ਐਂਟਰਟੇਨਮੈਂਟ ਡੈਸਕ - ਟੀ.ਵੀ.ਐੱਫ. ਆਪਣੇ ਦਰਸ਼ਕਾਂ ਲਈ 'ਗ੍ਰਾਮ ਚਕਿਤਸਾਲਯ' ਦਾ ਦੂਜਾ ਸੀਜ਼ਨ ਲੈ ਕੇ ਵਾਪਸ ਆ ਰਿਹਾ ਹੈ। ‘ਗ੍ਰਾਮ ਚਕਿਤਸਾਲਯ’ ਦੇ ਸੀਜ਼ਨ-2 ’ਚ ਅਮੋਲ ਪਰਾਸ਼ਰ ਡਾ. ਪ੍ਰਭਾਤ ਦੇ ਰੂਪ ਵਿਚ ਵਾਪਸੀ ਕਰ ਰਹੇ ਹਨ। ਇਸ ਵਾਰ ਸੀਰੀਜ਼ ਵਿਚ ਪ੍ਰਭਾਤ ਨੂੰ ਹੋਰ ਹੰਗਾਮਿਆਂ ਦਾ ਸਾਹਮਣਾ ਕਰਨਾ ਪਵੇਗਾ। ਉੱਥੇ ਹੀ, ਇਸ ਵਾਰ ਸੀਰੀਜ਼ ਵਿਚ ਨਵੇਂ ਲੋਕਪ੍ਰਿਯ ਚਿਹਰੇ ਵੀ ਦੇਖਣ ਨੂੰ ਮਿਲਣਗੇ। ਸੀਰੀਜ਼ 23 ਜੂਨ ਨੂੰ ਐਮਾਜ਼ੋਨ ਪ੍ਰਾਈਮ ਵੀਡੀਓ ’ਤੇ ਸਟ੍ਰੀਮ ਕੀਤੀ ਜਾਵੇਗੀ। ਸੀਰੀਜ਼ ਬਾਰੇ ਅਮੋਲ ਪਰਾਸ਼ਰ, ਆਕਾਂਸ਼ਾ ਰੰਜਨ ਕਪੂਰ ਅਤੇ ਦਿਨੇਸ਼ ਲਾਲ ਯਾਦਵ ਨਿਰਹੂਆ ਨੇ ਪੰਜਾਬ ਕੇਸਰੀ/ ਨਵੋਦਯ ਟਾਈਮਜ਼/ ਜਗਬਾਣੀ/ ਹਿੰਦ ਸਮਾਚਾਰ ਨਾਲ ਖ਼ਾਸ ਗੱਲਬਾਤ ਕੀਤੀ ਅਤੇ ਦਿਲਚਸਪ ਗੱਲਾਂ ਸਾਂਝੀਆਂ ਕੀਤੀਆਂ.....
