ਸ਼ਾਹਕੋਟ (ਅਰੁਣ)— ਸ਼ਾਹਕੋਟ ਪੁਲਸ ਵਲੋਂ ਵਿਦੇਸ਼ ਭੇਜਣ ਦੇ ਨਾਂ 'ਤੇ 32 ਲੱਖ ਰੁਪਏ ਠੱਗਣ ਵਾਲੇ ਇਕ ਕਥਿਤ ਭਗੌੜੇ ਟਰੈਵਲ ਏਜੰਟ ਨੂੰ ਸ਼ਾਹਕੋਟ ਪੁਲਸ ਵੱਲੋਂ ਨਵੀਂ ਦਿੱਲੀ ਏਅਰਪੋਰਟ ਤੋਂ ਗ੍ਰਿਫਤਾਰ ਕੀਤਾ ਗਿਆ ਹੈ। ਥਾਣਾ ਮੁਖੀ ਸ਼ਾਹਕੋਟ ਸੁਰਿੰਦਰ ਕੁਮਾਰ ਨੇ ਦੱਸਿਆ ਕਿ 19 ਅਗਸਤ 2017 ਨੂੰ ਥਾਣਾ ਮਹਿਤਪੁਰ ਜਗਮੀਤ ਸਿੰਘ ਵਾਸੀ ਪਰਜੀਆਂ ਖੁਰਦ ਦੀ ਸ਼ਿਕਾਇਤ 'ਤੇ ਇਕ ਮਾਮਲਾ ਦਰਜ ਕੀਤਾ ਗਿਆ ਸੀ। ਸ਼ਿਕਾਇਤ 'ਚ ਜਗਮੀਤ ਨੇ ਦੋਸ਼ ਲਾਏ ਸਨ ਕਿ ਦਵਿੰਦਰ ਕੁਮਾਰ ਪਰਾਸ਼ਰ ਵਾਸੀ ਜਲੰਧਰ ਨੇ ਉਸ ਨੂੰ ਪੱਕੇ ਤੌਰ 'ਤੇ ਅਮਰੀਕਾ ਭੇਜਣ ਦੇ ਨਾਂ 'ਤੇ 32 ਲੱਖ 44 ਹਜ਼ਾਰ 150 ਰੁਪਏ ਲਏ ਸਨ ਪਰ ਦਵਿੰਦਰ ਨੇ ਨਾਜਾਇਜ਼ ਤੌਰ 'ਤੇ ਭੇਜ ਦਿੱਤਾ, ਜਿਥੇ ਉਹ ਰਾਸਤੇ ਵਿਚ ਹੀ ਫੜਿਆ ਗਿਆ ਅਤੇ ਉਸ ਨੂੰ ਵਾਪਸ ਭੇਜ ਦਿੱਤਾ ਗਿਆ।
ਦਰਜ ਮਾਮਲੇ ਦੇ ਆਧਾਰ 'ਤੇ ਮਾਣਯੋਗ ਅਦਾਲਤ ਤਨਵੀਰ ਸਿੰਘ ਜੇ. ਐੱਮ. ਆਈ. ਸੀ. ਨਕੋਦਰ ਵਲੋਂ 6 ਜੂਨ 2018 ਨੂੰ ਦਵਿੰਦਰ ਨੂੰ ਪੀ. ਓ. ਕਰਾਰ ਦਿੱਤਾ ਗਿਆ ਸੀ। ਇਸ ਸਬੰਧੀ ਥਾਣਾ ਸ਼ਾਹਕੋਟ ਵਲੋਂ ਹੁਣ ਦਵਿੰਦਰ ਜਦੋਂ ਥਾਈਲੈਂਡ ਜਾਣ ਲਈ ਨਵੀਂ ਦਿੱਲੀ ਏਅਰਪੋਰਟ 'ਤੇ ਗਿਆ ਤਾਂ ਉਸ ਸਬੰਧੀ ਪਹਿਲਾਂ ਤੋਂ ਜਾਰੀ ਐੱਲ. ਓ. ਸੀ. ਕਾਰਣ ਦਵਿੰਦਰ ਕੁਮਾਰ ਪਰਾਸ਼ਰ ਨੂੰ ਏਅਰਪੋਰਟ 'ਤੇ ਰੋਕ ਲਿਆ ਗਿਆ, ਜਿਥੋਂ ਭੁਪਿੰਦਰ ਸਿੰਘ ਚੌਕੀ ਇੰਚਾਰਜ ਤਲਵੰਡੀ ਸੰਘੇੜਾ ਨੇ ਸਮੇਤ ਪੁਲਸ ਪਾਰਟੀ ਏਅਰਪੋਰਟ ਤੋਂ ਦਵਿੰਦਰ ਕੁਮਾਰ ਪਰਾਸ਼ਰ ਨੂੰ ਗ੍ਰਿਫਤਾਰ ਕੀਤਾ। ਥਾਣਾ ਮੁਖੀ ਨੇ ਦੱਸਿਆ ਕਿ ਦਵਿੰਦਰ ਕੁਮਾਰ ਪਰਾਸ਼ਰ ਨੂੰ ਅਦਾਲਤ ਵਿਚ ਪੇਸ਼ ਕਰ ਕੇ ਇਕ ਦਿਨ ਦਾ ਪੁਲਸ ਰਿਮਾਂਡ ਹਾਸਲ ਕੀਤਾ ਗਿਆ ਹੈ, ਜਿਸ ਕੋਲੋਂ ਹੋਰ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।
ਲੁਧਿਆਣਾ ਜੇਲ ਕਾਂਡ ਤੋਂ ਬਾਅਦ ਰੰਧਾਵਾ 'ਤੇ ਫੁੱਟਿਆ ਸੁਖਬੀਰ ਦਾ ਗੁੱਸਾ, ਜਾਣੋ ਕੀ ਬੋਲੇ
NEXT STORY 
