ਮੁੰਬਈ- 15 ਮਈ ਨੂੰ ਸਿਨੇਮਾ ਘਰਾਂ ’ਚ ਰਿਲੀਜ਼ ਹੋਣ ਵਾਲੀ ਰੋਮਾਂਟਿਕ-ਕਾਮੇਡੀ ਫ਼ਿਲਮ ‘ਪਤੀ, ਪਤਨੀ ਔਰ ਵੋਹ ਦੋ’ ਨੂੰ ਮੁਦੱਸਰ ਅਜ਼ੀਜ਼ ਨੇ ਡਾਇਰੈਕਟ ਕੀਤਾ ਹੈ। ਫਿਲਮ ’ਚ ਆਯੁਸ਼ਮਾਨ ਖੁਰਾਨਾ, ਸਾਰਾ ਅਲੀ ਖਾਨ, ਵਾਮਿਕਾ ਗੱਬੀ ਤੇ ਰਕੁਲਪ੍ਰੀਤ ਸਿੰਘ ਮੁੱਖ ਭੂਮਿਕਾਵਾਂ ’ਚ ਨਜ਼ਰ ਆਉਣਗੇ। ਇਹ ਫਿਲਮ ਸਾਲ 2019 ’ਚ ਆਈ ਫਿਲਮ ਦਾ ਸਟੈਂਡਅਲੋਨ ਸੀਕਵਲ ਹੈ। ਫਿਲਮ ’ਚ ਪ੍ਰਜਾਪਤੀ ਪਾਂਡੇ ਦੇ ਆਲੇ-ਦੁਆਲੇ ਤਿੰਨ ਐਕਟ੍ਰੈੱਸ ਹਨ। ਫਿਲਮ ਬਾਰੇ ਸਟਾਰਕਾਸਟ ਆਯੁਸ਼ਮਾਨ ਖੁਰਾਨਾ, ਸਾਰਾ ਅਲੀ ਖਾਨ, ਵਾਮਿਕਾ ਗੱਬੀ, ਰਕੁਲਪ੍ਰੀਤ ਸਿੰਘ ਅਤੇ ਨਿਰਦੇਸ਼ਕ ਮੁਦੱਸਰ ਅਜ਼ੀਜ਼ ਨੇ ਪੰਜਾਬ ਕੇਸਰੀ/ਨਵੋਦਿਆ ਟਾਈਮਜ਼/ਜਗਬਾਣੀ/ਹਿੰਦ ਸਮਾਚਾਰ ਨਾਲ ਵਿਸ਼ੇਸ਼ ਗੱਲਬਾਤ ਕੀਤੀ। ਪੇਸ਼ ਹਨ ਮੁੱਖ ਅੰਸ਼ ...
ਪਿਓਰ ਫੈਮਿਲੀ ਐਂਟਰਟੇਨਮੈਂਟ
ਪ੍ਰ. ਤੁਹਾਡੀ ਫਿਲਮਾਂ ਦੀ ਚੋਣ ਹਮੇਸ਼ਾ ਵੱਖਰੀ ਹੁੰਦੀ ਹੈ। ਇਸ ਫਿਲਮ ਲਈ ‘ਹਾਂ’ ਕਹਿਣ ਦਾ ਸਭ ਤੋਂ ਵੱਡਾ ਕਾਰਨ ਕੀ ਸੀ?