ਅਨੋਖੇ ਮਰੀਜ਼ਾਂ ਤੇ ਨਵੀਆਂ ਚੁਣੌਤੀਆਂ ਨਾਲ ਭਰਿਆ ਹੋਵੇਗਾ ਨਵਾਂ ਸੀਜ਼ਨ : ਅਮੋਲ ਪਰਾਸ਼ਰ
Q. ਇਸ ਵਾਰ ਦਰਸ਼ਕਾਂ ਨੂੰ ਕੀ ਨਵਾਂ ਦੇਖਣ ਨੂੰ ਮਿਲੇਗਾ?
ਥੋੜ੍ਹਾ-ਬਹੁਤ ਲੋਕਾਂ ਨੇ ਪ੍ਰਭਾਤ ਨੂੰ ਸਵੀਕਾਰ ਕਰ ਲਿਆ ਹੈ ਅਤੇ ਪ੍ਰਭਾਤ ਨੇ ਵੀ ਪਿੰਡ ਦੇ ਤੌਰ-ਤਰੀਕਿਆਂ ਨੂੰ ਸਮਝਣਾ ਸ਼ੁਰੂ ਕਰ ਦਿੱਤਾ ਹੈ। ਹੁਣ ਉਹ ਇਹ ਸੋਚਦਾ ਹੈ ਕਿ ਇਥੋਂ ਦੇ ਲੋਕਾਂ ਨੂੰ ਕਿਵੇਂ ਸਮਝਾਇਆ ਜਾਵੇ ਅਤੇ ਉਨ੍ਹਾਂ ਦਾ ਇਲਾਜ ਕਿਵੇਂ ਕੀਤਾ ਜਾਵੇ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਇਸ ਵਾਰ ਮਰੀਜ਼ ਵੀ ਹਨ। ਪਹਿਲੇ ਸੀਜ਼ਨ ਤੋਂ ਬਾਅਦ ਸਭ ਤੋਂ ਵੱਧ ਸਵਾਲ ਇਹ ਆਉਂਦਾ ਸੀ ਕਿ ਡਾਕਟਰ ਸਾਹਿਬ ਕੋਲ 0ਮਰੀਜ਼ ਕਦੋਂ ਆਉਣਗੇ? ਤਾਂ ਇਸ ਵਾਰ ਮਰੀਜ਼ ਹਨ ਅਤੇ ਬਹੁਤ ਸਾਰੇ ਹਨ ਪਰ ਇਹ ਸਿਰਫ਼ ਇਲਾਜ ਕਰਵਾਉਣ ਨਹੀਂ ਆਏ ਸਗੋਂ ਪ੍ਰਭਾਤ ਦੇ ਧੀਰਜ ਦੀ ਵੀ ਪ੍ਰੀਖਿਆ ਲੈਣ ਵਾਲੇ ਹਨ। ਇਸ ਤੋਂ ਇਲਾਵਾ ਇਸ ਵਾਰ ਨਵੇਂ ਖਿਡਾਰੀ ਵੀ ਆਏ ਹਨ। ਪਹਿਲੇ ਸੀਜ਼ਨ ਵਿਚ ਜੋ ਪ੍ਰਭਾਤ ਬਨਾਮ ਭਠਕੰਡੀ ਦੀ ਸਥਿਤੀ ਬਣੀ ਸੀ, ਉਹ ਹੁਣ ਹੋਰ ਵੱਡੇ ਪੱਧਰ ’ਤੇ ਪਹੁੰਚ ਗਈ ਹੈ। ਪ੍ਰਭਾਤ ਨੂੰ ਲੱਗਦਾ ਹੈ ਕਿ ਇਕ ਸਮੱਸਿਆ ਹੱਲ ਹੋਵੇਗੀ ਤਾਂ ਸਭ ਠੀਕ ਹੋ ਜਾਵੇਗਾ ਪਰ ਜ਼ਿੰਦਗੀ ਵਿਚ ਅਜਿਹਾ ਨਹੀਂ ਹੁੰਦਾ। ਇਕ ਲੜਾਈ ਖ਼ਤਮ ਹੁੰਦੀ ਹੈ ਤਾਂ ਦੂਜੀ ਸ਼ੁਰੂ ਹੋ ਜਾਂਦੀ ਹੈ। ਇਸ ਦੇ ਨਾਲ-ਨਾਲ ਗਾਰਗੀ ਅਤੇ ਪ੍ਰਭਾਤ ਦਾ ਰਿਸ਼ਤਾ ਵੀ ਹੋਰ ਡੂੰਘਾ ਹੋਇਆ ਹੈ।
