ਮੁੰਬਈ - ਸਾਲ 2002 ਦੀ ਮਸ਼ਹੂਰ ਰੋਮਾਂਟਿਕ ਥ੍ਰਿਲਰ ਫਿਲਮ ‘ਯੇ ਦਿਲ ਆਸ਼ਿਕਾਨਾ’ ਇਕ ਵਾਰ ਫਿਰ ਸਿਨੇਮਾਘਰਾਂ ਵਿਚ ਦਸਤਕ ਦੇਣ ਲਈ ਤਿਆਰ ਹੈ। ਨਿਰਦੇਸ਼ਕ ਕੁਕੂ ਕੋਹਲੀ ਦੀ ਇਹ ਫਿਲਮ ਆਪਣੀ ਅਸਲੀ ਰਿਲੀਜ਼ ਦੇ 24 ਸਾਲਾਂ ਬਾਅਦ 13 ਫਰਵਰੀ 2026 ਨੂੰ ਮੁੜ ਰਿਲੀਜ਼ ਕੀਤੀ ਜਾਵੇਗੀ। ਟਰੂ ਐਂਟਰਟੇਨਮੈਂਟ ਪ੍ਰਾਈਵੇਟ ਲਿਮਟਿਡ ਵੱਲੋਂ ਇਸ ਨੂੰ ਦੇਸ਼ ਭਰ ਦੇ ਸਿਨੇਮਾਘਰਾਂ ਵਿਚ ਉਤਾਰਿਆ ਜਾ ਰਿਹਾ ਹੈ।
ਕਿਉਂ ਲਿਆ ਗਿਆ ਮੁੜ ਰਿਲੀਜ਼ ਦਾ ਫੈਸਲਾ?
ਫਿਲਮ ਦੇ ਨਿਰਦੇਸ਼ਕ ਕੁਕੂ ਕੋਹਲੀ, ਜਿਨ੍ਹਾਂ ਨੇ ਅਜੈ ਦੇਵਗਨ ਨੂੰ ਫਿਲਮ 'ਫੂਲ ਔਰ ਕਾਂਟੇ' ਰਾਹੀਂ ਬ੍ਰੇਕ ਦਿੱਤਾ ਸੀ, ਨੇ ਕਿਹਾ ਕਿ ‘ਯੇ ਦਿਲ ਆਸ਼ਿਕਾਨਾ’ ਵੱਡੇ ਪਰਦੇ ਲਈ ਬਣਾਈ ਗਈ ਸੀ। ਉਨ੍ਹਾਂ ਅਨੁਸਾਰ, ਫਿਲਮ ਦਾ ਸੰਗੀਤ, ਭਾਵਨਾਵਾਂ ਅਤੇ ਪੱਧਰ ਅਜਿਹਾ ਹੈ ਜਿਸ ਦਾ ਆਨੰਦ ਸਿਨੇਮਾ ਹਾਲ ਵਿਚ ਸਮੂਹਿਕ ਤੌਰ 'ਤੇ ਹੀ ਮਾਣਿਆ ਜਾ ਸਕਦਾ ਹੈ। ਉਨ੍ਹਾਂ ਉਮੀਦ ਜਤਾਈ ਕਿ ਨਵੀਂ ਪੀੜ੍ਹੀ ਇਸ ਫਿਲਮ ਨੂੰ ਉਸੇ ਤਰ੍ਹਾਂ ਪਸੰਦ ਕਰੇਗੀ ਜਿਵੇਂ 2002 ਵਿਚ ਦਰਸ਼ਕਾਂ ਨੇ ਕੀਤਾ ਸੀ।
ਕਦੇ ਵੀ OTT ਜਾਂ ਟੀਵੀ ’ਤੇ ਨਹੀਂ ਆਈ ਇਹ ਫਿਲਮ
ਟਰੂ ਐਂਟਰਟੇਨਮੈਂਟ ਦੇ ਸ਼ੈਲੇਂਦਰ ਮੰਡੋਵਾਰਾ ਨੇ ਇਕ ਹੈਰਾਨੀਜਨਕ ਖੁਲਾਸਾ ਕਰਦਿਆਂ ਦੱਸਿਆ ਕਿ ਇਹ ਫਿਲਮ ਕਦੇ ਵੀ ਸੈਟੇਲਾਈਟ ਜਾਂ OTT ਪਲੇਟਫਾਰਮਾਂ 'ਤੇ ਰਿਲੀਜ਼ ਨਹੀਂ ਕੀਤੀ ਗਈ ਸੀ। ਇਹ ਇਕ ਸੋਚਿਆ-ਸਮਝਿਆ ਫੈਸਲਾ ਸੀ ਤਾਂ ਜੋ ਦਰਸ਼ਕ ਇਸ ਨੂੰ ਸਿਰਫ਼ ਸਿਨੇਮਾਘਰਾਂ ਵਿਚ ਹੀ ਦੇਖ ਸਕਣ। ‘ਤੁਝੇ ਮੇਰੀ ਕਸਮ’ ਦੀ ਮੁੜ ਰਿਲੀਜ਼ ਨੂੰ ਮਿਲੇ ਭਰਵੇਂ ਹੁੰਗਾਰੇ ਤੋਂ ਬਾਅਦ ਹੁਣ ਇਸ ਫਿਲਮ ਨੂੰ ਲਿਆਉਣ ਦਾ ਫੈਸਲਾ ਕੀਤਾ ਗਿਆ ਹੈ।
ਕੀ ਹੈ ਫਿਲਮ ਦੀ ਕਹਾਣੀ?