-ਸਭ ਤੋਂ ਵੱਡਾ ਕਾਰਨ ਪਿਓਰ ਫੈਮਿਲੀ ਐਂਟਰਟੇਨਮੈਂਟ। ਮੈਨੂੰ ਲੱਗਦਾ ਹੈ ਕਿ ਕਲਾਸਿਕ ਕਾਮੇਡੀ ਫਿਲਮਾਂ ਦੀ ਹਮੇਸ਼ਾ ਜਗ੍ਹਾ ਹੁੰਦੀ ਹੈ। ਮੈਂ ਬਹੁਤ ਸਮੇਂ ਤੋਂ ਇਸ ਤਰ੍ਹਾਂ ਦੀ ਫਿਲਮ ਕਰਨਾ ਚਾਹੁੰਦਾ ਸੀ। ਮੈਂ ਪੁਰਾਣੇ ਸਮੇਂ ਤੋਂ ‘ਪਤੀ, ਪਤਨੀ ਔਰ ਵੋ’ ਦਾ ਫੈਨ ਰਿਹਾ ਹਾਂ। ਖਾਸ ਕਰ ਕੇ ਸੰਜੀਵ ਕੁਮਾਰ ਜੀ ਦੇ ਦੌਰ ਤੋਂ। ਮੈਨੂੰ ਖੁਸ਼ੀ ਹੈ ਕਿ ਮੁਦੱਸਰ ਜੀ ਨੇ ਇਸ ਨੂੰ ਇਕ ਵੱਖਰੇ ਪੱਧਰ ’ਤੇ ਪਹੁੰਚਾਇਆ ਹੈ। ਇਹ ਸਿਰਫ਼ ਰੋਮਾਂਟਿਕ ਕਾਮੇਡੀ ਨਹੀਂ ਹੈ, ਸਗੋਂ ਪੂਰੀ ਤਰ੍ਹਾਂ ਕਾਮੇਡੀ ਫਿਲਮ ਹੈ। ਮੈਂ ਅਜਿਹੀ ਫਿਲਮ ਦਾ ਹਿੱਸਾ ਬਣਨਾ ਚਾਹੁੰਦਾ ਸੀ।
ਪ੍ਰ. ਤੁਹਾਡਾ ਕਾਮਿਕ ਟਾਈਮਿੰਗ ਹਮੇਸ਼ਾ ਸ਼ਾਨਦਾਰ ਹੁੰਦਾ ਹੈ। ਇਸ ਲਈ ਤਿਆਰੀ ਕਰਦੇ ਹੋ, ਜਾਂ ਇਹ ਕੁਦਰਤੀ ਹੈ?
-ਮੈਂ ਜ਼ਿਆਦਾ ਤਿਆਰੀ ਨਹੀਂ ਕਰਦਾ। ਇਸ ਫਿਲਮ ’ਚ ਮੈਂ ਪੂਰੀ ਤਰ੍ਹਾਂ ਮੁਦੱਸਰ ਸਰ ਨੂੰ ਫੋਲੋ ਕੀਤਾ, ਕਿਉਂਕਿ ਉਨ੍ਹਾਂ ਦੀ ਖੁਦ ਦੀ ਕਾਮਿਕ ਟਾਈਮਿੰਗ ਬਹੁਤ ਸ਼ਾਨਦਾਰ ਹੈ। ਮੈਂ ਚਾਹੁੰਦਾ ਸੀ ਕਿ ਇਸ ਫਿਲਮ ਵਿਚ ਮੇਰਾ ਬੋਲਣ ਦਾ ਅੰਦਾਜ਼ ਦੂਜੀਆਂ ਫਿਲਮਾਂ ਨਾਲੋਂ ਥੋੜ੍ਹਾ ਵੱਖਰਾ ਹੋਵੇ ਤੇ ਉਹ ਸੁਰ ਮੈਨੂੰ ਉਨ੍ਹਾਂ ਨੇ ਦਿੱਤਾ।
ਮਜ਼ੇਦਾਰ ਅਤੇ ਵੱਖਰੀ ਕਿਸਮ ਦਾ ਕਿਰਦਾਰ
ਪ੍ਰ. ਆਪਣੇ ਕਿਰਦਾਰ ਬਾਰੇ ਕੁੱਝ ਦੱਸੋ। ਦਰਸ਼ਕਾਂ ਨੂੰ ਕੀ ਨਵਾਂ ਮਿਲੇਗਾ?
