ਨਵੀਂ ਦਿੱਲੀ— ਵੋਡਾਫੋਨ ਆਈਡੀਆ ਨੇ ਦੂਰਸੰਚਾਰ ਵਿਭਾਗ ਨੂੰ 1,000 ਕਰੋੜ ਰੁਪਏ ਦਾ ਭੁਗਤਾਨ ਕਰ ਦਿੱਤਾ ਹੈ। ਇਕ ਉੱਚ ਅਧਿਕਾਰੀ ਨੇ ਇਸ ਦੀ ਜਾਣਕਾਰੀ ਦਿੱਤੀ। ਇਸ ਤੋਂ ਪਹਿਲਾਂ ਕੰਪਨੀ ਨੇ ਸੋਮਵਾਰ ਨੂੰ 'ਐਡਜਸਟਡ ਗਰੋਸ ਰੈਵੇਨਿਊ (ਏ. ਜੀ. ਆਰ.)' ਬਕਾਏ ਨੂੰ ਲੈ ਕੇ 2500 ਕਰੋੜ ਰੁਪਏ ਦਾ ਭੁਗਤਾਨ ਕੀਤਾ ਸੀ। ਕੰਪਨੀ ਨੇ ਇਹ ਭੁਗਤਾਨ ਉਸ ਵਕਤ ਕੀਤਾ ਹੈ ਜਦੋਂ ਹਾਲ ਹੀ 'ਚ ਸੁਪਰੀਮ ਕੋਰਟ ਨੇ ਐਡਜਸਟਡ ਗਰੋਸ ਰੈਵੇਨਿਊ (ਏ. ਜੀ. ਆਰ.) ਦੀ ਪੇਮੈਂਟ ਕਰਨ ਲਈ ਹੋਰ ਸਮਾਂ ਦੇਣ ਤੋਂ ਇਨਕਾਰ ਕਰ ਦਿੱਤਾ ਸੀ।
14 ਫਰਵਰੀ ਨੂੰ ਸੁਪਰੀਮ ਕੋਰਟ ਨੇ ਟੈਲੀਕਾਮਸ ਫਰਮਾਂ ਨੂੰ 17 ਮਾਰਚ ਤੱਕ ਏ. ਜੀ. ਆਰ. ਦੇ ਬਕਾਏ ਦੇ ਰੂਪ 'ਚ 1 ਲੱਖ ਕਰੋੜ ਰੁਪਏ ਤੋਂ ਵੱਧ ਦਾ ਭੁਗਤਾਨ ਕਰਨ ਦੇ ਨਿਰਦੇਸ਼ ਦਿੱਤੇ ਸਨ। ਇਸ ਨਾਲ ਸਭ ਤੋਂ ਵੱਧ ਮਾਰ ਵੋਡਾਫੋਨ ਆਈਡੀਆ ਨੂੰ ਪਈ ਹੈ। ਦਸੰਬਰ 2019 ਤੱਕ ਦੇ ਡਾਟਾ ਮੁਤਾਬਕ, ਇਸ ਕੋਲ ਸਿਰਫ 12,530 ਕਰੋੜ ਨਕਦ ਅਤੇ ਇਸ ਦੇ ਬਰਾਬਰ ਦਾ ਰਿਜ਼ਰਵ ਹੈ, ਜਦੋਂ ਕਿ 1.2 ਲੱਖ ਕਰੋੜ ਰੁਪਏ ਦੇ ਭਾਰੀ ਭਰਕਮ ਕਰਜ਼ ਨਾਲ ਜੂਝ ਰਹੀ ਹੈ।
ਵੋਡਾਫੋਨ ਆਈਡੀਆ 'ਤੇ 53 ਹਜ਼ਾਰ ਕਰੋੜ ਰੁਪਏ ਦਾ ਏ. ਜੀ. ਆਰ. ਬਕਾਇਆ ਹੈ। ਇਸ ਤੋਂ ਇਲਾਵਾ ਟਾਟਾ ਟੈਲੀਸਰਵਿਸਿਜ਼ ਨੂੰ ਇਕ-ਦੋ ਦਿਨਾਂ 'ਚ ਪੂਰੇ ਬਕਾਏ ਦਾ ਭੁਗਤਾਨ ਕਰਨ ਲਈ ਨੋਟਿਸ ਭੇਜਿਆ ਗਿਆ ਹੈ। ਟਾਟਾ ਟੈਲੀਸਰਵਿਸਿਜ਼ ਨੇ ਸੋਮਵਾਰ 2,197 ਕਰੋੜ ਰੁਪਏ ਦਾ ਭੁਗਤਾਨ ਕੀਤਾ ਹੈ। ਇਸ 'ਤੇ 14 ਹਜ਼ਾਰ ਕਰੋੜ ਰੁਪਏ ਤੋਂ ਜ਼ਿਆਦਾ ਦਾ ਬਕਾਇਆ ਹੈ। ਦੂਰਸੰਚਾਰ ਵਿਭਾਗ (ਡੀ. ਓ. ਟੀ.) ਦੇ ਹਿਸਾਬ ਨਾਲ ਭਾਰਤੀ ਏਅਰਟੈੱਲ 'ਤੇ ਏ. ਜੀ. ਆਰ. ਦੇ ਤੌਰ 'ਤੇ 35,586 ਕਰੋੜ ਰੁਪਏ ਦਾ ਬਕਾਇਆ ਹੈ। ਏਅਰਟੈੱਲ ਨੇ ਇਸ 'ਚੋਂ 10,000 ਕਰੋੜ ਰੁਪਏ ਦੀ ਪੇਮੈਂਟ ਚੁੱਕਾ ਦਿੱਤੀ ਹੈ। ਨਿਯਮਾਂ ਮੁਤਾਬਕ, ਬਕਾਇਆ ਭੁਗਤਾਨ ਨਾ ਕਰਨ 'ਤੇ ਸਰਕਾਰ ਕੰਪਨੀਆਂ ਦੀ ਬੈਂਕ ਗਾਰੰਟੀ ਕੈਸ਼ ਕਰਾ ਸਕਦੀ ਹੈ ਤੇ ਲਾਇਸੈਂਸ ਵੀ ਰੱਦ ਕਰ ਸਕਦੀ ਹੈ।
ਵਿਦੇਸ਼ੀ ਮੰਗ ਨਾਲ ਚੜ੍ਹੇਗਾ ਟਮਾਟਰ
NEXT STORY 
