ਗੈਜੇਟ ਡੈਸਕ - ਅੱਜ ਦੇ ਡਿਜੀਟਲ ਦੌਰ 'ਚ ਮੋਬਾਈਲ ਨੰਬਰ ਸਾਡੀ ਪਛਾਣ ਦਾ ਅਹਿਮ ਹਿੱਸਾ ਬਣ ਚੁੱਕਾ ਹੈ ਪਰ ਕਈ ਵਾਰ ਜਨਤਕ ਥਾਵਾਂ 'ਤੇ ਨੰਬਰ ਸਾਂਝਾ ਕਰਨ ਨਾਲ ਔਰਤਾਂ ਦੀ Privacy ਨੂੰ ਖਤਰਾ ਹੋ ਸਕਦਾ ਹੈ। ਖਾਸ ਕਰਕੇ ਜਦੋਂ ਮੋਬਾਈਲ ਰੀਚਾਰਜ ਕਰਵਾਉਣ ਲਈ ਦੁਕਾਨਾਂ ਜਾਂ ਰਿਟੇਲ ਸਟੋਰਾਂ 'ਤੇ ਨੰਬਰ ਦੇਣਾ ਪੈਂਦਾ ਹੈ, ਤਾਂ ਕਈ ਔਰਤਾਂ ਅਸਹਿਜ ਮਹਿਸੂਸ ਕਰਦੀਆਂ ਹਨ। ਇਸੇ ਸਮੱਸਿਆ ਦੇ ਹੱਲ ਲਈ ਸਰਕਾਰੀ ਟੈਲੀਕਾਮ ਕੰਪਨੀ BSNL ਨੇ ਇਕ ਨਵਾਂ ਫੀਚਰ ਲਾਂਚ ਕੀਤਾ ਹੈ, ਜਿਸ ਦਾ ਨਾਮ 'ਕਵਚ ਨੰਬਰ' ਰੱਖਿਆ ਗਿਆ ਹੈ।
ਕੀ ਹੈ 'ਕਵਚ ਨੰਬਰ' ਫੀਚਰ?
ਬੀ.ਐੱਸ.ਐੱਨ.ਐੱਲ. ਦਾ 'ਕਵਚ ਨੰਬਰ' ਇਕ 10 ਅੰਕਾਂ ਦਾ ਅਸਥਾਈ ਜਾਂ ਵਿਕਲਪਿਕ ਨੰਬਰ ਹੈ, ਜੋ ਯੂਜ਼ਰ ਦੇ ਅਸਲੀ ਨੰਬਰ ਨਾਲ ਲਿੰਕ ਹੁੰਦਾ ਹੈ। ਇਸ ਨੂੰ 8 ਮਾਰਚ ਨੂੰ 'ਅੰਤਰਰਾਸ਼ਟਰੀ ਮਹਿਲਾ ਦਿਵਸ' ਦੇ ਮੌਕੇ 'ਤੇ ਖਾਸ ਤੌਰ 'ਤੇ ਔਰਤਾਂ ਦੀ ਸੁਰੱਖਿਆ ਅਤੇ ਨਿੱਜਤਾ ਨੂੰ ਧਿਆਨ 'ਚ ਰੱਖਦੇ ਹੋਏ ਪੇਸ਼ ਕੀਤਾ ਗਿਆ ਹੈ। ਇਸ ਸੇਵਾ ਦੇ ਤਹਿਤ, ਯੂਜ਼ਰ ਨੂੰ ਇਕ ਅਸਥਾਈ ਨੰਬਰ SMS ਰਾਹੀਂ ਭੇਜਿਆ ਜਾਂਦਾ ਹੈ।
ਕਿਵੇਂ ਕੰਮ ਕਰਦਾ ਹੈ ਇਹ ਸੁਰੱਖਿਆ ਕਵਚ?