- ਮੇਰੇ ਕਿਰਦਾਰ ਦਾ ਨਾਂ ਨੀਲੋਫਰ ਖਾਨ ਹੈ। ਇਸ ਤਰ੍ਹਾਂ ਦਾ ਡਾਇਲਾਗ ਸਟਾਈਲ ਤੇ ਕਿਰਦਾਰ ਪਹਿਲਾਂ ਕਦੇ ਨਹੀਂ ਕੀਤਾ। ਇਸ ਦਾ ਸਾਰਾ ਕ੍ਰੇਡਿਟ ਮੁਦੱਸਰ ਸਰ ਨੂੰ ਜਾਂਦਾ ਹੈ, ਕਿਉਂਕਿ ਉਨ੍ਹਾਂ ਨੇ ਇਸ ਕਿਰਦਾਰ ਦੀ ਕਾਮਿਕ ਟਾਈਮਿੰਗ ਅਤੇ ਭਾਸ਼ਾ ਬਹੁਤ ਵੱਖਰੀ ਬਣਾਈ ਹੈ। ਇਹ ਇਕ ਬਹੁਤ ਹੀ ਮਜ਼ੇਦਾਰ ਅਤੇ ਵੱਖਰੀ ਤਰ੍ਹਾਂ ਦੀ ਭੂਮਿਕਾ ਹੈ, ਜੋ ਮੈਂ ਪਹਿਲਾਂ ਕਿਸੇ ਫੀਮੇਲ ਕਰੈਕਟਰ ਲਈ ਪੜ੍ਹੀ ਜਾਂ ਨਿਭਾਈ ਨਹੀਂ। ਉਹ ਬਹੁਤ ਵਿਅੰਗਾਤਮਕ ਹੈ, ਬੇਹੱਦ ਇੰਡੀਪੈਂਡੇਂਟ ਹੈ ਅਤੇ ਬਹੁਤ ਹੀ ਮਜ਼ੇਦਾਰ ਕਿਰਦਾਰ ਹੈ। ਮੈਨੂੰ ਇਸ ਨੂੰ ਨਿਭਾਉਣ ਵਿਚ ਬਹੁਤ ਮਜ਼ਾ ਆਇਆ।
ਪ੍ਰ. ਤੁਹਾਡੀ ਆਨਸਕ੍ਰੀਨ ਕੈਮਿਸਟਰੀ ਹਰ ਅਦਾਕਾਰ ਨਾਲ ਬਹੁਤ ਵਧੀਆ ਨਜ਼ਰ ਆਉਂਦੀ ਹੈ। ਇਸ ਦਾ ਰਾਜ਼ ਕੀ ਹੈ?
- ਉਹ ਸਾਡਾ ਕੰਮ ਹੈ। ਬਿਲਕੁਲ। ਇਕ ਅਦਾਕਾਰ ਵਜੋਂ ਇਹ ਸਾਡੀ ਜ਼ਿੰਮੇਵਾਰੀ ਹੈ ਕਿ ਸਕ੍ਰੀਨ ’ਤੇ ਕੈਮਿਸਟਰੀ ਨੈਚੁਰਲ ਲੱਗੇ। ਇਸ ਲਈ ਕੋਈ ਖਾਸ ਤਕਨੀਕ ਨਹੀਂ ਹੁੰਦੀ। ਜਾਂ ਤਾਂ ਇਹ ਬਣ ਜਾਂਦੀ ਹੈ ਜਾਂ ਨਹੀਂ ਬਣਦੀ ਪਰ ਚੰਗੀ ਸਕ੍ਰਿਪਟ ਬਹੁਤ ਮਹੱਤਵਪੂਰਨ ਹੈ।
3 ਸਾਲਾਂ ਬਾਅਦ ਕਾਮੇਡੀ ਕਰ ਰਹੀ
ਪ੍ਰ. ਤੁਹਾਡੇ ਹੁਣ ਤੱਕ ਦੇ ਕਿਰਦਾਰਾਂ ਤੋਂ ਇਹ ਭੂਮਿਕਾ ਕਿੰਨੀ ਵੱਖਰੀ ਹੈ?
