ਹੈਲਥ ਡੈਸਕ : ਅੱਜ-ਕੱਲ੍ਹ ਦੀ ਭੱਜ-ਦੌੜ ਭਰੀ ਜ਼ਿੰਦਗੀ ਅਤੇ ਵਿਗੜ ਰਹੇ ਖਾਣ-ਪੀਣ ਕਾਰਨ ਦਿਲ ਦੇ ਰੋਗ ਤੇਜ਼ੀ ਨਾਲ ਵਧ ਰਹੇ ਹਨ। ਅਕਸਰ ਮੰਨਿਆ ਜਾਂਦਾ ਹੈ ਕਿ ਹਾਰਟ ਅਟੈਕ (ਦਿਲ ਦਾ ਦੌਰਾ) ਸਿਰਫ਼ ਛਾਤੀ ਵਿੱਚ ਦਰਦ ਹੋਣ 'ਤੇ ਹੀ ਆਉਂਦਾ ਹੈ, ਪਰ ਸਿਹਤ ਮਾਹਿਰਾਂ ਅਨੁਸਾਰ ਇਹ ਧਾਰਨਾ ਪੂਰੀ ਤਰ੍ਹਾਂ ਸਹੀ ਨਹੀਂ ਹੈ। ਕਈ ਵਾਰ ਦਿਲ ਦਾ ਦੌਰਾ ਪੈਣ ਤੋਂ ਕਈ ਦਿਨ ਪਹਿਲਾਂ ਹੀ ਸਰੀਰ ਕੁਝ ਅਜਿਹੇ ਸੰਕੇਤ ਦਿੰਦਾ ਹੈ, ਜਿਨ੍ਹਾਂ ਨੂੰ ਪਛਾਣ ਕੇ ਜਾਨ ਬਚਾਈ ਜਾ ਸਕਦੀ ਹੈ।
ਛਾਤੀ ਤੋਂ ਇਲਾਵਾ ਇਨ੍ਹਾਂ ਹਿੱਸਿਆਂ 'ਚ ਦਰਦ
ਹਾਰਟ ਅਟੈਕ ਦਾ ਸਭ ਤੋਂ ਆਮ ਲੱਛਣ ਛਾਤੀ ਵਿੱਚ ਤੇਜ਼ ਦਰਦ ਜਾਂ ਦਬਾਅ ਮਹਿਸੂਸ ਹੋਣਾ ਹੈ, ਜੋ ਅਕਸਰ ਖੱਬੇ ਹੱਥ, ਮੋਢੇ ਜਾਂ ਗਰਦਨ ਤੱਕ ਫੈਲ ਜਾਂਦਾ ਹੈ। ਪਰ ਧਿਆਨ ਦੇਣ ਯੋਗ ਗੱਲ ਇਹ ਹੈ ਕਿ ਦਿਲ ਦੇ ਨੇੜੇ ਮੌਜੂਦ ਨਾੜੀਆਂ ਕਾਰਨ ਇਹ ਦਰਦ ਪਿੱਠ, ਜਬਾੜੇ ਜਾਂ ਪੇਟ ਵਿੱਚ ਵੀ ਮਹਿਸੂਸ ਹੋ ਸਕਦਾ ਹੈ। ਕਈ ਲੋਕਾਂ ਵਿੱਚ ਛਾਤੀ ਦਾ ਦਰਦ ਬਿਲਕੁਲ ਨਹੀਂ ਹੁੰਦਾ, ਫਿਰ ਵੀ ਉਨ੍ਹਾਂ ਨੂੰ ਦੌਰਾ ਪੈ ਸਕਦਾ ਹੈ।
ਸਾਹ ਲੈਣ ਵਿੱਚ ਤਕਲੀਫ਼ ਅਤੇ ਭਾਰੀਪਨ
ਜਦੋਂ ਦਿਲ ਦੀਆਂ ਮਾਸਪੇਸ਼ੀਆਂ ਤੱਕ ਖੂਨ ਅਤੇ ਆਕਸੀਜਨ ਸਹੀ ਮਾਤਰਾ ਵਿੱਚ ਨਹੀਂ ਪਹੁੰਚਦੀ, ਤਾਂ ਵਿਅਕਤੀ ਨੂੰ ਸਾਹ ਲੈਣ ਵਿੱਚ ਔਖ ਮਹਿਸੂਸ ਹੁੰਦੀ ਹੈ। ਜੇਕਰ ਤੁਹਾਨੂੰ ਅਚਾਨਕ ਸਾਹ ਫੁੱਲਣਾ, ਸਰੀਰ ਵਿੱਚ ਭਾਰੀਪਨ ਜਾਂ ਬਹੁਤ ਜ਼ਿਆਦਾ ਥਕਾਵਟ ਮਹਿਸੂਸ ਹੋਵੇ, ਤਾਂ ਇਸ ਨੂੰ ਹਲਕੇ ਵਿੱਚ ਨਾ ਲਓ।