ਜਦੋਂ ਵੀ ਕਿਸੇ ਮਹਿਲਾ ਨੇ ਆਪਣਾ ਮੋਬਾਈਲ ਰੀਚਾਰਜ ਕਰਵਾਉਣਾ ਹੋਵੇ, ਤਾਂ ਉਹ ਰਿਟੇਲਰ ਜਾਂ ਦੁਕਾਨਦਾਰ ਨੂੰ ਆਪਣਾ ਅਸਲੀ ਨੰਬਰ ਦੇਣ ਦੀ ਬਜਾਏ ਇਹ 'ਕਵਚ ਨੰਬਰ' ਦੇ ਸਕਦੀ ਹੈ। ਇਹ ਨੰਬਰ ਸਿਸਟਮ ਰਾਹੀਂ ਅਸਲੀ ਨੰਬਰ ਨਾਲ ਜੁੜਿਆ ਹੁੰਦਾ ਹੈ, ਜਿਸ ਕਾਰਨ ਰੀਚਾਰਜ ਦੀ ਪ੍ਰਕਿਰਿਆ ਸਹੀ ਤਰੀਕੇ ਨਾਲ ਪੂਰੀ ਹੋ ਜਾਂਦੀ ਹੈ ਅਤੇ ਰੀਚਾਰਜ ਉਸੇ ਮੋਬਾਈਲ 'ਤੇ ਹੋ ਜਾਂਦਾ ਹੈ। ਇਸ ਤਰ੍ਹਾਂ ਅਸਲੀ ਮੋਬਾਈਲ ਨੰਬਰ ਪੂਰੀ ਤਰ੍ਹਾਂ ਗੁਪਤ ਰਹਿੰਦਾ ਹੈ ਅਤੇ ਕਿਸੇ ਅਣਜਾਣ ਵਿਅਕਤੀ ਕੋਲ ਨਹੀਂ ਪਹੁੰਚਦਾ।
ਕਿਵੇਂ ਪ੍ਰਾਪਤ ਕਰੀਏ ਇਹ ਸੇਵਾ?
ਬੀ.ਐੱਸ.ਐੱਨ.ਐੱਲ. ਦੇ ਗਾਹਕ ਇਸ ਫੀਚਰ ਦੀ ਵਰਤੋਂ ਕੰਪਨੀ ਦੀ 'ਸੈਲਫ ਕੇਅਰ ਐਪ' ਰਾਹੀਂ ਆਸਾਨੀ ਨਾਲ ਕਰ ਸਕਦੇ ਹਨ। ਐਪ 'ਚ ਜਾ ਕੇ ਇਸ ਨੰਬਰ ਬਾਰੇ ਜਾਣਕਾਰੀ ਲਈ ਜਾ ਸਕਦੀ ਹੈ ਅਤੇ ਲੋੜ ਪੈਣ 'ਤੇ ਆਪਣਾ ਅਸਥਾਈ ਨੰਬਰ ਹਾਸਲ ਕੀਤਾ ਜਾ ਸਕਦਾ ਹੈ। ਇਸ ਤੋਂ ਇਲਾਵਾ, ਇਸ ਸਬੰਧੀ ਪੂਰੀ ਜਾਣਕਾਰੀ ਕੰਪਨੀ ਦੀ ਅਧਿਕਾਰਤ ਵੈੱਬਸਾਈਟ 'ਤੇ ਵੀ ਉਪਲਬਧ ਹੈ।
ਡਿਜੀਟਲ ਸੁਰੱਖਿਆ ਵੱਲ ਵੱਡਾ ਕਦਮ
ਮੋਬਾਈਲ ਨੰਬਰ ਲੀਕ ਹੋਣ ਕਾਰਨ ਅਕਸਰ ਅਣਚਾਹੇ ਕਾਲਾਂ, ਮੈਸੇਜਾਂ ਜਾਂ ਹੋਰ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਕੰਪਨੀ ਅਨੁਸਾਰ, 'ਕਵਚ ਨੰਬਰ' ਵਰਗੇ ਫੀਚਰ ਔਰਤਾਂ ਨੂੰ ਡਿਜੀਟਲ ਦੁਨੀਆ ਵਿੱਚ ਵਧੇਰੇ ਸੁਰੱਖਿਅਤ ਅਤੇ ਆਤਮ-ਵਿਸ਼ਵਾਸੀ ਬਣਾਉਣ ਦੀ ਦਿਸ਼ਾ ਵਿੱਚ ਇੱਕ ਅਹਿਮ ਕਦਮ ਸਾਬਤ ਹੋਣਗੇ।
ਸਾਵਧਾਨ! ਮੋਬਾਈਲ ਚਾਰਜਰ 'ਤੇ ਸਟਾਈਲਿਸ਼ ਕਵਰ ਲਗਾਉਣਾ ਪੈ ਸਕਦਾ ਹੈ ਭਾਰੀ, ਅੱਜ ਹੀ ਹਟਾ ਲਓ ਨਹੀਂ ਤਾਂ...
NEXT STORY 