- ਇਮਾਨਦਾਰੀ ਨਾਲ ਕਹਾਂ ਤਾਂ ‘ਜ਼ਰਾ ਹਟਕੇ ਜ਼ਰਾ ਬਚਕੇ’ ਤੋਂ ਬਾਅਦ ਇਹ ਮੇਰੀ ਅਗਲੀ ਕਾਮੇਡੀ ਫਿਲਮ ਹੈ। ਮੈਂ ਲੱਗਭਗ ਤਿੰਨ ਸਾਲਾਂ ਬਾਅਦ ਇਸ ਤਰ੍ਹਾਂ ਦੀ ਕਾਮੇਡੀ ਕਰ ਰਹੀ ਹਾਂ। ਇਸ ਫਿਲਮ ਦਾ ਪੂਰਾ ਯੂਨੀਵਰਸ ਬਹੁਤ ਮਜ਼ੇਦਾਰ ਹੈ। ਸ਼ਾਇਦ ਇਸ ਤਰ੍ਹਾਂ ਦੀ ਕਾਮੇਡੀ ਮੈਂ ਪਹਿਲੀ ਵਾਰ ਕੀਤੀ ਹੈ। ਜਦੋਂ ਮੈਂ ਇਸ ਦੀ ਸਕ੍ਰਿਪਟ ਸੁਣੀ ਸੀ ਤਾਂ ਮੈਨੂੰ ਲੱਗਾ ਕਿ ਹਰੇਕ ਕਿਰਦਾਰ ਦਾ ਸੁਰ ਬਹੁਤ ਹੀ ਵੱਖਰਾ ਹੈ। ਹਰੇਕ ਕਿਰਦਾਰ ਦੀਆਂ ਵੱਖੋ-ਵੱਖਰੀਆਂ ਪਰਤਾਂ ਹਨ। ਸਕ੍ਰਿਪਟ ਸੁਣਨ ’ਚ ਵੀ ਮਜ਼ਾ ਆਇਆ ਅਤੇ ਸ਼ੂਟ ਕਰਨ ’ਚ ਵੀ। ਮੈਨੂੰ ਉਮੀਦ ਹੈ ਕਿ ਦਰਸ਼ਕਾਂ ਨੂੰ ਦੇਖਣ ’ਚ ਵੀ ਆਨੰਦ ਆਏਗਾ।
ਆਯੁਸ਼ਮਾਨ ਖੁਰਾਨਾ ਦੇ ‘ਹਾਂ’ ਕਹਿਣ ਨਾਲ ਵਧਿਆ ਫਿਲਮ ਦਾ ਮਜ਼ਾ : ਮੁਦੱਸਰ ਅਜ਼ੀਜ਼
ਪ੍ਰ. ਤੁਹਾਡੀਆਂ ਫਿਲਮਾਂ ’ਚ ਰਿਸ਼ਤਿਆਂ ਅਤੇ ਵਿਆਹ ਦੇ ਆਲੇ-ਦੁਆਲੇ ਕਾਫ਼ੀ ਕਹਾਣੀਆਂ ਦੇਖਣ ਨੂੰ ਮਿਲਦੀਆਂ ਹਨ। ਕੀ ਕਾਰਨ ਹੈ?
-ਮੈਂ ਅਕਸਰ ਕਹਿੰਦਾ ਹਾਂ ਕਿ ਵਿਆਹ ਦੇ ਰਿਸਤੇ ’ਚ ਬਹੁਤ ਰਸ ਹੁੰਦਾ ਹੈ ਤੇ ਹਿੰਦੋਸਤਾਨ ’ਚ ਵਿਆਹ ਲੋਕਾਂ ਦੀ ਜ਼ਿੰਦਗੀ ਦਾ ਬਹੁਤ ਮਹੱਤਵਪੂਰਨ ਹਿੱਸਾ ਹੈ। ਜ਼ਾਹਿਰ ਹੈ ਕਿ ਉੱਥੇ ਕਹਾਣੀਆਂ ਵੀ ਬਹੁਤ ਮਿਲਦੀਆਂ ਹਨ ਅਤੇ ਲੋਕਾਂ ਨੂੰ ਹਾਸਾ ਵੀ ਬਹੁਤ ਆਉਂਦਾ ਹੈ। ਸਾਡਾ ਮਕਸਦ ਐਂਟਰਟੇਨਮੈਂਟ ਦੇਣਾ ਹੁੰਦਾ ਹੈ, ਇਸ ਲਈ ਸ਼ਾਇਦ ਤੁਹਾਨੂੰ ਮੇਰੀ ਹਰ ਫਿਲਮ ’ਚ ਵਿਆਹ ਜਾਂ ਰਿਸ਼ਤਿਆਂ ਦਾ ਕੋਈ ਨਾ ਕੋਈ ਪਹਿਲੂ ਦੇਖਣ ਨੂੰ ਮਿਲ ਜਾਂਦਾ ਹੈ।
ਪ੍ਰ. ਅੱਜ ਦੇ ਦੌਰ ’ਚ ਪਿਆਰ ਅਤੇ ਰਿਸ਼ਤਿਆਂ ਦੀ ਭਾਸ਼ਾ ਬਦਲ ਗਈ ਹੈ। ਤੁਸੀਂ ਇਸ ਨੂੰ ਫਿਲਮ ’ਚ ਕਿਸ ਤਰ੍ਹਾਂ ਸ਼ਾਮਲ ਕੀਤਾ?
