕਰੇ 1 ਦਸੰਬਰ ਨੂੰ ਸ਼ਾਮ 5 ਵਜੇ ਸ਼ਿਵਾਜੀ ਪਾਰਕ ’ਚ ਸਹੁੰ ਚੁੱਕਣਗੇ।
-ਵਿਜੇ ਕੁਮਾਰ\\\
ਫਰਜ਼ਾਂ ਦਾ ਅਹਿਸਾਸ ਕਰਵਾਉਂਦੀ ਕਦਰਾਂ-ਕੀਮਤਾ ਆਧਾਰਿਤ ਸਿੱਖਿਆ
NEXT STORY 