Q. ਕੋਈ ਅਤਰੰਗੀ ਜਾਂ ਮਜ਼ੇਦਾਰ ਬਿਮਾਰੀ ਵਾਲਾ ਕਿੱਸਾ?
ਜੇ ਮੈਂ ਸਭ ਕੁਝ ਦੱਸ ਦਿਆਂਗਾ ਤਾਂ ਸਾਡੇ ਲੇਖਕਾਂ ਦੀ ਮਿਹਨਤ ’ਤੇ ਪਾਣੀ ਫਿਰ ਜਾਵੇਗਾ। ਇੰਨਾ ਜ਼ਰੂਰ ਕਹਿ ਸਕਦਾ ਹਾਂ ਕਿ ਇਸ ਵਾਰ ਕਈ ਅਜਿਹੇ ਮਰੀਜ਼ ਹਨ, ਜੋ ਤੁਹਾਨੂੰ ਹੈਰਾਨ ਕਰ ਦੇਣਗੇ। ਟ੍ਰੇਲਰ ਵਿਚ ਵੀ ਇਕ ਝਲਕ ਦਿਖਾਈ ਗਈ ਹੈ, ਜਿੱਥੇ ਇਕ ਵਿਅਕਤੀ ਮਠਿਆਈ ਦੇ ਡੱਬੇ ਵਿਚ ਆਪਣਾ ਸੈਂਪਲ ਲੈ ਕੇ ਆਉਂਦਾ ਹੈ। ਡਾਕਟਰ ਨੂੰ ਲੱਗਦਾ ਹੈ ਕਿ ਕੋਈ ਮਠਿਆਈ ਲੈ ਕੇ ਆਇਆ ਹੈ ਪਰ ਡੱਬਾ ਖੋਲ੍ਹਣ 'ਤੇ ਕੁਝ ਹੋਰ ਹੀ ਨਿਕਲਦਾ ਹੈ। ਅਜਿਹੇ ਕਈ ਮਜ਼ੇਦਾਰ ਅਤੇ ਅਨੋਖੇ ਮਾਮਲੇ ਇਸ ਵਾਰ ਦੇਖਣ ਨੂੰ ਮਿਲਣਗੇ।
Q. ਟੀ.ਵੀ.ਐੱਫ. ਦੇ ਲਗਭਗ ਇਕ ਦਹਾਕੇ ਲੰਬੇ ਸਫ਼ਰ ਨੂੰ ਤੁਸੀਂ ਕਿਵੇਂ ਦੇਖਦੇ ਹੋ?
ਟੀ.ਵੀ.ਐੱਫ. ਨਾਲ ਮੇਰਾ ਰਿਸ਼ਤਾ ਸਿਰਫ਼ ਕੰਮ ਦਾ ਨਹੀਂ ਹੈ ਸਗੋਂ ਕਈ ਲੋਕਾਂ ਨਾਲ ਮੇਰੀ ਜਾਣ-ਪਛਾਣ ਟੀ.ਵੀ.ਐੱਫ. ਬਣਨ ਤੋਂ ਪਹਿਲਾਂ ਦੀ ਹੈ। ਅਸੀਂ ਸਭ ਵੱਖ-ਵੱਖ ਕਾਲਜਾਂ ਤੋਂ ਸੀ ਪਰ ਲਗਭਗ ਇਕੋ ਸਮੇਂ ਮੁੰਬਈ ਆਏ ਸੀ। ਸ਼ੁਰੂਆਤ ਵਿਚ ਉਨ੍ਹਾਂ ਨੇ ਯੂ-ਟਿਊਬ ’ਤੇ ਕੰਟੈਂਟ ਬਣਾਉਣਾ ਸ਼ੁਰੂ ਕੀਤਾ। ਉਸ ਸਮੇਂ ਕਿਸੇ ਨੂੰ ਪਤਾ ਨਹੀਂ ਸੀ ਕਿ ਵੈੱਬ ਸੀਰੀਜ਼ ਕੀ ਹੁੰਦੀ ਹੈ। ਫਿਰ ‘ਪਰਮਾਨੈਂਟ ਰੂਮਮੇਟਜ਼’ ਆਈ ਅਤੇ ਉਸ ਨੇ ਇਤਿਹਾਸ ਬਣਾ ਦਿੱਤਾ। ਉਸ ਤੋਂ ਬਾਅਦ ‘ਪਿਚਰਜ਼’ ਆਈ ਅਤੇ ਉਹ ਵੀ ਬਹੁਤ ਸਫ਼ਲ ਰਹੀ। ਮੈਂ ‘ਟ੍ਰਿਪਲਿੰਗ’ ਰਾਹੀਂ ਟੀ.ਵੀ.ਐੱਫ. ਦਾ ਹਿੱਸਾ ਬਣਿਆ।
ਸ਼ੂਟਿੰਗ ਦੌਰਾਨ ਕਤੂਰੇ ਨੇ ਵੱਢਿਆ, ਸਰਕਾਰੀ ਹਸਪਤਾਲ ਜਾਣਾ ਪਿਆ, ਮੈਨੂੰ ਲੱਗਾ ਜਿਵੇਂ ਮੈਂ ਕਿਸੇ ਨਿੱਜੀ ਹਸਪਤਾਲ ਵਿਚ ਹਾਂ : ਆਕਾਂਸ਼ਾ ਰੰਜਨ ਕਪੂਰ
Q.ਅਸਲ ਜ਼ਿੰਦਗੀ ਵਿਚ ਤੁਸੀਂ ਅਤੇ ਡਾਕਟਰ ਗਾਰਗੀ ਕਿੰਨੇ ਇਕੋ ਜਿਹੇ ਹੋ?