-ਮੇਰਾ ਫੋਕਸ ਇਸ ਗੱਲ ’ਤੇ ਨਹੀਂ ਸੀ ਕਿ ਮੈਂ ਕਿਸੇ ਖਾਸ ਦੌਰ ਦੀ ਭਾਸ਼ਾ ਨੂੰ ਫੜਾਂ। ਮੇਰੀ ਕੋਸ਼ਿਸ਼ ਸੀ ਕਿ ਇਕ ਨਵੀਂ ਅਤੇ ਵੱਖਰੀ ਸਥਿਤੀ ਬਣਾਈ ਜਾਏ। ਇਸ ਫਿਲਮ ਦਾ ਪਤੀ ਭਾਵ ਪ੍ਰਜਾਪਤੀ ਪਾਂਡੇ ਬਹੁਤ ‘ਵਾਈਫ ਪ੍ਰਾਊਡ’ ਵਿਅਕਤੀ ਹੈ। ਹੁਣ ਜੇ ਅਜਿਹੇ ਆਦਮੀ ਨੂੰ ਕਿਸੇ ਗਲਤਫਹਿਮੀ ਜਾਂ ਸ਼ੱਕ ਦੀ ਸਥਿਤੀ ਵਿਚ ਪਾ ਦਿੱਤਾ ਜਾਏ ਤਾਂ ਉੱਥੋਂ ਬਹੁਤ ਮਜ਼ੇਦਾਰ ਕਾਮੇਡੀ ਪੈਦਾ ਹੋ ਸਕਦੀ ਹੈ। ‘ਪਤੀ, ਪਤਨੀ ਔਰ ਵੋ’ ਨਾਂ ਸੁਣਦੇ ਹੀ ਅਕਸਰ ਲੋਕਾਂ ਨੂੰ ਲੱਗਦਾ ਹੈ ਕਿ ਪਤੀ ਕੁਝ ਗਲਤ ਕਰੇਗਾ, ਪਰ ਮੈਂ ਖੁਦ ਨੂੰ ਚੁਣੌਤੀ ਦਿੱਤੀ ਕਿ ਇੱਥੇ ਪਤੀ ਕੁਝ ਨਹੀਂ ਕਰੇਗਾ, ਫਿਰ ਵੀ ਕਾਮੇਡੀ ਆਫ ਐਰਰਸ ਕਿਵੇਂ ਬਣਾਈ ਜਾਏ। ਉੱਥੋਂ ਹੀ ਇਸ ਕਹਾਣੀ ਦੀ ਸ਼ੁਰੂਆਤ ਹੋਈ।
ਪ੍ਰ. ਸਟਾਰ ਕਾਸਟ ’ਚ ਸਭ ਤੋਂ ਆਸਾਨ ਅਤੇ ਸਭ ਤੋਂ ਮੁਸ਼ਕਲ ਅਦਾਕਾਰ ਕੌਣ ਸੀ?
-ਮੈਂ ਕਿਸੇ ਨੂੰ ਫੇਵਰੇਟ ਨਹੀਂ ਕਹਿ ਸਕਦਾ, ਪਰ ਮੈਂ ਇਹ ਜ਼ਰੂਰ ਕਹਾਂਗਾ ਕਿ ਇਸ ਸਮੇਂ ਤਿੰਨੋਂ ਅਭਿਨੇਤਰੀਆਂ ਚੰਗੀ ਕਾਮੇਡੀ ਫਿਲਮ ਕਰਨਾ ਚਾਹੁੰਦੀਆਂ ਸਨ ਤੇ ਇਹ ਸਾਡੇ ਲਈ ਚੰਗੀ ਗੱਲ ਸੀ। ਉਨ੍ਹਾਂ ਸਾਰਿਆਂ ਨਾਲ ਕੰਮ ਕਰਨਾ ਦਾ ਅਨੁਭਵ ਵੱਖਰਾ ਅਤੇ ਸ਼ਾਨਦਾਰ ਸੀ। ਜਿੱਥੇ ਤੱਕ ਆਯੁਸ਼ਮਾਨ ਦੀ ਗੱਲ ਹੈ, ਮੈਂ ਕਈ ਸਾਲਾਂ ਤੋਂ ਆਪਣੀ ਲੱਗਭਗ ਹਰ ਸਕ੍ਰਿਪਟ ਲੈ ਕੇ ਉਨ੍ਹਾਂ ਕੋਲ ਗਿਆ ਹਾਂ। ਇਸ ਵਾਰ ਜਦੋਂ ਉਨ੍ਹਾਂ ਨੇ ਕਿਹਾ, ਸਰ, ਇਸ ’ਚ ਮਜ਼ਾ ਆ ਗਿਆ ਤਾਂ ਮੈਨੂੰ ਬਹੁਤ ਖੁਸ਼ੀ ਹੋਈ। ਮੈਂ ਹਮੇਸ਼ਾ ਆਯੁਸ਼ਮਾਨ ਨੂੰ ਡਾਇਰੈਕਟ ਕਰਨਾ ਚਾਹੁੰਦਾ ਸੀ, ਕਿਉਂਕਿ ਅੱਜ ਦੇ ਸਮੇਂ ’ਚ ਕਾਮੇਡੀ ਨੂੰ ਮਜ਼ਬੂਤੀ ਨਾਲ ਸੰਭਾਲਣ ਵਾਲੇ ਬਹੁਤ ਘੱਟ ਕਲਾਕਾਰ ਹਨ।
ਸੈੱਟ ’ਤੇ ਬਹੁਤ ਹਾਸਾ-ਮਜ਼ਾਕ ਚੱਲਦਾ ਸੀ
ਪ੍ਰ. ਫਿਲਮ ਦੀ ਸ਼ੂਟਿੰਗ ਦਾ ਅਨੁਭਵ ਕਿਹੋ ਜਿਹਾ ਰਿਹਾ?
