ਨਵੀਂ ਦਿੱਲੀ (ਏਜੰਸੀ)- "ਤਲਵਾਰ" ਅਤੇ "ਰਾਜ਼ੀ" ਵਰਗੀਆਂ ਮਸ਼ਹੂਰ ਫਿਲਮਾਂ ਦਾ ਨਿਰਦੇਸ਼ਨ ਕਰਨ ਵਾਲੀ ਮੇਘਨਾ ਗੁਲਜ਼ਾਰ ਆਪਣੀ ਅਗਲੀ ਫਿਲਮ "ਦਾਇਰਾ" ਵਿੱਚ ਅਦਾਕਾਰਾ ਕਰੀਨਾ ਕਪੂਰ ਖਾਨ ਅਤੇ ਅਦਾਕਾਰ ਪ੍ਰਿਥਵੀਰਾਜ ਸੁਕੁਮਾਰਨ ਨੂੰ ਨਿਰਦੇਸ਼ਤ ਕਰੇਗੀ। ਇਹ ਫਿਲਮ ਜੰਗਲੀ ਪਿਕਚਰਜ਼ ਦੇ ਬੈਨਰ ਹੇਠ ਬਣਾਈ ਜਾ ਰਹੀ ਹੈ। 'ਦਾਇਰਾ' ਇੱਕ ਕ੍ਰਾਈਮ ਡਰਾਮਾ ਥ੍ਰਿਲਰ ਫਿਲਮ ਹੈ। ਕਰੀਨਾ ਕਪੂਰ ਨੇ ਇੱਕ ਬਿਆਨ ਵਿੱਚ ਕਿਹਾ, "ਹਿੰਦੀ ਸਿਨੇਮਾ ਵਿੱਚ 25 ਸ਼ਾਨਦਾਰ ਸਾਲਾਂ ਦਾ ਜਸ਼ਨ ਮਨਾਉਂਦੇ ਹੋਏ, ਮੈਂ ਆਪਣੀ ਅਗਲੀ ਫਿਲਮ 'ਦਾਇਰਾ' ਦਾ ਐਲਾਨ ਕਰਨ ਲਈ ਉਤਸ਼ਾਹਿਤ ਹਾਂ। ਮੇਘਨਾ ਗੁਲਜ਼ਾਰ ਨਾਲ ਇੱਕ ਨਿਰਦੇਸ਼ਕ ਵਜੋਂ ਕੰਮ ਕਰਨਾ ਇੱਕ ਸੁਪਨਾ ਸਾਕਾਰ ਹੋਣ ਵਰਗਾ ਹੈ। ਮੈਂ ਲੰਬੇ ਸਮੇਂ ਤੋਂ ਉਨ੍ਹਾਂ ਦੇ ਕੰਮ ਦੀ ਪ੍ਰਸ਼ੰਸਕ ਰਹੀ ਹਾਂ। ਪ੍ਰਿਥਵੀਰਾਜ ਵਰਗੇ ਪ੍ਰਤਿਭਾਸ਼ਾਲੀ ਅਦਾਕਾਰ ਨਾਲ ਕੰਮ ਕਰਨਾ ਵੀ ਮੇਰੇ ਲਈ ਖਾਸ ਹੈ। ਮੈਨੂੰ ਫਿਲਮ ਦੀ ਕਹਾਣੀ ਬਹੁਤ ਪਸੰਦ ਆਈ।"
'ਤਲਵਾਰ' ਅਤੇ 'ਰਾਜ਼ੀ' ਤੋਂ ਬਾਅਦ ਇਹ ਮੇਘਨਾ ਗੁਲਜ਼ਾਰ ਅਤੇ ਜੰਗਲੀ ਪਿਕਚਰਜ਼ ਵਿਚਕਾਰ ਤੀਜਾ ਸਹਿਯੋਗ ਹੈ। ਇਹ ਫਿਲਮ ਯਸ਼ ਕੇਸਵਾਨੀ ਅਤੇ ਸੀਮਾ ਅਗਰਵਾਲ ਨੇ ਮਿਲ ਕੇ ਲਿਖੀ ਹੈ। ਪ੍ਰਿਥਵੀਰਾਜ ਸੁਕੁਮਾਰਨ ਨੇ ਕਿਹਾ, "ਜਿਸ ਪਲ ਮੈਨੂੰ ਸਕ੍ਰਿਪਟ ਸੁਣਾਈ ਗਈ, ਮੈਨੂੰ ਲੱਗਾ ਕਿ ਮੈਨੂੰ ਇਹ ਫਿਲਮ ਕਰਨੀ ਚਾਹੀਦੀ ਹੈ।" ਜੰਗਲੀ ਪਿਕਚਰਜ਼ ਦੀ ਸੀਈਓ ਅੰਮ੍ਰਿਤਾ ਪਾਂਡੇ ਨੇ ਮੇਘਨਾ ਦੀ ਸੰਵੇਦਨਸ਼ੀਲਤਾ, ਕਲਾਤਮਕਤਾ ਅਤੇ ਮਨੋਰੰਜਨ ਅਤੇ ਸਮੱਗਰੀ ਦੇ ਸੰਤੁਲਨ ਦੀ ਪ੍ਰਸ਼ੰਸਾ ਕੀਤੀ ਅਤੇ ਕਿਹਾ ਕਿ ਫਿਲਮ ਦੀ ਸਕ੍ਰਿਪਟ ਮੌਜੂਦਾ ਸਮੇਂ ਦੀਆਂ ਗੁੰਝਲਾਂ ਨੂੰ ਡੂੰਘਾਈ ਨਾਲ ਉਕੇਰਦੀ ਹੈ। ਇਹ ਫਿਲਮ ਇਸ ਸਮੇਂ ਪ੍ਰੀ-ਪ੍ਰੋਡਕਸ਼ਨ ਪੜਾਅ 'ਤੇ ਹੈ।
ਪਤੀ ਰਾਜੀਵ ਨੇ ਹੁਣ ਸਾਬਕਾ ਪਤਨੀ ਚਾਰੂ 'ਤੇ ਲਗਾਏ ਗੰਭੀਰ ਦੋਸ਼, ਕਿਹਾ-'ਮੇਰੇ ਦੋਸਤ ਨਾਲ...'
NEXT STORY 