ਇਸ ਫਿਲਮ ਵਿਚ ਕਰਨ ਨਾਥ ਅਤੇ ਜੀਵਿਧਾ ਸ਼ਰਮਾ ਨੇ ਮੁੱਖ ਭੂਮਿਕਾਵਾਂ ਨਿਭਾਈਆਂ ਹਨ। ਕਹਾਣੀ ਕਰਨ ਅਤੇ ਪੂਜਾ ਦੀ ਹੈ, ਜਿਨ੍ਹਾਂ ਦੀ ਜ਼ਿੰਦਗੀ ਵਿਚ ਉਦੋਂ ਭੂਚਾਲ ਆ ਜਾਂਦਾ ਹੈ ਜਦੋਂ ਪੂਜਾ ਦੇ ਜਹਾਜ਼ ਨੂੰ ਅੱਤਵਾਦੀਆਂ ਵੱਲੋਂ ਹਾਈਜੈਕ ਕਰ ਲਿਆ ਜਾਂਦਾ ਹੈ। ਕਰਨ ਆਪਣੀ ਜਾਨ ਦੀ ਪਰਵਾਹ ਕੀਤੇ ਬਿਨਾਂ ਉਸ ਨੂੰ ਬਚਾਉਣ ਨਿਕਲਦਾ ਹੈ, ਪਰ ਉਸ ਨੂੰ ਇਹ ਜਾਣ ਕੇ ਧੱਕਾ ਲੱਗਦਾ ਹੈ ਕਿ ਪੂਜਾ ਦਾ ਆਪਣਾ ਭਰਾ ਵੀ ਉਨ੍ਹਾਂ ਅੱਤਵਾਦੀਆਂ ਵਿਚ ਸ਼ਾਮਲ ਹੈ।
ਜ਼ਿਕਰਯੋਗ ਹੈ ਕਿ ਕੁਕੂ ਕੋਹਲੀ ਨੇ ਇਸ ਤੋਂ ਪਹਿਲਾਂ 'ਸੁਹਾਗ', 'ਹਕੀਕਤ' ਅਤੇ 'ਜ਼ੁਲਮੀ' ਵਰਗੀਆਂ ਕਈ ਚਰਚਿਤ ਫਿਲਮਾਂ ਦਾ ਨਿਰਦੇਸ਼ ਕੀਤਾ ਹੈ। ਹੁਣ ਦੇਖਣਾ ਹੋਵੇਗਾ ਕਿ 24 ਸਾਲਾਂ ਬਾਅਦ ਇਹ ਰੋਮਾਂਟਿਕ ਜੋੜੀ ਦਰਸ਼ਕਾਂ ਦੇ ਦਿਲਾਂ 'ਤੇ ਫਿਰ ਤੋਂ ਰਾਜ ਕਰ ਪਾਉਂਦੀ ਹੈ ਜਾਂ ਨਹੀਂ।
ਬਾਲੀਵੁੱਡ ਅਦਾਕਾਰ ਅਨੁਪਮ ਖੇਰ ਪਹੁੰਚੇ ਵਾਰਾਣਸੀ, ਕਾਸ਼ੀ ਵਿਸ਼ਵਨਾਥ ਤੇ ਸੰਕਟ ਮੋਚਨ ਮੰਦਰ 'ਚ ਟੇਕਿਆ ਮੱਥਾ
NEXT STORY 