-ਬਹੁਤ ਸ਼ਾਨਦਾਰ। ਸ਼ੂਟਿੰਗ ਦੌਰਾਨ ਅਸੀਂ ਬਹੁਤ ਮਸਤੀ ਕੀਤੀ। ਸੈੱਟ ’ਤੇ ਹਰ ਸਮੇਂ ਹਾਸਾ-ਮਜ਼ਾਕ ਚੱਲਦਾ ਰਹਿੰਦਾ ਸੀ। ਬਹੁਤ ਕੁਝ ਸਿੱਖਣ ਨੂੰ ਮਿਲਿਆ, ਖਾਸ ਕਰ ਕੇ ਕਾਮਿਕ ਟਾਈਮਿੰਗ। ਇਸ ਫਿਲਮ ਦੇ ਸਾਰੇ ਕਿਰਦਾਰ ਇੰਨੇ ਰੰਗੀਨ ਤੇ ਮਜ਼ੇਦਾਰ ਹਨ ਕਿ ਕਿਸੇ ਵੀ ਅਦਾਕਾਰ ਨਾਲ ਸੀਨ ਕਰਨਾ ਆਪਣੇ ਆਪ ’ਚ ਐਂਟਰਟੇਨਿੰਗ ਸੀ।
ਪ੍ਰ. ਤੁਸੀਂ ਪੰਜਾਬੀ, ਸਾਊਥ ਅਤੇ ਹਿੰਦੀ ਤਿੰਨੋਂ ਇੰਡਸਟਰੀਆਂ ’ਚ ਕੰਮ ਕੀਤਾ ਹੈ। ਤੁਹਾਨੂੰ ਸਭ ਤੋਂ ਵੱਡਾ ਫਰਕ ਕਿੱਥੇ ਲੱਗਦਾ ਹੈ?
- ਮੈਂ ਪੰਜਾਬੀ ਤੇ ਸਾਊਥ ਇੰਡਸਟਰੀ ’ਚ ਵੀ ਕੰਮ ਕੀਤਾ ਹੈ। ਮੈਨੂੰ ਲੱਗਦਾ ਹੈ ਕਿ ਫਰਕ ਇੰਡਸਟਰੀ ਨਾਲੋਂ ਜ਼ਿਆਦਾ ਲੋਕਾਂ ’ਚ ਹੁੰਦਾ ਹੈ। ਚੰਗੇ ਅਤੇ ਪੈਸ਼ਨੇਟ ਲੋਕ ਹਰ ਜਗ੍ਹਾ ਅਨੁਭਵ ਨੂੰ ਵਧੀਆ ਬਣਾਉਂਦੇ ਹਨ। ਹਾਂ, ਬਜਟ, ਲੋਕੇਸ਼ਨ ਅਤੇ ਕਲਚਰ ਵੱਖਰੇ ਹੋ ਸਕਦੇ ਹਨ, ਪਰ ਅਸਲੀ ਫਰਕ ਟੀਮ ਅਤੇ ਲੋਕਾਂ ਦਾ ਹੁੰਦਾ ਹੈ।
'ਚੱਕ ਕੇ ਬਾਹਰ ਮਾਰਾਂਗੇ..!' ਝੰਡੇ ਦਿਖਾਉਣ ਵਾਲਿਆਂ ਨੂੰ ਸਿੱਧਾ ਹੋਇਆ ਦੋਸਾਂਝਾਂਵਾਲਾ
NEXT STORY 
