ਇੰਟਰਨੈਸ਼ਨਲ ਡੈਸਕ- ਮੱਧ ਪੂਰਬ ਵਿੱਚ ਜਾਰੀ ਜੰਗ ਦੇ ਵਿਚਕਾਰ ਇੱਕ ਨਵਾਂ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਈਰਾਨ ਦੇ ਇਸਫਹਾਨ ਇਲਾਕੇ ਵਿੱਚ ਅਮਰੀਕੀ ਫੌਜੀ ਮਿਸ਼ਨ ਦੌਰਾਨ ਇੱਕ C-130 ਹਰਕੁਲਿਸ ਟ੍ਰਾਂਸਪੋਰਟ ਜਹਾਜ਼ ਅਤੇ ਦੋ ਬਲੈਕ ਹਾਕ ਹੈਲੀਕਾਪਟਰਾਂ ਦੇ ਤਬਾਹ ਹੋਣ ਦੀ ਖ਼ਬਰ ਹੈ। ਇਸ ਘਟਨਾ ਨੂੰ ਲੈ ਕੇ ਈਰਾਨ ਅਤੇ ਅਮਰੀਕਾ ਵੱਲੋਂ ਕੀਤੇ ਜਾ ਰਹੇ ਵੱਖ-ਵੱਖ ਦਾਵਿਆਂ ਨੇ ਪੂਰੇ ਮਾਮਲੇ ਨੂੰ ਇੱਕ ਰਹੱਸ ਬਣਾ ਦਿੱਤਾ ਹੈ।
ਈਰਾਨ ਦਾ ਦਾਅਵਾ: ਅਸੀਂ ਡੇਗੇ ਅਮਰੀਕੀ ਜਹਾਜ਼
ਈਰਾਨ ਦੀ ਸੈਨਾ ਅਤੇ ਇਸਲਾਮਿਕ ਰਿਵੋਲਿਊਸ਼ਨਰੀ ਗਾਰਡ ਕਾਰਪਸ (IRGC) ਨੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਨੇ ਅਮਰੀਕੀ ਰੇਸਕਿਊ ਆਪ੍ਰੇਸ਼ਨ ਦੌਰਾਨ ਦੁਸ਼ਮਣ ਦੇ ਇਹਨਾਂ ਜਹਾਜ਼ਾਂ ਨੂੰ ਨਿਸ਼ਾਨਾ ਬਣਾਇਆ ਹੈ। ਈਰਾਨੀ ਮੀਡੀਆ ਨੇ ਇਸ ਘਟਨਾ ਦੀਆਂ ਕੁਝ ਵੀਡੀਓਜ਼ ਅਤੇ ਤਸਵੀਰਾਂ ਵੀ ਜਾਰੀ ਕੀਤੀਆਂ ਹਨ, ਜਿਨ੍ਹਾਂ ਵਿੱਚ ਰੇਗਿਸਤਾਨ ਵਿੱਚ ਜਹਾਜ਼ਾਂ ਦਾ ਸੜਿਆ ਹੋਇਆ ਮਲਬਾ ਅਤੇ ਧੂਆਂ ਉੱਠਦਾ ਦਿਖਾਈ ਦੇ ਰਿਹਾ ਹੈ। ਈਰਾਨ ਦੇ ਪਾਰਲੀਮੈਂਟ ਸਪੀਕਰ ਮੁਹੰਮਦ ਬਾਘੇਰ ਗਾਲਿਬਫ ਨੇ ਵੀ ਸੋਸ਼ਲ ਮੀਡੀਆ 'ਤੇ ਮਲਬੇ ਦੀ ਤਸਵੀਰ ਸਾਂਝੀ ਕੀਤੀ ਹੈ।
ਅਮਰੀਕਾ ਦਾ ਪੱਖ: ਰਣਨੀਤਕ ਕਦਮ ਤਹਿਤ ਖੁਦ ਕੀਤੇ ਨਸ਼ਟ
ਦੂਜੇ ਪਾਸੇ, ਅਮਰੀਕੀ ਮੀਡੀਆ ਦੀਆਂ ਰਿਪੋਰਟਾਂ ਇਸ ਕਹਾਣੀ ਨੂੰ ਬਿਲਕੁਲ ਉਲਟ ਦੱਸ ਰਹੀਆਂ ਹਨ। ਰਿਪੋਰਟਾਂ ਅਨੁਸਾਰ, ਇਹ ਜਹਾਜ਼ ਈਰਾਨੀ ਗੋਲੀਬਾਰੀ ਨਾਲ ਨਹੀਂ ਡਿੱਗੇ, ਸਗੋਂ ਅਮਰੀਕੀ ਕਮਾਂਡਰਾਂ ਨੇ ਖੁਦ ਇਹਨਾਂ ਨੂੰ ਉਡਾ ਦਿੱਤਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਜਦੋਂ ਕਮਾਂਡੋ ਟੀਮ ਆਪਣੇ ਲਾਪਤਾ ਪਾਇਲਟ ਨੂੰ ਬਚਾਉਣ ਲਈ ਆਪ੍ਰੇਸ਼ਨ ਚਲਾ ਰਹੀ ਸੀ, ਉਦੋਂ ਦੋ ਜਹਾਜ਼ ਇੱਕ ਦੂਰ-ਦੁਰਾਡੇ ਬੇਸ 'ਤੇ ਫਸ ਗਏ ਸਨ। ਦੁਸ਼ਮਣ ਦੇ ਹੱਥ ਸੰਵੇਦਨਸ਼ੀਲ ਫੌਜੀ ਤਕਨੀਕ ਲੱਗਣ ਦੇ ਡਰੋਂ ਅਮਰੀਕਾ ਨੇ ਇਹਨਾਂ ਨੂੰ ਖੁਦ ਹੀ ਨਸ਼ਟ ਕਰਨ ਦਾ ਫੈਸਲਾ ਲਿਆ।
ਪਾਇਲਟ ਦਾ ਸੁਰੱਖਿਅਤ ਰੇਸਕਿਊ
ਇਹ ਹਾਈ-ਰਿਸਕ ਆਪ੍ਰੇਸ਼ਨ ਇੱਕ F-15E ਸਟ੍ਰਾਈਕ ਈਗਲ ਦੇ ਕਰੂ ਮੈਂਬਰ ਨੂੰ ਬਚਾਉਣ ਲਈ ਚਲਾਇਆ ਗਿਆ ਸੀ, ਜਿਸ ਨੂੰ ਈਰਾਨ ਨੇ ਪਹਿਲਾਂ ਮਾਰ ਗਿਰਾਇਆ ਸੀ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਸ ਮਿਸ਼ਨ ਦੀ ਸਫ਼ਲਤਾ ਦੀ ਪੁਸ਼ਟੀ ਕਰਦਿਆਂ ਲਿਖਿਆ ਕਿ ਅਮਰੀਕੀ ਸੈਨਾ ਨੇ ਇਤਿਹਾਸ ਦੇ ਸਭ ਤੋਂ ਦਲੇਰਾਨਾ ਆਪ੍ਰੇਸ਼ਨਾਂ ਵਿੱਚੋਂ ਇੱਕ ਨੂੰ ਅੰਜਾਮ ਦਿੱਤਾ ਹੈ ਅਤੇ ਪਾਇਲਟ ਹੁਣ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ।
ਹਾਲਾਂਕਿ ਪਾਇਲਟ ਬਚਾ ਲਿਆ ਗਿਆ ਹੈ, ਪਰ ਅਮਰੀਕਾ ਦੇ ਸੈਂਟਰਲ ਕਮਾਂਡ ਨੇ ਅਜੇ ਤੱਕ ਇਸ ਗੱਲ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਕਿ ਜਹਾਜ਼ ਅਸਲ ਵਿੱਚ ਕਿਵੇਂ ਤਬਾਹ ਹੋਏ। ਜਿੱਥੇ ਈਰਾਨ ਇਸ ਨੂੰ ਆਪਣੀ ਵੱਡੀ ਫੌਜੀ ਜਿੱਤ ਦੱਸ ਰਿਹਾ ਹੈ, ਉੱਥੇ ਹੀ ਅਮਰੀਕਾ ਇਸ ਨੂੰ ਇੱਕ ਸੋਚਿਆ-ਸਮਝਿਆ ਰਣਨੀਤਕ ਫੈਸਲਾ ਕਰਾਰ ਦੇ ਰਿਹਾ ਹੈ।
ਈਰਾਨ ਜੰਗ 'ਤੇ ਚੀਨ ਦੀ ਤਿੱਖੀ ਨਜ਼ਰ! AI ਰਾਹੀਂ ਅਮਰੀਕੀ ਫੌਜ ਦੀਆਂ ਹਰਕਤਾਂ ਨੂੰ ਕਰ ਰਿਹਾ ਟ੍ਰੈਕ
NEXT STORY 