ਔਰਤਾਂ ਵਿੱਚ ਵੱਖਰੇ ਲੱਛਣ
ਹਾਰਟ ਅਟੈਕ ਦੌਰਾਨ ਸਰੀਰ ਵਿੱਚ ਸਟ੍ਰੈੱਸ ਹਾਰਮੋਨ ਵਧਣ ਕਾਰਨ ਬਹੁਤ ਜ਼ਿਆਦਾ ਪਸੀਨਾ ਆ ਸਕਦਾ ਹੈ। ਇਸ ਤੋਂ ਇਲਾਵਾ ਜੀਅ ਕੱਚਾ ਹੋਣਾ (ਮਤਲੀ), ਉਲਟੀ ਆਉਣਾ ਜਾਂ ਚੱਕਰ ਆਉਣਾ ਵਰਗੇ ਲੱਛਣ ਖ਼ਾਸ ਤੌਰ 'ਤੇ ਔਰਤਾਂ ਵਿੱਚ ਜ਼ਿਆਦਾ ਦੇਖੇ ਜਾਂਦੇ ਹਨ। ਜੇਕਰ ਬਿਨਾਂ ਕਿਸੇ ਕਾਰਨ ਸਰੀਰ ਵਿੱਚ ਊਰਜਾ ਦੀ ਕਮੀ ਜਾਂ ਚੱਲਣ-ਫਿਰਨ ਵਿੱਚ ਦਿੱਕਤ ਆਵੇ, ਤਾਂ ਇਹ ਖ਼ਤਰੇ ਦੀ ਘੰਟੀ ਹੋ ਸਕਦੀ ਹੈ।
ਕਿਉਂ ਵਧ ਰਿਹਾ ਹੈ ਖ਼ਤਰਾ?
ਸਰੋਤਾਂ ਅਨੁਸਾਰ ਖ਼ਰਾਬ ਜੀਵਨ ਸ਼ੈਲੀ, ਬਾਹਰ ਦਾ ਜ਼ਿਆਦਾ ਤਲਿਆ-ਫਲਿਆ ਖਾਣਾ, ਹਾਈ ਕੋਲੇਸਟ੍ਰੋਲ, ਮੋਟਾਪਾ ਅਤੇ ਬਲੱਡ ਪ੍ਰੈਸ਼ਰ ਇਸ ਦੇ ਮੁੱਖ ਕਾਰਨ ਹਨ। ਪਰਿਵਾਰਕ ਇਤਿਹਾਸ ਅਤੇ ਸਰੀਰਕ ਗਤੀਵਿਧੀਆਂ ਦੀ ਕਮੀ ਵੀ ਇਸ ਖ਼ਤਰੇ ਨੂੰ ਵਧਾ ਦਿੰਦੀ ਹੈ।
ਬਚਾਅ ਦੇ ਉਪਾਅ:
• ਰੋਜ਼ਾਨਾ ਸੈਰ, ਯੋਗਾ ਅਤੇ ਕਸਰਤ ਕਰੋ।
• ਸਿਗਰਟਨੋਸ਼ੀ ਅਤੇ ਤੰਬਾਕੂ ਤੋਂ ਪੂਰੀ ਤਰ੍ਹਾਂ ਦੂਰੀ ਬਣਾਓ।
• ਖੁਰਾਕ ਵਿੱਚ ਫਲ, ਸਬਜ਼ੀਆਂ, ਘੱਟ ਚਰਬੀ ਵਾਲੇ ਡੇਅਰੀ ਉਤਪਾਦ ਅਤੇ ਸਾਬਤ ਅਨਾਜ ਸ਼ਾਮਲ ਕਰੋ।
• ਲੂਣ (ਸੋਡੀਅਮ) ਅਤੇ ਚੀਨੀ ਦੀ ਮਾਤਰਾ ਘੱਟ ਰੱਖੋ।
ਬੀਅਰ ਜਾਂ ਸ਼ਰਾਬ ਤੋਂ ਬਾਅਦ ਦੁੱਧ ਪੀਣਾ ਕਿੰਨਾ ਕੁ ਖਤਰਨਾਕ? ਮਾਹਰਾਂ ਨੇ ਦੱਸੇ ਹੈਰਾਨ ਕਰਨ ਵਾਲੇ ਤੱਥ
NEXT STORY 