ਸੀਜ਼ਨ-1 ਵਿਚ ਮੈਂ ਗਾਰਗੀ ਤੋਂ ਬਿਲਕੁਲ ਵੱਖਰੀ ਸੀ ਪਰ ਸੀਜ਼ਨ-2 ਵਿਚ ਮੈਂ ਆਪਣੀ ਸ਼ਖ਼ਸੀਅਤ ਦਾ ਕਾਫ਼ੀ ਹਿੱਸਾ ਗਾਰਗੀ ਵਿਚ ਜੋੜਿਆ ਹੈ। ਇਸ ਵਾਰ ਗਾਰਗੀ ਕਾਫ਼ੀ ਨਟਖਟ ਹੈ। ਕਈ ਦ੍ਰਿਸ਼ਾਂ ਵਿਚ ਉਹ ਪ੍ਰਭਾਤ ਨੂੰ ਛੇੜਦੀ ਹੈ, ਉਸ ਦਾ ਮਜ਼ਾਕ ਉਡਾਉਂਦੀ ਹੈ। ਉਨ੍ਹਾਂ ਵਿਚਕਾਰ ਹਲਕੀ-ਫੁਲਕੀ ਨੋਕਝੋਕ ਦੇਖਣ ਨੂੰ ਮਿਲੇਗੀ। ਜਦੋਂ ਅਸੀਂ ਸ਼ੂਟਿੰਗ ਕੀਤੀ ਅਤੇ ਮੈਂ ਮਾਨੀਟਰ ’ਤੇ ਆਪਣੇ ਸੀਨ ਦੇਖ ਰਹੀ ਸੀ, ਉਦੋਂ ਸਾਡੇ ਲੇਖਕ ਨੇ ਮੈਨੂੰ ਕਿਹਾ ਕਿ ਇਸ ਵਾਰ ਜੋ ਤੁਸੀਂ ਕਰ ਰਹੇ ਹੋ, ਉਹ ਬਹੁਤ ਚੰਗਾ ਕੰਮ ਕਰ ਰਹੇ ਹੋ। ਅਸਲ ਜ਼ਿੰਦਗੀ ਵਿਚ ਵੀ ਮੈਂ ਆਪਣੇ ਦੋਸਤਾਂ ਨਾਲ ਅਜਿਹੀ ਹੀ ਹਾਂ। ਦੋਸਤੀ ਵਿਚ ਮਜ਼ਾਕ ਕਰਨਾ, ਛੇੜਣਾ ਅਤੇ ਹਾਸਾ-ਮਜ਼ਾਕ ਮੇਰੀ ਆਦਤ ਹੈ। ਇਸ ਲਈ ਗਾਰਗੀ ਦਾ ਇਹ ਰੂਪ ਨਿਭਾਉਣਾ ਮੇਰੇ ਲਈ ਬਹੁਤ ਸੁਭਾਵਿਕ ਸੀ।
Q. ਅੱਜ ਵੀ ਕਈ ਲੋਕ ਸਰਕਾਰੀ ਹਸਪਤਾਲਾਂ ’ਤੇ ਭਰੋਸਾ ਨਹੀਂ ਕਰਦੇ। ਇਸ ਬਾਰੇ ਕੀ ਰਾਏ ਹੈ?
ਇਹ ਕਾਫ਼ੀ ਹੱਦ ਤੱਕ ਵਿਅਕਤੀ ਦੀ ਆਰਥਿਕ ਸਮਰੱਥਾ ’ਤੇ ਨਿਰਭਰ ਕਰਦਾ ਹੈ। ਜੋ ਲੋਕ ਨਿੱਜੀ ਹਸਪਤਾਲ ਦਾ ਖ਼ਰਚਾ ਚੁੱਕ ਸਕਦੇ ਹਨ, ਉਹ ਉੱਥੇ ਜਾਂਦੇ ਹਨ। ਮੈਂ ਆਪਣਾ ਇਕ ਤਜਰਬਾ ਸਾਂਝਾ ਕਰਨਾ ਚਾਹਾਂਗੀ। ਸ਼ੂਟਿੰਗ ਦੌਰਾਨ ਮੈਨੂੰ ਇਕ ਕਤੂਰੇ ਨੇ ਵੱਢ ਲਿਆ ਸੀ। ਅਸੀਂ ਮੱਧਪ੍ਰਦੇਸ਼ ਦੇ ਇਕ ਪਿੰਡ ’ਚ ਸ਼ੂਟ ਕਰ ਰਹੇ ਸੀ ਅਤੇ ਮੈਨੂੰ ਸਰਕਾਰੀ ਹਸਪਤਾਲ ਜਾਣਾ ਪਿਆ। ਮੇਰਾ ਤਜਰਬਾ ਬੇਹੱਦ ਚੰਗਾ ਰਿਹਾ। ਮੈਨੂੰ ਅਜਿਹਾ ਲੱਗਿਆ ਜਿਵੇਂ ਮੈਂ ਕਿਸੇ ਨਿੱਜੀ ਹਸਪਤਾਲ ਵਿਚ ਹਾਂ। ਜਦੋਂ ਮੇਰਾ ਇਲਾਜ ਪੂਰਾ ਹੋਇਆ ਤਾਂ ਮੈਂ ਪੁੱਛਿਆ ਕਿ ਪੈਸੇ ਕਿੱਥੇ ਜਮ੍ਹਾ ਕਰਨੇ ਹਨ ਤਾਂ ਮੈਨੂੰ ਦੱਸਿਆ ਗਿਆ ਕਿ ਇਹ ਸਰਕਾਰੀ ਹਸਪਤਾਲ ਹੈ ਅਤੇ ਇਥੇ ਮੈਨੂੰ ਕੁਝ ਵੀ ਭੁਗਤਾਨ ਨਹੀਂ ਕਰਨਾ। ਬਾਅਦ ਵਿਚ ਮੁੰਬਈ ਵਿਚ ਵੀ ਮੈਨੂੰ ਰੈਬੀਜ਼ ਦੇ ਟੀਕੇ ਲਵਾਉਣੇ ਸਨ ਅਤੇ ਉੱਥੇ ਵੀ ਤਜਰਬਾ ਚੰਗਾ ਰਿਹਾ। ਮੈਨੂੰ ਲੱਗਦਾ ਹੈ ਕਿ ਲੋਕਾਂ ਦੇ ਮਨ ਵਿਚ ਸਰਕਾਰੀ ਹਸਪਤਾਲਾਂ ਨੂੰ ਲੈ ਕੇ ਜੋ ਪੁਰਾਣਾ ਅਕਸ ਹੈ, ਉਹ ਹੁਣ ਕਾਫ਼ੀ ਬਦਲ ਚੁੱਕਾ ਹੈ। ਬਸ ਲੋਕਾਂ ਤੱਕ ਸਹੀ ਜਾਣਕਾਰੀ ਪਹੁੰਚਾਉਣ ਦੀ ਲੋੜ ਹੈ।
ਇਸ ਸ਼ੋਅ ਦੀ ਦੁਨੀਆ ਮੈਨੂੰ ਬੇਹੱਦ ਅਸਲੀ ਲੱਗਦੀ ਹੈ : ਦਿਨੇਸ਼ ਲਾਲ
Q. ਤੁਹਾਨੂੰ ਇਹ ਸ਼ੋਅ ਕਿਵੇਂ ਮਿਲਿਆ ਅਤੇ ਪਹਿਲੀ ਪ੍ਰਤੀਕਿਰਿਆ ਕੀ ਸੀ?
ਮੈਨੂੰ ਬਹੁਤ ਖ਼ੁਸ਼ੀ ਹੋਈ ਜਦੋਂ ਪਤਾ ਲੱਗਾ ਕਿ ਮੈਂ ‘ਗ੍ਰਾਮ ਚਕਿਤਸਾਲਯ’ ਦੇ ਦੂਜੇ ਸੀਜ਼ਨ ਦਾ ਹਿੱਸਾ ਬਣਨ ਜਾ ਰਿਹਾ ਹਾਂ। ਸੱਚ ਕਹਾਂ ਤਾਂ ਮੈਂ ਪਹਿਲੇ ਸੀਜ਼ਨ ਵਿਚ ਵੀ ਕੰਮ ਕਰਨਾ ਚਾਹੁੰਦਾ ਸੀ ਪਰ ਕਿਸੇ ਕਾਰਨ ਕਰ ਕੇ ਨਹੀਂ ਕਰ ਸਕਿਆ। ਜਦੋਂ ਮੈਂ ਪਹਿਲਾ ਸੀਜ਼ਨ ਦੇਖਿਆ ਤਾਂ ਮੈਨੂੰ ਬਹੁਤ ਪਸੰਦ ਆਇਆ ਕਿਉਂਕਿ ਮੈਂ ਖ਼ੁਦ ਪਿੰਡ ਵਿਚ ਪਲਿਆ-ਵਧਿਆ ਹਾਂ। ਮੁੱਢਲੇ ਸਿਹਤ ਕੇਂਦਰ ਕੀ ਹੁੰਦੇ ਹਨ ਅਤੇ ਉੱਥੇ ਕਿਵੇਂ ਦੇ ਹਾਲਾਤ ਹੁੰਦੇ ਹਨ, ਇਹ ਮੈਂ ਬਹੁਤ ਨੇੜੇ ਤੋਂ ਦੇਖਿਆ ਹੈ। ਇਸ ਲਈ ਇਸ ਸ਼ੋਅ ਦੀ ਦੁਨੀਆ ਮੈਨੂੰ ਬੇਹੱਦ ਅਸਲੀ ਲੱਗਦੀ ਹੈ। ਸ਼ਾਇਦ ਜਿਨ੍ਹਾਂ ਲੋਕਾਂ ਨੇ ਪਿੰਡ ਦੀ ਜ਼ਿੰਦਗੀ ਨਹੀਂ ਦੇਖੀ, ਉਨ੍ਹਾਂ ਲਈ ਇਹ ਸਭ ਕੁਝ ਨਵਾਂ ਹੋਵੇ ਪਰ ਸਾਡੇ ਲਈ ਇਹ ਸਾਡੀ ਰੋਜ਼ਾਨਾ ਜ਼ਿੰਦਗੀ ਦਾ ਹਿੱਸਾ ਰਿਹਾ ਹੈ। ਇਸ ਲਈ ਅਜਿਹੇ ਸ਼ੋਅ ਦਾ ਹਿੱਸਾ ਬਣਨਾ ਮੇਰੇ ਲਈ ਬੇਹੱਦ ਖ਼ਾਸ ਤਜਰਬਾ ਰਿਹਾ।
Q. ਸ਼ੋਅ ਦਾ ਤੁਹਾਡਾ ਸਭ ਤੋਂ ਪਸੰਦੀਦਾ ਡਾਇਲਾਗ ਕਿਹੜਾ ਸੀ, ਜੋ ਤੁਹਾਡੇ ਨਾਲ ਰਹਿ ਗਿਆ ਹੋਵੇ?
ਮੇਰੇ ਨਾਲ ਇਕ ਡਾਇਲਾਗ ਹਮੇਸ਼ਾ ਲਈ ਰਹਿ ਗਿਆ ਹੈ ‘ਇਨਕੋ ਨਜ਼ਰ ਨਹੀਂ ਲਗਤੀ, ਖ਼ੁਦ ਹੀ ਬਨਰਾਕਸ ਹੈ।’ ਇਹ ਡਾਇਲਾਗ ਮੈਨੂੰ ਕਾਫ਼ੀ ਪਸੰਦ ਹੈ। ਟ੍ਰੇਲਰ ’ਚ ਵੀ ਇਸ ਨੂੰ ਸ਼ਾਮਿਲ ਕੀਤਾ ਗਿਆ ਸੀ ਅਤੇ ਸੱਚ ਕਹਾਂ ਤਾਂ ਟ੍ਰੇਲਰ ਦਾ ਸਭ ਤੋਂ ਵਧੀਆ ਅਤੇ ਯਾਦਗਾਰ ਹਿੱਸਾ ਇਹੀ ਸੀ।
ਥੀਏਟਰ ਭਾਜੜ ਮਾਮਲਾ: ਅਦਾਲਤ 'ਚ ਪੇਸ਼ ਨਹੀਂ ਹੋਏ ਅੱਲੂ ਅਰਜੁਨ
NEXT STORY 
